Yohana 1
1
Mpola aleanojekha muntu
1Pa mwandyo panaa liwelelo alelekhale khowombwaa, Mpola aleapwale. Mpola oyoo angile alepalomwi no Matuunda, no Mpola oyoo angile Matuunda. 2Khopuma mwandyo Mpola angile alepalomwi no Matuunda. 3Matuunda aleawombaa vento vyensi khokelela Mpola, khotopo ninga kento kemwii kenaa alechawombwaa patopo khokelela omwene. 4Mokhate mwakwe angile khole opanga, no opanga owoo awenee angile welo wa vantu. 5Welo ogoo gokhomolekha kho kiiti, ne kiiti alelekhakhowola khowokhonya welo.
6Aleapwale muntu yomwi yunaa aleatomwa khopuma khwa Matuunda yunaa alekhwetwaa Yohana. 7Omwene aliija khovaweela vantu kenaa aleawonaa khougela welo oyoo, ili vantu vensi vakhowole khomogoomba khokelela omwene. 8Yohana angile akha welo oyoo, ila aleiija khovaweela vantu ganaa aleagamanyile khougela oyoo welo. 9Oyoo amwenee welo wa khapanga, yunaa aleiija paliwelelo, khomomolekela kela muntu.
10Mpola oyoo aleapwale kho liwelelo, khokelela omwene Matuunda aleawombaa liwelelo, ila vantu va paliwelelo alevakhakhowola khomotembola. 11Aleiija kho nse yakwe mwenee, ila vantu vakwe mwenee alevakhamowawola. 12Ila vantu vensi vanaa alevamowawola no khomogoomba, aleavapelaa olaala ili vawee vana va Matuunda. 13Ewa nkha vana vanaa alevalelwa kho olaala wa vantu, ninga kho otogwi wa muntu, khwa khotogwa khwa muntu, ila khwa khotogwa khwa Matuunda mwenee.
14Nanoyo Mpola alealelwaa kete muntu, ikhalaa palomwi nasu. Nasu khwawowine olaala wakwe, olaala kete Mwana aleemwi yunaa apumagaa khwa Daada, ijolagaa loojo ja Matuunda ne khapanga.
15Yohana aleavawela vantu egoo ganaa aleagamanyile khougela Mpola oyoo, ajomaa kho lolii, apalaa, “Oyo amwene yunaa alenkhovaweela kho ituungo eloo, ‘Yunaa ijilee panaa onene amba nakelaga, amolaala khokela onene, kho nguno aleapwale panaa onene alenkhale kholelwa.’ ”
16Matuunda ijolagaa loojo kho nguno manoji gakwe a masoga. Osweswe vensi khwapokelaga loojo ja Matuunda khanke ne khanke. 17Matuunda aleapumya njaanga khokelela Musa, ila loojo ja Matuunda ne khapanga alejiija khokelela Yesu Kilisto. 18Khotopo muntu yeyensi yunaa aleamowonaa Matuunda, Ila topo Mwana aleemwi, yunaa ninga nanoyo a Matuunda. Oyoo angile alepepi no Daada, nanoyo amwene atonogajaa khomomanye Daada.
Okhombe wa Yohana Mobatiji
Mateo 3:1-12; Maluko 1:1-8; Luka 3:1-18
19Nsiko yemwi valaala va Vayahudi vanaa angile vapwale Yelusalemu, alevawatoma vamoonga va vapumya matambekho valaala va Matuunda ne Valawi vamowolye Yohana, “Mbi, ogwegwe a nanuu?” 20Yohana aleakhasita khovaweela, ila aleavawelaa patopo khovasweekha, “Onene nkha Kilisto yunaa aleasagolwaa no Matuunda.”
21Nanevo alevamowolya, “Gechoo ogwegwe a nanuu? Mbi, ogwegwe a Eliya?”
Yohana avawelaa, “Nkha gechoo, onene nkha Eliya.”
Vamowolya khanke, “Mbi, ogwegwe ole mokuuni wa Matuunda?”
Yohana avawelaa, “Nkha onene.”
22Apenee vamowolya, “Gechoo ogwegwe a nanuu? Khowelee mpola ya khapanga yenaa akhopeta khovaweela evoo vanaa vakhotomaga. Gechoo ogwegwe kwipalela mbi?”
23Yohana aleavawelaa khwa khotomela mpola ja mokuuni Isaya wa Matuunda, apalaa,
“Onene amwene lolii lwa muntu yunaa khojomaa pitenengwa,
Golooli njela ya Mwene.”
24Vantu vanaa angile vatomagwa ne Mafalisayo, 25nanevo vamowolya Yohana, “Mbe ogwegwee nkha Kilisto yunaa aleasagolwaa no Matuunda ao Eliya, ninga nkha mokuuni wa Matuunda, kho kee khobatijaa?”
26Yohana avawelaa, “Onene nkhobatijaa kho meje, ila apwale muntu yomwi pakhate yenyu yunaa onywenywe mokhamomanya. 27Omwenee aliija ituungo nkha itale, yunaa ninga onenee nkhafwaya khotungola ninga ngosa ja ntanjee jakwe.”
28Ega gensi aleganojekha ihala la Betania, nkelo ya lweje ya Yolodani khonaa Yohana alekhobatijaa.
Yesu amwene Mwanankholo wa Matuunda
29Igolo lakwe, Yohana aleamowona Yesu khomwijelaa, apalaa, “Kunaa, Mwanankholo wa Matuunda yunaa khosolaa mabe ga liwelelo! 30Oyo amwenee yunaa alenapalela mpola jakwe panaa alenavaweela, ‘Yunaa ijile panaa onene amba nakela amolaala khokela onene, kho nguno aleapwale panaa onene alenkhale.’ 31Ninga onene alenkhamomanya kete omwenee ananuu, ila nijaga khobatija kho meje ili vantu va pa Izilaeli vamowone.”
32Yohana aleapalaa kenaa aleawonaa, “Alenamowona Moye wa Matuunda khotelemokhaa kete njewa khopuma khochanya pa Matuunda no khosiiga palomwi nanoyo. 33Onene alenkhamomanya, ila yunaa aleantoma khobatija vantu kho meje aleambwelaga, ‘Muntu yunaa olamowona khotelemokelwa no Moye waane khopuma khochanya no khosiiga palomwi nanoyo, oyoo amwenee yunaa khobatijaa kho Moye waane.’ ” 34Apenee Yohana apalaa, “Onene niwonelaga ega gensi, kho khapanga nkhovaweela kete oyo amwenee Mwana wa Matuunda.”
Vahemba va mwandyo va Yesu
35Igolo lakwe, Yohana aleimelela epoo khanke palomwi ne vahemba vakwe vawele. 36Yohana panaa aleamowona Yesu khokelaa pepi nanevo, apalaa, “Kunagi! Oyoo amwenee Mwanankholo wa Matuunda.”
37Vahemba evoo vawele panaa alevategeela Yohana khopalaa egoo, alevamoloonda Yesu. 38Apenee Yesu aleaghalokha, avawona vantu vawele vamolondile. Avawolya, “Mokhopooga kee?” Nanevo vamowolya, “Labi, emaana yakwe Molaangi khwikhala kwenii?”
39Yesu avawelaa, “Mwiije mopawone panaa nkhwikhala.” Gechoo alevapeta no khopawona panaa alekhwikhala, alevadiila nanoyo nsiko eyoo, kho nguno angile ituungo la saa ikomi ya mesee.
40Mohemba yomwii kho evoo vawele vanaa alevamotegeela Yohana no khomoloonda Yesu, angile Andelea molunaakwe Simoni Petelo. 41Apaponye Andelea panaa aleamowonaa Simoni Petelo molunaakwe, amowelaa, “Khwamopikhaga Masiha, yunaa aleasagolwaa no Matuunda yunaa khwetwaa Kilisto.” 42Apene Andelea aleamokenkha Simon khwa Yesu.
Yesu aleamokunaa Simoni no khomoweela, “Ogwegwe a Simoni, mwana wa Yohana, ila khwandelya seji khweetwa Kefa. Kefa kho Kegiliki Petelo, no Petelo emaana yakwe a mogamba.”
Yesu khovasogolaa Filipo no Natanaeli
43Igolo lakwe Yesu alealomaa khopeta ihala la Galilaya, amowela Filipo, “Ndonde.” 44Nanoyo Filipo alekhopumela Betisaida ihala lenaa Andelea no Petelo vakhwikhala. 45Filipo aleamopikha Natanaeli no khomoweela, “Khwamopikhaga muntu yunaa mpola jakwe alejandekhwa no Musa kho ketabu cha njaanga, ne vakuuni vinki va Matuunda alevandekha mpola jakwe. Oyo amwene Yesu, mwana wa Yusufu, nanoyo mwikhali wa ihala la Nazaleti.”
46Natanaeli aleamowolya Filipo, “Mbi, kento chechensi kesoga nakekhowola khopuma Nazaleti?” Filipo amowela, “Ijoo owone.”
47Yesu panaa aleamowona Natanaeli khomwijela, apalaa, “Kunagi! Oyo amwenee Mwizilaeli khapanga, atokhola opepi mokhate mwakwe.” 48Natanaeli amowolya, “Wammanya mbi?” Yesu amowela, “Panaa Filipo aleakhale akhwete panaa alewikile panse ya ipeke la motini onene alenakhowonaga.”
49Apenee, Natanaeli aleamowela, “Molaangi, ogwegwee ole Mwana wa Matuunda! Ogwegwee ole Mwami wa Izilaeli!”
50Yesu amowela, “Mbi, wagombaga kho nguno nakhowelaga kete alenakhowona panse yi peke la motini? Olagawona minki khokela ega!” 51Apenee endelelaa khovaweela, “Nkhovaweela khwa khapanga, molawona khochanya khwa Matuunda khokhodigokha ne vatomami va pachanya pa Matuunda vakhotanta no khotelemokha khopuma khwa Mwana wa Muntu.”
Právě zvoleno:
Yohana 1: NTKIBL2025
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Kimbu @The Word for The World International and Kimbu Language translation, 2025. All rights reserved.
