मरकुस 8

यीसु च्यार हजार मिनखौ नै जिमाया

(मती 15:32–39)

1उण दिनां में एक दिन दूजी मोटी भीड़ भेळी होई। उणौरै खनै खावण वास्तै कीं कोनीं हो, तो यीसु आपरा चेला नै नैड़ा बुलानै उणौनै कयौ, 2“म्हनै इण भीड़ माथै तरस आवै, क्यूंकै ऐ लारला तीन दिनां ऊं म्हारै साथै है, अर उणौरै खनै कीं भी खावण नै कोनीं है। 3जे म्हैं उणौ नै भूखो घर भेजूं, तो रासते माई थाक नै बेहोस हो जावैला, क्यूंकै इण मे ऊं कोईक तो आगा ऊं आया है।”

4चेलौ उणनै जबाब दियौ, “अठै सुनी जगा मे इती रोटियां कोई कठै ऊं लावै की ऐ सगळा धाप जावै?”

5यीसु उण ऊं पूछयौ, “थौरे खनै किती रोटियां है?”

वो कयौ, “सात।”

6तद यीसु मिनखां नै जमीं माथै बैठनै रौ हुकम दियौ, अर वो वे सात रोटियां ली अर परमेसर रौ धन्यवाद करनै तोड़ी, अर आपरा चेलौ नै देतो गियौ की मिनखां रै आगै राखै, अर चेलौ मिनखां रै आगै परोस दी। 7उणौरै खनै थोड़ीक नेनी मछलिया भी ही, यीसु परमेसर रौ धन्यवाद देन उणौ नै भी चेलौ नै देन मिनखां नै परोस नै रौ हुकम दियौ। 8मिनख खाने धाप गा अर चेलौ बाकी बचयोड़ी रोटियां री सात छाबड़िया भरी। 9जिमणा रै पछै यीसु उणौ नै विदा करिया। ऐ लोग च्यार हजार रै लगोलग हा। 10पछै वो आपरै चेलौ रै साथै नाव माथै चढ़नै दलमनूता देस मे गिया परा।

फरीसी यीसु ऊं सरग री निसाणी मांगी

(मती 16:1–4)

11 # मत 12:38; लूक 11:16 पछै फरीसी उणरै खनै आयनै उण ऊं वाद-विवाद करण लागा, अर उणनै फसावण वास्तै उण ऊं की सरग री निसाणी मांगी जिणसूं ओ ठाह पड़ै के वो परमेसर री ओर ऊं आयौ है। 12#मत 12:39; लूक 11:29वो आपरै मन मे गेरी आह भरने कयौ, “इण जुग रा लोग निसाणी क्यूं मांगे है? म्हैं थौरे ऊं हाची हाची कैवूं की इण जुग रा लोगां नै कीं भी निसाणी नीं दी जावैला।” 13पछै वे भीड़ नै छोड़नै चेलौ साथै पाछौ नाव माथै चढ़ गिया अर झील रै पार रवाना हो गिया।

सास्तरी सीख ऊं सावचेत रैवौ

(मती 16:5–12)

14यीसु रा चेला रोटी साथै लेवणा भुलगा हा अर नाव में उणौ खनै एक रोटी नै छोड़नै खावण नै कीं कोनीं हो। 15#लूक 12:1यीसु गळत सीख ऊं लोगां नै बचावण वास्तै, उणौनै सावचेत करिया के, “देखौ, फरीसी अर हेरोदेस रै खमीर#8:15 आटे नै फुलिजणा रै वास्तै चीज जिकौ आटे नै गुदते वगत घाले तो आटो फुल जावै। ऊं सावचेत रहीजौ।”

16वे एक दूजा ऊं विचार करनै कैवण लागा, “म्हौरै खनै रोटी कोनीं है, इण वास्तै वो यूं कैवै है।”

17उणौरा विचार जांणनै यीसु कयौ, “थै क्यूं एक दूजा ऊं ओ विचार कर रिया हो की म्हौरै खनै रोटी कोनीं? कांई अबार तांई नीं देखियौ या नीं समझया? कांई थौरो हिरदा कैड़ा हो गिया है? 18#मरकु 4:12थारै खनै आंख्यां है तो भी दिखे कोनीं, अर कांन है तो भी सुणौ कोनीं? कांई वे बातां याद कोनीं? 19जद म्हैं पांच हजार वास्तै पांच रोटिया तोड़ी ही तो, किती छाबड़ी खाणौ बचयो हो?”

वे यीसु ऊं कयौ, “बारैह छाबड़िया।”

20“अर जद च्यार हजार मिनखां नै सात रोटिया ऊं जिमाया हा तो किती छाबड़िया खाणौ बचग्यौ हो?”

वे यीसु कयौ, “सात छाबड़िया।”

21वो उणौनै कयौ, “कांई थै हाल तांई कोनीं समझया?”

यीसु बैतसैदा मे आंधा नै आंख्यां दी

22वे बैतसैदा मांय आया, अर लोग एक आंधा नै उणरै खनै लेन आया अर उण ऊं विणती करी की उण माथै हाथ राखै। 23वो उण आंधा रौ हाथ पकड़नै उणनै गांव ऊं बारै लेन गियौ, अर उणरी आंख्यां मांय थूक नै उण माथै हाथ राखियौ, अर उण ऊं पूछयौ, “थनै कीं दिखे है?”

24वो आंख्यां उठायनै कयौ, “म्हैं मिनखौ नै देखूं हूं, वे म्हनै हालतोड़ा रुंखड़ा जैड़ा दिखे है।”

25तद यीसु पाछौ उणरी आंख्यां माथै हाथ राखियौ अर आंधे सावळ ऊं देखियौ। अर हैंग साफ साफ देखन लागौ वो सावळ होई गियौ। 26यीसु ओ कैहन उणनै घर भेज्यौ, “बैतसैदा मत जाइजै, सीधो थारै घर जाइजै।”

पतरस री घोसणा यीसु ही मसीह है

(मती 16:13–20; लूका 9:18–21)

27यीसु अर उणरा चेला केसरिया फिलिप्पी रै गांव मांय गिया। मारग मे वो आपरै चेलौ ऊं पूछयौ, “लोग म्हनै कांई कैवै की म्हैं कुण हूं?”

28 # मरकु 6:14,15; लूक 9:7,8 वे जबाब दियौ, “कीं लोग थनै यूहन्‍ना बतिस्मो देवणवाळौ, कीं एलियाह अर कीं भविसयदाता मे ऊं थूं एक है कैवै।”

29 # यूह 6:68,69 यीसु उणौ नै पूछयौ, “पण थै म्हनै कांई समझौ?”

पतरस जबाब दियौ, “थूं मसीह है।”

30तो वो उणौ नै चितायनै कयौ, “म्हारै बारै में कीण ऊं मती कहीजौ।”

यीसु आपरा दु:ख अर मौत रै बारै में बतायो

(मती 16:21–28; लूका 9:22–27)

31उण वगत ऊं यीसु चेलौ नै समझाण लाग्या, “म्हैं, मिनख रौ बेटौ घणौ दु:ख उठाऊंला अर बुढ़िया, परधान याजक अर सास्तरी म्हनै कीं नीं गिणेला। वे म्हनै मार दैला अर म्हैं तीजै दिन पाछौ जी उठूंला।” 32यीसु आ बात उणौ ऊं साफ साफ कैह दी। इण माथै पतरस उणनै अलग ले जायनै हाका करनै लागौ। 33पण वे मुड़नै आपरै चेलौ री तरफ देखनै पतरस नै हाका करनै कयौ, “हे सैतान, म्हारै खनै ऊं आगौ हो जा। क्यूंकै थूं परमेसर री बातां माथै कोनीं पण मिनख री बातां माथै मन लगावै है।”

34 # मत 10:38; लूक 14:27 वे भीड़ अर आपरै चेलौ नै आपरै खनै बुलायनै कयौ, “जिकौ कोई म्हारै लारै आवणौ चावै, वो अपणै आप ऊं इन्कार करै अर आपरौ क्रूस उठायनै म्हारै लारै आवै। 35#मत 10:39; लूक 17:33; यूह 12:25क्यूंकै जिकौ कोई खुद रा प्रांण बचावणा चावैला वो मरेला। पण जिकौ कोई म्हारै अर सुभ संदेस वास्तै आपरा प्रांण दैला, वो उणनै बचावैला। 36जे मिनख सगळै जगत नै पा लेवे अर आपरा प्रांण नै खो दे, तो उणनै कांई फायदो होवैला? 37मिनख आपरा प्रांण नै पाछौ लेवण वास्तै बदळा में कांई दे सकै? 38जिकौ कोई इण व्यभिचारी अर पापी पीढ़ी रै बीच म्हारौ अर म्हारै वचनो ऊं सरमावैला, म्हैं, मिनख रौ बेटौ भी जद सरगदूतो रै साथै आपरी महिमा समेत आवैला, तद उण ऊं भी सरमावैला।”

Právě zvoleno:

मरकुस 8: RWR

Zvýraznění

Sdílet

Porovnat

Kopírovat