Matius 27
27
Sènꞌòy Yahudi umꞌéd Yèsus namtèrbuk ma menterik rayak nòm Roma
(Mrk 15:1; Luk 23:1-2; Yoh 18:28-32)
1Is jakal eh nak, bil yèhyah tik chup, kenèmbek ketuwe imam ròb tèꞌtak kaum Yahudi umbekumpol dak umꞌampèk gerèk lok mukèrbes ma Yèsus. 2Umnak umbeg ma Yèsus, dak umꞌéd Rik Nak untok muꞌog ma Pilatus, menterik rayak nòm kerajaꞌan Roma.
Yudas nakerèsbes rik ma rik eh
(Tèn 1:18-19)
3Bil nak Yudas, rik betulong ma mèsmus muròt ma Yèsus hatòp, nakeyòkh umnak hòj umꞌéd Yèsus ma menterik Roma untok mukèrbes Eh. Dak Yudas nasisal geb, dak nawèk natèrmak tigak puloh kupang duid pèrak rik mèn ketuwe imam ròb tèꞌtak hòj umꞌog hatòp. #Tèn 1:18,19. 4Yudas nachal, “Yék hòj ibedose. Yék itulong ma nyob nyomròt ma sènꞌòy rik tok besalah, dak akal umkèrbes Eh!”
Tapik umnak umsaꞌod, “Kandék tok kibegorgèr! Unak hal hãk!”
5Yudas nabes duid nak ma kelòj Dékh Tuhan dak naperak ma umnak. Nòm kerek nak rik nak nawèk nalengòg ma geloh rik eh sampéy nakebes.
6Mèn ketuwe imam umros duid pèrak nak dak umchal, “Doh duid rik èbayar hatòp untok èmkèrbes ma sènꞌòy. Èn hukom agama èk, tok boléh èmchor duid gerèk doh ma kelòj kotak nèrchor duid èn Dékh Tuhan.” 7Jadik umnak umsetujuk dak umgunak duid nak bok umbelik tèk rik umkòw “Tèk Tukang Pèryok.” Dak nòm kerek nak umteꞌèl tèk nak najadik tempad kubor untok sènꞌòy nòm jerok. 8Unak lah sebab eh sampéy puꞌdoh tèk nak umkòw “Tèk Lènlòt.”
9Gerèk nak lah nabelakuk Gah Allah rik nabi Yèremiah naramal manah tòp:
“Umnak umkod tigak puloh kupang duid pèrak.
Unak lah hèrgak rik sènꞌòy Israꞌèl umsetujuk mubayar untok Rik Nak.#Sak 11:12,13.
10Duid nak umgunak untok mubelik Tèk Tukang Pèryok.
Hal nak gerèk Tuhan hòj naꞌampèk bok naꞌoglèkh ma yék.”
Yèsus èn mad Pilatus, menterik rayak nòm Roma
(Mrk 15:2-5; Luk 23:3-5; Yoh 18:33-38)
11Dak bil nak Yèsus nated èn mad Menterik Rayak Pilatus, dak Pilatus natanyak ma Rik Nak, “Kemën ke Hãk doh Rajak sènꞌòy Yahudi?”
Yèsus nasaꞌod, “Hek, gerèk rik hachal nak lah.” 12Tapik bil mèn ketuwe imam ròb tèꞌtak sènꞌòy Yahudi umtanas ma Rik Nak, Yèsus tok nabesaꞌod néy nyag pon.
13Jadik, Pilatus natanyak ma Rik Nak, “Tok hakèngyòkh ke kenèmbek rik umtanas ma Hãk? Nahey tok habesaꞌod?”
14Tapik Yèsus tik tok nabesaꞌod ilok-ilok pon ma tenanas umnak naꞌtèk, sampéy menterik nak nabèlꞌih geb.
Umkèrlek henukom kènbes ma Yèsus
(Mrk 15:6-15; Luk 23:13-25; Yoh 18:39—19:16)
15Tiyab-tiyab tawon bil arik Paskah, menterik rayak Roma nak biyase eh natèrwòl néy sènꞌòy nòm kelòj jél bok natèrsèk, nahoh ma nènchèn sènꞌòy jajéh. 16Bil mase nak èn kelòj jél mok néy sènꞌòy rik bekenëh Barabas. Rik nak hòj terkenal sebab jènhad eh. 17-18Dak Pilatus nalèkh mèn pemimpin Yahudi nak had umꞌéd Yèsus ma rik nak sebab umnak umtehak ma Yèsus. Jadik, bil sènꞌòy jajéh hòj umbekumpol, Pilatus natanyak ma umnak, “Chok rik nyob chèn yék imtèrsèk untok nyob? Barabas, atòw Yèsus rik umkòw Kristus?”
19Bil nak, asoh Pilatus tik nagèl-gel èn kerusi henakim eh nak, léh eh natèrꞌèn sènꞌòy untok namchal ma Pilatus: “Layèg tèk yék mok itapòk nèꞌpòk laꞌes tentang sènꞌòy nak, bok isuwéh geb. Agok lah teꞌèl ilok-ilok pon ma sènꞌòy rik tok besalah nak!”
20Mèn ketuwe imam ròb tèꞌtak sènꞌòy Yahudi umchèrmun ma sènꞌòy jajéh supaye musemany Pilatus namtèrsèk Barabas bok namhukom ma Yèsus namkebes. 21Tapik Menterik Rayak Pilatus natanyak wèl, “Nòm wènar nak, chok rik nyob chèn yék imtèrsèk untok nyob?”
Dak umnak umsaꞌod, “Barabas!”
22Pilatus natanyak wèl, “Dak ilok yék haros imteꞌèl ma Yèsus, rik umkòw Kristus nak?”
Umnak kenèmbek umꞌèh-éh, “Kèrbes lah Rik Nak èn palok salib!”
23Tapik Pilatus natanyak wèl, “Nahey? Jènhad ilok rik Nanak hòj nateꞌèl?”
Tapik sènꞌòy jajéh nak had umꞌèh-éh lebéh kuwad wèl, “Kèrbes lah Rik Nak èn palok salib!”
24 #
Ter 21:6-9. Bil nak Pilatus nanéh tok boléh namteꞌèl ilok-ilok wèl, bok sènꞌòy jajéh nak hòj mòg belangnyõk. Jadik rik nak nakod òng dak nasuj tikh eh èn mad sènꞌòy jajéh nak, dak nachal, “Nak, néh lah: yék doh tok besalah untok kènbes sènꞌòy doh! Nyob lah irik besalah!”
25Kenèmbek sènꞌòy jajéh nak umsaꞌod, “Hek, perak lah Allah namꞌanggap ma kandék doh ròb waris kandék hòj besalah untok kènbes sènꞌòy doh, kalòw lah kandék kiteꞌèl salah!”
26Nòm kerek nak Pilatus natèrwòl Barabas bok natèrsèk ma umnak. Tapik nanak naꞌog Yèsus ma mèn askah eh, dak naꞌor muhemẽd ma Yèsus bok mukèrbes Eh èn palok salib.
Askah umgeleh ma Yèsus
(Mrk 15:16-20; Yoh 19:2-3)
27Nòm kerek nak mèn askah menterik rayak naꞌtèk umꞌéd Yèsus namòj ma istane menterik rayak, dak anak umkòw ma kenèmbek askah gèhnih untok mukumpol èn keliling Yèsus. 28-29Dak anak umnak umtekèd umgeleh ma Yèsus: umteg nèglòg Eh, dak umtèrlòg bajuk chènglekh gerèk nèglòg rajak. Umchèrwèl tèmpok nòm jalak, gerèk tèmpok rajak, dak umtèrpok èn kuy Eh, dak umdol ad nènchòt èn tikh tep Eh. Dak umnak umtud èn sòy Yèsus dak umgeleh ma Rik Nak, umchal, “Hormad lah ma Rajak sènꞌòy Yahudi!” 30Umnak umgetòh ma Rik Nak, dak umkod ad naꞌtèk bok umseped ma kuy Eh. 31Hòj sëy umnak umchetẽk ma Yèsus, umnak umteg bajuk chènglekh nak dak umtèrlòg wèl bajuk rik Eh. Nòm kerek nak, umnak umꞌéd Yèsus untok mukèrbes Eh èn palok salib.
Umkèrbes Yèsus èn palok salib
(Mrk 15:21-32; Luk 23:26-43; Yoh 19:17-27)
32Bil umchèb-chib ma béng kote, mèn askah umtèrbuk ma néy sènꞌòy babeh nòm kote Kirèné rik bekenëh Simon. Dak askah umpakse ma rik nak namgulap palok salib Yèsus. 33Dak umnak umwèk ma tempad rik umkòw “Golgòta,” rik bemaksod “Tempad Chawòng.”#27:33 Chawòng nak maksod eh “tengkorak.” 34Èn anak umnak umꞌog òng anggor rik umchèhruh bahan kègdég ma Yèsus. Tapik pas Yèsus hòj natalok òng nak, najèk tok naꞌèng-òng wèl. #En 69:22.
35Bil hòj sòj umpehad ma Yèsus èn palok salib, mèn askah nak umbeba-bes undi untok muꞌa-og nèglòg Eh. #En 22:19. 36Dak umnak umgel èn anak untok mujagak Eh.
37Èn palok salib nak, èn balikh kuy Yèsus, mok papan rik hòj betenulis sebab ilok rik umtanas ma Yèsus nak: “Doh lah Yèsus, Rajak Sènꞌòy Yahudi.” 38Dak mèn askah umpehad pakuk keꞌjèk ma nar sènꞌòy sèjyèj èn palok salib rik wèh samak Yèsus, néy sènꞌòy ènlẽng tep dak néy sènꞌòy wèl ènlẽng yèl Eh.
39Sènꞌòy rik umbehawul èn anak umngẽl-ngẽl kuy dak umpègyog ma Yèsus. #En 22:8; 109:25. 40Umnak umchal, “Hãk hachal hamtuy Dékh Tuhan, bok èn mase tigak arik halos hamteꞌèl wèl! Kalòw Hãk kemën-kemën Kuwòt Allah, tèrgos lah rik ma rik Hãh bok taw nòm palok salib nak!” #Mat 26:61; Yoh 2:19.
41Mèn ketuwe imam, guruk agama, ròb tèꞌtak masarakat Yahudi keꞌjèk umgeleh ma Yèsus dak umchal, 42“Nanak natèrgos ma sènꞌòy mòy, tapik rik ma rik Eh tok dapad namtèrgos! Kalòw Rik Nak kemën-kemën Rajak kaum Israꞌèl, perak lah rik Eh namtaw nòm palok salib nak puꞌdoh, bok kandék kipechaye ma Rik Nak! 43Rik Nak napechaye ma Allah. Dak nachal Rik Nak Kuwòt Allah. Jok èk ènéh, mok ke Allah nachèn namtèrgos ma Rik Nak puꞌdoh?” #En 22:9.
44Dak wènar sènꞌòy sèjyèj rik umsalib samak Yèsus atèk wèhoh wèpègyog ma Yèsus keꞌjèk samak gerèk umnak naꞌtèk.
Yèsus nakebes
(Mrk 15:33-41; Luk 23:44-49; Yoh 19:28-30)
45Bil ès-is, kenèmbek negerik nak najadik rengah, sampéy pukol tigak lèngꞌakh. 46Bil nak Yèsus naꞌèh-éh kuwad nòm kuy rik Eh, “Èli, Èli, lama sabakhtani?” rik bemaksod, “Allah Yék, Allah Yék, nahey Hãk haperak ma Yék?” #En 22:2.#27:46 “Èli, Èli” nak nòm kuy Ibrani, bok “Èlòy, Èlòy” nak (èn kitab Markus) nòm kuy Aram. Maksod wènar nak tik chachod: “Allah Yék.”
47Mok maròp-maròp sènꞌòy umtèd-ted èn anak salah umkeyòkh ma enèh-éh Yèsus nak, bok umchal, “Nanak nakòw ma nabi Èliya.” 48Néy sènꞌòy nòm umnak sejèkh nadabal dak nakod span, nachelok ma kelòj òng anggor bènychuny, dak nachõk èn sòy ad awèn. Dak najulok ma nyag Yèsus. #En 69:22. 49Tapik sènꞌòy gèhnih èn anak umchal, “Perak! Èk èdeh hawèd, ènéh kalòw Èliya nalãj bok natèrgos ma Rik Nak.”
50Dak bil nak Yèsus naꞌèh-éh wèl nòm kuy kènwad Eh, dak natèrsèk henèmhum rik sèj-sòj.
51 #
Her 26:31-33. Bil Yèsus nakebes, langséh rayak rik nakèrlakh Ruwang Paléng Kudus èn kelòj Dékh Tuhan tok-tok nacha-chèg nòm balikh sampéy ma tèk, najadik nar heléy. Bumi nayèh-yoh, dak batuk-batuk umbekah. 52Dak mèn kubor pon umpa-pog, dak jajéh sènꞌòy penili Allah rik hòj umkèsbes Allah natèrwòg wèl nòm kènbes um. 53Umnak kenèmbek umhuwòl nòm kubor. Dak nòm kerek Yèsus hòj nawòg nòm kènbes Eh, umnak ummòj ma Yèrusalèm, kote penili Allah nak. Dak anak jajéh sènꞌòy umnéh ma umnak.
54Bil ketuwe askah ròb mèn askah rik tik umbejagak ma Yèsus umnéh gempah bumi ròb kenèmbek hal rik nabelakuk nak, umnak umtukh geb. Umnak umchal, “Rik Nak kemën-kemën Kuwòt Allah!”
55Èn anak mok keꞌjèk ibuk bèꞌbok rik umnèh-néh nòm jerok. Umnak lah bèꞌbok rik hòj umhèh-hoh samak Yèsus nòm Galiliya bok umbetulong ma Rik Nak. 56Èn umnak mok Maria Magdaléna, Maria amèk Yakobus ròb Yusop, bok ròb amèk Yakobus ròb Yohanès, kuwòt Sèbedius nak. #Luk 8:2,3.
Umdol mayad Yèsus èn guwok kubor
(Mrk 15:42-47; Luk 23:50-56; Yoh 19:38-42)
57Bil lèngꞌakh nak bok hòj tilok nambelayèg, nalãj lah néy sènꞌòy kaye rik bekenëh Yusop. Rik nak sènꞌòy nòm belah Arimatéa, dak rik nak keꞌjèk hèhoh Yèsus. 58Yusop nak nawèk ma Menterik Rayak Pilatus dak nasemany mayad Yèsus untok namkep. Dak Pilatus naꞌor ma askah supaye muꞌog mayad Yèsus ma Yusop. 59Yusop ròb maròp-maròp sènꞌòy mòy umkod mayad nak, dak umlat nòm abat rik méj-méj. 60Kerek nak Yusop nadol mayad Yèsus nak èn kelòj guwok kubor. Kubor nak milik rik Yusop, bok pay umchelòkh èn tangkòl batuk. Pas nak Yusop ròb sènꞌòy rik betulong eh nak umkèrléh batuk rik rayak untok namchèrtekh rèngkak kubor nak, dak umwèk. 61Dak Maria Magdaléna ròb Maria rik mòy wèga-gel tok jèꞌrok nòm sòy kubor nak dak wènèh-néh ma tempad umdol mayad Yèsus.
Mèn pemimpin Yahudi umsemany supaye mèn askah mujagak ma kubor Yèsus
62Bil umnak umkep ma Yèsus nak èn Arik Senèbyab.#27:62 Arik Senèbyab nak mok tiyab-tiyab arik Jumaꞌat. Bil arik nak, sènꞌòy Yahudi umsèbyab umtèrsòj kenèmbek kèrjak, sebab tok boléh umteꞌèl ilok-ilok kèrjak èn Is Tenarak. Jadik umnak haros géj umkep mayad Yèsus, èn mad is tèk-tik tok najèdlũd. Dak ma is jakal eh nak, hòj Is Tenarak, mèn ketuwe imam ròb sènꞌòy Parisi umwèk umtèrbuk ma Pilatus. 63#Mat 16:21; 17:23; 20:19; Mrk 8:31; 9:31; 10:33,34; Luk 9:22; 18:31-33. Umnak umchal, “Yãng, kandék kibelekh bil sènꞌòy rik besèꞌlok nak tik nagos, Rik Nak pernah nachal, ‘Hòj sòj tigak arik Yék akal iwòg wèl.’ 64Jadik kandék kiꞌid mèn hèhoh Eh akal umlãj dak umseyèj mayad Eh nak, dak umsèꞌlok ma sènꞌòy jajéh bok umchal Rik Nak hòj nawòg nòm kènbes. Dak senèꞌlok rik sèj-sòj doh akal lebéh terok nòm chare Rik Nak nasèꞌlok ma sènꞌòy nòm mulak eh! Sebab nak, tulong lah or sènꞌòy supaye mujagak kubor nak keheb sampéy ma arik tenigak.”
65Pilatus nachal ma umnak, “Nak, éd lah maròp-maròp askah bok wèk lah jagak ma kubor nak keheb.”
66Jadik mèn pemimpin Yahudi umwèk dak umteꞌèl tande has èn batuk cherèntekh kubor nak, supaye sènꞌòy tok dapad mupog. Dak umperak mèn askah èn anak dak umꞌor mujagak ma kubor nak.
Právě zvoleno:
Matius 27: KKT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 Wycliffe Bible Translators, Inc.
