Matius 23

Yèsus natanas chare mèn guruk agama Yahudi nak salah

(Mrk 12:38-39; Luk 11:43-46; 20:45-46)

1Nòm kerek nak Yèsus nachal ma sènꞌòy jajéh bok ma mèn hèhoh Eh, 2“Mèn guruk Hukom Tuhan ròb mèn guruk agama nòm pitak Parisi nak hòj umterime hak untok mutènglèkh ilok maksod Hukom Tuhan nak, gerèk Musa manah tòp.#23:2 Tèks asli mok kiasan èn anuh: “umgel èn kerusi Musa.” 3Sebab nak, hoh lah bok taꞌãd ma kenèmbek rik umtènglèkh ma nyob nak. Tapik agok lah teꞌèl gerèk tènꞌèl umnak, sebab ilok rik umtènglèkh nak umnak irik um tok umhèh-hoh. 4Umnak umpedug ma nyob bok umꞌor nyomhoh ma ibuk adad agama rik susah geb, gerèk umbeg bende rik ènjoh èn pòg nyob. Tapik umnak irik um tok umchèn-chèn mutadok néy tikh pon untok mutulong ma nyob nyomhoh ma adad agama nak. 5Kenèmbek tènꞌèl méj um nak had umteꞌèl untok sènꞌòy munéh. Umnak umchor ayad Kitab èn kelòj kotak èꞌjok rik umtepok èn petëk bok umlat èn pog um. Tapik kotak nak umteꞌèl lebéh rayak nòm biyase, bok umteꞌèl èn sòy bajuk umnak téyrajòy rik jèꞌrok supaye sènꞌòy mòy munéh umnak nak méj. #Mat 6:1; Ter 6:8; Ken 15:38. 6Dak bil èn jamuwan atòw èn dékh senindol, umnak umchèn umgel èn tempad hormad rik paléng penting. 7Umnak umchèn sènꞌòy mutabék ma rik umnak èn pasah, dak umchèn bil sènꞌòy umkòw ma rik umnak ‘Guruk.’ 8Tapik nyob rik hèh-hoh ma Yék agok lah or ma sènꞌòy gèhnih mukòw ma nyob ‘Guruk.’ Nyob kenèmbek néy kewarge èn kelòj Tuhan, dak Guruk nyob had mok néy hék. 9Dak agok lah hormad kèw-kòw ‘Apak’ ma chok-chok pon èn bumi doh, sebab had mok néy hék Apak nyob, Rik Nak Apak èn sorga. 10Dak agok lah or sènꞌòy mukòw ma nyob pemimpin, sebab Pemimpin nyob had mok néy hék, Kristus. 11Tapik èn nyob, chok rik najadik gerèk kuli ma sènꞌòy gèhnih, rik nak lah paléng rayak èn mad Tuhan.#Mat 20:26,27; Mrk 9:35; 10:43,44; Luk 22:26. 12Chok rik bebèdlod rik ma rik eh lebéh rayak nòm sènꞌòy mòy, akal Allah najadik sènꞌòy nak tok bepenting. Dak chok rik bebèdlod sènꞌòy mòy lebéh penting nòm rik eh, akal Allah najadik eh sènꞌòy rik rayak.” #Luk 14:11; 18:14.

Yèsus natèdchod ma mèn guruk agama ròb sènꞌòy Parisi

(Mrk 12:40; Luk 11:39-52; 20:47)

13Yèsus nachal wèl, “Terok geb lah ma nyob akal, guruk agama ròb sènꞌòy Parisi! Nyob sènꞌòy rik bemèrhĩr! Nyob doh lah rik betènglèkh sèk ma sènꞌòy bok nyob kèrlakh supaye tok dapad mumòj ma Kerajaꞌan Allah — gerèk nyob chèrtekh rèngkak èn mad umnak! Nyob irik nyob jèk tok nyob mèj-mòj, dak nyob kèrlakh keꞌjèk ma sènꞌòy mòy rik umchèn mumòj.

[14Terok geb lah ma nyob akal, guruk agama ròb sènꞌòy Parisi. Nyob rik bemèrhĩr! Nyob doh nyob sèꞌlok ma balakh supaye nyomkod harte um. Tapik untok nyomkèrdëk tènꞌèl jèdhad nyob nak, nyob gèw-gòw bok nyob pèꞌtak jerok-jerok supaye sènꞌòy munéh ma nyob méj. Pastik Allah akal nahukom ma nyob lebéh ènjoh nòm sènꞌòy mòy!]#23:14 Jajéh tèks Kitab Yunani manah tòp tok mèk-mok ayad doh.

15Terok geb lah ma nyob akal, guruk agama ròb sènꞌòy Parisi! Nyob rik bemèrhĩr! Nyob doh sanggob nyomkèk ma téh ma rèh, ma laud bok ma béng, supaye nyomchèrmun ma néy sènꞌòy pon nammòj ma agama nyob. Tapik bil sènꞌòy nak hòj nahoh ma nyob, dak nyob nyomꞌuy ma sènꞌòy nak jerok lebéh laꞌes#23:15 jerok lebéh laꞌes Tèks asli: “kuwòt nerake rik nar kalik lebéh laꞌes.” nòm rik nyob, sampéy rik nak patod namterime henukom èn nerake samak nyob!

16Terok geb lah ma nyob akal! Nyob rik chèn-chèn nyomjadik pemimpin ma sènꞌòy gèhnih, kemoh nyob kenèmbek lok bebèybëy! Chòntoh eh, kalòw mok sènꞌòy napèrhod napantakh bok nadéh kenëh Dékh Tuhan untok namkèrwad perènhod eh nak, dak nyob doh nyob chal sènꞌòy nak tok payah namteꞌèl ilok rik napèrhod nak. Tapik kalòw sènꞌòy rik tèlꞌèl perènhod nak napantakh bok nadéh kenëh mèn barang mas rik umdol èn kelòj Dékh Tuhan nak, nyob chal nanak haros namteꞌèl ilok rik napèrhod nak. 17Nyob sènꞌòy rik beyayéw bok bebèybëy! Bok tok nyob lèng-lèkh lah, Dékh Tuhan nak lebéh penting nòm barang mas rik umdol èn kelòj eh nak? Mèn barang mas nak had najadik suchi sebab sènꞌòy umpèrmòy barang nak has untok musindol ma Allah èn Dékh Tuhan.

18Dak nyob keꞌjèk nyob tènglèkh gerèk doh: kalòw mok sènꞌòy napèrhod napantakh bok nadéh kenëh tempad jenamuk èn Dékh Tuhan nak, nyob chal sènꞌòy nak tok payah namteꞌèl ilok rik napèrhod nak. Tapik kalòw sènꞌòy rik tèlꞌèl perènhod nak napantakh bok nadéh kenëh jenamuk rik hòj umjamuk èn balikh eh nak, nyob chal nanak haros namteꞌèl ilok rik napèrhod nak. 19Nyob sènꞌòy rik bebèybëy! Nahey wèl nyob tok lèng-lèkh: tempad jenamuk nak pastik lebéh penting nòm jenamuk rik umjamuk èn balikh eh nak! Jenamuk nak had najadik suchi sebab umpèrmòy bok umjamuk ma Allah èn tempad jenamuk nak. 20Sebab nak, bil mok sènꞌòy napèrhod napantakh bok nadéh kenëh tempad jenamuk nak, maksod eh hòj napèrhod nòm kenèmbek jenamuk èn balikh eh nak keꞌjèk. 21Bok bil mok sènꞌòy napèrhod napantakh bok nadéh kenëh Dékh Tuhan, maksod eh nanak hòj napèrhod keꞌjèk nòm kenëh Allah rik gèl-gel èn anak. 22#Yès 66:1; Mat 5:34. Dak kalòw néy sènꞌòy nabepantakh bok nadéh kenëh sorga, maksod eh nanak hòj napèrhod keꞌjèk nòm kenëh tempad nèlgel Allah bok nòm kenëh Allah rik gèl-gel bok beperintah èn anak.

23Terok geb lah ma nyob akal, guruk agama ròb sènꞌòy Parisi! Nyob rik bemèrhĩr! Nyob hoh ma Hukom Tuhan bok nyob og ènsekh hasil nòm selay nyob, yab ber chenèhruh#23:23 ber chenèhruh Tèks asli: “selasih, adas manis, ròb jintan.” rik ajok geb. Tapik nyob tok begorgèr ma nèrꞌor Allah rik paléng penting: nyob tok beꞌadil, tok bekalõn, bok tok besetiye. Che patod eh nak nyob haros nyomteꞌèl hal rik lebéh penting nak, dak og ma Allah hal èꞌjok nak keꞌjèk. #Im 27:30. 24Nyob rik chèn-chèn nyomjadik pemimpin ma sènꞌòy gèhnih, kemoh nyob kenèmbek lok bebèybëy! Chare nyob hoh ma nèrꞌor Allah nak gerèk nyob tapìs kabèd ajok nòm òng nyob, tapik tik mok unta èn kelòj òng nak dak nyob lig! Nyob hoh ma adad agama rik èꞌjok, tapik nyob tok begorgèr ma nèrꞌor Allah rik paléng penting.

25Terok geb lah ma nyob akal, guruk agama ròb sènꞌòy Parisi! Nyob rik bemèrhĩr! Nyob suj kuléh ròb hok nòm béng hék, tapik èn kelòj eh tik laꞌes — èn kelòj hup nyob nak tebikh nòm bèngbokh bok beꞌarad rik ma rik. 26Nyob sènꞌòy Parisi doh bebèybëy! Suj lah nèng-nèng kelòj kuléh nyob nak, bok kenèmbek eh nak akal méj.

27Terok geb lah ma nyob akal, guruk agama ròb sènꞌòy Parisi! Nyob rik bemèrhĩr! Nyob doh gerèk kubor rik umchad beyug: ènéh nòm béng eh nak méj, tapik èn kelòj eh nak tebikh nòm jeꞌẽng sènꞌòy kèsbes ròb kenèmbek rik laꞌes. #Tèn 23:3. 28Gerèk nak keꞌjèk ma nyob: nòm béng sènꞌòy gèhnih umnéh ma nyob gerèk sènꞌòy rik kènmën. Tapik che kènmën eh nak èn kelòj hup nyob tebikh nòm menèrhĩr ròb jènhad.

29Terok geb lah ma nyob akal, guruk agama ròb sènꞌòy Parisi! Nyob rik bemèrhĩr! Manah tòp yak dòt bej nyob umcheleg ma mèn nabi Tuhan, dak nyob puꞌdoh nyob teꞌèl tande berènleng rik méj-méj èn tempad kubor mèn nabi nak, gerèk nyob hormad ma umnak. Dak nyob hiyas méj-méj ma tande berènleng èn kubor sènꞌòy kènmën mòy. 30Bok nyob chal, ‘Kalòw kandék kigos jènman yak dòt bej kandéh tòp, pastik lah kandék tok kihèh-hoh samak umnak untok kimcheleg ma mèn nabi nak.’ 31Tapik nòm nèlchal rik nyob nak, nyob pèrnéh tèꞌlalah nyob nak kemën-kemën nòm waris umnak rik umchègleg ma mèn nabi nak! 32Jadik sèrjèkh lah bok tèrsòj kèrjak jèdhad rik hòj umtekèd mèn yak dòt bej nyob nak! 33Nyob doh sènꞌòy jèdhad, samak ma yak dòt bej nyob nak — nyob kenèmbek gerèk tajuk èmpĩd! Nyob pastik akal tok dapad nyomda-dok nòm henukom èn nerake! #Mat 3:7; 12:34; Luk 3:7. 34Jadik, keyòkh lah! Yék akal itèrꞌèn ma nyob nabi-nabi, sènꞌòy rik umlèng-lèkh, ròb guruk-guruk. Tapik ènsekh sènꞌòy nòm umnak akal nyob cheleg bok nyob kèrbes èn palok salib. Dak ènsekh sènꞌòy wèl akal nyob hemẽd èn dékh senindol nyob, bok nyob hoh ma umnak nòm kote ma kote untok nyomkeseh ma umnak. 35Sebab nak, nyob lah rik besalah untok chènleg kenèmbek sènꞌòy kènmën rik pernah nabelakuk èn bumi. Nòm chènleg Habèl, sènꞌòy kènmën nak, sampéy lah ma chènleg Sakariya kuwòt Bèrekiya rik umcheleg èn sòy Ruwang Kudus tilok ma tempad jenamuk èn Dékh Tuhan. #Jen 4:8; 2 Sej 24:20,21. 36Kemën Yék ichal ma nyob, akal Allah nahukom ma nyob sènꞌòy jaman doh untok kenèmbek chènleg nak!”

Yèsus nakalõn ma sènꞌòy Yèrusalèm

(Luk 13:34-35)

37Dak Yèsus nachal wèl nòm hup sèndéh Eh, “Sènꞌòy Yèrusalèm, nyob lah irik chègleg ma mèn nabi rik Allah natèrꞌèn ma nyob, bok nyob bedal nòm batuk sampéy umkebes. Yék hòj mayek-mayek ichèn imchèb-chab bok imjagak ma nyob, gerèk ayam nakumpol bok najagak ma kuwòt-kuwòt eh èn dadak kènyèng eh. Tapik nyob jèk! 38Jadik keyòkh lah: Allah akal naperak ma nyob, dak kote nyob akal sengẽk. #Yèr 22:5. 39#En 118:26. Dak Yék ichal ma nyob, mulak is doh nyob akal tok nyob nèh-néh ma Yék wèl sampéy nalòy mase eh nyob chal, ‘Allah nateꞌèl méj lah ma Sènꞌòy rik nalãj nòm kuwase Tuhan Allah!’”

Právě zvoleno:

Matius 23: KKT

Zvýraznění

Sdílet

Kopírovat