Lukas 7
7
Yèsus natèrhakh kuli ketuwe askah Roma
(Mat 8:5-13)
1Hòj sòj Yèsus nachèl-chal kenèmbek gah doh ma sènꞌòy jajéh, Rik Nak nawèk ma kote Kapernaum. 2Èn anak mok néy ketuwe askah Roma. Rik nak mok néy kuli rik nasayèkh geb, dak kuli nak najèk-jik dak tèꞌlok namkèsbes. 3Bil ketuwe askah nak nakeyòkh gah Yèsus nalãj, rik nak nasemany maròp-maròp sènꞌòy tèꞌtak Yahudi muwèk ma Yèsus untok namsemany Rik Nak namlãj dak namtèrhakh kuli eh. 4Umnak umwèk ma Yèsus dak umsemany lèdbëd, “Sènꞌòy doh behakak hamtulong, 5sebab rik nak nasayèkh ma kaum èk. Dak rik nak lah nabayar untok teꞌèl dékh senindol untok èk.”
6Jadik, Yèsus nawèk samak umnak. Bil Rik Nak hòj tilok namlèj-lãj èn dékh nak, ketuwe askah nak natèrꞌèn kéy-kéy eh muchal ma Yèsus, “Yãng, agok lah Hãk susah-susah ma dékh yék, sebab yék tok behakak imsambud ma Hãk. 7Dak yék tok behakak imlãj untok imtèrbuk ma Hãk. Tapik or hék supaye kuli yék namhakh, dak pastik nahakh. 8Yék ilèkh, sebab yék pon ihoh ma sènꞌòy rik lebéh rayak nòm yék, dak yék keꞌjèk mok jajéh askah rik umhoh ma yék. Bil yék iꞌor askah, ‘Wèk!’ rik nak pon nawèk. Bil yék iꞌor ma askah mòy, ‘Lãj!’ rik nak pon nalãj. Dak bil yék iꞌor kuli yék, ‘Teꞌèl lah naꞌdoh!’ rik nak pon nateꞌèl.”
9Yèsus nabèlꞌih nakeyòkh gah nak. Rik Nak nawãr dak nachal ma sènꞌòy jajéh rik hèh-hoh, “Kemën Yék ichal ma nyob, tok pernah Yék itèrbuk sènꞌòy rik kuwad napechaye gerèk doh, èn sènꞌòy Israꞌèl pon hõy!”
10Bil kéy-kéy rik ketuwe askah natèrꞌèn naꞌtèk umlos ma dékh nak, umnak umnéh kuli nak hòj nahakh.
Yèsus natèrwòg babeh lenitòw nòm kènbes
11Tok lamad nòm kerek nak, Yèsus nawèk ma néy kote rik bekenëh Nayin. Hèhoh-hèhoh Eh ròb sènꞌòy jajéh umhoh samak Rik Nak. 12Bil Nanak nalãj èn gerbang kote nak, mok sènꞌòy nòm kote nak umkanar mayad ma béng. Rik kèsbes nak kuwòt babeh tungal néy sènꞌòy balakh. Dak ibuk sènꞌòy kote nak umhoh samak babok nak. 13Bil Tuhan nanéh ma balakh nak, nakalõn dak nachal, “Agok lah yam.” 14Yèsus nachib dak napèk-pek ma ad kenanar mayad nak, dak sènꞌòy rik umkanar nak umted gëb. Dak Yèsus nachal, “Lenitòw, Yék iꞌor ma hãk, wòg lah!” 15Sènꞌòy rik hòj kèsbes nak pon nawòg dak namulak nabecharak, dak Yèsus natèrlos ma amèk eh.
16Kenèmbek sènꞌòy umtukh dak umꞌèhmah ma Allah. Umnak umchal, “Néy sènꞌòy nabi rik rayak hòj nalãj èn gagid èk! Allah hòj nalãj untok namtulong ma kaum Eh!”
17Gah tentang Yèsus umtèrjekh èn kenèmbek negerik Yudéya dak èn belah keliling.
Yohanès Pembaptis natanyak tentang Yèsus, dak Yèsus nabetènglèkh ma sènꞌòy jajéh tentang Yohanès Pembaptis
(Mat 11:2-19)
18Hèhoh-hèhoh Yohanès Pembaptis umꞌoglèkh ma Yohanès kenèmbek gah tentang Yèsus nak. Jadik Yohanès nakòw nar sènꞌòy hèhoh eh, 19dak naꞌor wèmtanyak ma Tuhan Yèsus, “Hãk ke Mèsias rik Allah napèrhod, atòw tik kimpòj sènꞌòy mòy?”
20Bil wènar nak wèlãj ma Yèsus, wèchal, “Yohanès Pembaptis naꞌor yamtanyak ma Hãk, ‘Hãk ke Mèsias rik Allah napèrhod, atòw tik kimpòj sènꞌòy mòy?’”
21Bil mase nak, Yèsus natèrhakh jajéh sènꞌòy jèk-jik. Dak Nanak nakiron yel-yel jèdhad dak natèrhakh mad sènꞌòy bebèybëy. 22Dak anak Yèsus nasaꞌod ma nar hèhoh Yohanès naꞌtèk, “Mak lah, oglèkh ma Yohanès tande rik hòj kaꞌan yad bok keyòkh: sènꞌòy bebèybëy umnéh, sènꞌòy bekantem umchèb-chib, sènꞌòy bechenèk sèmpok umjadik méj wèl,#7:22 sènꞌòy bechenèk sèmpok umjadik méj wèl Èn adad sènꞌòy Yahudi, sènꞌòy rik kenak chenèk sèmpok gerèk nak umdéh “laꞌes èn mad Tuhan,” dak umpèrmòy sènꞌòy nak nòm sènꞌòy mòy. Jadik bil Yèsus natèrhakh ma umnak, chenèk nak nahakh bok umjadik méj wèl èn mad Tuhan keꞌjèk. sènꞌòy tèb-tãb umkeyòkh, sènꞌòy kèsbes umwòg wèl, dak iꞌoglèkh Gah Méj nòm Allah ma sènꞌòy hèl-hal. #Yès 35:5,6; Yès 61:1. 23Beꞌadés lah sènꞌòy rik umpechaye ma Yék bok tok umꞌèd-id!”
24Hòj nar hèhoh Yohanès nak wèmak, Yèsus namulak nabecharak tentang Yohanès ma sènꞌòy jajéh: “Bil Yohanès naꞌèg-oglèkh Gah Allah èn pantil gurun, nahey nyob wèk ma rik nak? Pastik nyob tok nyob wèk untok nyomnéh sènꞌòy rik naꞌèd-id, rik nawèk dak nalos gerèk rambang bil beꞌawéh nahũb tènghõng! 25Jadik nahey nyob wèk? Pastik nyob tok nyob wèk untok nyomnéh sènꞌòy rik lèg-lòg méj-méj! Hõy, sènꞌòy rik lèg-lòg méj-méj bok umgès-gos èn kenaye nak tok umgèl-gel èn pantil gurun, tapik umgel èn istane. 26Jadik, nahey nyob wèk? Pastik nyob wèk sebab nyob chèn nyomnéh ma sènꞌòy nabi. Kemën, Yohanès nak nabi. Dak Yék ichal ma nyob, rik nak lebéh rayak nòm nabi gèhnih. 27Sebab èn kelòj Kitab manah tòp Allah nachal tentang Yohanès: #Mal 3:1.
‘Néh lah! Yék yimtèrꞌèn sènꞌòy nèng-nèng rik namtèrlòy gah Yék,
supaye namtabéh nòng èn sòy Hãk.’
28Yék ichal ma nyob, Yohanès nak lebéh rayak nòm kenèmbek sènꞌòy èn bumi. Tapik kenèmbek sènꞌòy èn kelòj Kerajaꞌan Allah, yab sènꞌòy rik paléng ajok pon, lebéh rayak nòm Yohanès.”
29Dak bil umkeyòkh nèlchal Yèsus, sènꞌòy jajéh ròb mèn sènꞌòy rik bechatuk duid chukay pon umsetujuk. Dak umchal chare Allah nak kemën, sebab umnak hòj umhoh ma nènchèn Allah bil Yohanès nabaptis ma umnak. #Mat 21:32; Luk 3:12. 30Tapik sènꞌòy Parisi ròb guruk agama gèhnih umjèk tok umhèh-hoh ma nènchèn Allah untok rik umnak, dak umjèk Yohanès nambaptis ma umnak.
31Yèsus nachal wèl, “Gerèk lok Yék imbanding ma nyob rik jèk-jèk ma Yohanès ròb Yék? Yék imꞌog chòntoh ma nyob: 32Nyob doh gerèk sèdyẽd rik umgèl-gel umjèhwah èn pantil. Kumpolan rik néy umꞌabad ma rik mòy, ‘Nahey nyob jèk tok nyob bejogéd bil kandék kijèhwah laguk untok nyob? Dak kandék kijèhwah berawong, tapik nyob tok nyob yèm-yam!’ 33Gerèk nak keꞌjèk, bil Yohanès Pembaptis nalãj, rik nak naꞌòd dak tok naꞌèng-òng òng anggor, dak nyob jèk bok nyob chal, ‘Rik nak nasid yel jèdhad!’ 34Tapik bil Yék, Sènꞌòy Nòm Sorga, ilãj wèl, dak igèy-géy bok iꞌèng-òng, dak nyob jèk bok nyob chal, ‘Néh lah sènꞌòy doh! Rik Nak bèngbokh, beloyẽj, bok nabarkéy ma sènꞌòy rik bechatuk duid chukay ròb sènꞌòy mòy rik bedose!’ 35Tapik yab mok sènꞌòy rik umjèk, kenèmbek sènꞌòy rik hèh-hoh ma chare cherèndìk Allah umpèrnéh èn kelòj nèsgos um cherèndìk Eh nak kemën.”
Néy babok nasèd binyak chèsngẽs ma jukh Yèsus
36Mok néy sènꞌòy guruk agama Parisi rik bekenëh Simon. Nanak nakòw ma Yèsus namgéy èn dékh rik eh nak. Dak Yèsus nawèk ma dékh eh nak dak nagel nagèy-géy.
37Mok keꞌjèk èn kote nak néy sènꞌòy babok rik bedose. Bil nanak nakeyòkh Yèsus nagèy-géy èn dékh sènꞌòy Parisi nak, dak nanak nawèk ma nak naꞌèn néy butol rik umteꞌèl nòm batuk puwalam#7:37 batuk puwalam Puwalam nak néy jenis batuk rik méj-méj; boléh gunak untok teꞌèl barang méj bok mèlhal. méj-méj, beꞌisik binyak chèsngẽs. #Mat 26:7; Mrk 14:3; Yoh 12:3. 38Babok nak nalãj nated èn kerek Yèsus, tilok ma jukh Eh. Nanak nayam, dak keꞌej ma jukh Yèsus nòm òng mad eh. Nanak nasok sog eh ma jukh Yèsus namsekul, dak nachëy ma jukh Yèsus. Pas nak nasèd binyak chèsngẽs tèk ma jukh Eh. 39Bil sènꞌòy Parisi rik kèw-kòw ma Yèsus nanéh ilok belakuk nak, nanak nabebèdlod èn kelòj hup eh, “Pastik sènꞌòy doh kedak nabi nòm Tuhan! Sebab kalòw Nanak kemën-kemën nòm Tuhan, mestik Nanak nalèkh chok babok nak bok rèk lok perangéy eh, dak pastik tok naꞌèr-or eh nampèk-pek ma Rik Nak gerèk nak. Babok nak sènꞌòy bedose!”
40Yèsus nalèkh ma benèdlod Simon nak, dak nachal, “Simon, mok Yék ichèn imchal ma hãk.” Dak Simon nasaꞌod, “Chal lah, Guruk.”
41Dak Yèsus naꞌoglèkh chenal ma Simon: “Mok nar sènꞌòy rik wèbeꞌutang ma néy sènꞌòy rik èg-og peninjam duid. Rik néy sènꞌòy nak naꞌutang ibuk, gerèk gajik sènꞌòy bekèrjak néy tawon lebéh.#7:41 gajik sènꞌòy bekèrjak néy tawon lebéh Tèks asli: “500 dinar (kupang pèrak).” Néy kupang pèrak nak nilay eh gerèk gajik néy arik. Dak néy sènꞌòy nak wèl utang eh gerèk gajik sènꞌòy bekèrjak limak puloh arik.#7:41 gajik sènꞌòy bekèrjak limak puloh arik Tèks asli: “50 dinar (kupang pèrak).” 42Wènar nak tok dapad wèmbayar utang. Jadik sènꞌòy rik naꞌog peninjam duid nak natèrhõy utang wènar nak. Èn wènar nak, malok rik lebéh besayèkh ma rik nak?”
43Simon nasaꞌod, “Yék ibèdlod sènꞌòy rik mulak nak, sebab rik naꞌog peninjam duid natèrhõy utang eh rik lebéh rayak.” Yèsus nachal ma rik nak, “Kemën benèdlod hãh nak.”
44Dak Yèsus nawãr ma babok nak dak nachal wèl ma Simon, “Hãk hanéh ke ma babok doh? Yék imòj ma dékh hãh, dak hãk tok haꞌèg-og òng untok nèjsuj jukh Yék. Tapik babok doh hòj nasuj jukh Yék nòm òng mad eh, dak nasok nòm sog eh. 45Hãk tok habesambud ma Yék nòm nèychey, tapik babok doh tok sèj-sòj sèj-sòj namchey ma jukh Yék. 46Hãk tok hasèd-sèd binyak ma kuy Yék untok hamhormad ma Yék. Tapik babok doh hòj nasèd binyak chèsngẽs ma jukh Yék. 47Jadik Yék ichal ma hãk: dose eh rik ibuk nak hòj iꞌampon. Sebab unak lah nanak nasayèkh ibuk geb ma Yék. Tapik kalòw Yék iꞌampon ma sènꞌòy rik bedose amès hék, sènꞌòy nak pon akal nasayèkh ma Yék amès hék.”
48Dak Yèsus nachal ma babok nak, “Dose hãk hòj iꞌampon.”
49Umnak rik gèy-géy samak Yèsus nak umbetanyak kaban rik um, “Chok sènꞌòy doh rik belamid chèl-chal namꞌampon ma dose? Had Allah hék bok boléh naꞌampon dose!”
50Tapik Yèsus nachal ma babok nak, “Sebab hãk hapechaye ma Yék, Tuhan hòj natèrgos ma hãk. Wèk lah nòm hup tèngnang!”
Právě zvoleno:
Lukas 7: KKT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 Wycliffe Bible Translators, Inc.
