Lukas 2

Nèsyos Yèsus

(Mat 1:18-25)

1Bil mase nak Rajak Rayak èn Roma, rik bekenëh Agustus, naꞌor kenèmbek rik umgèl-gel èn kerajaꞌan Roma mudaptar untok mubanchik. 2Doh lah kalik pertame kerajaꞌan Roma umteꞌèl banchik gerèk nak (bil nak Kirènius menterik rayak rik nabeperintah ma negerik Siriya untok rajak Roma nak). 3Kenèmbek sènꞌòy umwèk ma kote pimòy-pimòy untok mudaptar.

4Jadik Yusop pon nawèk nòm kampong Nasarèt èn Galiliya, dak nawèk ma negerik Yudéya, ma kote Bètlehèm — tempad nèsyos Rajak Daud — sebab Yusop nòm waris Rajak Daud. 5Nanak nawèk untok namdaptar samak Maria, rik akal nambabéy ma rik nak, èn tik kayod eh. 6-7Dak bil wènar wèlòy èn Bètlehèm, kenèmbek dékh nèmdep hòj tebikh sènꞌòy, tok mèk-mok tempad wèmgel. Jadik, wègel èn tempad sènlòg mèn lawok. Bil nak nalòy lah mase eh untok Maria namyès-yos, dak nayos néy kuwòt babeh, kuwòt eh rik mulak. Kuwòt nak nasapod nòm abat eh dak nasèrlòg èn kelòj palong, tempad nèygéy mèn lawok.

Melaykat umꞌoglèkh gah nèsyos Yèsus ma sènꞌòy rik bejagak kambikh biri

8Bil layèg nak, mok maròp-maròp sènꞌòy rik umbejagak kambikh biri um èn pantil rik tilok. 9Tok-tok melaykat Tuhan napèrnéh rik eh ma umnak, dak nachelakh beyug kuwase Tuhan bedeyãr ma umnak sampéy umnak umtukh. 10Tapik melaykat nak nachal ma umnak, “Agok tukh! Yék iꞌèn ma nyob gah méj, rik akal namꞌadés ma kenèmbek sènꞌòy. 11Is doh èn kote Rajak Daud, hòj nayos Rik Terèsgos ma nyob! Rik Nak Kristus, Tuhan rik Allah napèrhod. 12Doh lah tande eh: akal nyob tèrbuk néy kuwòt chènglèkh rik umsapod nòm abat dak umsèrlòg èn kelòj palong.”

13Tok-tok mok jajéh melaykat mòy gerèk tentere nòm sorga samak melaykat naꞌtèk, dak umꞌèhmah ma Allah umchal,

14“Èhmah ma Allah èn tempad rik paléng balikh,

dak èn bumi bema-méj lah

sènꞌòy rik umserèngnang ma hup Allah!”

15Nòm kerek melaykat nak umperak ma umnak untok mulos ma sorga, rik bejagak kambikh biri nak umcha-chal kaban rik um, “Jok lah, èk èwèk ma Bètlehèm untok èmyad jenadik rik hòj nabelakuk nak, gerèk rik Tuhan naꞌoglèkh ma èk!”

16Umnak hès umwèk dak umtèrbuk ma Maria, Yusop, ròb kuwòt chènglèkh rik nasèglòg èn kelòj palong.

17Bil umnak umnéh ma sayẽd nak, umnak umꞌoglèkh kenèmbek sènꞌòy èn anak ilok rik melaykat nachal tentang sayẽd nak. 18Dak kenèmbek sènꞌòy umbèlꞌih bil umkeyòkh ma nèlchal sènꞌòy rik umbejagak kambikh biri nak. 19Tapik Maria nabelekh dak nabebèdlod dèngwòng ma kenèmbek gah nak. 20Kerek nak, rik bejagak kambikh biri nak ummak. Dak umꞌèhmah ma Allah sebab kenèmbek nak kemën-kemën nabelakuk gerèk melaykat nachal ma umnak.

Yusop ròb Maria wètèrjal kenëh Eh Yèsus

21 # Im 12:3; Luk 1:31. Bil hòj lapan arik, lòy lah mase eh untok musunat sayẽd nak. Dak apak ròb amèk Eh wètèrjal kenëh Eh Yèsus, gerèk rik melaykat nachal bil Maria tèk-tik tok nabekayod.

Yusop ròb Maria wèꞌéd Yèsus ma Dékh Tuhan

22-23 # Her 13:2,12. Nòm kerek Maria ròb Yusop hòj wèpòj empad puloh arik, nalòy lah mase eh Maria namteꞌèl adad namjadik méj wèl èn mad Tuhan, gerèk Hukom Tuhan rik Musa natèrlòy. Dak èn kelòj Hukom Tuhan nateꞌèl, “Kenèmbek kuwòt bèhbeh rik mulak haros nyob pèrmòy untok mujadik milik Tuhan.” Jadik Yusop ròb Maria pon wèꞌéd Yèsus ma Dékh Tuhan èn Yèrusalèm untok wèmꞌog ma Tuhan. 24#Im 12:6-8.Wènar nak keꞌjèk wèꞌog jenamuk ma Tuhan wèhoh ma Hukom Tuhan: nar ikor chèp kukur atòw nar ikor kuwòt chèp kukur.

Simion naꞌog renamal nòm Allah tentang Yèsus

25Bil mase nak èn Yèrusalèm mok néy babeh bekenëh Simion. Nanak néy sènꞌòy rik kènmën bok nahoh ma nènchèn Allah. Nanak nadèh-deh untok Mèsias namlãj namtèrgos ma sènꞌòy Israꞌèl. Dak Ruway Allah mok samak rik nak. 26Ruway Kudus nak hòj naꞌoglèkh ma Simion rik nak akal tok nakèsbes èn tèk-tik tok nanèh-néh Mèsias rik Tuhan napèrhod. 27Arik nak keꞌjèk Ruway Kudus hòj naꞌor ma Simion namwèk ma Dékh Tuhan. Dak Yusop ròb Maria wèꞌéd Yèsus rik tèk-tik ajok nak ma kelòj Dékh Tuhan untok wèmteꞌèl ilok rik seteréd untok wèmhoh ma Hukom Tuhan. 28Bil nak, Simion nakod Kuwòt nak dak nachedup Eh, dak naꞌèhmah ma Allah:

29“Yah Tuhan, yék doh milik Hãk bok ihoh ma nènchèn Hãk.

Gerèk hapèrhod hatòp, hòj hateꞌèl ma yék.

Puꞌdoh perak lah yék imkebes nòm enadés.

30Yah Tuhan, nòm mad rik yéh hòj inéh

Terèsgos rik nalãj nòm Hãk,

31rik hòj hatabéh untok kenèmbek kaum munéh.

32Rik Nak gerèk néy chènlakh rik bedeyãr #Yès 42:6; 49:6; 52:10.

untok nampèrnéh Hãk ma kaum kedak Yahudi rik tok umkèlnal ma Hãk,

dak sebab Rik Nak kenèmbek kaum akal umꞌèhmah ma sènꞌòy Hãk, kaum Israꞌèl.”

33Amèk ròb apak Eh wèbèlꞌih wèkeyòkh ilok rik Simion nachal tentang Kuwòt nak. 34Dak Simion napèꞌtak supaye Tuhan namteꞌèl méj ma umnak. Pas nak nachal ma Maria, amèk Kuwòt nak, “Allah hòj napili Kuwòt doh untok namhukom terok geb ma jajéh sènꞌòy èn Israꞌèl, tapik akal natèrgos ma jajéh sènꞌòy keꞌjèk. Yab Allah natèrꞌèn Rik Nak, tapik jajéh sènꞌòy akal umjèk ma Rik Nak. 35Dak nòm tènꞌèl umnak, jajéh sènꞌòy akal umpèrnéh benèdlod èn kelòj hup um tentang Allah. Dak Maria, èn kelòj hup hãh akal hagahmak pesũy, gerèk juwòj rik pènyhèny nachõk.”

Hana nanéh ma Yèsus dak naꞌèg-oglèkh gah tentang Rik Nak ma sènꞌòy

36Mok wèl néy sènꞌòy nabi babok rik hòj jajak. Kenëh eh Hana kuwòt Panuꞌèl, nòm suku Aser. Manah tòp nanak nababéy samak tòw eh selamak tujoh tawon, 37dak pas nak najadik balakh, sampéy puꞌdoh umor eh lapan puloh empad tawon. Nanak jarang namperak ma Dékh Tuhan. Yèhyah layèg nanak nabesindol ma Tuhan nòm pèntak dak naꞌèd-òd. 38Bil Simion tik nabecharak tentang Kuwòt nak, Hana nalãj ma Maria ròb Yusop keꞌjèk. Dak Hana sejèkh-serajèkh nabeterime kaséh ma Allah. Nanak nachèl-chal tentang Kuwòt nak ma kenèmbek sènꞌòy rik umdèh-deh mase Allah nambébas ma kaum Israꞌèl.#2:38 Allah nambébas ma kaum Israꞌèl Tèks asli: “Allah nambébas ma Yèrusalèm.” Maksod eh bukan ma kote nak hék, tapik ma kenèmbek sènꞌòy Israꞌèl.

Yusop, Maria, ròb Yèsus ummak ma Nasarèt

39Bil Yusop ròb Maria hòj sòj wèteꞌèl kenèmbek gah rik seteréd untok wèmhoh ma Hukom Tuhan, umnak ummak ma kampong rik um, Nasarèt, èn tèk Galiliya. #Mat 2:23. 40Dak Kuwòt nak naberayak dak nabetabeh kènwad ròb nènglèkh Eh. Dak Allah méj hup ma Rik Nak.

Yèsus èn Dékh Tuhan

41Tiyab-tiyab tawon amèk ròb apak Yèsus wèwèk ma Yèrusalèm wèmsambud arik Paskah. #Her 12:1-27; Ter 16:1-8. 42Bil Yèsus hòj beꞌumor nar belas tawon, Yusop ròb Maria wèwèk ma raye nak gerèk biyase, dak wèꞌéd Yèsus. 43Hòj sòj raye nak, Maria ròb Yusop wèwèk wèma-mak. Tapik Yèsus, kuwòt wèh nak, tik nagel èn Yèrusalèm, dak amèk apak Eh tok lèng-lèkh. 44Wènar wèsabok Nanak mok samak sènꞌòy mòy rik umchèb-chib samak umnak. Jadik wèchib wèl néy arik, dak pay nak wèkèk ma Yèsus èn kewarge ròb kéy-kéy umnak. 45Sebab wènar tok wèterèꞌbuk Eh, wènar wèlos wèl ma Yèrusalèm untok wèmkèk Eh. 46Pas tigak arik, sèj-sòj eh wètèrbuk Yèsus èn kelòj Dékh Tuhan. Nanak nagèl-gel samak guruk-guruk agama, nakèngyòkh ma tenènglèkh umnak dak natanyak senuꞌal ma umnak. 47Kenèmbek sènꞌòy rik kèngyòkh ma Yèsus umbèlꞌih, sebab Nanak nalèkh ibuk bok boléh nasaꞌod ma tenanyak guruk agama nak. 48Dak amèk apak Eh pon wèkèdjed wènéh ma Rik Nak, dak amèk Eh nachal, “Agah, nahey hateꞌèl gerèk doh ma yar? Néh lah, yar apak yasuwéh hup yakèk ma Hãk!”

49Dak Yèsus nasaꞌod, “Nahey kaꞌan kèk ma Yék? Kaꞌan patod kaꞌan lèkh Yék mestik mok èn dékh Apak Yéh.” 50Tapik wènar nak tok lèng-lèkh ilok maksod Yèsus nachal gerèk nak.

51Dak anak Yèsus namak samak amèk apak Eh ma Nasarèt, dak nataꞌãd ma wènar. Dak amèk Eh nabelekh dak nabebèdlod ma kenèmbek gah nak. 52Dak Yèsus naberayak wèl dak nabetabeh wèl nènglèkh Eh. Nanak nasèrnang ma hup Allah ròb sènꞌòy keꞌjèk. #1 Sam 2:26; Ten 3:4.

Právě zvoleno:

Lukas 2: KKT

Zvýraznění

Kopírovat

Porovnat

Sdílet