Ansa 9
9
CicoꞋo n tsulau e meɗevile
1CicoꞋo tsu maꞋanka ka̱ci ka̱ ni kpaꞋa,
u yaꞋankai ku ɗa ashamkpatsu e cindere.
2U zuwai a kiɗai i nyama
u yaꞋin ma̱kya̱n,
ɗa u foɓusoi ka̱ɗiva̱.
3Ɗa u suki agbashi a̱ ni a̱ ma̱ci,
a yaꞋan meɗevile a̱ ubuta̱ u na u laꞋi n uɗa̱ngi a̱ likuci.
4A kudana a̱mici,
<<YaꞋan a̱ta̱m
a̱ ta̱wa̱ punu na.>>
5<<Ta̱wa̱i i lyaꞋa ilikulyaꞋa i va̱,
i soꞋo ma̱kya̱n ma na n yaꞋin.
6Ka̱sukpa̱i uye u tsulau u ɗa̱
yi ta̱ tana a̱ kuciya̱ wuma,
yaꞋin nwalu a uye wu u kuyeve.>>
7<<Yaba dem na baci u lapulakai vuza vu kugoyi,
wi ta̱ a kuronoko ka̱ci ka̱ ni ishikushi.
vuza na baci kpamu u ɓarangi vuza vu gbani-gbani,
wi ta̱ a ku unaku yi
8Ko kenu ka̱ta̱ vu ɓarangu vuza vu kugoyi ba,
adama a na wi ta̱ a ku iwan wu.
Ama ɓarangu vuza vu cicoꞋo,
wi ta̱ a kuciga wu.
9Neke vuza vu cicoꞋo odoki,
wi ta̱ tana udoku ugboji,
PiꞋisaka vuza vu usuɓi,
wi ta̱ tana o kudoku n kuyeve.
10<<Wovon u Vuzavaguɗu ɗaɗa ugiti u cicoꞋo,
uyevi u vuza vu ciɗa ɗaɗa kuyeve.
11Adama na mpa cicoꞋo mi ta̱
o kudoku ka̱bunda̱i ka ayin a̱ nu
ka̱ta̱ kpamu n doku wu a̱ya̱ a wuma a̱ nu.
12Vi baci n cicoꞋo,
cicoꞋo tsu nu ci ta̱
e kuneke wu katsupu,
avu vuza vu ulami ɗa baci
vi ta̱ a kutakacika endeꞋen nu.>>
13Tsulau tsu kalau ka vuka,
e keteshe kaꞋa tsu ɗa ci,
u ci yaꞋan n giri ba kpamu wi n kuyeve ba.
14U tsu da̱sa̱ngu ta̱ a̱ utsutsu u kpaꞋa ku ni,
a̱ ka̱tugulu a̱ ubuta̱ u na yaba dem u ku ene yi,
15e kuɗeke aza a na i a nwalu,
aza a na a̱ɗu e le i a uye u le.
16A kudana a̱mici
<<YaꞋan a̱ta̱m a̱ ta̱wa̱ punu na,>>
17<<Ko ana wo okpoi kuvaku n vuka vu uboki u tsu yokpo ta̱,
an mini mu uboki
n ilikulyaꞋa i na a ci lyaꞋa usokongi.>>
18Ama e yeve a na a̱kpisa̱ a ɗa i ɗe ba.
kpamu omoci a̱ ni,
i ta̱ a kubana a̱ ubuta̱ wu uga̱vi a kasaun.
©️2025 Language Development and Translation Initiative (LDTI)