Ansa 8
8
Meɗevile mo cicoꞋo
1Panai, cicoꞋo ci ta̱ e meɗevile,
kuyeve a̱ kuɗa̱ngusa̱ ka̱la̱ka̱tsu ka̱ ni.
2A nsasan, n uye,
nu nsanji mu uye, u shamgbai lo,
3a̱ ka̱ga̱Ꞌin ka̱ ka̱ɓa̱ya̱ntsu ku utsutsu u likuci,
a kuꞋuwatai ku likuci
u ɗa̱ngusa̱i ka̱la̱ka̱tsu ka̱u u danai,
4<<A̱ɗa̱ uma, mi ta̱ ufolu u ɗa̱,
mi ta̱ e kuɗekushe yaba dem na wi aduniyan.
5A̱ɗa̱ na yi a̱ta̱m, zuwai ugboji,
a̱ɗa̱ alau, la̱nsa̱i kuyeve.
6Zuwai atsuvu i pana,
adama a na mi ta̱ n ili i singai
i na mi a kudana,
m apuka ta̱ una̱ u va̱ n dansa ili i na yi derere.
7Una̱ u va̱ wi ta̱ a kudansa ukuna u mayun,
adama a na nla̱ba̱ mu una̱ u va̱
n iwan ta̱ ka gbani-gbani.
8Kadanshi ku una̱ u va̱ ra̱ka̱ ku usuɓi kaꞋa,
ko ke te ki punu u vadaluykpi ko ma̱ya̱nsa̱ka̱ ba.
9Ra̱ka̱ vu le i ta̱ e keteshe u vuza vu kuyeve,
i n unushi ba wa aza a na i n kuyeve.
10Zagbai odoki a̱ va̱, a̱ una̱ wa azurufa,
kuyeve kpamu a̱ una̱ wa azanariya,
11adama a na cicoꞋo tsu laꞋa ta̱
atali a singai tsuloboi,
ili yi lo i na a kugisanku n a̱yi ba.
12<<Mpa cicoꞋo, mi ta̱ ida̱shi n ugboji,
mi ta̱ n kuyeve n kukasa kakuna,
13Kupana ku wovon u Ka̱shile,
ɗaɗa vu iwan ka gbani-gbani,
n kovo ta̱ ugbamukaci n a̱ra̱ɗi,
kuyongo ku gbani-gbani,
n kadanshi ka wasasa.
14Kakuna ko odoki n kusheshe ku singai ɗaɗa ka̱ va̱,
mi ta̱ n kuyeve, n utsura.
15N uɓa̱nki u va̱ ɗa ngono mi a kulyaꞋa tsugono,
ayaꞋinfada i a kuzuwa wila̱ wu usuɓi.
16N uɓa̱nki u va̱ ɗa muku mu ngono mi a kulyaꞋa tsugono,
ta feu aza a gbagbaꞋin a na i o tsugono
tsa aduniyan nannai.
17Mi ta̱ a kuciga aza a na i a kuciga mu,
aza a na kpamu i a̱ kula̱nsa̱ mu
i ta̱ a̱ kuciya̱ mu.
18Uciyi n tsugbayin wi ta̱ wa a̱ va̱,
uciyi u ko wannai n ulyaꞋi u kelime.
19Ili i na i kuciya̱ wa̱ a̱ va̱ i laꞋa ta̱ azanariya,
i laꞋa ta̱ azurufa a singai.
20Mi ta̱ a nwalu a uye wu usuɓi,
a uye u na wi mejege,
21e kuneke uciyi wa aza a na a cigai mu,
mi a kuzuwa mpon n le n shana.
22<<Vuzavaguɗu u zuwai mu vuza vu ugiti
a̱ ka̱tsuma̱ ki ili i na u yaꞋin,
kafu ulinga u ni u cau.
23A zuwa mu ta̱ ali n ayin a̱ ugiti,
a̱ ugiti kafu a yaꞋan aduniyan.
24A matsa mu ta̱ kafu mala mu uga̱vi,
makyan ma nanlo babu a̱shi a̱ mini.
25Kafu a zuwa nsansa a̱ ubuta̱ u na i,
kafu aginda ɗa a matsai mu,
26kafu u yaꞋan aduniyan ko akamba
ko kafu u yaꞋan kayala ka aduniyan.
27Mpa lo ayin a na u zuwai gaɗi a̱da̱nga̱shile a̱ ubuta̱ u na i,
a na u ka̱ra̱i uteku u gaɗi m mini ma̱ uga̱vi,
28a na u yaꞋin eleshu gaɗi,
ɗa kpamu u zuwai a̱shi a̱ mini mu uga̱vi,
29a na u zuwakai mala u teku,
adama a na ka̱ta̱ mini ma laza
uteku u na a zuwakai ni ba,
kpamu, ana u varai kumiꞋi ka aduniyan.
30A makyan ma nanlo mpa ɗa keyevi ku ulinga,
mi ta̱ m ma̱za̱nga̱ kanna dem,
makyan dem mi ta̱ a̱ ma̱za̱nga̱ wa̱ ni.
31Mi ta̱ ma̱za̱nga̱ n aduniya a̱ ni ra̱ka̱,
mi ta̱ kpamu a kupana uyoꞋo u vuma.
32<<Gogo na, muku n va̱ panakai mu,
aza a una̱singai a ɗa ele na o tonoi uye u va̱.
33Panai kadanshi ka̱ va̱,
adama a na i ciya̱ cicoꞋo,
ka̱ta̱ i iwan tsu ɗa ba.
34Vuza vu una̱singai ɗa a̱yi na u panakai mu,
wi kashani a ku inda utsutsu u va̱ kanna dem,
a kuvana a̱ utsutsu u kuꞋuwa a kpaꞋa ku va̱.
35Adama a na yaba dem na baci u ciya̱i mu,
u ciya̱ ta̱ wuma.
wi ta̱ a̱ kuciya̱ mapasa ma singai u Vuzavaguɗu.
36Ama yaba dem na baci u kpa̱ɗa̱i kuciya̱ mu,
wu unaku ta̱ ka̱ci ka̱ ni,
vuza na baci dem u iwain mu, u ciga ta̱ ukpa̱.>>
©️2025 Language Development and Translation Initiative (LDTI)