Ansa 6
6
Tsuɓari adama a tsulau
1Maku ma̱ va̱ vu saꞋawa baci ku okpo magan
adama a vuza na yi ida̱shi ɗeɗevu
a̱ ubuta̱ u ku isa kutan?
2Kadanshi ka̱ una̱ ka̱ nu
ka saꞋwa baci ku aza wu,
ko kadanshi ku una̱ u nu ko okpoi nu maza,
3maku ma̱ va̱ yaꞋan kanampa,
adama a na vu uta̱ka̱ ka̱ci ka̱ nu,
ana wo okpoi vu uwa ta̱
ekiye a vuza na yi ida̱shi ɗeɗevu,
bana vu cina yi,
vu ufolu vuza na yi ida̱shi ɗeɗevu.
4Vu sa̱nka̱ ka̱ci ka̱ nu alavu,
ko vu gbaɗika ba ko kenu.
5Utuka̱ ka̱ci ka̱ nu tsu na mesheun
ma̱ tsu laꞋaka e ekiye a katain,
tsu na manunu ma tsu fa̱ta̱tsa̱
e ekiye a vuza vu kutambu.
6Bana a̱ ubuta̱ u ka̱yinga̱nla̱i avu korogo
la̱na̱ uye u ni vu okpo vuza vu cicoꞋo.
7Wi n vuza vu kelime ba,
ko vuzagbayin,
ko vuza vu tsugono,
8n nannai dem u tsu foɓo ta̱
ilikulyaꞋa i ni e kpenle n kpandari,
u tsu ɓolongu ta̱ ilikulyaꞋa i ni
a ayin a vikyaꞋa adama a̱ lyushi.
9Ali n wannai ɗai va kulyaꞋa kelime n ivaꞋin avu korogo?
Wannai ɗai i kujimgba alavu?
10Vu danai, <<YaꞋan n lata kenu,
yaꞋan m gbaɗika kenu,
yaꞋan n keɓe kukyuꞋun mu uvuka kenu.>>
11Ka̱ta̱ tana unambi u ta̱wa̱ wu
an vuza vu ma̱ga̱la̱ka̱,
yali kpamu i ta̱wa̱ wu tsu koboki.
12Vuma vu kavama n vuma vu gbani-gbani,
vuza na u tsu ka̱ra̱sa̱ n kadanshi ka kavama a̱ una̱ u ni,
13vuza na u tsu gipa̱tsa̱ a̱shi a̱ ni,
u ka̱na̱ kuzuwa urotu n ene a̱ ni
a kusapangusu n a̱jivu a̱ ni,
14a̱yi na u tsu sheshe ka gbani-gbani
m ma̱ya̱nsa̱ka̱ a̱ ka̱ɗu ka̱ ni,
a ayin dem u ka̱na̱ kuɗa̱ngusa̱ vishili.
15Adama a nannai kawuya ki ta̱ a̱ kuta̱wa̱ yi n kute,
ki ta̱ a ku una yi gogoꞋo lo ko gitsatsu.
16Ili i ta̱li yi ta̱ lo i na Vuzavaguɗu u kovoi,
ali a kubana i cindere i na yi ili yi unata wa̱ ni,
17Ɗaɗa, kindi ku kugoyi,
N Kelentsu ka aꞋuwa,
N ekiye a na a tsu una aza a babu unushi,
18N ka̱ɗu ka na ka tsu sheshe ka gbani-gbani,
N ene a̱ ufa̱ka̱ a kubana a̱ ubuta̱ u kuyaꞋan ka gbani-gbani,
19M magan ma aꞋuwa vuza na u tsu ka̱na̱ kutsungu aꞋuwa,
N vuza na u tsu ɗa̱ngusa̱ vishili wi itoku i ni.
Tsuɓari adama a tsugbani
20Maku ma̱ va̱, tono kadanshi ke esheku a̱ nu,
ka̱ta̱ kpamu vu ka̱sukpa̱
kuyotsongusu ka̱ a̱na̱ku a̱ nu ba.
21Vu zuwa le a̱ ka̱ɗu ka̱ nu ko wannai,
ka̱ta̱ vu ka̱sukpa̱ le ba ci idolu e.
22Ayin ana baci vi a nwalu,
i ta̱ o kutono n avu,
ayin ana baci vi alavu,
i ta̱ a̱ kula̱na̱ wu,
ayin ana baci vu ɗa̱nga̱i,
i ta̱ a kuyaꞋanka wu kadanshi.
23Adama a na kadanshi ka nampa ma̱kuni maꞋa,
kuyotsongusu ku nampa kpamu kutashi ku ɗa,
kpamu uɓarangi n ugbari
uye u wuma u ɗa,
24i ta̱ e ku ere a maku ma vuka ma kavama,
n una̱ wu uyoꞋo u vuka vu na vi m ma̱riki ba.
25Ka̱ta̱ vu ka̱sukpa̱ ugaꞋin u ni u uwa wu a̱ ka̱ɗu ka̱nu ba,
ko vu ka̱sukpa̱ u uwa wu a̱shi n a̱ nu ba.
26Adama a na kashakanlai
ko tsu bonoko wu ta̱
vishuꞋwan vu uye koci,
vuka vu tsugbani kpamu u tsu tamba ta̱ wuma u nu.
27Vuma wi ta̱ a kufuɗa ku oɓongu akina
o songu akashi a̱ ni ba?
28Vuma wi ta̱ a kufuɗa ku wala
a gaɗi va̱ a̱ga̱ruwa̱shi akina
ene a̱ ni a̱ kpa̱ɗa̱ kukula̱?
29Ta kaꞋa ki nannai u vuza vu na
u vaki n vuka vu vuza vu yoku,
ko vuza u na u kuyaꞋan nannai
ka̱ta̱ u laza gbani.
30Uma o tsu goyoko koboki ba,
ɗa baci u yaꞋin uboki adama kambulu.
31N nannai dem ɗa baci e remei ni,
mayun ɗa u tsupa ili i nanlo kucindere,
ko yi ishi baci o kukotso uciyi u kpaꞋa u ni ra̱ka̱.
32Ama vuza vu na u vaki
n vuka vu vuza vu yoku wi n ugboji ba,
yaba dem na baci u yaꞋin nannai
wi ta̱ a ku una ka̱ci ka̱ ni.
33Kugoyi n ulapi u ɗa upecu u ni,
ka̱ta̱ wo okpo n wono ko wannai.
34Adama a na cisheꞋe
tsu ci ɗa̱ngusa̱ ta̱ wupa u vali,
u tsu sa̱Ꞌa̱ vuza ba
a makyan ma na wi a kutsupa
ili i na a yaꞋankai ni.
35Wi a ku isa katsupu ba,
wi a ku isa kalyaꞋa ba ko ki n a̱bunda̱i.
©️2025 Language Development and Translation Initiative (LDTI)