Ansa 5
5
Tsuɓari adama a tsugbani
1Maku ma̱ va̱, zuwa ugboji a ukuna u cicoꞋo u va̱,
zuwa atsuvu vu pana kadanshi
ka na ki n atakaci e kuyeve,
2adama a na vu lyaꞋa kelime n kusheshe ku singai
una̱ u nu kpamu u foɓo kuyeve.
3Adama a na kashakanlai ki ta̱
n una̱ wu uyoꞋo ci ishigi,
kpamu kadanshi ka̱ ni ka laꞋa ta̱
maniꞋin ma̱ sukuya̱ n leku,
4ama a ukocishi u ni okono a ɗa
tsu mapaɗakutsu,
wi ta̱ n alyu tsu kotokobi ka̱ una̱ u re.
5Vu tonoi baci wi ta̱ a kuɗika wu a kubana ukpisa̱,
idashi i ni yi ta̱ a kubanka wu a kasaun.
6Ili i bura yi n uye u wuma ba,
uye u ni wi magaba ba,
ama u yeve ba.
7Gogo na muku n va̱, panakai mu,
ka̱ta̱ i zuwaka ili i na n danai ɗa̱ kucina̱ ba.
8YaꞋan daꞋangi n uye u ni,
ka̱ta̱ vu bana ɗevu n utsutsu u kpaꞋa ku ni ba,
9adama a na ka̱ta̱ vu neke utsura u nu wa aza yoku ba,
n tsulolobo tsu nu u vuza na wi n asuvayali ba,
10adama a na ka̱ta̱ omoci
a yaꞋan ka̱ɗiva̱ n uciyi u nu ba,
kataci ka̱ nu kpamu ke neke kpaꞋa
ku vuza vu yoku uciyi gbani ba.
11Ka̱ta̱ a ukocishi vu ka̱na̱ ciꞋinki a wuma u ɗa̱,
a makyan ma na mɓa̱la̱ n lyaꞋi inyama n ikyamba i nu.
12Vi ta̱ a kudana,
<<Yiɗa̱i i zuwai ɗa n iwain ugbari?
Yiɗa̱i i zuwai ɗa ka̱ɗu ka̱ va̱ ka iwain kulapulu?
13N zuwa atsuvu a nlum n va̱ ba.
m panaka yi ana i kupiꞋisaka mu ba.
14Ɗanna n yawa ta̱ ɗevu n kukuwa̱,
a̱ ka̱tsa̱ma̱ ko koɓolo ka uma ra̱ka̱.>>
15Yotsongu vuka vu nu ucigi koci
vu pana uyoꞋo u kayinva ka nanlo koci.
16Vi ta̱ a̱ kuka̱sukpa̱ vuka vu nu vu okpo tsu kuyene
ana vali dem wa kubana u kenuku mini ɗe?
17YaꞋan o okpo a̱ nu koci,
adama a na ka̱ta̱ vu pece n omoci ba.
18YaꞋan vuka vu nu
vu okpo vu una̱singai,
yaꞋan ma̱za̱nga̱ n vuka vu nu
vu na vu zuwai avu ka̱ɗa̱nga̱ni.
19UgaꞋin u ku inda an mereꞋe,
yaꞋan mani ma̱ ni ma yawa wu makyan dem,
yaꞋan u lege wu n ucigi u ni.
20Maku ma̱ va̱ yiɗa̱i ɗa va̱ kuka̱sukpa̱ kashakanlai ke lege wu?
Yiɗa̱i ɗa vu ku oɓongu vuka vu vuza vu yoku?
21Adama a na uye u vuma dem wi ta̱
e keteshe e kelime ka Vuzavaguɗu,
u tsu kondo ta̱ uye u ni ra̱ka̱.
22Ka gbani-gbani ka vuma
vu gbani-gbani maza maꞋa wa̱ ni,
unushi u ni a ɗa
a tsu shiya yi kpankpaꞋan.
23Wi ta̱ a̱ kukuwa̱ adama a unambi wu ugbari,
tsulau tsa a̱bunda̱i ci ni ci ta̱
a kuzuwa yi u ka̱sukpa̱ uye.
©️2025 Language Development and Translation Initiative (LDTI)