Jang 4
4
Brah Jê-sus u mei dơur Sa-ma-ri
1Tơt Brah Jê-sus#4:1 Brah Jê-sus: Knông m'baak plơơp 'bian ti laa Brah. gưt kươt bnih Pha-ri-si geh ttang mor Pang chơp wơơt u lơh bap-tem ơk jơrnơ huôih Jang, 2(Ngan lah 'bưn geh nơơm Brah Jê-sus lơh bap-tem, dôh laa bơl jơrnơ Pang ri), 3nei Pang lơơi kwaal Ju-đê plơq siq kwaal Ga-li-lê. 4Dôh Pang phrui han rloot kwaal Sa-ma-ri. 5Bei nei, Pang lôh di poh kwaal Sa-ma-ri ri, chôôl laa Si-kha, dơơh srei pa Ja-kôp ja aan koon nơơm laa Jô-sep. 6Tu nei geh tơrbang Ja-kôp. Đươm han troong bool lgenh, mơ Brah Jê-sus gôq rlu gêêng tơrbang. Plah nei lap tơmlai jmơt baar bêl nar tam.#4:6 S'bt: bêl ttal prau, awap laa bêl klap prau.
7Mbu dơur Sa-ma-ri han gưnh daak. Brah Jê-sus mor n'hai mei dơur: “Aan Hei dan daak ôn.” 8Plah nei, bơl jơrnơ Pang ja han sot u đôôn pook griêng sa. 9Mei dơur Sa-ma-ri mor: “A hay ay laa mbu bnih Jo-thai baah leet dan hei, mbu dơur Sa-ma-ri, aan ôn daak?” (Đươm#4:9 (Đươm... Sa-ma-ri): Knông m'baak plơơp 'bian ti 'bưn geh pal sêr au. bnih Jo-thai ơơm 'bưn geh ta mor n'hai bnih Sa-ma-ri). 10Brah Jê-sus ơh: “Mơq ruh gưt griêng tkôm Brah Ưn ri, u Bnih plah mor n'hai ruh: ‘Aan Hei dan daak ôn’ laa 'bơơn nei jap ngan ruh a kươi dan jjuh Bnih, u Bnih a kươi aan ruh daak rêh.” 11Mei dơur mor: “Ơi ay, ay 'bưn geh pi gưrnưnh, pa tơrbang nei jru, bei nei ay pơih sot a êch daak rêh nei? 12Yau yi bơl hei laa Ja-kôp ja aan bơl hei tơrbang au; nơơm Ja-kôp, bơl koon u pai pơchim bu ri kot ôn a tơrbang au, bei nei ay ttih huôih Ja-kôp neh?” 13Brah Jê-sus ơh: “'Bơơn ôn daak au a kươi nha nh'hiêr nggan, 14dôh 'bơơn ôn daak Hei a kươi aan nei 'bưn khal êch nh'hiêr hôm. Daak Hei aan a kươi but di trôôm daak knông bnih nei, hooch rlaai tơt tut baak rêh yoot yôw.” 15Mei dơur mor: “Ơi ay, dan aan hei daak nei, jah hei 'bưn nh'hiêr u 'bưn geh tơt au gưnh daak hôm.”
16Pang maanh: “Phrui han khuôl sai klau ruh, ja nei plơq kươi u đau.” 17Mei dơur ơh: “Hei 'bưn geh sai klau.” Brah Jê-sus mor: “Ruh lah laah ruh 'bưn geh sai klau laa dip ngan, 18đươm ruh ja geh pram tung sai klau, nha bnih pa ruh geh bei au 'bưn dip laa sai klau ruh; ntil au ruh ja mor ngan.” 19Mei dơur mor: “Ơi ay, hei gưt ay laa mbu grnưt noor. 20Yau yi bơl hei chuh th'bưn a lơ bnơm au, nha bơl ay nei mor laah a poh Jê-ru-sa-lem mơ laa ktôk dip jah chuh th'bưn.” 21Brah Jê-sus ơh: “Au, mei dơur tôw, phrui jơ Hei, bêl êch dơơh tơt, bơl 'bei 'bưn geh chuh th'bưn Bươp a lơ bnơm au paich tu poh Jê-ru-sa-lem hôm. 22Bơl 'bei chuh th'bưn Yaang bơl 'bei 'bưn gưt, nha bơl bơn chuh th'bưn Yaang bơl bơn ja gưt, đươm baak đoh kwaai lôh a bnih Jo-thai. 23Bêl êch dơơh tơt u ja tơt hôm, tơt bơl bnih chuh th'bưn ngan nguôn a kươi chuh th'bưn Bươp dơng chưt nuih u soong klanh; nei laa bơl bnih chuh th'bưn pa Bươp wơng joi. 24Brah Ưn laa wêêng, mơ bơl bnih chuh th'bưn Pang phrui chuh th'bưn dơng chưt nuih u soong klanh#4:24 soong klanh: Paich laa baak ngan nguôn..” 25Mei dơur ơh: “Hei gưt laah Yaang Mê-si-a (rkhech laa Yaang Krist) a kươi lôh. Tơt Pang lôh, Pang a kươi chhuôr aan bơl hei jôm ntil.” 26Brah Jê-sus lah: “Hei, bnih plah mor n'hai ruh au, đươm nơơm laa Yaang nei.”
27Plah nei, bơl jơrnơ lôh. Bu êêng aang tơt sau Pang ta mor n'hai mei dơur; dôh 'bưn mbu 'bơơn ôp: “Yau êch ơơn?” paich laa: “A hay Yau ta mor n'hai mei dơur au?” 28Mei dơur teq drap daak nơơm ri kươi nei han mưt u poh, mor n'hai jôm bnih laah: 29“Phrui han mơq mbu bnih ja mor dip leq sêch ntil ơơn hei ja lơh. Nei 'bưn geh laa Yaang Krist laang?” 30Bu sot rlach poh u lôh n'hai Brah Jê-sus.
31Knông plah nei, bơl jơrnơ jjuh leh Pang: “Ơi Yau, phrui sa ơơi.” 32Dôh Pang ơh: “Hei geh griêng sa jah sa pa bơl 'bei 'bưn gưt.” 33Đươm nei, bơl jơrnơ mor tơrnang nơơm: “Geh 'bơơn ja liêu ơơn aan Pang sa pan?” 34Brah Jê-sus mor n'hai bu: “Griêng sa Hei ri laa lơh tênh rnđêch Yaang ja maanh Hei, u lơh sơp kaar Pang ri. 35'Bưn geh bơl 'bei mor: ‘Nha puôn khay dơq laa tơt khal kach laang?’ Dôh Hei mor n'hai bơl 'bei: ‘Phrui nggơơr mat u mơq pal srei u ndum paal#4:35 S'bt: ja book. riêp ơơm aan khal kach. 36Bnih kach pơih prak lơh kaar u pơrgum dơơm griêng pkao aan baak rêh yoot yôw, jah leq bnih tam leq bnih kach kot broh s'bai.’ 37A ktôk au, ndroong mor: ‘Bnih au siêm, bnih tôw kach,’ laa dip đat. 38Hei ja maanh bơl 'bei kach ntil ơơn bơn 'bưn geh lơh rngiêl. Bơl bnih nday ja lơh rngiêl, nha bơl 'bei nei mưt ta toon baak kro bu ri.”
39Ơk bnih a poh Sa-ma-ri nei jơ Pang, đươm mei dơur ja lơh ndraanh laah: “Pang ja mor leq jôm ntil hei ja lơh.” 40Đươm bei nei, tơt lôh n'hai Pang, bơl bnih Sa-ma-ri dan Pang gôq kươi n'hai bu, u Pang gôq kươi a nei baar nar. 41Rlach baak Pang ri, nak bnih jơ ơk huôih nha. 42Bu mor n'hai mei dơur laah: “Bei au 'bưn chkhôm ntil ơơn ruh phrui mor jah bơl hei jơ, đươm nơơm bơl hei ja ttang, u gưt laah Pang laa Brah Đoh ngan swich teh ri.”
Brah Jê-sus tơmbah koon klau mbu yau kan ttih
43Baar nar kơơi, Brah Jê-sus lơơi ktôk nei, han tơt kwaal Ga-li-lê. 44(Đươm nơơm Pang ja laah plak, grnưt noor 'bưn kươt bu đing knông ktôk poh bri nơơm).#Mat 13:57; Mak 6:4; Lu 4:24. 45Tơt lôh kwaal Ga-li-lê, Pang kươt raih Ga-li-lê wơơt, đươm bu ja sau leq sêch ntil ơơn Pang ja lơh tu poh Jê-ru-sa-lem lap nar ryơơng, đươm nơơm bu kot joq han ryơơng.#Ja 2:23.
46Bei nei, Pang plơq kơơi Ka-na knông kwaal Ga-li-lê, ktôk Pang r'bian daak but bih. Di mbu yau kan ttih knông mbaang snđach tu Ka-bê-na-um geh koon klau lôh pơrtanh.#Ja 2:1-11. 47Tơt yau kan ttih au ttang Brah Jê-sus a Ju-đê tơt Ga-li-lê nei wơng Pang, u jjuh dan Pang han tơmbah pơrtanh aan koon nơơm đươm bu êch dơơh chhưt. 48Brah Jê-sus mor n'hai yau kan ttih laah: “Mơq 'bưn sau ntil chmlih chmleek u rƀon rƀian, nei bơl 'bei 'bưn geh jơ!” 49Yau kan ttih ơh: “Smbah Brah, dan han noor koon hei ndah chhưt!” 50Brah Jê-sus maanh: “Phrui han, koon 'bei a kươi rêh.” Yau kan ttih jơ baak Brah Jê-sus mor n'hai nơơm bu u han. 51Tơt bu plah han, bơl dêch bu ri han a mơp u mor: “Koon klau nnơơm ri rêh!” 52Yau kan ttih ôp bu koon ay ja baaq lap bêl êch. Bu ơh: “Nar bnau, lap tơmlai di bêl mau,#4:52 S'bt: bêl ttal poh, awap laa bêl klap poh. bu leq pơrtanh.” 53Bnih bươp gưt nei đươm laa bêl Brah Jê-sus ja maanh bơn laah: “Koon 'bei ri a kươi rêh;” mơ nơơm bu, u leq di nhi kot jơ. 54Au laa chmlih chmleek ttal baar Brah Jê-sus ja lơh, di kươi Pang a Ju-đê siq Ga-li-lê.
Právě zvoleno:
Jang 4: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.
