Kênh Kaar 27
27
Phao-lô han tơt Rô-ma
1Tơt ja rwach aan bơl hei han troong rmưt rlai rlach I-ta-li-a nei bu ndơơp Phao-lô u pal bnih gôq khaam nday aan mbu kan bôôk raanh chhak Ju-lơ, klung lênh phung mbaang snđach Au-gut-tơ. 2Bơl hei jưr teq u di mlơm sbau a A-tra-mit êch dơơh han tơt pal ktôk sbau rgoq kơh daak rmưt A-si-a, n'hai bơl hei sot daak rmưt. A-ri-tak, bnih Ma-sê-đô-ni-a gôq Tê-sa-lô-ni-ka, han pôl n'hai bơl hei. 3Nar a ôi, bơl hei han tơt Si-đôn; Ju-lơ gôq dơq lmơơi n'hai Phao-lô, aan ch'bap bu han nhjook bơl gnasaal u jah aan bu pơn ei bu. 4Ja nei a ktôk nei, bơl hei jưr u sbau han tênh dơơh bơr gguônh Sip, đươm khal au chaal nkup. 5Di kươi chloong rlach kwaal daak rmưt Si-li-si u Pam-phi-li, bơl hei lôh Mi-ra, klung Li-si-a. 6A nei, kan bôôk raanh sau geh di mlơm sbau a A-lek-san-đơ-ri-a han rloot I-ta-li-a mơ aan bơl hei jưr sbau nei. 7Sbau han ndrach knông ơk nar u phrui bool hưl đat mơ lôh dơơh poh Kơ-nit. Đươm chaal nkup 'bưn aan ch'bap sbau ndih han ngngai huôih, mơ bơl hei jhiat dơơh kơh gguônh Kơ-rêt, han rloot Sa-môn. 8Bơl hei han rgoq tênh kơh rmưt rlai n'hai ơk kro rngiêl u tơt di ktôk chôôl laa Krpal Klanh, dơơh poh La-sê.
9Bơl hei ja saap ơk nar khay u rơn han but ap êêng đươm ja rlach jơl Ơt jrơng,#27:9 jơl Ơt jrơng: Au lah nar ryơơng doh dôih maanh lơh mưt ptut khay sưn rnđơơih a bôôk khay jmơt, lah plah nar khay ap mơ han rmưt rlai đat ap êêng. mơ Phao-lô buôi bu 10laah: “Ơi bơl ay, hei sau rơn han au a kươi mơp ap êêng u khuit khwait tih, 'bưn dơơn aan griêng grau u sbau baah leq tơt sm'boh rêh bơl bơn hih.” 11Dôh kan bôôk raanh jơ baak bnih chưphơ sbau u nnơơm sbau huôih laa baak Phao-lô mor. 12Đươm ktôk sbau nei 'bưn rhơi aan rpal srung khal chaal puh mơ ơk nak kot chuh rnđêch mơ du rlach nei; n'hai jôm ndroong, phrui han tơt Phê-nit laa krpal gguônh Kơ-rêt ri, teq u r'bong nhơp nar tơơm bri u nhơp nar chông bri, jah rlu khal chaal puh a nei. 13Tơt chaal tơơm bri ptơơm khôm dêq, bu kơn ơơn awap lơh tênh kươt sơmlap mơ đook kơt kkôn u han rgoq tênh gguônh Kơ-rêt.
Dol chaal n'hai a trơp sbau
14Dôh 'bưn nhjok ơơm, di chaal kuông chôôl laa Ơ-ra-ki-lon a lơ gguônh mrah u teh. 15Sbau dol truôi u 'bưn geh ta wal moh n'hai kmlang chaal mơ bơl hei chhơi teq êêng aan bu truôi. 16Tơt sbau truôi rlach mak tơơm bri di gguônh dêq chôôl laa Kơ-lô-đa ri, bơl hei phrui bool rngiêl đat mơ kray kươt mlơm duuk đoh rêh. 17Di kươi têêk duuk hao, bu nhôq chhei kaap kơt jap rlum sbau; ja nei đươm n'hông ayơơt u bơr lơ kwaal Si-rơ-tơ mơ bu nhjur knat bla u teh, teq êêng aan chaal liêu han. 18Nar a ôi, chaal kuông nha ndih khôm kơndang mơ bu ptơơm jang griêng grau u teh rmưt rlai. 19Nar a ôi, ti nơơm bu jang êêng pal griêng lơ sbau u teh rmưt rlai. 20Knông rluôt ơk nar, 'bưn geh mat nar kot 'bưn geh smanh ơơn lôh sot, u chaal kuông nei khang khôm kơndang. Ptut, bơl hei 'bưn nh'ơơm kơndưng kươt đoh hôm.
21Đươm bu ơt nh'hit u jook nar, mơ Phao-lô ta yoong gôq klung bu u mor: “Ơi bơl ay, mơq noor n'au bơl ay iat baak hei, khơơm du rlach gguônh Kơ-rêt nei bơl bơn ja het kươt khuit khwait u saap griêng au. 22Dôh khal au, hei buôi bơl ay phrui jap chưt; knông bơl bu 'bưn 'bơơn khuich sak leq, dơơn saap sbau ei! 23Đươm mang rlach, mbu lênh brah Brah Ưn ri, hei pơơn teq u Yaang n'hai jraih kaar, ja lôh tơt n'hai hei u lah: 24‘Ơi Phao-lô, khơơm n'hông! Koon phrui dơk di mat Sê-sa; u au, Brah Ưn ja ươn koon leq sêch bơl bnih han pôl sbau n'hai koon.’ 25Bei nei dan bơl ay phrui jap chưt, đươm hei jơ jap ktôk Brah Ưn laah ntil nei a kươi lôh tơt dip bei baak Pang ja lah. 26Dôh jap ngan bơl bơn a kươi dol a truôi teq u di gguônh ơơn tôw.”
27Ja tơt mang ttal jmơt puôn baah bơl hei nha nang tơq nang tơr lơ rmưt rlai A-đơ-ri-a-tich. Mưt plah nggơl mang, bơl bnih lơ sbau kơn ơơn laah bu plah han dơơh teh kơh. 28Bu krôih chhei weh u teh nei sau jru baar jơt laaih; han ngngai di ndêq dơq, bu leet krôih chhei weh nei sau jmơt pram laaih. 29Khal au, n'hông chơm ktôk geh tmau mơ bu a maq ttiêng sbau krôih puôn kơt kkôn u teh, u dan ndưng aan trôôk gway aang. 30Dôh đươm bơl bnih lơ sbau plah wơng ndroong kup rlach sbau mơ krôih mlơm duuk u teh rmưt rlai, tak lah han krôih kơt kkôn a bôôk bơr sbau. 31Nei mơ, Phao-lô mor n'hai kan bôôk raanh u lênh traang: “Bơl ay 'bưn geh kươt đoh rôih, khal êch bơl bnih au khang gôq knông sbau.” 32Khal au, bơl lênh traang grach chhei kơt mlơm duuk nei, aan bu a tup u teh. 33Tơt trôôk êch dơơh aang, Phao-lô buôi jôm bnih phrui sa. Bu mor: “Bơl ay ja cham ndưng yoot jmơt puôn nar, ơt nh'hit 'bưn sôông ndêq pau ơơm. 34Bei nei, hei buôi bơl ay phrui sôông jah sm'boh rêh bei ơơm đươm 'bưn di kong chhok êch lơ bôôk bơl ay a kươi saap laang.” 35Ja mor, Phao-lô pơih nom, ta yoong di mat jôm bnih, or Brah Ưn, ja nei pak u ptơơm sa. 36Khal au jôm bnih kươt trôih trôl u kot sôông sa. 37Bơl hei geh leq sêch baar riêng poh jơt prau#27:37 baar riêng poh jơt prau: Knông m'baak plơơp 'bian ti laatơmlai poh jơt prau. bnih knông sbau. 38Di kươi sa bơm hơơm, bu jang ba uôi jưr daak rmưt, lơh aan hôông sbau.
39Tơt aang, bu 'bưn grnưt laa steh êch, dôh sau geh chhuôit n'hai chhaih daak rmưt mơ joq waat mơq awap nei aan sbau yeh teq u kơh. 40Bei nei, bu gơrwat chhei kơt kkôn teq u rmưt rlai, n'hai nei doh chhei kơt kong chưphơ; ja nei bu lơơk knat bla tênh troong chaal, tuôt song teq u kơh. 41Dôh sbau tuôt chơm geh chhech rka ruk mơ dol a yơơt. Bôôk sbau jlơp u teh rka gôq khơơm, nha ttiêng sbau nei dol kmbuôl pơm 'bơh hach leq. 42Khal au bơl lênh êch lưm leq sêch bnih gôq khaam jah 'bưn di mbu 'bơơn awap rei teq u kơh u kup rlach. 43Dôh kan bôôk raanh êch đoh Phao-lô mơ pơrkhaang rnđêch nei. Bu maanh aan 'bơơn gưt rei nei njroh noor u rei teq u kơh; 44nak nha ơơm tênh a kươi, bnih nei rei lơ kơđaar, bnih nei ut kơđaar a chah sbau ri. Nei laa jôm bnih kot kươt hao kơh sroong.
Právě zvoleno:
Kênh Kaar 27: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.
Kênh Kaar 27
27
Phao-lô han tơt Rô-ma
1Tơt ja rwach aan bơl hei han troong rmưt rlai rlach I-ta-li-a nei bu ndơơp Phao-lô u pal bnih gôq khaam nday aan mbu kan bôôk raanh chhak Ju-lơ, klung lênh phung mbaang snđach Au-gut-tơ. 2Bơl hei jưr teq u di mlơm sbau a A-tra-mit êch dơơh han tơt pal ktôk sbau rgoq kơh daak rmưt A-si-a, n'hai bơl hei sot daak rmưt. A-ri-tak, bnih Ma-sê-đô-ni-a gôq Tê-sa-lô-ni-ka, han pôl n'hai bơl hei. 3Nar a ôi, bơl hei han tơt Si-đôn; Ju-lơ gôq dơq lmơơi n'hai Phao-lô, aan ch'bap bu han nhjook bơl gnasaal u jah aan bu pơn ei bu. 4Ja nei a ktôk nei, bơl hei jưr u sbau han tênh dơơh bơr gguônh Sip, đươm khal au chaal nkup. 5Di kươi chloong rlach kwaal daak rmưt Si-li-si u Pam-phi-li, bơl hei lôh Mi-ra, klung Li-si-a. 6A nei, kan bôôk raanh sau geh di mlơm sbau a A-lek-san-đơ-ri-a han rloot I-ta-li-a mơ aan bơl hei jưr sbau nei. 7Sbau han ndrach knông ơk nar u phrui bool hưl đat mơ lôh dơơh poh Kơ-nit. Đươm chaal nkup 'bưn aan ch'bap sbau ndih han ngngai huôih, mơ bơl hei jhiat dơơh kơh gguônh Kơ-rêt, han rloot Sa-môn. 8Bơl hei han rgoq tênh kơh rmưt rlai n'hai ơk kro rngiêl u tơt di ktôk chôôl laa Krpal Klanh, dơơh poh La-sê.
9Bơl hei ja saap ơk nar khay u rơn han but ap êêng đươm ja rlach jơl Ơt jrơng,#27:9 jơl Ơt jrơng: Au lah nar ryơơng doh dôih maanh lơh mưt ptut khay sưn rnđơơih a bôôk khay jmơt, lah plah nar khay ap mơ han rmưt rlai đat ap êêng. mơ Phao-lô buôi bu 10laah: “Ơi bơl ay, hei sau rơn han au a kươi mơp ap êêng u khuit khwait tih, 'bưn dơơn aan griêng grau u sbau baah leq tơt sm'boh rêh bơl bơn hih.” 11Dôh kan bôôk raanh jơ baak bnih chưphơ sbau u nnơơm sbau huôih laa baak Phao-lô mor. 12Đươm ktôk sbau nei 'bưn rhơi aan rpal srung khal chaal puh mơ ơk nak kot chuh rnđêch mơ du rlach nei; n'hai jôm ndroong, phrui han tơt Phê-nit laa krpal gguônh Kơ-rêt ri, teq u r'bong nhơp nar tơơm bri u nhơp nar chông bri, jah rlu khal chaal puh a nei. 13Tơt chaal tơơm bri ptơơm khôm dêq, bu kơn ơơn awap lơh tênh kươt sơmlap mơ đook kơt kkôn u han rgoq tênh gguônh Kơ-rêt.
Dol chaal n'hai a trơp sbau
14Dôh 'bưn nhjok ơơm, di chaal kuông chôôl laa Ơ-ra-ki-lon a lơ gguônh mrah u teh. 15Sbau dol truôi u 'bưn geh ta wal moh n'hai kmlang chaal mơ bơl hei chhơi teq êêng aan bu truôi. 16Tơt sbau truôi rlach mak tơơm bri di gguônh dêq chôôl laa Kơ-lô-đa ri, bơl hei phrui bool rngiêl đat mơ kray kươt mlơm duuk đoh rêh. 17Di kươi têêk duuk hao, bu nhôq chhei kaap kơt jap rlum sbau; ja nei đươm n'hông ayơơt u bơr lơ kwaal Si-rơ-tơ mơ bu nhjur knat bla u teh, teq êêng aan chaal liêu han. 18Nar a ôi, chaal kuông nha ndih khôm kơndang mơ bu ptơơm jang griêng grau u teh rmưt rlai. 19Nar a ôi, ti nơơm bu jang êêng pal griêng lơ sbau u teh rmưt rlai. 20Knông rluôt ơk nar, 'bưn geh mat nar kot 'bưn geh smanh ơơn lôh sot, u chaal kuông nei khang khôm kơndang. Ptut, bơl hei 'bưn nh'ơơm kơndưng kươt đoh hôm.
21Đươm bu ơt nh'hit u jook nar, mơ Phao-lô ta yoong gôq klung bu u mor: “Ơi bơl ay, mơq noor n'au bơl ay iat baak hei, khơơm du rlach gguônh Kơ-rêt nei bơl bơn ja het kươt khuit khwait u saap griêng au. 22Dôh khal au, hei buôi bơl ay phrui jap chưt; knông bơl bu 'bưn 'bơơn khuich sak leq, dơơn saap sbau ei! 23Đươm mang rlach, mbu lênh brah Brah Ưn ri, hei pơơn teq u Yaang n'hai jraih kaar, ja lôh tơt n'hai hei u lah: 24‘Ơi Phao-lô, khơơm n'hông! Koon phrui dơk di mat Sê-sa; u au, Brah Ưn ja ươn koon leq sêch bơl bnih han pôl sbau n'hai koon.’ 25Bei nei dan bơl ay phrui jap chưt, đươm hei jơ jap ktôk Brah Ưn laah ntil nei a kươi lôh tơt dip bei baak Pang ja lah. 26Dôh jap ngan bơl bơn a kươi dol a truôi teq u di gguônh ơơn tôw.”
27Ja tơt mang ttal jmơt puôn baah bơl hei nha nang tơq nang tơr lơ rmưt rlai A-đơ-ri-a-tich. Mưt plah nggơl mang, bơl bnih lơ sbau kơn ơơn laah bu plah han dơơh teh kơh. 28Bu krôih chhei weh u teh nei sau jru baar jơt laaih; han ngngai di ndêq dơq, bu leet krôih chhei weh nei sau jmơt pram laaih. 29Khal au, n'hông chơm ktôk geh tmau mơ bu a maq ttiêng sbau krôih puôn kơt kkôn u teh, u dan ndưng aan trôôk gway aang. 30Dôh đươm bơl bnih lơ sbau plah wơng ndroong kup rlach sbau mơ krôih mlơm duuk u teh rmưt rlai, tak lah han krôih kơt kkôn a bôôk bơr sbau. 31Nei mơ, Phao-lô mor n'hai kan bôôk raanh u lênh traang: “Bơl ay 'bưn geh kươt đoh rôih, khal êch bơl bnih au khang gôq knông sbau.” 32Khal au, bơl lênh traang grach chhei kơt mlơm duuk nei, aan bu a tup u teh. 33Tơt trôôk êch dơơh aang, Phao-lô buôi jôm bnih phrui sa. Bu mor: “Bơl ay ja cham ndưng yoot jmơt puôn nar, ơt nh'hit 'bưn sôông ndêq pau ơơm. 34Bei nei, hei buôi bơl ay phrui sôông jah sm'boh rêh bei ơơm đươm 'bưn di kong chhok êch lơ bôôk bơl ay a kươi saap laang.” 35Ja mor, Phao-lô pơih nom, ta yoong di mat jôm bnih, or Brah Ưn, ja nei pak u ptơơm sa. 36Khal au jôm bnih kươt trôih trôl u kot sôông sa. 37Bơl hei geh leq sêch baar riêng poh jơt prau#27:37 baar riêng poh jơt prau: Knông m'baak plơơp 'bian ti laatơmlai poh jơt prau. bnih knông sbau. 38Di kươi sa bơm hơơm, bu jang ba uôi jưr daak rmưt, lơh aan hôông sbau.
39Tơt aang, bu 'bưn grnưt laa steh êch, dôh sau geh chhuôit n'hai chhaih daak rmưt mơ joq waat mơq awap nei aan sbau yeh teq u kơh. 40Bei nei, bu gơrwat chhei kơt kkôn teq u rmưt rlai, n'hai nei doh chhei kơt kong chưphơ; ja nei bu lơơk knat bla tênh troong chaal, tuôt song teq u kơh. 41Dôh sbau tuôt chơm geh chhech rka ruk mơ dol a yơơt. Bôôk sbau jlơp u teh rka gôq khơơm, nha ttiêng sbau nei dol kmbuôl pơm 'bơh hach leq. 42Khal au bơl lênh êch lưm leq sêch bnih gôq khaam jah 'bưn di mbu 'bơơn awap rei teq u kơh u kup rlach. 43Dôh kan bôôk raanh êch đoh Phao-lô mơ pơrkhaang rnđêch nei. Bu maanh aan 'bơơn gưt rei nei njroh noor u rei teq u kơh; 44nak nha ơơm tênh a kươi, bnih nei rei lơ kơđaar, bnih nei ut kơđaar a chah sbau ri. Nei laa jôm bnih kot kươt hao kơh sroong.
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.