I Kô-rinh-tô 1
1
I. Pơơk baak
(1:1-9)
Baak pơơn teq u chah nhjook
1Phao-lô, đươm rnđêch Brah Ưn ri, kươt khuôl lơh jơt jơng Yaang Krist Jê-sus ri, pôl n'hai Sôt-then, oh bi bơl bơn, 2dan piyơ Phung Jrah Brah Ưn tu Kô-rinh-tô u bơl bnih ja kươt jhut rao knông Yaang Krist Jê-sus, kươt chôôl laa koon sơih, pôl n'hai leq sêch bơl bnih gôq jôm ktôk plah khuôl duôn saak Brah bơl bơn laa Brah Jê-sus Krist, Brah bu ri n'hai bơl bơn ri.#Kênh 18:1. 3R'bon dan Brah Ưn, Bươp bơl bơn, u Brah laa Brah Jê-sus Krist ươn brêêng smlaang u sroong boong aan oh bi.
Baak or gun
4Hei or gun Brah Ưn yoot đươm oh bi, đươm brêêng smlaang Pang ja ươn oh bi knông Yaang Krist Jê-sus; 5đươm knông Pang, oh bi kươt ơk m'bơt mbơl teq u jôm ndroong, leq baak mor tơt gưt jhai — 6bei baak lơh ndraanh teq u Yaang Krist kot kươt plak knông oh bi — 7jah oh bi 'bưn khwaq paich baak smlaang wêêng yaang êch, knông plah cham baak lôh sot Brah bơl bơn ri laa Brah Jê-sus Krist. 8Brah Ưn a kươi ơn oh bi jap juôn aan tơt ptut, jah 'bưn dol têh buôi knông nar Brah bơl bơn ri laa Brah Jê-sus Krist. 9Brah Ưn laa Yaang pleh tur; Pang ja khuôl oh bi mưt u baak ta glơm n'hai Koon Pang laa Brah Jê-sus Krist, Brah bơl bơn.
II. Kơrleet u ryơơng ap knông Phung Jrah Kô-rinh-tô
(1:10 – 6:20)
Ta sruôl knông Yaang Krist
10Ơi oh bi, tơmoh chhak Brah bơl bơn laa Brah Jê-sus Krist, hei buôi leq sêch oh bi phrui mlơm baak mor, jah knông oh bi 'bưn geh baak pơrlang khach, baah ta sruôl n'hai knông chưt gơrninh u ndroong. 11Ơi oh bi, bnih nhi Kơ-lô-ê geh mbơh aan hei gưt laah knông oh bi geh baak ta tau. 12Ntil hei êch mor laa jôm bnih knông oh bi kot mor: “Hei pơơn teq u Phao-lô;” paich: “Hei pơơn teq u A-pô-lô;” paich: “Hei pơơn teq u Sê-pha;”#1:12 Sê-pha: Au lah chhak Phi-e-rơ knông baak A-ram. paich: “hei pơơn teq u Yaang Krist.”#Kênh 18:24. 13Yaang Krist ja dol ta koh hơơi laang?#1:13 Yaang Krist ja dol ta koh hơơi laang? Knông m'baak plơơp 'bian ti lah: Nei hơơi, Yaang Krist 'bưn dol ta koh. Geh lah Phao-lô ja dol pơng đênh teq u chhư rglaang đươm oh bi 'bưn? Paich geh lah oh bi tơmoh chhak Phao-lô baah dol bap-tem 'bưn? 14Hei or gun Brah Ưn đươm êêng Kơ-rit-pu u Gai-ut, hei ndah ơm lơh bap-tem aan mbu 'bơơn knông oh bi,#Kênh 18:8; 19:29; Rô 16:23. 15jah 'bưn 'bơơn awap geh mor laah oh bi ja tơmoh chhak hei dol bap-tem. 16Hei kot ja lơh bap-tem aan nhi nak Sê-pha-na. Êêng nha, hei 'bưn gênh nơơm ja lơh bap-tem aan 'bơơn nday.#I Kô 16:15. 17Đươm Yaang Krist 'bưn maanh hei lôh jah lơh bap-tem dôh jah chhuôr Baak Sroong Klanh, 'bưn geh dơng jhai mor rmach klech rmeh, daq dang kmheng chhư rglaang Yaang Krist ri a kươi but 'bưn preh pan.
Baak jhai rpech swich teh ri u chhư rglaang
18Đươm baak preh chhư rglaang ri teq u bơl bnih khuich saap lah wơơng pniêm; dôh n'hai bơl bơn, bơl bnih kươt đoh kwaai, nei laa dang kmheng Brah Ưn ri. 19Đươm geh baak 'bian:
“Hei a kươi kruit baak jhai blau bnih jhai blau ri,
Luôch baak jhai rpech bnih jhai rpech ri.”
20Bnih jhai rpech a êch? Bơl yau gưt jhai a êch? Bơl bnih ta tau klap au ri a êch? 'Bưn geh Brah Ưn ja lơh aan baak jhai rpech swich teh ri sot wơơng pniêm laang? 21Đươm Brah Ưn, đươm baak jhai rpech Pang ri, jah lơh swich teh 'bưn geh nhôq jhai rpech êêng nơơm ri jah gưt jhai Pang, mơ Pang broh chưt nhôq baak chhuôr dol mơq laa wơơng pniêm bơl bơn ri jah đoh bơl bnih jơ. 22Knông plah bnih Jo-thai dơrnan chmlih chmleek, bnih Hi-lap wơng joi baak jhai rpech 23nei bơl hei chhuôr Yaang Krist dol pơng đênh teq u chhư rglaang, ntil pa bnih Jo-thai aan laa tih, nha bnih nggoor agaih aan laa wơơng pniêm. 24Dôh teq u bơl bnih kươt khuôl duôn, leq bnih Jo-thai u bnih Hi-lap, nei Yaang Krist laa dang kmheng n'hai baak jhai rpech Brah Ưn ri. 25Đươm ntil mơq bei wơơng pniêm Brah Ưn ri nha jhai rpech huôih koon bnih; ntil mơq bei lhok lhơơi Brah Ưn ri nha dang huôih koon bnih.
26Ơi oh bi, phrui gênh plah oh bi kươt khuôl duôn, knông oh bi 'bưn geh pal bnih jhai blau tênh lpaat klap au, 'bưn sau 'bơơn geh dal kmheng, kot 'bưn geh sau bnih lah mbaang prêh thlay. 27Dôh Brah Ưn ja sach pal ntil kơrlung kơrlong a swich teh jah lơh prêêng mat bơl bnih jhai blau; Brah Ưn ja sach ntil ơơn lhok lhơơi a swich teh jah lơh prêêng mat bơl bnih moh dang. 28Brah Ưn ja sach ntil ơơn 'bưn sơnơ, dol đam điêl a swich teh, leq ntil ơơn 'bưn geh, jah aan ntil ơơn ja geh sot khuich khwait, 29jah 'bưn mbu bnih êch awap pn'hal di mat Brah Ưn. 30Paan chkhôm Pang baah oh bi kươt gôq knông Yaang Krist Jê-sus, Yaang pa Brah Ưn ja lơh but baak jhai rpech, sêch song, sêch jrah u baak đoh kwaai aan bơl bơn; 31nei mơ, bei baak ja 'bian:
“'Bơơn a uôt, phrui a uôt knông Brah.”
Právě zvoleno:
I Kô-rinh-tô 1: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.