ମାର୍କ 11
11
ଜିସୁ ଜିରୁସାଲମ ହାଲ୍ବନ୍
(ମାତିଉ ୨୧:୧–୧୧; ଲୁକ ୧୯:୨୮–୪୦; ଜହନ ୧୨:୧୨–୧୯)
1ଏଚ୍ଚିକିଃଆ ଏୱାରି ଜିରୁସାଲମ ରେଃଏସ୍ତି ଜିତ ହରୁ ଟାକ୍କେ ମାନ୍ନି ବେତ୍ପାଗି ଅଟେ ବେତନିଆ ରେଃଏସ୍ ଏତେରି । ଏମ୍ବାଟି ଏୱାଞ୍ଜି ତା ଗ୍ରାମ୍ୱାଗାଟାରି ତାୱାଟି ରିଃଆରିକି ଇ କାତା ୱେସାନ୍ ପାଣ୍ଡିତେଞ୍ଜି, 2ମି ନକେସ୍ ମାନ୍ନି ଏ ନାଜୁଇନ୍ଦା ହାଜ୍ଜୁ; ଏଚ୍ଚିକିଃଆ ମିରୁ ଏଦିମ୍ୱା ଏଦ୍ଦେରି ଏଚିୱାଡ଼େ, ଇନ୍ଦାର୍ କୁଃଏଟି ଏମ୍ୱେ ଏଚ୍ଚେକ୍ କକ୍ଚ୍ଚାହେଃଲ୍ଲେରି, ଇହିଙ୍ଗ୍ତି ଗଦ ଡେଗେଲ୍ ଗାସାନ୍ ମାନ୍ନାଦାଃଆ ହୁଡ଼ିଦେରି; ଏଦା ୱ୍ରିକ୍ଚ୍ଚାନ୍ ତାଚ୍ଚିୱାଦୁ । 3ଆଟେ ଜଦି ଏମ୍ୱେ ମିଙ୍ଗେ ଇନାକିଅନ୍ ଇଦା ଅଇଞ୍ଜେରି ଇଞ୍ଜାନ୍ ୱେଞ୍ଜାତେସି, ତାଙ୍ଗେ ୱେସ୍ଦେରି, “ଇଦି ଦାର୍ମୁ ବାଗା ଆବସକ ମାନ୍ନେ,” ଆଟେ ଏୱାଞ୍ଜି ଏଦା ଏଚିୱାଡ଼େ କାର୍ବେକ୍ ପାଣ୍ଡିଦାନେଞ୍ଜି ।
4ଏୱାର୍ ହାଜ୍ଜାନାହି ଦାରା ଟାକ୍କେ ଆଟେଲ୍ତାୱା ରଣ୍ଡା ଗଦ ଡେଗେଲ୍ତିଦି ଗାସାନ୍ନାଦାଃଆ ହୁଡ଼ାନ୍ ଏଦା ୱ୍ରିକ୍ତେରି । 5ଏମ୍ୱାଟି ଏଦିମ୍ୱା ଡିଡ୍ଡାଚି ତୁଲ୍ଲେ ଦାଲ୍ଲା ଏୱାରିକି ୱେଚ୍ଚେରି, “ଗଦ ଡଟିତିଦି ୱ୍ରିକ୍ଚ୍ଚାନ୍ ଇନ୍ନା କିଞ୍ଜେରି ?”
6ଜିସୁ ଇନିସ୍ ୱେସାଚ୍ଚେଞ୍ଜି, ଏୱାରି ଏଚିଡେହେଙ୍ଗ୍ ଏୱାରିକି ୱେସ୍ତେରି; ଏମ୍ବାଟି ଏୱାରି ପିହ୍ତେରି । 7ଜିସୁ ରେଃଏସ୍ ଗଦ ଡେଗେଲ୍ ତାଚ୍ଚିୱାତେରି, ଏ ଗଦ କୁଃଏଟି ତା ତା ଜିରାଙ୍ଗ୍ ପାସାହିତେରି, ଆଟେ ଏୱାଞ୍ଜି ତା କୁଃଏଟି କକ୍ତେଞ୍ଜି । 8ଆଟେ ଏଗେଲ୍ ଦାଲ୍ଲା ଗିଜ୍ଜୁତାୱା ତା ତା ଜିରାଙ୍ଗ୍ ପାହେର୍ତାୱା ପାସାହିତେରି ଅଟେ ତୁଲ୍ଲେ ଦାଲ୍ଲା ଆକା ଡେଲଙ୍ଗ୍ କାତାନ୍ ତାଚ୍ଚାନ୍ ପାସାହିତେରି । 9ଆଟେ ନକେସ୍ ବେତଟ୍ ମାଚ୍ଚି ଦାଲ୍ଲା ଏଗେଲ୍ ଗଜେଲ୍ ଆନ୍ ୱେସ୍ପନ୍ ମ୍ରାସ୍ତେରି, ହସାନ୍ନା ! ଦାର୍ମୁ ପାରୁଟି ଏମ୍ୱେନାଞ୍ଜି ୱାଇନ୍ନେଞ୍ଜି, ଏୱାଞ୍ଜି ଦନ୍ୟ ଆପାକାଞ୍ଜି ! 10ମୁଲାପେନୁ ମା ଜୁଜୁଆକେ ଦାଉଦତି ୱାଇନି ରାଜିତିଦି ମେଲା କିନେଞ୍ଜି ! ସର୍ଗତାୱା ମାନ୍ନି ମୁଲାପେନୁତି ହସାନ୍ନା !
11ଡେଗ୍ଗା ଏୱାଞ୍ଜି ଜିରୁସାଲମତାୱା ୱାନାହି ମନ୍ଦିରତାୱା ହଟେଞ୍ଜି, ଆଟେ ଗୁଞ୍ଜେର୍ତି ହାବେତ୍ କୁଲା ନେହେନ୍ ହୁଡ଼ାନାହି ମିଡ୍ଡଡ଼୍ ଆଅନେଃଏ ବାରାଗାଣ୍ଡି ଡ଼ାହି ବେତନିଆଇନ୍ଦା ହଚାନ୍ ହାଚ୍ଚେଞ୍ଜି ।
ତଗା ମ୍ରାନୁତିଦି ଜିସୁତି ୱ୍ଲିପା
(ମାତିଉ ୨୧:୧୮–୧୯)
12ଏ ୱେଃଇତ୍ ଜିସୁ ଆଟେ ତା ଗ୍ରାମ୍ୱାଗାଟାରି ବେତନିଆତାୱାଟି ଜିରୁସାଲମଇନ୍ଦା ୱାଇଚ୍ଚି ତୁକାତାୱା ଜିସୁନିକି ହାକ୍କି ଆତେ; 13ଆଟେ ଏୱାଞ୍ଜି ଦେହାଟି ଆକା ମାନ୍ନି ରଣ୍ଡା ତଗା ମ୍ରାନୁ ହୁଡ଼ାନ୍, ଇନିସ୍କି ଏ ମ୍ରାନୁଟି ତଗା ପାଁନେଞ୍ଜି, ଏ ଆସାଟି ମ୍ରାନୁ ରେଃଏସ୍ ହାଚ୍ଚେଞ୍ଜି । ମତ୍ର ରେଃଏସ୍ ୱାନ୍ ଏୱାଞ୍ଜି ଏଦିମ୍ୱା ଆକା ପିହାନ୍ ଆଟେ ଇନ୍ନା ପାଃନାତେଞ୍ଜି, ଇନାକି ଏଚିତୁକାତାୱା ତଗା ଆଗନ୍ତି ଦିନା ଆହେଃଲ୍ଲାତେ । 14ଏମ୍ୱାଟି ଏୱାଞ୍ଜି ମ୍ରାନୁତିଦି ୱେସ୍ତେଞ୍ଜି, “ଆଟେ ଏଚ୍ଚେକ୍ୱାଡ଼େ ଏମ୍ବେନାରି ନି ତାୱାଟି ତଗା ତିଃନ୍ନାକାରି ।” ତା ଗ୍ରାମ୍ୱାଗାଟାରି ଇ କାତା ୱେଚ୍ଚେରି ।
ଜିସୁ ଜିରୁସାଲମ ମନ୍ଦିରତାୱାଟି ବେପାର୍ଗାଟାରିକି ପେରନ୍
(ମାତିଉ ୨୧:୧୨–୧୭; ଲୁକ ୧୯:୪୫–୪୮; ଜହନ ୨:୧୩–୨୨)
15ଡେଗ୍ଗା ଏୱାରି ଜିରୁସାଲମଇନ୍ଦା ୱାତେରି, ଆଟେ ଏୱାଞ୍ଜି ମନ୍ଦିରତାୱା ହଲ୍ଜାନାହି ଏ ଗର୍ରିତାୱା କଡ୍ଡନ୍ ପ୍ରାପନ୍ କିଚ୍ଚି ହାବେ ଦାଲ୍ଲାନିକି କାଟ ହପନ୍ ମ୍ରାସ୍ତେଞ୍ଜି, ଅଟେ ଟାକ୍କାଙ୍ଗ୍ ମାସ୍କନ୍ତାରିତି ଟେବୁଲ୍କା ଅଟେ ଗୁଗୁର୍କା ପ୍ରାପନ୍ତାରିତି କପ୍କା ଗର୍ରିଙ୍ଗ୍ ଉକେଡ଼୍ କିଆନ୍ ତୁହ୍ପା ହିତେଞ୍ଜି । 16ଆଟେ ମନ୍ଦିର ଏସେନ୍ ହିଆନ୍ ଇନ୍ନିକୁଲା ୱାଡ଼େ ଅନ୍ ତାପନ୍ କିଅନ୍ ବାଗାଟି ଅନୁମତି ହିଃଆତେଞ୍ଜି । 17ଆଟେ ଏୱାଞ୍ଜି ଏୱାରିକି ଗ୍ରାପ୍ଚାନ୍ ୱେସ୍ତେଞ୍ଜି, “ଇଦି ଦର୍ମପୁତିତାୱା ୱ୍ରିଗାଆନ୍ନେ, ନା ଇଡ୍ଡୁ ପୁର୍ତିତି ହାବେତ୍ ଜାତି ବାଗାଟି ପ୍ରାତ୍ନା ଇଡ୍ଡୁ ଇଞ୍ଜାନ୍ ପଙ୍ଗିନେ; ମତ୍ର ମିରୁ ମୁଲାପେନୁତି ଇ ଇଡ୍ଡୁତିଦି ଟ୍ଡକେଙ୍ଗ୍ତି ହାଲୁ କିଆଞ୍ଜେରି ।” 18ଗାମିନ୍ ଜାଜକଙ୍ଗ୍, ସାସ୍ତ୍ରିଙ୍ଗ୍ ଇଦା ୱେଞ୍ଜାନାହି ଜିସୁନିକି ଇନ୍ନିୱାହୁ ପାଗନ୍ ମୁନେରି, ଏଦା ଜୁଜନା କିଅନ୍ ମ୍ରାସ୍ତେରି; ଇନାକି ଦାଲ୍ଲା ହାବେ ତା ଗ୍ରାପନ୍ତାୱା ଆକ୍କାବାଡ଼ାଙ୍ଗ୍ ଆଇଚ୍ଚି ବାଗାଟି ଏୱାରି ତାଙ୍ଗେ ଆଜ୍ଜେଚ୍ଚେରି ।
19ହାବେ ଦିନା ଡେହେଙ୍ଗ୍ ମିଡ୍ଡଡ଼୍ ତୁକାତାୱା ଜିସୁ ଅଟେ ତା ଗ୍ରାମ୍ୱାଗାଟାରି ଜିରୁସାଲମ ଗାଡ଼ାନାଜୁଟି ହଚାନ୍ ହାଚ୍ଚେରି ।
ୱାଚ୍ଚାନ୍ନି ତଗା ମ୍ରାନୁଟି ଗ୍ରାମ୍ବନି
(ମାତିଉ ୨୧:୨୦–୨୨)
20ଏ ୱେଃଇତ୍ ଡାଃଏସ୍ ଏ ଗିଜ୍ଜୁ ଏସେନ୍ ହାଜ୍ଜିଚ୍ଚି ତୁକାତାୱା ଏୱାରି ତଗା ମ୍ରାନୁ ଟାକ୍କୁଟି ୱାଚ୍ଚାନ୍ନାଦାଃଆ ହୁଡ଼ିତେରି । 21ଏମ୍ବାଟି ପିତର କାହେତି କାତା ଏଲୁ କିଆନ୍ ତାଙ୍ଗେ ୱେସ୍ତେଞ୍ଜି, “ଏ ଗ୍ରାପାଗାଟାତି, ହୁଡ଼ାମୁ, ନିନୁ ୱ୍ଲିପା ହିଆଚ୍ଚି ତଗା ମ୍ରାନୁ ୱାଚ୍ଚାନ୍ନେ ।”
22ଜିସୁ ଏୱାରିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ମିରୁ ମୁଲାପେନୁନିକି ମାଞ୍ଜାଡ଼ି କିଦୁ।” 23#ମାତି ୧୭:୨୦; ୧କ ୧୩:୨ନାନୁ ମିଙ୍ଗେ ନିଜ୍ଜା ୱେସ୍ପିଞ୍ଜା, ଏମ୍ୱେନାଞ୍ଜି ଇ ହରୁତିଦି ଏମ୍ବାଟି ସାମ୍ନ୍ଦେର୍ତାୱା ହାଜ୍ଜାନ୍ ଦିକାମୁ ଇଞ୍ଜାନ୍ ୱେସ୍ନେଞ୍ଜି, ଆଟେ ତା ହଡାଙ୍ଗ୍ତାୱା ସନ୍ଦେହ କିଃଏଟେଃଏ, ଇନ୍ନା ୱେସ୍ନେଞ୍ଜି ଏଦି ଗଟି ଆନେ ଇଞ୍ଜାନ୍ ମାଞ୍ଜାଡ଼ି କିନ୍ନେଞ୍ଜି ଇଚ୍ଚେସି, ଏଦି ଏୱାଞ୍ଜ୍ ବାଗାଟି ଗଟିଆନେ । 24ଏଦାବାଗା ନାନୁ ମିଙ୍ଗେ ୱେସ୍ପିଞ୍ଜା, “ମିରୁ ଇନ୍ନା ଇନ୍ନା ପ୍ରାତ୍ନା କିଞ୍ଜେରି ଅଟେ ୱ୍ରିହ୍ପିଞ୍ଜେରି, ଏୱା ହାବେ ପାଁଣ୍ଡାନ୍ନାମୁ ଇଞ୍ଜାନ୍ ମାଞ୍ଜାଡ଼ି କିଦୁ, ଏମ୍ୱାଟି ଏୱା ହାବେ ପାଁଣ୍ଡେରି । 25#ମାତି ୬:୧୪,୧୫ଆଟେ ଏଚ୍ଚିକିଃଆ ମିରୁ ପ୍ରାତ୍ନା କିଅନ୍ ବାଗା ଡିଡ୍ଡେଞ୍ଜେରି, ଏମ୍ୱା ଜଦି ଇନ୍ଦାର୍ ବିରୁଦଟି ମି ତାୱା ଇନ୍ନି କାତା ମାନ୍ନେ, ଏହେଙ୍ଗ୍ ଆତେସି ମାକ୍ସାଡ଼ି କିଦୁ, ଇନିସ୍କି ମି ସର୍ଗତି ଆବା ୱାଡ଼େ ମି ପାପ ହାବେ ମାକ୍ସାଡ଼ି କିଆନେଞ୍ଜି । 26ମତ୍ର ମିରୁ ଜଦି ମାକ୍ସାଡ଼ି କିଃଏରି, ଏହେଙ୍ଗ୍ ଆତେସି ମି ସର୍ଗତି ଆବା ୱାଡ଼େ ମି ଦୁସ ହାବେ ମାକ୍ସାଡ଼ି କିଃଏଞ୍ଜି ।”
ଜିସୁତି ହକତ୍ କୁଲାଟି ୱେନ୍ବନି
(ମାତିଉ ୨୧:୨୩–୨୭; ଲୁକ ୨୦:୧–୮)
27ଡେଗ୍ଗା ଏୱାରି ରିହିକ୍ ଜିରୁସାଲମଇନ୍ଦା ୱାତେରି; ଆଟେ ଏୱାଞ୍ଜି ମନ୍ଦିରତାୱା ତ୍ରେବିଚ୍ଚି ତୁକାତାୱା ଗାମିନ୍ ଜାଜକଙ୍ଗ୍, ସାସ୍ତ୍ରିଙ୍ଗ୍ ଅଟେ ଗାମିନାରି ତା ରେଃଏସ୍ ୱାନାହି ୱେଚ୍ଚେରି, 28“ନିନୁ ଇମ୍ୱିନ୍ ହକତ୍ ଡ଼ାହି ଇୱାହାବେ କିଞ୍ଜି ? ଆଟେ ଇୱାହାବେ କିଅନ୍ବାଗା ନିଙ୍ଗେ ଏମ୍ୱେନାଞ୍ଜି ଇ ହକତ୍ ହିଆତେଞ୍ଜି ?”
29ମତ୍ର ଜିସୁ ଏୱାରିକି ୱେସ୍ତେଞ୍ଜି, “ନାନୁ ମିଙ୍ଗେ ରଣ୍ଡା କାତା ୱେଞ୍ଜା, ନାଙ୍ଗେ ୱେସ୍ତାଟୁ, ଏହେଙ୍ଗ୍ ଆତେସି ନାନୁ ଇମ୍ୱିନ୍ ହକତ୍ ଡ଼ାହି ଇୱାହାବେ କିମାଃଇ, ଏଦା ମିଙ୍ଗେ ୱେସ୍ତାଆ । 30ଏମ୍ୱେନାଞ୍ଜି ଜହନନିକି ଡୁବନ୍ ହିଅନ୍ବାଗା ହକତ୍ ହିଆଚ୍ଚେଞ୍ଜି, ସର୍ଗତି ମୁଲାପେନୁ କି କୁଇଙ୍ଗ୍ ? ନାଙ୍ଗେ ୱେସ୍ତାଟୁ ।”
31ଏମ୍ୱାଟି ଏୱାରି ତାରୁତାରୁ କାତାବାର୍ତା ଆନ୍ ୱେସ୍ପିଆତେରି, “ଜଦି ସର୍ଗ ତାୱାଟ୍ ଇଞ୍ଜାନ୍ ୱେସ୍ନା, ଇଚ୍ଚେସି ଏୱାଞ୍ଜି ୱେସ୍ତାନେଞ୍ଜି, ଏହେଙ୍ଗ୍ ଆତେସି ମିରୁ ଇନ୍ନା କିଅନ୍ ଜହନନିକି ମାଞ୍ଜାଡ଼ି କିଃଆତେରି ? 32ଆଟେ କୁଇଙ୍ଗ୍ତାୱାଟ୍ ଇଞ୍ଜାନ୍ ଇନ୍ନା ୱେସ୍ନା ?” ଏୱାରି ଦାଲ୍ଲାନିକି ଆଜ୍ଜେଚ୍ଚେରି; ଇନାକି ହାବେତାରି ଜହନନିକି ରଃଅଞ୍ଜି ନିଜ୍ଜା ବାବବାଦି ଇଞ୍ଜାନ୍ ମାନି ଆଇଚ୍ଚେରି । 33ଏଦାକି ଏୱାରି ଜିସୁନିକି ୱେସ୍ତେରି, “ମାମୁ ପୁଞ୍ଜାହେଃଲ୍ଲାମୁ ।”
ଏମ୍ବାଟି ଜିସୁ ଏୱାରିକି ୱେସ୍ତେଞ୍ଜି, “ଏହେଙ୍ଗ୍ ଆତେସି ନାନୁ ଇମ୍ୱିନ୍ ହକତ୍ଟିଆଟି ଇୱାହାବେ କିମାଃଇ, ଏଦା ନାନୁ ୱାଡ଼େ ମିଙ୍ଗେ ୱେସ୍ତାଦାଃଏନୁ ।”
Právě zvoleno:
ମାର୍କ 11: DWK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0
