ମାତିଉ 4
4
ଜିସୁ ପରିକ୍ୟାତାୱା ଦିଅନ୍
(ମାର୍କ ୧:୧୨–୧୩; ଲୁକ ୪:୧–୧୩)
1 #
ଏବ୍ରି ୨:୧୮; ୪:୧୫ ଏଚିତୁକାତାୱା ଜିସୁ ସଇତାନ ତାୱାଟି ପରିକ୍ୟା ଆଅନ୍ ବାଗା ପିର୍ନି ଡିଙ୍ଗାଟି ନେଞ୍ଜାନ୍ ଚିହ୍ପି ଗର୍ରିଇନ୍ଦା ଅୱାଆତେଞ୍ଜି । 2ଆଟେ ରି କୁଡ଼ି ଡାଡ଼ିଙ୍ଗ୍ କାର୍ରାତ୍ ହାକ୍କି ଏଡ୍ରେ ବାସାଆତି ବାଗା, ତାଙ୍ଗେ ଗାପ୍ଚି ହାକ୍କି ଆତେ । 3ଆଟେ ପରିକ୍ୟା କିଅନ୍ତାଞ୍ଜି ତା ରେଃଏସ୍ ୱାନାହି ୱେସ୍ତେଞ୍ଜି, “ନିନୁ ଜଦି ମୁଲାପେନୁତି ମ୍ରିଃଏଞ୍ଜାତି, ଏହେଙ୍ଗ୍ ଆତେସି ଇ ୱାଲ୍ଲିଙ୍ଗ୍ତିଦି ରୁଟିଙ୍ଗ୍ ଆଅନ୍ ବାଗା ୱେସ୍ମୁ ।” 4ମତ୍ର ଜିସୁ ତାଙ୍ଗେ ୱେସ୍ତେଞ୍ଜି, “ଦର୍ମପୁତିତାୱା ୱ୍ରିଗାଆନ୍ନେ, କୁଏଞ୍ଜି ୱାର୍ରି ରୁଟିଙ୍ଗ୍ ଡ଼ାହି ନିମ୍ୱେଞ୍ଜି, ମତ୍ର ମୁଲାପେନୁ ଗୁତିଟି ହପିନ୍ନି ହାବେତ୍ ବାକ୍ୟ ତାୱାଟି ନିମ୍ୱିନେଞ୍ଜି ।” 5ଏମ୍ୱାଟି ସଇତାନ ତାଙ୍ଗେ ଜିହୁଦିଙ୍ଗ୍ତି ପିର୍ନି ଗାଡ଼ାନାଜୁ ଜିରୁସାଲମଇନ୍ଦା ଅଆନ୍ ମନ୍ଦିରତି ଦଲାନ୍ କୁଃଏଟି ଡିଡ୍ଡି କିଆନ୍ ତାଙ୍ଗେ ୱେସ୍ତେଞ୍ଜି, 6“ନିନୁ ଜଦି ମୁଲାପେନୁତି ମ୍ରିଃଏଞ୍ଜାତି, ଏହେଙ୍ଗ୍ ଆତେସି ନେତେ ପାଞ୍ଜାମୁ, ଇନାକି ଦର୍ମପୁତିତାୱା ୱ୍ରିଗାଆନ୍ନେ, ଏୱାଞ୍ଜି ତା ଦୁତଙ୍ଗ୍ନିକି ନି କୁଲାଟି ଆଦେସ୍ ହିନେଞ୍ଜି, ଆଟେ ନି ପାନେଡ଼୍କା ୱାଲ୍ଲିତାୱା ଉଃଗଅ, ଇଦାବାଗା ଏ ଦୁତଙ୍ଗ୍ ନିଙ୍ଗେ କାସ୍କାଟି ଡେସାନ୍ ଆହ୍ତାନେରି ।” 7ଜିସୁ ତାଙ୍ଗେ ୱେସ୍ତେଞ୍ଜି, “ଆଟେ ୱାଡ଼େ ଦର୍ମପୁତିତାୱା ୱ୍ରିଗାଆନ୍ନେ, ନିନୁ ଦାର୍ମୁ ନି ମୁଲାପେନୁନିକି ପରିକ୍ୟା କିଃଆ ।” 8ରିହିକ୍ ସଇତାନ ତାଙ୍ଗେ ରଣ୍ଡା ଏଗେଲ୍ ପ୍ଡିଚ୍ଚାନ୍ନି ହରୁଡ଼ିପେ ଅଆନ୍ ପୁର୍ତିତି ହାବେତ୍ ରାଜିଙ୍ଗ୍ ଅଟେ ଏ ହାବେ ରାଜିଙ୍ଗ୍ତି ଆଡିତି କୁଲା ତସାନାହି ୱେସ୍ତେଞ୍ଜି, 9“ନିନୁ ଜଦି ନାଙ୍ଗେ ଅଲ୍ଗି ଆନ୍ ଗାଡ଼ିହେରୁ କିଆଦି, ଇଚ୍ଚେସି ନାନୁ ଇ ହାବେ ନିଙ୍ଗେ ହିଆ ।” 10ଏଦାକି ଜିସୁ ତାଙ୍ଗେ ୱେସ୍ତେଞ୍ଜି, “ଏ ସଇତାନ ଦେହା ଆମୁ, ଇନାକି ଦର୍ମପୁତିତାୱା ୱ୍ରିଗାଆନ୍ନେ, ନିନୁ ୱାର୍ରି ଦାର୍ମୁ ନି ମୁଲାପେନୁନିକି ଜୁହାରି କିଦି, ଆଟେ ୱାର୍ରି ତା ଆଙ୍ଗୁଲ୍ ଆଦି ।” 11ଏମ୍ୱାଟି ସଇତାନ ତାଙ୍ଗେ ପିହାନାହି ହାଚ୍ଚେଞ୍ଜି, ଆଟେ ହୁଡ଼ାଟୁ, ଦୁତଙ୍ଗ୍ ୱାନାହି ତାଙ୍ଗେ ଆଙ୍ଗୁଲ୍ ଆଅନ୍ ମ୍ରାସ୍ତେରି ।
ଗାଲିଲିତାୱା ଜିସୁ ଆଙ୍ଗୁଲ୍ କାମା ମ୍ରାସ୍ତେଞ୍ଜି
(ମାର୍କ ୧:୧୪–୧୫; ଲୁକ ୪:୧୪–୧୫)
12 #
ମାତି ୧୪:୩; ମାର୍କ ୬:୧୭; ଲୁକ ୩:୧୯,୨୦ ଜହନ ବନ୍ଦି ଇଡ୍ଡୁତାୱା ବନ୍ଦି ଆଅନ୍ତାଦା ଜିସୁ ଏଚ୍ଚିକିଃଆ ୱେଚ୍ଚେଞ୍ଜି, ଏମ୍ବାଟି ଏୱାଞ୍ଜି ଆଙ୍ଗେ ଆନାହି ଗାଲିଲି ରାଜିଇନ୍ଦା ହାଚ୍ଚେଞ୍ଜି; 13#ଜହ ୨:୧୨ଆଟେ ଏୱାଞ୍ଜି ନାଜରିତ ଗାଡ଼ାନାଜୁତାୱା ବାସାଆଃଏଟେଃଏ ସବୁଲୁନ ଅଟେ ନପ୍ତାଲି ରାଜିତାୱା ମାନ୍ନି ସାମ୍ନ୍ଦେର୍ ଇଡ଼ା ରେଃଏସ୍ତି କପର୍ନାହୁମ ଗାଡ଼ାନାଜୁଇନ୍ଦା ହାଜ୍ଜାନାହି ବାସାଆତେଞ୍ଜି, 14ଇନିସ୍କି ଜିସାୟ ବାବବାଦି ୱେସାନ୍ନି ଇ କାତା ସପଲ ଆନେ । 15ସବୁଲୁନ ଦେସା ଅଟେ ନପ୍ତାଲି ଦେସା ସାମ୍ନ୍ଦେର୍ ଟାକ୍କେ ମାନ୍ନି ଅଟେ ଜର୍ଦ୍ଦନ ପେରେଏଜୁତି ରକଟ୍ ୱାଡୁତି, ଗାଲିଲି ରାଜି ଇମ୍ୱିନାୱା ଗାପ୍ଚି ଅନଜିହୁଦିଙ୍ଗ୍ ମାଞ୍ଜିନ୍ନେରି । 16ଏୱାରି ହାବେତାରି ଆନ୍ଦେରିଃଆ ମାଞ୍ଜିଚ୍ଚେରି, ମତ୍ର ହାଦାଡ଼ି ଏୱାରି ବେର୍ ଅଲା ହୁଡ଼ିତେରି, ଆଟେ ଏୱାରି ହାବେତାରି ହାଅନ୍ତି ଦେସା ଅଟେ ଡ଼ୁଗାତାୱା ମାଞ୍ଜିଚ୍ଚି ଦାଲ୍ଲା ବାଗା ପରନ୍ ହିଅନ୍ତି ଅଲା ୱାତେ । 17#ମାତି ୩:୨ଏଚିତୁକାତାୱାଟି ଜିସୁ ୱେସ୍ପନ୍ ମ୍ରାସ୍ତେଞ୍ଜି, “ଏଲୁୱ୍ଡେପ୍ଦୁ, ଇନାକି ସର୍ଗ ରାଜି ଟାକ୍କେ ୱାତେ ।”
ଜିସୁ ଏଚ୍ଚୁରି ଗ୍ରାମ୍ୱାଗାଟାରିକି ଆଚି କିଅନି
(ମାର୍କ ୧:୧୬–୨୦; ଲୁକ ୫:୧–୧୧)
18ଜିସୁ ଗାଲିଲି ସାମ୍ନ୍ଦେର୍ ଇଡ଼ାତାୱା ତ୍ରେବିଚ୍ଚି ତୁକାତାୱା ସିମନ, ଇନ୍ଦାରିଆକି ପିତର ଇଞ୍ଜିଚ୍ଚେରି, ଆଟେ ତା ଆମ୍ୱେସ୍ ଆନ୍ଦ୍ରିୟ, ଇ ରିଃଆରି ସାମ୍ନ୍ଦେର୍ତାୱା ତୁହ୍ପା ଜାଲଟି ମିନ୍ଙ୍ଗା ଆହ୍ପିଚ୍ଚାଦାଃଆ ହୁଡ଼ିତେଞ୍ଜି, ଇନାକି ଏୱାରି ମିନ୍ଙ୍ଗା ଆହ୍ପନ୍ତାରି ମାଚ୍ଚେରି । 19ଜିସୁ ଏୱାରିକି ୱେସ୍ତେଞ୍ଜି, “ନା ବେତଟ୍ ୱାଦୁ, ନାନୁ ମିଙ୍ଗେ କୁଇଙ୍ଗ୍ନିକି ଆହ୍ପନ୍ ଗ୍ରାପ୍ତାଆ ।” 20ଏମ୍ୱାଟି ଏୱାରି ଏଚିୱାଡ଼େ ଜାଲ ତୁହାନାହି ତା ବେତଟ୍ ହାଚ୍ଚେରି । 21ଆଟେ ଜିସୁ ଏମ୍ବାଟିଆଟି ନକେସ୍ ହାଜ୍ଜାନାହି ଆଟେ ରିଃଆରି ଆମ୍ବେସାଙ୍ଗାନିକି ଇଚ୍ଚେସି ଜେବଦିତି ମ୍ରିକା ଜାକୁବ ଅଟେ ତା ଆମ୍ୱେସ୍ ଜହନନିକି ହୁଡ଼ିତେଞ୍ଜି, ଏୱାରି ତା ଆବା ଜେବଦି ଡ଼ାହି ଡଙ୍ଗାତାୱା ଜାଲ ରହ୍ପିଚାଦାଃଆ ହୁଡ଼ିତେଞ୍ଜି ଅଟେ ଏୱାରିକି ୱାଡ଼େ ଆର୍ତେଞ୍ଜି । 22ଏଦାକି ଏଚିୱାଡ଼େ ଏୱାରି ଡଙ୍ଗା ଅଟେ ତା ଆବାନିକି ପିହାନ୍ ତା ବେତଟ୍ ହାଚ୍ଚେରି ।
ଜିସୁ ଦାଲ୍ଲାନିକି ଗ୍ରାପନି, ପ୍ରଚାର ଅଟେ ରଗୁତାୱାଟି ନେହି କିଅନି
(ଲୁକ ୬:୧୭–୧୯)
23 #
ମାତି ୯:୩୫; ମାର୍କ ୧:୩୯ ଡେଗ୍ଗା ଜିସୁ ଏୱାର୍ତି ହାଜା ଇଟ୍କା ଏସେନ୍ ହାବେ ଗ୍ରାପ୍ଚାନ୍ ସର୍ଗ ରାଜିତି ସୁସମାଚାର ପ୍ରଚାର କିଆନ୍ ଅଟେ ଦାଲ୍ଲାତି ହାବେତ୍ ୱାହୁତି ରଗୁ ଅଟେ ହାବେତ୍ ୱାହୁତି ରେଡ଼ମ୍ ଗାଟାରିକି ନେହି କିଆନ୍ ଗାଲିଲି ରାଜି ହାବେ ତ୍ରେବନ୍ ମ୍ରାସ୍ତେଞ୍ଜି । 24ଆଟେ ଜିସୁତି କୁଲା ସିରିଆ ଦେସାତି ହାବେତ୍ଇନ୍ଦା ପ୍ରେଜିତେ, ଆଟେ ଦାଲ୍ଲା ବୁତ ଆହାନ୍ନିଗାଟାରିକି, କୁନ୍ଦ୍ଲି ରଗୁ ଅଟେ କେରିୱାଚ୍ଚା ରଗୁ ଇହିଙ୍ଗ୍ ବିହି ବିହି ରଗୁତାୱା ରେଡ଼ମ୍ ଅଟେ ବିହା ପାଁଣ୍ଡାନ୍ ମାଞ୍ଜିଚ୍ଚି ହାବେତାରିନିକି ତା ଟାକ୍କେ ତାଚ୍ଚିୱାତେରି, ଆଟେ ଏୱାଞ୍ଜି ଏୱାରିକି ନେହି କିତେଞ୍ଜି । 25ଆଟେ ଗାଲିଲି, ଦେକାପଲି, ଜିରୁସାଲମ, ଜିହୁଦା ରାଜି ଅଟେ ଜର୍ଦ୍ଦନ ପେରେଏଜୁତି ଆନେଟ୍ ୱାଡୁ ମାଚ୍ଚି ଏଗେଲ୍ ଦାଲ୍ଲା ୱାନାହି ଜିସୁ ବେତଟ୍ ହାଚ୍ଚେରି ।
Právě zvoleno:
ମାତିଉ 4: DWK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
