ମାତିଉ 13
13
ବିଚ୍ଚା ମାଟ୍ଟନ୍ତାଞ୍ଜିତି ତୁକାଙ୍ଗାତା
(ମାର୍କ ୪:୧–୯; ଲୁକ ୮:୪–୮)
1ଏଚିୱେଲା ଜିସୁ ଇଜ୍ଜାଟି ହଚାନ୍ ହାଜ୍ଜାନାହି ସାମ୍ନ୍ଦେର୍ ଗ୍ରିଆତାୱା କକ୍ତେଞ୍ଜି । 2#ଲୁକ ୫:୧–୩ଏମ୍ୱାଟି ତା ଟାକ୍କେ ଏଗେଲ୍ ଦାଲ୍ଲା ରପାଟ୍ଟେ ଆଅନେଃଏ ଏୱାଞ୍ଜି ହାଜ୍ଜାନାହି ରଣ୍ଡା ଡଙ୍ଗାତାୱା କକ୍ତେଞ୍ଜି, ଆଟେ ଦାଲ୍ଲା ହାବେ ଗ୍ରିଆତାୱା ଡିଡ୍ଡାନାହି ବାସାଆତେରି । 3ଆଟେ ଏୱାଞ୍ଜି ତୁକାଙ୍ଗାତା ଡ଼ାହି ଏୱାରିକି ଏଗେଲ୍ କାତା ୱେସ୍ତେଞ୍ଜି, “ହୁଡ଼ାଟୁ, ରଃଅଞ୍ଜି ବିଚ୍ଚା ମାଟ୍ଟନ୍ତାଞ୍ଜି ବିଚ୍ଚା ମାଟ୍ଟନ୍ ହତେଞ୍ଜି । 4ଏୱାଞ୍ଜି ମାଟ୍ଟି ମାଟ୍ଟି ଏଚ୍ଚଡ଼୍ ବିଚ୍ଚା ଗିଜ୍ଜୁ ରେଃଏସ୍ ଦିତୁ, ଆଟେ ପଟ୍ଟାଙ୍ଗ୍ ୱାନ୍ ଏ ବିଚ୍ଚାତିଦି ତିଚ୍ଚୁ । 5ଆଟେ ଏଚ୍ଚଡ଼୍ ବିଚ୍ଚା ୱାଲ୍ଲିଙ୍ଗ୍ ମାନ୍ନି ୱିର୍ରାତାୱା ଦିତୁ ଅଟେ ଏଗେଲ୍ ୱିର୍ରା ହେଃଲ୍ଲାତାୱାଟି କାର୍ବେକ୍ କଡ଼ ଆତୁ । 6ମତ୍ର ୱେଲା ହପନେଃଏ, କାର୍ରା ରାଗ୍ଗାଟି ଦୁକିତୁ ଅଟେ ହିର୍କା ପିତାତାୱାଟି ୱାଚ୍ଚିତୁ । 7ଆଟେ ଏଚ୍ଚଡ଼୍ ବିଚ୍ଚା ହାପ୍କା ମ୍ରାକା ମାଚ୍ଚି ୱିର୍ରାତାୱା ସ୍ରୁତୁ, ଆଟେ ହାପ୍କା ମ୍ରାକା ବାଡ୍ଡି ଆନ୍ ଏୱାତିଦି ନାଚ୍ଚିତୁ । 8ମତ୍ର ଅଟେ ଏଚ୍ଚଡ଼୍ ନେହି ୱିର୍ରାତାୱା ଦିତୁ, ଆଟେ କାଉ ଆଗିତୁ, ଏଚ୍ଚଡ଼୍ ସେଙ୍ଗୁଡ଼ି ଦୁଗୁଡ଼୍, ଏଚ୍ଚଡ଼୍ ମୁ କୁଡ଼ି ଦୁଗୁଡ଼୍ ଅଟେ ଏଚ୍ଚଡ଼୍ କଡ଼େକ୍ ଦାସା ଦୁଗୁଡ଼୍ କାଉ ଆଗିତୁ । 9ଇନ୍ଦାରିକି କ୍ରିକା ମାନ୍ନୁ ଏୱାରି ୱେନ୍ନାକାରି ।”
ଇ ତୁକାଙ୍ଗାତାତି ଅର୍ତ
(ମାର୍କ ୪:୧୦–୧୨; ଲୁକ ୮:୯–୧୦)
10ଏମ୍ୱାଟି ଗ୍ରାମ୍ୱାଗାଟାରି ଜିସୁ ଟାକ୍କେ ୱାନାହି ୱେଚ୍ଚେରି, “ନିନୁ ଇନ୍ନା କିଅନ୍ ଦାଲ୍ଲାନିକି ତୁକାଙ୍ଗାତା ଡ଼ାହି କାତା ୱେସ୍ପିଞ୍ଜି ?” 11ଏୱାଞ୍ଜି ୱେସ୍ତେଞ୍ଜି, ଇନାକି ସର୍ଗ ରାଜିତି ଲାଃଇତ୍ କାତା ପୁନ୍ବନ୍ ବାଗା ମିଙ୍ଗେ ବଲ ହିୱାଆନ୍ନେ, ମତ୍ର ଏୱାରିକି ହିୱାଆହେଃଲ୍ଲେ । 12#ମାତି ୨୫:୨୯; ମାର୍କ ୪:୨୫; ଲୁକ ୮:୧୮; ୧୯:୨୬ଇନାକି ଇନ୍ଦାରିକି ମାନ୍ନୁ, ତାଙ୍ଗେ ହିଅନ୍ ଆନେ, ଆଟେ ଏୱାଞ୍ଜିକି ଏଗେଲ୍ ଆନୁ; ମତ୍ର ଇନ୍ଦାରିକି ହେଃଲ୍ଲ, ଏୱାଞ୍ଜ୍ ପାଟ୍ଟି ଇନ୍ନା ମାନ୍ନୁ, ଏୱା ୱାଡ଼େ ଏୱାଞ୍ଜ୍ତାୱାଟି ଅୱାଆନେ । 13ଏୱାରି ହୁଡ଼ି ହୁଡ଼ି ହୁଡ଼େହେଃଲ୍ଲେରି ଅଟେ ୱେଞ୍ଜି ୱେଞ୍ଜି ୱେଃନେରି କି ପୁଃନ୍ନେରି; ଏଦାବାଗା ନାନୁ ଏୱାରିକି ତୁକାଙ୍ଗାତା ଡ଼ାହି କାତା ୱେସ୍ପିମାଃଇ । 14ଆଟେ ଜିସାୟତି ଇ ବାବବାନି ଏୱାର୍ତି କୁଲାଟି ସପଲ ଆଇନେ, ମିରୁ ୱେଞ୍ଜି ୱେଞ୍ଜି ୱେଞ୍ଜେରି, ମତ୍ର ପୁଃନ୍ନେରି ଅଟେ ହୁଡ଼ି ହୁଡ଼ି ହୁଡ଼ିଦେରି, ମତ୍ର ବୁଜ୍ଜି ଆଃଏରି । 15ଇନାକି ଇ ଦାଲ୍ଲାତି ହଡାଙ୍ଗ୍ ଆଣ୍ଟ ଆନ୍ନୁ, ଏୱାରି ପେଡ୍ଡା ୱେଚ୍ଚେରି ଅଟେ ଏୱାରି ତା କାଡ଼୍କା ହୁଞ୍ଜିତେରି, ଏଦାକି ଏୱାରି କାଡ଼୍କାଟି ହୁଃଡ଼େରି ଅଟେ କ୍ରିକାଟି ୱେଃନେରି, ଆଟେ ହଡାଙ୍ଗ୍ତାୱା ପୁଃନ୍ନେରି, ଆଟେ ୱ୍ଡେଚି ୱାଃଏରି, ଆଟେ ନାନୁ ଏୱାରିକି ନେହି କିଃଏନୁ । 16#ଲୁକ ୧୦:୨୩,୨୪ମତ୍ର ମିରୁ ଦନ୍ୟ, ଇନାକି ମି କାଡ଼୍କା ଏଦା ହୁଡ଼େନ୍ନୁ ଅଟେ ମି କ୍ରିକା ଏଦା ୱେଞ୍ଜିନ୍ନୁ । 17ଇନାକି ନାନୁ ମିଙ୍ଗେ ନିଜ୍ଜା ୱେସ୍ପିଞ୍ଜା, ମିରୁ ଇନ୍ନା ଇନ୍ନା ହୁଡ଼େଞ୍ଜେରି, ଏ ହାବେ ଏଗେଲ୍ ବାବବାଦିଙ୍ଗ୍ ଅଟେ ଦାର୍ମିକଙ୍ଗ୍ ହୁଡ଼ନ୍ତିକି ମନ କିତେରି, ମତ୍ର ହୁଡ଼ନ୍ ମୁଃଆତେରି; ଆଟେ ମିରୁ ଇନ୍ନା ଇନ୍ନା ୱେଞ୍ଜିଞ୍ଜେରି, ଏ ହାବେ ଏୱାରି ୱେନ୍ବନ୍ ବାଗା ମନ କିତେରି, ମତ୍ର ୱେନ୍ବନ୍ ମୁଃଆତେରି ।
ବିଚ୍ଚା ମାଟ୍ଟନ୍ତି ତୁକାଙ୍ଗାତାତି ଅର୍ତ
(ମାର୍କ ୪:୧୩–୨୦; ଲୁକ ୮:୧୧–୧୫)
18“ହାଦାଡ଼ି ମିରୁ ବିଚ୍ଚା ମାଟ୍ଟନ୍ତାଞ୍ଜିତି ତୁକାଙ୍ଗାତାତି ଅର୍ତ ୱେଞ୍ଜୁ । 19ଏମ୍ୱେନାଞ୍ଜିକି ରାଜିତି ବାକ୍ୟ ୱେଞ୍ଜାନାହି ବୁଜ୍ଜି ଆଇହେଃଲ୍ଲେଞ୍ଜି, ଡ଼ଃଆନ୍ ଡିଙ୍ଗା ୱାନାହି ତା ହଡାଙ୍ଗ୍ତାୱା ଇନ୍ନା ମାଟ୍ଟା ଆଚ୍ଚେ ଏଦା ମିଞ୍ଜାନ୍ ଅନେ, ଏୱାଞ୍ଜି ରଃଅଞ୍ଜି ମାଟ୍ଟା ଆଚ୍ଚି ଗିଜ୍ଜୁ ଗ୍ରିଆତି ୱିର୍ରା ଡେହେଙ୍ଗ୍ । 20ଏମ୍ୱେନାଞ୍ଜିକି ବାକ୍ୟ ୱେଞ୍ଜିନ୍ନେଞ୍ଜି ଆଟେ ଏଚିୱାଡ଼େ ରାହାଙ୍ଗ୍ ଆନାହି ଏଦା ଆହ୍ପିନ୍ନେଞ୍ଜି, 21ମତ୍ର ହିର୍କା ପିତାନାୱାଟି ହିତେ ଦିନା ମାଞ୍ଜିନ୍ନେଞ୍ଜି, ଡେଗ୍ଗା ବାକ୍ୟ ବାଗାଟି କସ୍ଟ କି ବିହାନପୁ ୱାତେସି ଏଚିୱାଡ଼େ ଏୱାଞ୍ଜି ବାକ୍ୟ ପିହ୍ପିନ୍ନେଞ୍ଜି, ଏୱାଞ୍ଜି ୱାଲ୍ଲିଙ୍ଗ୍ କୁଃଏଟି ମାନ୍ନି ୱିର୍ରା ଡେହେଙ୍ଗ୍ । 22ରଃଅଞ୍ଜି ବାକ୍ୟ ୱେଞ୍ଜିନ୍ନେଞ୍ଜି, ମତ୍ର ପୁର୍ତିତି ଏଲୁ ଅଟେ ଦନତି ବାଉଡ଼ି ବାକ୍ୟତିଦି ମୁଚ୍ଚି କିନ୍ନୁ, ଆଟେ ଏୱାଞ୍ଜି ଏଚ୍ଚେକ୍ୱାଡ଼େ କାଉ ଆଗେହେଃଲ୍ଲେଞ୍ଜି, ଏୱାଞ୍ଜି ହାପ୍କାତାୱା ମାନ୍ନି ୱିର୍ରା ଡେହେଙ୍ଗ୍ । 23ମତ୍ର ଏମ୍ୱେ ବାକ୍ୟ ୱେଞ୍ଜାନ୍ ବୁଜ୍ଜି ଆଇନେଞ୍ଜି ଅଟେ ନିଜ୍ଜାନେଃଏ କାଉ ଆଗେନ୍ନେଞ୍ଜି, ଏମ୍ୱେନାଞ୍ଜି ସେଙ୍ଗୁଡ଼ି ଦୁଗୁଡ଼୍, ଏମ୍ୱେନାଞ୍ଜି ମୁ କୁଡ଼ି ଦୁଗୁଡ଼୍ ଏମ୍ୱେନାଞ୍ଜି କଡ଼େକ୍ ଦାସା ଦୁଗୁଡ଼୍, ଏୱାଞ୍ଜି ନେହି ୱିର୍ରା ଡେହେଙ୍ଗ୍ ।”
ଗହମ ଅଟେ କୁଡ୍ଡିତାଲ୍ଲିତି ତୁକାଙ୍ଗାତା
24ଜିସୁ ଏୱାରିକି ଆଟେ ରଣ୍ଡା ତୁକାଙ୍ଗାତା ଡ଼ାହି ୱେସ୍ତେଞ୍ଜି, ସର୍ଗ ରାଜି ଆଇନେ ରଃଅଞ୍ଜି କୁଏଞ୍ଜି ଡେହେଙ୍ଗ୍ ଏମ୍ବେନାଞ୍ଜିକି ତା ପାଙ୍ଗାତାୱା ନେହି ବିଚ୍ଚା ମାଟ୍ଟିତେଞ୍ଜି । 25ମତ୍ର ହାବେ ଦାଲ୍ଲା ହୁଞ୍ଜାଚି ତୁକାତାୱା ତା ସତ୍ରୁ ୱାନାହି ଏ ଗହମତାୱା କୁଡ୍ଡିତାଲ୍ଲି ମାଟ୍ଟାନ୍ ହାଚ୍ଚେଞ୍ଜି । 26ଏଚ୍ଚିକିଃଆ ଗହମ ବାଡ୍ଡି ଆନ୍ ଗ୍ରେଙ୍ଗୁଆତେ ଏଚିତୁକାତାୱା କୁଡ୍ଡିତାଲ୍ଲି ୱାଡ଼େ ତଞ୍ଜିତେ । 27ଏମ୍ୱାଟି ଇଡ୍ଡୁଗାଟାଞ୍ଜ୍ତି କାମ୍ବାରାଙ୍ଗା ତା ଟାକ୍କେ ୱାନାହି ୱେସ୍ତେରି, ଏ ସକାରେଏଞ୍ଜ୍ତି, ନିନୁ ଇନ୍ନା ନି ପାଙ୍ଗାତାୱା ନେହି ବିଚ୍ଚା ମାଟ୍ଟାହେଃଲ୍ଲାତି ? ଏହେଙ୍ଗ୍ ଆତେସି କୁଡ୍ଡିତାଲ୍ଲି ହାବେ ଇମ୍ୱିନାୱାଟି ନେଜିତୁ ? 28“ଏୱାଞ୍ଜି ଏୱାରିକି ୱେସ୍ତେଞ୍ଜି, ଇଦା ନା ସତ୍ରୁ କିଆନ୍ନେଞ୍ଜି । ଆଟେ କାମ୍ବାରାଙ୍ଗା ତାଙ୍ଗେ ୱେଚ୍ଚେରି, ମାମୁ ହାଜ୍ଜାନ୍ ଏୱା ଜେସ୍କାନାହି ରପାଟ୍ଟେ କିନାମୁ, ଇଦା ଇନ୍ନା ନିନୁ ଇଚ୍ଚା କିଞ୍ଜିମା ? 29ମତ୍ର ସକାରେଏଞ୍ଜି ୱେସ୍ତେଞ୍ଜି, ବାଃଏ, ଏୱା ମାନ୍ନାକାଃଆ, କାଲେ ମିରୁ କୁଡ୍ଡିତାଲ୍ଲି ଜେନ୍ନାୱିଃଆ ଗହମ ୱାଡ଼େ ଜେବନ୍ ପାଁଣ୍ଡେରି । 30ଗହମ ରେଃଗାନ୍ ଟିକ୍ନା ଗହମ ଅଟେ କୁଡ୍ଡିତାଲ୍ଲିତିଦି ରପାଟ୍ଟେ ବାଡ୍ଡିଆନ୍ତିକି ପିହା ହିଦୁ, ଆଟେ ଗହମ ରେଗନ୍ତି ତୁକାତାୱା ନାନୁ ରେଗନ୍ତାରିନିକି ୱେସିଃଇ; କୁମ୍ୱନ୍ ବାଗା କାହେ କୁଡ୍ଡିତାଲ୍ଲି ରପାଟ୍ଟେ କିଆନ୍ ପିଣ୍ଡି ଗାସ୍ଦୁ, ମତ୍ର ଗହମ ଉହି କିଆନାହି ନା ୱେହା କିଟ୍ଟାଇଡ୍ଡୁତାୱା ତାଚ୍ଚିୱାଦୁ ।”
ରିଚ୍ଚ ପନ୍ନତି ତୁକାଙ୍ଗାତା
(ମାର୍କ ୪:୩୧–୩୨; ଲୁକ ୧୩:୧୮–୧୯)
31ଜିସୁ ଏୱାରିକି ଆଟେ ରଣ୍ଡା ତୁକାଙ୍ଗାତା ୱେସ୍ତେଞ୍ଜି, “ସର୍ଗ ରାଜି ଆଇନେ ରଃଅଞ୍ଜି କୁଏଞ୍ଜି ତା ପାଙ୍ଗାତାୱା ମାଟ୍ଟାନ୍ନି ରିଚ୍ଚ ପନ୍ନ ଡେହେଙ୍ଗ୍ ।” 32ଏଦି ତ ହାବେ ପନ୍ନତାୱାଟି ଡଟି, ମତ୍ର ଏଦି ବାଡ୍ଡିଆତେସି ହାବେ କୁଚ୍ଚା ମ୍ରାକାତାୱାଟି ବେର୍ରାଦ୍ ଆନାହି ଇହିଙ୍ଗିସି ମ୍ରାନୁ ଆନେ ଜେ, ଜାଗ୍ଗୁତି ପଟ୍ଟାଙ୍ଗ୍ ୱାନ୍ ତା କାମ୍ୱାଙ୍ଗ୍ନାୱା ବଡ଼ା ରହାନ୍ ବାସାଆଇନୁ ।
କମିରତି ତୁକାଙ୍ଗାତା
(ଲୁକ ୧୩:୨୦,୨୧)
33ଜିସୁ ଏୱାରିକି ଆଟେ ରଣ୍ଡା ତୁକାଙ୍ଗାତା ୱେସ୍ତେଞ୍ଜି, “ସର୍ଗ ରାଜି କମିର ଡେହେଙ୍ଗ୍; ରଣ୍ଡି ଆଚାଲୁ ଏଦା ଅଆନ୍ ରଣ୍ଡା ବେର୍ କ୍ଲାହିତାୱା ମାଚ୍ଚି ବାଇକ୍ ରିକୁଡ଼ି କେଜି ଗୁଣ୍ଡାତାୱା ଆଟ୍ଚାନ୍ ମୁଚ୍ଚି କିଆନ୍ କିଟ୍ଟିତେ, ଆଟେ ଡେଗ୍ଗା ଏ ହାବେ କମିର#୧୩:୩୩ କମିର ଆଇନେ କାର ଡେହେଙ୍ଗ୍ତାଦି ଆତେ ।” 34ଇ ହାବେ କାତା ଜିସୁ ତୁକାଙ୍ଗାତା ତାୱାଟି ଦାଲ୍ଲାନିକି ହାବେ ୱେସ୍ତେଞ୍ଜି, ଆଟେ ତୁକାଙ୍ଗାତା ପିହାନ୍ ଏୱାଞ୍ଜି ଏୱାରିକି ଇନ୍ନା ୱେସ୍ପେହେଃଲ୍ଲାତେଞ୍ଜି, 35ଇନିମିଡି ଜିସାୟ ବାବବାଦି ୱେସାନ୍ନି ଇ ବାକ୍ୟ ଲେର୍ ଆନେ,
“ନାନୁ ତୁକାଙ୍ଗାତା ଡ଼ାହି କାତା ୱେସି,
ପୁର୍ତି ମ୍ରାନ୍ଦନ୍ତାୱାଟି ମ୍ରାଗାନ୍ ମାନ୍ନି ହାବେତ୍ କୁଲା ପକିଃଇ ।”
କୁଡ୍ଡିତାଲ୍ଲି ତୁକାଙ୍ଗାତାତି ଅର୍ତ
36ଡେଗ୍ଗା ଜିସୁ ହାବେ ଦାଲ୍ଲାନିକି ପିହାନାହି ଇଡ୍ଡୁତାୱା ହଟେଞ୍ଜି, ଆଟେ ତା ଗ୍ରାମ୍ୱାଗାଟାରି ତା ରେଃଏସ୍ ୱାନାହି ୱେସ୍ତେରି, “ଏ ପାଙ୍ଗାତାୱା ମାନ୍ନି କୁଡ୍ଡିତାଲ୍ଲିତି ତୁକାଙ୍ଗାତା ମାଙ୍ଗେ ନେହେନ୍ ବୁଜ୍ଜେ କିଆମୁ ।” 37ଜିସୁ ୱେସ୍ତେଞ୍ଜି, ଏମ୍ୱେନାଞ୍ଜି ନେହି ବିଚ୍ଚା ମାଟ୍ଟେନ୍ନେଞ୍ଜି, ଏୱାଞ୍ଜି ଆଇନ୍ନେଞ୍ଜି କୁଏଞ୍ଜି ମ୍ରିଃଏଞ୍ଜି; 38ପାଙ୍ଗା ଆଇନେ ପୁର୍ତି; ନେହି ବିଚ୍ଚା ଆଇନେ ରାଜିତି ମ୍ରିକା; କୁଡ୍ଡିତାଲ୍ଲିତି ଅର୍ତ ଆଇନେ ଦୁସ୍ଟଗାଟାର୍ତି ମ୍ରିକା; 39ଇମ୍ୱିନ୍ ସତ୍ରୁ ଏଦା ମାଟ୍ଟିତେଞ୍ଜି, ଏୱାଞ୍ଜି ସଇତାନ; ୱେହା ରେଗନ୍ତି ତୁକା ଆଇନେ ୱିହାନ୍ଦୁକା, ଆଟେ ରେଗନ୍ତାରି ଆଇନ୍ନେରି ଦୁତଙ୍ଗ୍ । 40ଇନିସ୍ କୁଡ୍ଡିତାଲ୍ଲିତିଦି ରପାଟ୍ଟେ କିଆନାହି ନାଡ଼ିତାୱା କୁମ୍ୱନ୍ ଆନେ, ୱିହାନ୍ଦୁକାତାୱା ଏହେଙ୍ଗିସି ଡୁଣ୍ଡେଲ୍ ଆନେ । 41କୁଏଞ୍ଜି ମ୍ରିଃଏଞ୍ଜି ତା ଦୁତଙ୍ଗ୍ନିକି ପାଣ୍ଡିଦାନେଞ୍ଜି, ଆଟେ ଏୱାରି ଏୱାଞ୍ଜ୍ତି ରାଜିତାୱାଟି ହାବେତ୍ ଅଦର୍ମଗାଟାରିକି ଅଟେ ଉଗ୍ଜାନ୍ ପାପ କିୱି କିନ୍ନି ହାବେତ୍ କୁଲାତିଦି ରପାଟ୍ଟେ କିଆନ୍ ରାଜିତାୱାଟି କାଟ ଅନେରି । 42ଆଟେ ଏୱାରିକି ନାଡ଼ିକୁଟ୍ଟିତାୱା ମେସ୍ନେରି, ଏମ୍ୱା ଏୱାରି ଡ଼ିନେରି ଅଟେ ପାଟ୍କା ମ୍ରେଡିନେରି । 43ଏଚିତୁକାତାୱା ଦାର୍ମିକଗାଟାରି ତା ଆବା ମୁଲାପେନୁତି ରାଜିତାୱା ୱେଲା ଡେହେଙ୍ଗ୍ ଅଲା ଆନ୍ ତଞ୍ଜିନେରି । ଇନ୍ଦାର୍ତି କ୍ରିକା ମାନ୍ନୁ, ଏୱାରି ୱେନ୍ନାକାରି ।
ମୁସାନ୍ନି ଦନ ଅଟେ ମୁକ୍ତାତି ତୁକାଙ୍ଗାତା
44ସର୍ଗ ରାଜି ପାଙ୍ଗାତାୱା ଆଡ଼୍ଚ୍ଚାନ୍ ଇଟ୍ଟାନ୍ନି ଦନ ଡେହେଙ୍ଗ୍ । ରଃଅଞ୍ଜି କୁଏଞ୍ଜି ଏଦା ହୁଡ଼ିତେଞ୍ଜି ଅଟେ ଏ ଦନତିଦି ଆଡ଼୍ଚ୍ଚାନ୍ ଇଟ୍ଟିତେଞ୍ଜି ଅଟେ ରାହାଙ୍ଗ୍ ଆନ୍ ହାଜ୍ଜାନାହି ତା ହାବେତ୍ କୁଲା ପ୍ରାଚାନାହି ଏ ପାଙ୍ଗାତିଦି କଡ୍ଡିତେଞ୍ଜି । 45ଆଟେ ୱାଡ଼େ ସର୍ଗ ରାଜି ନେହି ମୁକ୍ତା ଦାହ୍ପିନ୍ନି ରଃଅଞ୍ଜି ବେପାର୍ଗାଟାଞ୍ଜି ଡେହେଙ୍ଗ୍ । 46ଏୱାଞ୍ଜି ରଣ୍ଡା ଏଗେଲ୍ ଟାକ୍କାଙ୍ଗ୍ତି ମୁକ୍ତା ହୁଡ଼ିତେଞ୍ଜି ଅଟେ ଏୱାଞ୍ଜି ହାଜ୍ଜାନାହି ତା ହାବେତ୍ କୁଲା ପ୍ରାଚାନାହି ଏ ମୁକ୍ତାତିଦି କଡ୍ଡିତେଞ୍ଜି ।
ମିନ୍ଙ୍ଗା ଆହ୍ପା ଜାଲତି ତୁକାଙ୍ଗାତା
47ରିହିକ୍ ସର୍ଗ ରାଜି ଆଇନେ ସାମ୍ନ୍ଦେର୍ତାୱା ମେସାନାହି ହାବେ କୁଲାତି ମିନ୍ଙ୍ଗା ଆହ୍ପନ୍ତି ରଣ୍ଡି ଜାଲ ଡେହେଙ୍ଗ୍ । 48ଏଦି ନେଞ୍ଜନେଃଏ ଦାଲ୍ଲା ଗ୍ରିଆଇନ୍ଦା ଜେଜ୍ଜାନ୍ ତାଚ୍ଚିୱାତେରି, ଆଟେ କକ୍ଚ୍ଚାନ୍ ନେହି ମିନ୍ଙ୍ଗାତିଦି ଜରଡ଼୍ତାୱା ରପାଟ୍ଟେ କିଆନ୍ ଇଟ୍ଟିତେରି, ମତ୍ର ଡ଼ଃଆନାଃଆ ତୁହ୍ତେରି । 49ୱିହାନ୍ଦୁକାତାୱା ଇହିଙ୍ଗ୍ତି ଡୁଣ୍ଡେଲ୍ ଆନେ, ଦୁତଙ୍ଗ୍ ହଚାନ୍ ୱାନାହି ଦାର୍ମିକଗାଟାର୍ ତାୱାଟି ଡ଼ଃଆନାରିନିକି ଆଙ୍ଗେବିଙ୍ଗେ କିନେରି । 50ଆଟେ ଏୱାରିକି ନାଡ଼ିକୁଟ୍ଟିତାୱା ମେସ୍ନେରି; ଏମ୍ୱା ଏୱାରି ଡ଼ିନେରି ଅଟେ ପାଟ୍କା ମ୍ରେଡିନେରି । 51ଜିସୁ ଏୱାରିକି ୱେଚ୍ଚେଞ୍ଜି, “ମିରୁ ଇନ୍ନା ଇ ହାବେ କାତା ବୁଜ୍ଜି ଆତେରି ?” ଏୱାରି ତାଙ୍ଗେ ୱେସ୍ତେରି ହାଁ । 52ଏମ୍ୱାଟି ଏୱାଞ୍ଜି ଏୱାରିକି ୱେସ୍ତେଞ୍ଜି, ସର୍ଗ ରାଜି କୁଲାଟି ପୁଞ୍ଜାନ୍ନି ହାବେତ୍ ସାସ୍ତ୍ରିଙ୍ଗ୍ ରଃଅଞ୍ଜି ଇଡ୍ଡୁତି ଗାମିନାଞ୍ଜି ଡେହେଙ୍ଗ୍ । ଏମ୍ୱେନାଞ୍ଜିକି ତା କିଟ୍ଟା ଇଡ୍ଡୁତାୱାଟି ପୁନି ଅଟେ ପ୍ଡାଃଇ କୁଲା ୱେଚାନ୍ ତାପିନ୍ନେଞ୍ଜି ।
ନାଜରିତ ଗାଡ଼ାନାଜୁତାୱା ଜିସୁନିକି ଅସ୍ପିକାର କିଅନ୍
(ମାର୍କ ୬:୧–୬; ଲୁକ ୪:୧୬–୩୦)
53ଜିସୁ ଇ ହାବେତ୍ ତୁକାଙ୍ଗାତା ୱିହିକିତାନାୱାଟି ଏ ଗର୍ରିତାୱାଟି ହାଚ୍ଚେଞ୍ଜି । 54ଆଟେ ଏୱାଞ୍ଜି ତା ଗାଡ଼ାନାଜୁ ନାଜରିତଇନ୍ଦା ୱାନାହି ଦାଲ୍ଲାନିକି ଏୱାର୍ତି ହାଜା ଇଡ୍ଡୁତାୱା ଇହିଙ୍ଗିସି ଗ୍ରାପ୍ତେଞ୍ଜି ଜେ, ଏୱାରି ଆକ୍କାବାଡ଼ାଙ୍ଗ୍ ଆନ୍ ୱେସ୍ତେରି, “ଇ କୁଏଞ୍ଜି ଇହିଙ୍ଗ୍ତି ବୁଦ୍ଦି ଅଟେ ବଲତି କାମା ଇମ୍ୱିନାୱାଟି ପାଟେଞ୍ଜି ? 55ଇୱାଞ୍ଜି ଇନ୍ନା ଏ ବାଡେଞ୍ଜ୍ତି ମ୍ରିଃଏଞ୍ଜି ଆଃଏ ? ଇୱାଞ୍ଜ୍ତି ଇୟାତି ପାରୁ ଇନ୍ନା ମରିୟମ ଆଃଏ ? ଆଟେ ଇୱାଞ୍ଜ୍ତି ଆମ୍ୱେସାଙ୍ଗାତି ପାରୁ ଇନ୍ନା ଜାକୁବ, ଜସେପ, ସିମନ ଅଟେ ଜିହୁଦା ଆଃଏ ? 56ଆଟେ ଇୱାଞ୍ଜ୍ତି ଆଙ୍ଗିସ୍କା ହାବେ ଇନ୍ନା ମା ଗାଡ଼ାନାଜୁତାୱା ମାଞ୍ଜେହେଃଲ୍ଲ ? ଏହେଙ୍ଗ୍ ଆତେସି ଏୱାଞ୍ଜି ଇ ହାବେ ଇମ୍ୱିନାୱାଟି ପାଟେଞ୍ଜି ?” 57#ଜହ ୪:୪୪ଆଟେ ଏୱାରି ଜିସୁନିକି ସ୍ୱିକାର କିଃଆତେରି, ମତ୍ର ଜିସୁ ଏୱାରିକି ୱେସ୍ତେଞ୍ଜି, “ବାବବାଦି ତା ପ୍ଲିଆନ୍ନି ଗାଡ଼ାନାଜୁତାୱା ଅଟେ ତା ଇଜ୍ଜାନ୍ ଦାଲ୍ଲା ତାୱାଟି ସନ୍ମାନ୍ ପାଃନେଞ୍ଜି, ମତ୍ର ବିହି ଦାଲ୍ଲାତାୱାଟି ସନ୍ମାନ୍ ପାଁନେଞ୍ଜି ।” 58ଆଟେ ଏମ୍ୱାତି ଦାଲ୍ଲା ଜିସୁନିକି ମାଞ୍ଜାଡ଼ି କିଃଆତେରି, ଏଦାକି ଏୱାଞ୍ଜି ଏଦିମ୍ୱା ଆଟେ ଏଗେଲ୍ ବୁଦ୍ଦି ଅଟେ ବଲତି କାମା କିଃଆତେଞ୍ଜି ।
Právě zvoleno:
ମାତିଉ 13: DWK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0
