ଜହନ 3
3
ଜିସୁ ଅଟେ ନିକଦିମ
1ପାରୁସିଙ୍ଗ୍ ତାୱାଟି ନିକଦିମ ପାରୁଟି ରଃଅଞ୍ଜି କୁଏଞ୍ଜି ମାଚ୍ଚେଞ୍ଜି, ଏୱାଞ୍ଜି ଜିହୁଦି ଦାଲ୍ଲାତି ରଃଅଞ୍ଜି ଗାମିନାଞ୍ଜି । 2ଏୱାଞ୍ଜି ଡାଡ଼ିଙ୍ଗ୍ ତୁକାତାୱା ଜିସୁ ଟାକ୍କେ ୱାନାହି ୱେସ୍ତେଞ୍ଜି, “ଏ ଗ୍ରାପାଗାଟାତି, ନିଙ୍ଗେ ମୁଲାପେନୁ ପାଣ୍ଡାଞ୍ଜାନେଞ୍ଜି ଇଦା ମାମୁ ପୁଞ୍ଜାନ୍ନାମୁ, ଇନାକି ମୁଲାପେନୁ ନି ଡ଼ାହି ମାନ୍ନି ବାଗା ନିନୁ ଇ ହାବେ ଆକ୍କାବାଡ଼ାଙ୍ଗ୍ତି କାମା କିଞ୍ଜି, ମୁଲାପେନୁ ଆଡ୍ଡାନ୍ ହେଃଲ୍ଲାତେସି, ଏ ହାବେତ୍ କାମା ଏମ୍ୱେନାଞ୍ଜି ୱାଡ଼େ କିଅନ୍ ମୁଃଏଞ୍ଜି ।”
3ଜିସୁ ତାଙ୍ଗେ ୱେସ୍ତେଞ୍ଜି, “ନାନୁ ନିଜ୍ଜାନେଃଏ ନିଙ୍ଗେ ୱେସ୍ପିଞ୍ଜା, ରିହିକ୍ ପ୍ଲିଃଆତେସି ଏମ୍ୱେନାରି ମୁଲାପେନୁତି ରାଜି ହୁଡ଼ନ୍ ମୁଃଏରି ।”
4ନିକଦିମ ତାଙ୍ଗେ ୱେସ୍ତେଞ୍ଜି, “ବୁଡ୍ଡା ଆନାହି କୁଏଞ୍ଜି ଇନିମିଡି ପ୍ଲିନେଞ୍ଜି ? ଏୱାଞ୍ଜି ଇନ୍ନା ତା ଇୟା ଟୁଟୁ ଲାଃଇ ହଲ୍ଜାନାହି ରିହିକ୍ ପ୍ଲିନେଞ୍ଜିମା ?”
5ଜିସୁ ୱ୍ଡେପ୍ଚ୍ଚି ୱେସ୍ତେଞ୍ଜି, “ନାନୁ ନିଜ୍ଜାନେଃଏ ନିଙ୍ଗେ ୱେସ୍ପିଞ୍ଜା, ଏଜୁ ଅଟେ ଡିଙ୍ଗାଟି ଆଟେରଲି ପ୍ଲିଃଆତେସି, ଏମ୍ୱେନାରି ମୁଲାପେନୁତି ରାଜିତାୱା ହଲ୍ବନ୍ ମୁଃଏରି । 6ଗାଣ୍ଡିଟି ଇନ୍ନାଦି ପ୍ଲିଆନ୍ନେ ଏଦି ଗାଣ୍ଡି; ମତ୍ର ଡିଙ୍ଗାଟି ଇନ୍ନାଦି ପ୍ଲିଆନ୍ନେ ଏଦି ଡିଙ୍ଗା । 7ନାନୁ ମିଙ୍ଗେ ରିହିକ୍ ପ୍ଲିଅନ୍ ଆନେ ଇଞ୍ଜାନ୍ ୱେସ୍ତାତେଃଏ, ଏଦାବାଗା ଆକ୍କାବାଡ଼ାଙ୍ଗ୍ ଆଃଆଟୁ । 8ୱ୍ଲିଉ ଇମ୍ୱିନ୍ ୱାଡୁ ଇଚ୍ଚା କିତେ, ଏନେଟ୍ ୱାଡୁ ହାଜ୍ଜିନ୍ନେ, ଆଟେ ମିରୁ ତା ହାଦ୍ଦା ୱେଞ୍ଜିଞ୍ଜେରି, ମତ୍ର ୱ୍ଲିଉ ଇମ୍ୱିନାୱାଟି ୱାଇନେ ଅଟେ ଇମ୍ୱିନ୍ଇନ୍ଦା ହାଜ୍ଜିନ୍ନେ, ଏଦା ପୁଞ୍ଜେହେଃଲ୍ଲେରି; ଡିଙ୍ଗାତାୱାଟି ପ୍ଲିଆନି ହାବେ ଦାଲ୍ଲାତି କୁଲାଟି ଇହିଙ୍ଗିସି ।”
9ନିକଦିମ ତାଙ୍ଗେ ୱେସ୍ତେଞ୍ଜି, “ଇ ହାବେ ଇନିସ୍ ଆଅନ୍ ମୁନେ ?”
10ଜିସୁ ତାଙ୍ଗେ ୱେସ୍ତେଞ୍ଜି, “ନିନୁ ଇସ୍ରାଏଲତି ରଃଅଞ୍ଜି ଗ୍ରାପାଗାଟାତି ଆନ୍ ୱାଡ଼େ ଇନ୍ନା ଇ ହାବେ ପୁଞ୍ଜେହେଃଲ୍ଲା ? 11ନାନୁ ନିଜ୍ଜାନେଃଏ ମିଙ୍ଗେ ୱେସ୍ପିଞ୍ଜା, ମାରୁ ଇନ୍ନା ପୁଞ୍ଜିନ୍ନା, ଏଦା ୱେସ୍ପିନ୍ନା ଅଟେ ଇନ୍ନା ହୁଡ଼େନ୍ନା, ଏ କୁଲାଟି ୱେସ୍ପିନ୍ନା, ମତ୍ର ମିରୁ ମା ସାକ୍ୟ ଗ୍ରହନ କିହେଃଲ୍ଲେରି । 12ନାନୁ ମିଙ୍ଗେ ପୁର୍ତିତି କୁଲାଟି ୱେସ୍ତାତେସି ମିରୁ ମାଞ୍ଜାଡ଼ି କିହେଃଲ୍ଲେରି, ଜଦି ସର୍ଗତି କୁଲାଟି ୱେସ୍ତାତେସି ଇନିମିଡି ମିରୁ ମାଞ୍ଜାଡ଼ି କିଦେରି ? 13ଆଟେ ଇମ୍ୱିନ୍ କୁଏଞ୍ଜ୍ ମ୍ରିଃଏଞ୍ଜି ସର୍ଗଟି ଜାତାତେଞ୍ଜି, ଏୱାଞ୍ଜିକି ପିହାନ୍ ଆଟେ ଏମ୍ୱେନାଞ୍ଜି ସର୍ଗଇନ୍ଦା ହାଜ୍ଜାହେଃଲ୍ଲେଞ୍ଜି ।”
14ଆଟେ ମସା ଇନିମିଡି ଚିହ୍ପି ଗର୍ରିତାୱା ରାଚୁତିଦି ୱାନ୍ଦା ନିକ୍ଚାଚ୍ଚେଞ୍ଜି, କୁଏଞ୍ଜ୍ ମ୍ରିଃଏଞ୍ଜି ୱାଡ଼େ ଏହେଙ୍ଗିସି ୱାନ୍ଦା ନିପ୍କାଆନେଞ୍ଜି । 15ଏଦାକି ଏମ୍ୱେନାଞ୍ଜି ତାଙ୍ଗେ ମାଞ୍ଜାଡ଼ି କିନେଞ୍ଜି, ଏୱାଞ୍ଜି ଟାକ୍କିଡ଼ହ୍ନାତି ପରନ୍ ପାଁନେଞ୍ଜି । 16ଇନାକି ମୁଲାପେନୁ ପୁର୍ତିତିଦି ଇଚେ ଜେଡା କିତେଞ୍ଜି ଜେ, ଏୱାଞ୍ଜି ତା ରଃଅଞ୍ଜେଃଏ ମ୍ରିଃଏଞ୍ଜିକି ହିଆତେଞ୍ଜି, ଏଦାକି ଏମ୍ୱେନାଞ୍ଜି ତାଙ୍ଗେ ମାଞ୍ଜାଡ଼ି କିନେଞ୍ଜି, ଏୱାଞ୍ଜି ନାହେଡ୍ ଆଃଏଟେଃଏ ଟାକ୍କିଡ଼ହ୍ନାତି ପରନ୍ ପାଁନେଞ୍ଜି । 17ଇନାକି ପୁର୍ତିତି ନିୟେ କିଅନ୍ ବାଗାଟି ମୁଲାପେନୁ ତା ମ୍ରିଃଏଞ୍ଜିକି ପୁର୍ତିତାୱା ପାଣ୍ଡିଦାଃଏଟେଃଏ, ପୁର୍ତି ଇନିମିଡି ତା ତାୱାଟି ଜ୍ଡିପା ପାଁନେ, ଏଦାବାଗା ତାଙ୍ଗେ ପାଣ୍ଡିଦାତେଞ୍ଜି ।
18ଏମ୍ୱେନାଞ୍ଜି ତାଙ୍ଗେ ମାଞ୍ଜାଡ଼ି କିନେଞ୍ଜି, ଏୱାଞ୍ଜି ବିଚାର ଆଏହେଃଲ୍ଲେଞ୍ଜି; ମତ୍ର ଏମ୍ୱେନାଞ୍ଜି ମାଞ୍ଜାଡ଼ି କିଏହେଃଲ୍ଲେଞ୍ଜି, ଏୱାଞ୍ଜି ବିଚାର ଆତେଞ୍ଜି, ଇନାକି ଏୱାଞ୍ଜି ମୁଲାପେନୁତି ରଃଅଞ୍ଜେଃଏ ମ୍ରିଃଏଞ୍ଜ୍ତି ପାରୁଟି ମାଞ୍ଜାଡ଼ି କିଆ ହେଃଲ୍ଲେଞ୍ଜି । 19ଆଟେ ଏ ବିଚାର ଇଦି, ପୁର୍ତିତାୱା ଅଲା ୱାନ୍ନେ, ମତ୍ର ଦାଲ୍ଲା ଅଲା ପିହାନ୍ ୱାର୍ରି କାଲକ୍ତିଦି ଜେଡା କିତେରି, ଇନାକି ଏୱାର୍ତି କାମା ହାବେ ଡ଼ଃଆନାଦି । 20ଇନାକି ଏମ୍ୱେନାଞ୍ଜି ଡ଼ଃଆନ୍ କାମା କିନ୍ନେଞ୍ଜି, ଏୱାଞ୍ଜି ଅଲାତିଦି ସ୍ରିଞ୍ଜେନ୍ନେଞ୍ଜି, ଆଟେ ଏଚ୍ଚେକ୍ ଆତେସ୍ ତା ଡ଼ଃଆନ୍ କାମା ପଙ୍ଗିନେ ଇଞ୍ଜାନ୍ ଏୱାଞ୍ଜି ଅଲା ଟାକ୍କେ ୱାଏହେଃଲ୍ଲେଞ୍ଜି । 21ମତ୍ର ଏମ୍ୱେନାଞ୍ଜି ନିଜ୍ଜା ଗିଜ୍ଜୁତାୱା ତାକେନ୍ନେଞ୍ଜି, ଏୱାଞ୍ଜି ଅଲା ଟାକ୍କେ ୱାଇନ୍ନେଞ୍ଜି, ଇନିସ୍କି ତା କାମା ହାବେ ମୁଲାପେନୁତାୱାଟି ଆଇନେ ଇଞ୍ଜାନ୍ ପଙ୍ଗେନ୍ନେ ।
ଜିସୁ ଅଟେ ଡୁବନ୍ ହିନ୍ନି ଜହନ
22ଏମ୍ୱାଟି ଜିସୁ ଅଟେ ତା ଗ୍ରାମ୍ୱାଗାଟାରି ଜିହୁଦା ରାଜିଇନ୍ଦା ହାଚ୍ଚେରି, ଆଟେ ଏୱାଞ୍ଜି ଏ ଗର୍ରିତାୱା ଏୱାର୍ ଡ଼ାହି ବାସା ଆନ୍ ଡୁବନ୍ ହିଅନ୍ ମ୍ରାସ୍ତେଞ୍ଜି । 23ଜହନ ୱାଡ଼େ ସାଲମ ଟାକ୍କେତି ଏନନତାୱା ଡୁବନ୍ ହିଚ୍ଚେଞ୍ଜି, ଇନାକି ଏ ଗର୍ରିତାୱା ଏଗେଲ୍ ଏଜୁ ମାଚ୍ଚେ, ଆଟେ ଦାଲ୍ଲା ୱାନ୍ ଡୁବନ୍ ଆଇଚ୍ଚେରି । 24#ମାତି ୧୪:୩; ମାର୍କ ୬:୧୭; ଲୁକ ୩:୧୯,୨୦ଇନାକି ଜହନନିକି ଏଚିତୁକାତାୱା ବନ୍ଦି ଇଡ୍ଡୁତାୱା କିଟ୍ଟା ହେଃଲ୍ଲାତେରି ।
25ରନେସି ଜିହୁଦିଙ୍ଗ୍ତି ହାଜୁ ଡେହେଙ୍ଗ୍ ନବ୍ଗା କାମା#୩:୨୫ ନବ୍ଗା କାମା ଇଚ୍ଚେସି ଉଡ଼ିଆ ବାଇବଲତାୱା “ସଉଚ କ୍ରିୟା” ଇଞ୍ଜାନ୍ ୱ୍ରିଗାଆନ୍ନେ । କୁଲାଟି ଜହନତି ଗ୍ରାମ୍ୱାଗାଟାରି ରଃଅଞ୍ଜି ଜିହୁଦି ଡ଼ାହି ହିଲାବାଦେର୍ ଆତେରି । 26ଏଦାବାଗା ଏୱାରି ଜହନ ଟାକ୍କେ ହାଜ୍ଜାନାହି ୱେସ୍ତେରି, “ଏ ଗ୍ରାପାଗାଟାତି, ଏମ୍ୱେନାଞ୍ଜି ଜର୍ଦ୍ଦନତି ଏନେଟ୍ ୱାଡୁ ନି ଡ଼ାହି ମାଚ୍ଚେଞ୍ଜି, ଇନ୍ଦାର୍ତି କୁଲାଟି ନିନୁ ୱେସ୍ପିଞ୍ଜି, ହୁଡ଼ାମୁ, ଏୱାଞ୍ଜି ଡୁବନ୍ ହିନ୍ନେଞ୍ଜି ଅଟେ ହାବେତାରି ତା ଟାକ୍କେ ହାଜ୍ଜିନ୍ନେରି ।”
27ଜହନ ୱ୍ଡେପ୍ଚ୍ଚି ୱେସ୍ତେଞ୍ଜି, ସର୍ଗତାୱାଟି ହିୱା ଆଃଆତେସି ଏମ୍ୱେନାଞ୍ଜି ୱାଡ଼େ ଇନ୍ନା ପାଃନେଞ୍ଜି । 28#ଜହ ୧:୨୦ନାନୁ କ୍ରିସ୍ଟ ଆଃଏ, ମତ୍ର ତା ନକେସି ନାଙ୍ଗେ ପାଣ୍ଡାଞ୍ଜାନେଞ୍ଜି, ଏଦା ନାନୁ ୱେସାଞ୍ଜାତେଃଏ ଇଞ୍ଜାନ୍ ମିରୁ ନା ସାକି । 29ଏମ୍ୱେନାଞ୍ଜି ବିବା ଆଇନ୍ନେଞ୍ଜି, ଏୱାଞ୍ଜି ବିବା ଲାୱେଞ୍ଜି, ମତ୍ର ବିବା ଲାୱେଞ୍ଜ୍ତି ଇମ୍ୱିନ୍ ତଡ଼େଞ୍ଜି ତା ରେଃଏସ୍ ଡିଡ୍ଡାନାହି ତା କାତା ୱେଞ୍ଜିନ୍ନେଞ୍ଜି, ଏୱାଞ୍ଜି ତା ଉକୁଡ଼୍ ୱେଞ୍ଜାନ୍ ଏଗେଲ୍ ରାହାଙ୍ଗ୍ ଆଇନ୍ନେଞ୍ଜି, ନାନୁ ଏଚିଡେହେଙ୍ଗ୍ତି ରାହାଙ୍ଗ୍ ପାଁଣ୍ଡାମାଃଇ । 30ଏୱାଞ୍ଜିକି ଇନିସ୍ ୱାଡ଼େ ଗାମନ୍ତିକି ଆନେ, ମତ୍ର ନାଙ୍ଗେ କକ୍ଚି ଆଅନ୍ତିକି ଆନେ ।
31ଏମ୍ୱେନାଞ୍ଜି ସର୍ଗତାୱାଟି ୱାଇନ୍ନେଞ୍ଜି, ଏୱାଞ୍ଜି ହାବେ ଦାଲ୍ଲାତାୱାଟି ଗାମିନାଞ୍ଜି ଆନେଞ୍ଜି; ଏମ୍ୱେନାଞ୍ଜି ପୁର୍ତିତାୱାଟି ପ୍ଲିଆନ୍ନେଞ୍ଜି, ଏୱାଞ୍ଜି ପୁର୍ତିତାଞ୍ଜି, ଆଟେ ଏୱାଞ୍ଜି ପୁର୍ତିତି କାତା ୱେସ୍ନେଞ୍ଜି; ମତ୍ର ଏମ୍ୱେନାଞ୍ଜି ସର୍ଗଟି ୱାଇନ୍ନେଞ୍ଜି, ଏୱାଞ୍ଜି ହାବେତାରିଟିଆଟି ଗାମିନାଞ୍ଜି । 32ଏୱାଞ୍ଜି ଇନ୍ନା ହୁଡ଼ାନ୍ନେଞ୍ଜି ଅଟେ ୱେଞ୍ଜାନ୍ନେଞ୍ଜି, ଏ କୁଲାଟି ସାକ୍ୟ ହିନ୍ନେଞ୍ଜି, ମତ୍ର ଏୱାଞ୍ଜ୍ତି ସାକ୍ୟ ଏମ୍ୱେନାରି ଗ୍ରହନ କିହେଃଲ୍ଲେରି । 33ଏମ୍ୱେନାଞ୍ଜି ତା ସାକ୍ୟ ଗ୍ରହନ କିଆନ୍ନେଞ୍ଜି, ଏୱାଞ୍ଜି ମୁଲାପେନୁ ସାମେନେଃଏ ନିଜ୍ଜା ଇଞ୍ଜାନ୍ ସିଲ୍ କିଆନ୍ନେଞ୍ଜି । 34ଇନାକି ମୁଲାପେନୁ ଇନ୍ଦାରିକି ପାଣ୍ଡାଞ୍ଜାନେଞ୍ଜି, ଏୱାଞ୍ଜି ମୁଲାପେନୁତି ବାକ୍ୟ ୱେସ୍ପିନ୍ନେଞ୍ଜି, ଇନାକି ମୁଲାପେନୁ ତାଙ୍ଗେ ହାରାବୁରାନ୍ ପିର୍ନି ଡିଙ୍ଗା ହିଆନ୍ନେଞ୍ଜି । 35#ମାତି ୧୧:୨୭; ଲୁକ ୧୦:୨୨ଆବା ମ୍ରିଃଏଞ୍ଜିକି ଜେଡା କିନ୍ନେଞ୍ଜି, ଆଟେ ହାବେତ୍ କୁଲା ତା କାଜ୍ଜୁତାୱା ସର୍ପି କିଆନ୍ନେଞ୍ଜି । 36ଏମ୍ୱେନାଞ୍ଜି ମ୍ରିଃଏଞ୍ଜିକି ମାଞ୍ଜାଡ଼ି କିନ୍ନେଞ୍ଜି, ଏୱାଞ୍ଜି ଟାକ୍କିଡ଼ହ୍ନାତି ପରନ୍ ପାଁଣ୍ଡାନ୍ନେଞ୍ଜି, ମତ୍ର ଏମ୍ୱେନାଞ୍ଜି ମ୍ରିଃଏଞ୍ଜିକି ମାନି ଆଃଏଞ୍ଜି, ଏୱାଞ୍ଜି ଟାକ୍କିଡ଼ହ୍ନାତି ପରନ୍ ପାଃନେଞ୍ଜି, ମତ୍ର ଏୱାଞ୍ଜି ମୁଲାପେନୁତି ଗାପ୍ଚି ରାଗାତି ଦଣ୍ଡ ପାଁନେଞ୍ଜି ।
Právě zvoleno:
ଜହନ 3: DWK
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
