Maruko 11
11
milihu musavak i Yērusalem
(Matay 21.1-11; Luka 19.28-40; Yohanē 12.12-19)
1i Yēsu zi na temakesi kemakawang mudalrep i Yērusalem, meredek lra kana Olēv zenan i Bētfaki zi i Bētaniya. pakarun i Yēsu kana temakesi za zazuwa iyanguwayan mukuwa. 2patalru marengay kanazu: <<uwa i ngawayan kana zekalr i inmu. nu musavak mu mu, uri nana'u mu saya za makiteng 'azi ziya inuitrasan za trau a rova irekep i kazu. muwa vakevakay i intaw, zi kezengu pukuwani. 3nu ulra a trau kiyumalr kanmu: <kemuda zi kemaani mu?> zi rengayu i intaw: <maanayin ni Luzu#11.3 <<Luzu>> karuwa marengay za <<kanantu ma'izang>>., nu piya lra manay mu payasaw pareveliyas puruma' na rova.> >>
4mukuwa lra nazu, mena'u i ngaydiran kana dalan ulra saya a makiteng na rova kazu irekep kana sulray i patraran. penauwa za venakevak kana tatilu' nazu mu, 5ulra papida matikezir i kazu na trau mu kiyumalr kanazu: <<kemuda zi mu vakevakay na makiteng na rova awa?>>
6nazu tu iturusay na ipatalru ni Yēsu temuvang, nazu na trau mu tu pakezenganay na makiteng na rova. 7nazu tu kezengaw na makiteng na rova mukuwa kani Yēsu i kazu, tu sapayanay nantu kavang kana rova i itras, zi muitras lra i Yēsu. 8ulra kazuwan a trau melre'ap kanantu kavang i dalan, zi ulra ziya a trau metek kana kawi na sa'az semapesap i dalan. 9na kemakawang i ngawayan na miturus i likuzan na trau 'emuy'uy marengay: <<semenay pulihu kana Viruwa i itras! kiyalriman kana Viruwa i itras veray za ka'inavayan kanizu na pakalrang kanantu ngadan ni Luzu zi zuwa! 10kiyalriman kana Viruwa i itras veray za ka'inavayan kanizu na uri raredek kananta temuwamuwan i Davidē na kanatal! na senay na lihu kaya kana maraitraitras na Viruwa i itras!>>
11meredek lra i Yērusalem i Yēsu, musavak kana vangesar ruma', menana'u i iyan ziyan. 'alrana 'aremeng lra, i intaw zi na papulu' zi zazuwa na sito mupataran kana kazekalran mukuwa i Bētaniya.
penunang kana tepur na kawi
(Matay 21.18-19)
12kazuwa wariyan, kemay Bētaniya mareveliyas i kazekalran nazu; kazu i dalan, savelaw lra i Yēsu. 13mena'u i intaw i ngawayan za 'azi adawilr mu ulra sarakazan a tepur na kawi, naven tu vira', zi mukuwa, maranger mena'u kana kawi i itras ulra mivuwa' nay. meredek kana kawi i ngawayan, mawmau mena'u za vira', 'alrana a azu mu amelri kapivavuwa'an na tepur. 14i Yēsu marengay kanizu na kawi: <<kemay harem mu, iniyan lra za trau aekan kanannu vuwa'!>>
kinger nantu temakesi kanini na ngay mapiya.
kemirungetr kana vangesar ruma' i Yēsu
(Matay 21.12-17; Luka 19.45-48; Yohanē 2.13-22)
15nazu meredek lra i Yērusalem, a musavak i Yēsu kana vangesar ruma', tu verelranganay pupatraran na matriyamatrima' ziyan i savak kana vangesar ruma' na trau. tu salikutrangaw na venavalis za ginpiya tu etu zi na menaniwan kana tutur tu lipad, 16zi 'azi muwai kani emaeman semangalr za eman kazu kana vangesar ruma' i patraran mu'iva'ivat. 17i intaw panadam kanazu marengay: <<kana Sēsiyo vinavalrayan kanantu ngay na Viruwa i itras marengay: <nanku na vangesar ruma' utu kiyaanunan na tratrautrau ziyan>, mawmu i inmu venaliyasaw putu ruma' kana male'es lra!>>
18na ma'izang na rahan zi na sinsi kana Sēsiyo kinger kanini na ngay, zi maranger pinatray kani Yēsu. mawmu makaud kantaw nazu, 'alrana zinekalranan salaw pakanu kemaira mukituluz kanantu ipanadam.
19a 'araremeng lra, i Yēsu zi na temakesi mukuwa i panayan kana kazekalran.
kipanadam kemay kana tepur na kawi
(Matay 21.20-22)
20a kazuwa wariyan semavalr, i Yēsu zi na temakesi masalr ziya makalrang kanizu na dalan, menau' kanizu na tepur na kawi arusay tu rami marum minatray lra. 21patuanger i Pētēro tu pinakalrangan kantrini na lremak, zi marengay kani Yēsu: <<sinsi, na'uwi i inu, nannu pinunang na tepur na kawi marum minatray lra.>>
22temuvang i Yēsu kanazu; <<mipakutatena'ana mu kana Viruwa i itras! 23penazangala ku marengay kanmu, anu marengay mu kanini na zenan: <karahan, uwa usavak kana lrevek i savakan!> nu 'azi ziya malrivak i anger, pakutatena' patulre'ay na nirengayan 'azika'azi mula'esi, ini na lremak mu muramawan kanmu ula'esi. 24semeneng, marengaya ku kanmu, nu kiyanun mu, nu kiyami mu lra za eman mu, pakutatena' za melak mu lra, zi aelak kananmu kiniyaami. 25matikezir mu kiyanun mu, piyanguwayan melapus kana pamelri kanmu na trau; kemani mu, nanmu Temama i itras kemazu lalapus kananmu pinamelriyan.>>#11.25 ulra pidaya na awatranan lulun puwayay za 26 vatras <<nu 'azi mu melapus tu pamelriyan za trau mu, nanmu Temama i itras 'azi lalapus kananmu pamelriyan.>> (na'u kana Matay 6.15)
penatezelr kiyumalr kanantu kezang ni Yēsu
(Matay 21.23-27; Luka 20.1-8)
27zuwa ziya nazu i Yērusalem. kazu kemakawang i Yēsu kana vangesar ruma' mu, na ma'izang na rahan, na sinsi kana Sēsiyo, zi na ciyoro zuwa kirepana'uwa kantaw, 28kiyumalr kantaw: <<pakalrang u za eman kezangan kemakuda kananni na lremak? i eman na veray kannu za kezang kemakuda kananni na lremak ziyamaw?>>
29temuvang i Yēsu; <<iyanguwayana ku ziya kiyumalr za saya a ngay kanmu, nu temuvang mu kaninku mu, zi rarengay ku kanmu za pakalrang ku za eman kezangan kikarun kananni na lremak. 30rengayaw ku, nantu kezang semuwap ni Yohanē maw zuwa kemay i iyan? maw kemay kana Viruwa i itras zi za maw kemay kana trau zuwa?>>
31kemirakaz masakisaki nazu, marengay: <<pauwayanay mu kuwadakuda ta temuvang zi kapauwa awa? nu marengay ta <zuwa kemay kana Viruwa i itras>, rarengay i intaw za: <nu kemazu mu, kemuda zi 'azi mu pakutatena' kani Yohanē ziyamaw?> 32mawmu karuwa ta marengay za <zuwa kemay kana trau> ziyamaw?>> makakaud nazu kana zinekalranan za kima'etrev kanazu, 'alrana pakutatena' mapiya kani Yohanē za maw a patralritralri. 33kemazu zi temuvang nazu kani Yēsu: <<'azi mi malrazam.>>
marengay i Yēsu kanazu: <<nu kemazu mu, 'azi ku rarengay kanmu za pakalrang ku za eman kezangan kemakuda kananni na lremak.>>
Právě zvoleno:
Maruko 11: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
