Luka 14
14
i Yēsu paka'inava kana kuwaleng na trau
1ulra a saya katalaulepan na wari, i Yēsu mukuwa kana kemakezeng na Palisay na trau kanantu ruma' mekan; ulra papida a trau tremakatrakaw mena'u kantaw. 2penauwa ulra a trau i ngawayan kantaw a sasa mikuwalengan za venavare', 3zi kiyumalr i Yēsu kanazu na sinsi kana kuret zi kana Palisay na trau marengay: <<nanta kuret paturus za paka'inava kana kuwalengan nu katalaulepan na wari nay?>>
4mapeng nazu mapiya 'azi marengay. zi demikes i Yēsu kanizu na trau, paka'inava kantaw, puveruk kantaw. 5kemazu zi i intaw marengay kana trau mapiya: <<kanmu i savakan i eman na ulra za alrak zi za hung kazu za katalaulepan na wari mutani kana tevun i savakan mu, zi 'azi paayas kemezeng kantaw papuitras?>>
6tu kiniyumalr ni Yēsu na ngay 'azi maruwa temuvang nazu.
kemaira zi na pauwayan kana temara za lavang
7patulre'ay mena'u i Yēsu za ulra zuma a lavang palimi' kana i ngawayan na kakayanan kana semasaharan i intaw, zi paruwalru marengay kana mapiya: 8<<nu kidaulr u kurelrang kana pakaetim mu, iauwa kemayana i ngawayan kana kakayanan, kaulra ulra a marapenazangal kannu na lavang kidaulr. 9izu na demaulr kanmu na miraruma' zazuwa marengaya kannu: <'alrazi pakayanu kanini na sasa mu!> nu azu mu, kaaira u, zi 'azika'azi mulikuzan kana kakayanan. 10nu kidaulr u mu, zi uwa kayan i likuzan, zuwaya na miraruma' marengaya kannu za: <ali, 'alrazi kayan i ngawayan.> kemani mu, pimudingan u kana lavang i ngawayan. 11'alrana Viruwa i itras tu pulusuwaw na matras na trau, zi papuitras kana salaw kemaira na trau.>>
12kema ziya marengay i Yēsu kana demaulr pakayan kantaw na miraruma': <<nu temara u pakare'alri zi za pakeravi mu, amanan demaulr kanannu 'ali'an, wadiyan, niruma'enan, zi na miyaeman na 'udar, mawnu venales demaulr kannu i intaw, pareveliyas kanannu iyaveray. 13demaulr u paekan kana lavang, daulru nazu na kalramalraman, na 'azi 'iyanavayan tu zazek, na matripu', na mavutri'; 14nu kemani mu, mika'inavayan u lra, 'alrana nazu na trau mu iniyan za kezang pareveliyas kannu. nu marevaaw na penatezelr na trau mu, na Viruwa i itras i intaw na vavales veray kannu.>>
na paruwalruwan kana semasaharan
(Matay 22.1-10)
15na mukasa kemayan kana semasaharan ulra a sasa trau kinger kananni na ngay mu, kema marengay kani Yēsu: <<na maruwa kazu pa'inavanava za semasahar kanantu kanatal na Viruwa i itras na trau mu kemudakuda kana mika'inavayan a!>>
16i Yēsu marengay kantaw: <<ulra a trau kema'izang za semasaharan, demaulr lra kazuwan za lavang. 17a musasavak kemayan mu, pakarun i intaw kana pakarunan pauwa marengaya kana dinaulr na lavang: <alamu lra, pinadang lra peniya!> 18mawmu kemirakaz 'ema'azi sasasasa nazu. na i nguwanguwayan marengay: <maw ku ziyan tremima' za saya dare', 'azi ku ka'azi mukuwa mena'uwa. 'alrazi ikaselru kaninku, 'azi ku pakazuwa.> 19ulra zuma a sasa marengay: <tremima' ku za lruwatra 'etrev za hung, penauwa za makuwa ku patalrama. 'alrazi ikaselru kaninku, 'azi ku pakazuwa.> 20ulra ziya a sasa marengay: <maw ku ziyan mi'azin, tatena' ku za 'azi kalr'ayan muiayaiyan.> 21izu na pakarunan muruma' pakalrazam kana miraruma' ini na nirekudayan peniya. ini na miraruma' ka'ilremesan, zi marengay kana pakarunan: <kadika upatraran, uwa kana kazekalran na dadalan ziyan, arelrayu na kalramalraman, na 'azi 'iyanavayan tu zazek, na mavutri', na matripu' pilralrangu zuwa mapapiya.> 22'azi sawariyan, muruma' na pakarunan temuvang marengay: <tawki, nannu pinakarun piya ku lra, mawmu ulra ziya a sazu na kakayanan!> 23marengay na miraruma' kana pakarunan: <uwa i dadalan zi na kakitengan na dalan, pa'iselri na trau pusavak, patemuyi kemayan kananku ruma'.> 24marengaya ku kanmu, nazu na dinaulr a pakangawayan na trau mu 'azi karuwa pa'inava kananku semasaharan!>>
na trima' kana mutu temakesi
(Matay 10.37-38)
25ulra kazuwazuwan a trau kurelrang kani Yēsu. marepiles i Yēsu marengay kanazu: 26<<na zuwa kaninku i kani na trau tu saharan kaninku nu 'azi semalaw tu saharan kanantu ma'izangan, 'azin, lralrak, wadadiyan, arusay kantaw i intaw mu, zi 'azi karuwa mutu temakesi kaninku. 27na 'azi muwai penazek kanantu ziyuzika zuwa kurelranga kaninku mu, kuwaazu 'azi kararuwa mutu temakesi kaninku. 28kanmu i savakan ulra i eman za maranger parahan kana atras na ruma', nu 'azi kiyanguwayan kemayan kemianger menau' kanantu paisu mu, menau' za ulra nay za kararuwa kemipiya kana kiyakarunan na paisu? 29nu 'azi mu, munu piya patikezir kana pukaarekezan mu, 'azi maruwa kemipiya parahan kana maretre'etre'elr na ruma', na mena'u na trau mu kaliked kantaw, 30marengay: <ini na trau kemirakaz parahan, mawmu 'azi pakapiya!> 31anu ulra a sasa yawan murung za sakuzaw na hitay, auwa kimatengeza kana zuma na mihitay za zuwaya kuzaw, i intaw 'azika'azi kiyanguwayan kemayan kemianger kanantu pinikezangan, mena'u za kararuwa nay kimatengez kana hitay na 'alra; 32nu 'azi kararuwa mu, kuwaazu i intaw nu kazu ziya i dawilr tu hitay na 'alra, pakarun kana pakarunan mukuwa kimazayara kanazu na 'alra, mazazayar za pareka'iyanavayan. 33mararesan, i inmu nu i eman lra, nu 'azi 'ematelr kana eman ziya mu, 'azi kararuwa mutu temakesi kaninku.>>
na iniyan za pakakudain na iyam
(Matay 5.13; Maruko 9.50)
34<<taw 'inavayan na iyam, mawmu nu iniyan za ka'asilr mu, kudayaw lra masalr paka'asilr awa? 35anu tinudare' zi za tinuzaruk mu 'azi kirepa'uwa, 'inava lra ta 'atelranay. na mitralinga mu, kingeri mapiya a!>>
Právě zvoleno:
Luka 14: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
