ମାଥିଉ 28
28
ଯୀଶୁ ଜୀବନ୍ ହାୟ୍କ୍ରି ଉଟ୍ଲା
(ମାର୍କ ୧୬:୧-୧୦; ଲୁକ ୨୪:୧-୧୨; ଯୋହ. ୨୦:୧-୧୦)
1ଯିହୁଦିମ୍ନ୍କାର୍ ବିଶାଉଣିଦିନ୍ ସ୍ର୍ଲା ହ୍ଚେ ରଇବାର୍ ଦିନାର୍ ସ୍କାଳ୍ ଅନ୍ଦାର୍ ରେମ୍ ରେମ୍ ମଗ୍ଦଲୀନୀ ମରୀୟମ୍ ଆର୍ ବିନ୍ ମରୀୟମ୍ ମ୍ସୁଣ୍ ଦ୍କୁକେ ଆଇଲାଇ। 2ଆରେକ୍ ଦ୍କା, ବ୍ଡ୍ ବୂମିକ୍ମ୍ପ ଅଇଲି, କାଇତାକ୍ ଇଶ୍ଵରାର୍ ଗଟେକ୍ ଦୂତ୍ ସ୍ର୍ଗେ ହ୍ଣି ଉତ୍ରି ଆସି ସେ ଟେଳାକେ ଗୁଚାଇ କ୍ରି ତାର୍ ଉହ୍ରେ ବ୍ସ୍ଲି।
3ସେ ଦୂତାର୍ ମୁଉ ବିଜ୍ଲି ହର୍ ଉଜାଳ୍ ଡିସ୍ତିରିଲି ଆର୍ ତାର୍ ହ୍ଚିଆ କ୍ରାଗଡି ହର୍ ହିଟ୍ ଦବ୍ଳା ଡିସ୍ତିରିଲି, 4ଆରେକ୍, ସେଡେବ୍ଳ୍ ସେ ଜାଗୁଆଳିମ୍ନ୍ ବେସି ଡିରି ମ୍ଲାଲକ୍ ହର୍ ଅଇଲାଇ।
5ମ୍ତର୍ ସ୍ର୍ଗାର୍ ଦୂତ୍ ସେ ମାଇଜି ମ୍ନ୍କେ କଇଲା, ତୁମିମ୍ନ୍ ଡିରାନାଇ, କାଇତାକ୍ ତୁମିମ୍ନ୍ କୁର୍ଶକାଟେ ମ୍ରିରିଲା ଯୀଶୁକେ କଜୁଲାସ୍, ଇକ୍ତା ମୁଇ ଜାଣି। 6ସେ ଇଜାଗାଇ ନାଇ, କାଇତାକ୍ ସେ ଜ୍ନ୍କ୍ରି କଇରିଲା, ସେନ୍କ୍ରି ଜୀବନ୍ ହାୟ୍କ୍ରି ଉଟିଆଚେ। ତୁମିମ୍ନ୍ ଆଶା, ସେ ଜୁଇ ଲ୍ଗେ ସଇରିଲା ସେ ଜାଗାକେ ଦ୍କା। 7ଆର୍, ତୁମିମ୍ନ୍ ବେଗି ହ୍ଳାଇ ଜାଇ ଯୀଶୁର୍ ଚେଲାମ୍ନ୍କେ କ୍ଉଆ, ଯେ ଯୀଶୁ ମ୍ଲା ଲ୍ଗେ ହ୍ଣି ଜୀବନ୍ ହାଇକ୍ରି ଉଟ୍ଲା ଆଚେ ବ୍ଲି, ଆରେକ୍, ଦ୍କା, ଯୀଶୁ ତୁମାର୍ ଆଗେ ଗାଲିଲୀ ଜିଲାକେ ଜ୍ମ୍ଲା, ସେତି ତୁମିମ୍ନ୍ ତାକେ ଦ୍କୁହାରାସ୍। ଦ୍କା, ମୁଇ ତୁମୁକ୍ମ୍ନ୍ କଇଲେ।
8ସ୍ଡେବ୍ଳ୍ ସେ ମାଇଜିମ୍ନ୍ ଡିର୍ଲାଇ ଆର୍ ବେସି ସ୍ର୍ଦା ଅଇକ୍ରି ସେ ମ୍ସ୍ଣେ ହ୍ଣି ବାରି, ତାର୍ ଚେଲାମ୍ନ୍କେ କ୍ବର୍ ଦେମ୍କେ ଦ୍ବ୍ଳି ଗ୍ଲାଇ। 9ଆର୍ ଦ୍କା, ଯୀଶୁ ସେମ୍ନ୍କେ ଦ୍କାଇଅଇକ୍ରି କଇଲା, ତୁମାର୍ମ୍ନ୍କାର୍ ଶାନ୍ତି ଅଉଅ। ତ୍ବେ ସେମ୍ନ୍ ଯୀଶୁର୍ ଲ୍ଗେ ଆଇଲାଇ ଆର୍ ତାର୍ ହାଦ୍ ଦ୍କିକ୍ରି ତାର୍ ଆରାଦନା କ୍ଲାଇ। 10ତ୍ବେ ଯୀଶୁ ସେମ୍ନ୍କେ କଇଲା, ଡିରାନାଇ, ତୁମିମ୍ନ୍ ଜାହା ଆର୍ ମର୍ ଚେଲାମ୍ନ୍କେ ଜାଣାଉଆ, ସେମ୍ନ୍ ଗାଲିଲୀ ଜିଲାକେ ଜ୍ଉତ୍। ସେତି ସେମ୍ନ୍ ମକେ ଦ୍କ୍ତି।
ଜାଗୁଆଳିମ୍ନ୍ ଯିହୁଦି ମ୍ନ୍କାର୍ ଗଟ୍ଲା କ୍ତା
11ସେ ମାଇଜିମ୍ନ୍ ଚେଲାମ୍ନ୍କାର୍ ଲ୍ଗେ ଇ କ୍ବର୍ ଦେତାର୍ ଗିନେ ଜାତିରିଲାବ୍ଳ୍, ଦ୍କା, ମ୍ସୁଣ୍ ଜାଗୁଆଳି ଦ୍ଳାର୍ କ୍ତେକ୍ ଲକ୍ ଯିରୁଶାଲମ୍କେ ଲେଉଟି ଜାଇ ସେ ସ୍ବୁ ଗଟ୍ଲା ଗଟ୍ଣା ମୁକିଆ ଜାଜକ୍ ମ୍ନ୍କେ ଜାଣାଇଲାଇ। 12ମୁକିଆ ଜାଜକ୍ମ୍ନ୍ ପାରାଚିନ୍ମ୍ନ୍କାର୍ ସ୍ଙ୍ଗ୍ ମିସିକ୍ରି ବୁଦି ହାଚ୍ଲାଇ, ଆର୍ ସେ ଜାଗୁଆଳି ଲକ୍ମ୍ନ୍କେ ମିଚ୍ ସାକି ଦେମ୍କେ ବେସି ଟ୍କା ଲାଚ୍ ଦେଇ କଇଲାଇ, 13ତୁମିମ୍ନ୍ ଲକ୍ମ୍ନ୍କେ କ୍ଉଆ, ଅମିମ୍ନ୍ ରାତି ସଇଲା ବ୍ଳ୍ ତାକାର୍ ଚେଲାମ୍ନ୍ ଆସିକ୍ରି ଯୀଶୁର୍ ମ୍ଲା ମ୍ଳ୍କେ ଚରିକ୍ରି ନ୍ଇଗ୍ଲାଇ।
14ଆରେକ୍, ତୁମି ସଇରିଲା କ୍ତା ପିଲାତ ଗବର୍ନର୍ ଶୁଣେଦ୍, ତ୍ବେ ଅମିମ୍ନ୍ ତାକେ ବୁଜାଇ ଦେମ୍ନ୍ଦ୍ ଯେ ଇତି ତୁମାର୍ କାଇ ଦସ୍ ନାଇବ୍ଲି, ଇ ବିଷୟେ ତୁମିମ୍ନ୍ ଚିନ୍ତା କ୍ରାନାଇ। 15ସେ ଜାଗୁଆଳିମ୍ନ୍ ସେ ଟ୍କାକେ ନିଲାଇ ଆର୍ ସେମ୍ନ୍କେ କଇରିଲା ହର୍ ଲକ୍ମ୍ନ୍କେ କଇଲାଇ। ତ୍ବେ ଇକ୍ତା ଯିହୁଦି ଲକ୍ମ୍ନ୍କାର୍ ବିତ୍ରେ ଉବ୍ଜ୍ଲି ଆର୍ ଆଜିହ୍ତେକ୍ ହେଁ ସେ କ୍ତା ଆଚେ।
ବ୍ଡ୍ ଆଦେଶ୍
(ମାର୍କ ୧୬:୧୪-୧୮; ଲୁକ ୨୪:୩୬-୪୯; ଯୋହ. ୨୦:୧୯-୨୩; ପ୍ରେରି. ୧:୬-୮)
16ମ୍ତର୍ ଏଗାର୍ ଗଟ୍ ଚେଲା ଗାଲିଲୀ ଜିଲାକେ ଜାଇ, ଯୀଶୁ ଜୁଇ ଡଙ୍ଗ୍ରେ ସେମ୍ନ୍କେ ଜ୍ମ୍କେ କଇରିଲା, ସେ ଡଙ୍ଗ୍ରେ ଗ୍ଲାଇ। 17ଆର୍, ସେତି ସେମ୍ନ୍ ଯୀଶୁକେ ଦ୍କିକ୍ରି ମାଣ୍ତିକୁଟା ଟେସି ତାର୍ ଆରାଦନା କ୍ଲାଇ, ମ୍ତର୍ କେ କେ ସେ ଜୀବନ୍ ଅଇଲାଆଚେ ବ୍ଲି ତାକାର୍ ମ୍ନେ ବିଶ୍ବାସ୍ ନ୍କେଲାଇ।
18ଆରେକ୍, ସେ ବିଶ୍ବାସ୍ ନ୍କେଲା ଲକ୍ମ୍ନ୍କର୍ ଲ୍ଗେ ଯୀଶୁ ଗ୍ଲା ଆର୍ କଇଲା, ସ୍ର୍ଗ୍ ଆର୍ ହୁର୍ତିବିର୍ ସ୍ବୁ ଅଦିକାର୍ ଇଶ୍ୱର୍ ମକେ ଦିଲାଆଚେ। 19ତ୍ବେ, ତୁମିମ୍ନ୍ ଜାଇ ସ୍ବୁ ଦେଶାର୍ ଆର୍ ସ୍ବୁ ଜାତିର୍ ଲକ୍ମ୍ନ୍କେ ଉବା ଇଶ୍ୱର୍, ତାର୍ ହଇସି ଯୀଶୁ ଖ୍ରୀଷ୍ଟ, ଆର୍ ପବିତର୍ ଆତ୍ମାର୍ ନାମେ ଡୁବେନ୍ ଦିଆସ୍,
20ମୁଇ ତୁମୁକ୍ମ୍ନ୍ ଜୁଇସ୍ବୁ ଆଦେଶ୍ ଦେଇଆଚି, ସେ ସ୍ବୁ ମାନ୍ତାର୍ ଗିନେ ଶିକ୍ୟା ଦେଇ ସେମ୍ନ୍କେ ଚେଲା କ୍ରା। ଆର୍ ମ୍ନେର୍କା, ଯୁଗ୍ ଶେସ୍ ହ୍ତେକ୍ ସ୍ବୁବ୍ଳ୍ ମୁଇ ତୁମାର୍ମ୍ନ୍କାର୍ ସ୍ଙ୍ଗେ ସ୍ଙ୍ଗେ ଆଚି।
Právě zvoleno:
ମାଥିଉ 28: BDVNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
