Kodampaya 14
14
Pawloosi isho Parnapaasi wa a katama Iqqoniyooni kara kodene
1Pawloosi isho Parnapaasi ollinni Iqooniyooni kara tikase a qinseeta a orra Yihuta kelopa kullen. Ka eyyeeyye haka Yihutaata kuttayteeta isho orra Yihutaata in koddinini oppaayye orra a akata kutta kollishen malla a akata leka ka amanen. 2Yihutaata a in amannin xoori, orra a Yihutaata in koddininii nyarisse ka akka hella kiristaana qara needduma an xa'ane koote. 3Semmalla Pawloosi isho Parnapaasi qoota Poqallaati desa maxanyumaan haasawattanne, a kuttati eeyye jaren. Poqalla ka akka wa orra qawwanna isho daxxowwa ishootta qudan koddane'e, hupna ukkumeeta ishootta daassatanne, qaaletaadi a daassata Waaqa akka dukaata koddite upnaanni. 4Orra katama kara kalo xoori, lakki'i qite; paka takka ka Yihutaata quda kodde; paka takka ka erkamampaya quda kodde.
5Orra a Yihutaata in koddinin isho Yihutaata ka saarrasso ollinni, akka Pawloosi isho Parnapaasi rakkacciissan ka dakaan ishootta dakkeeta faden; 6Pawloosi isho Parnapaasi ete sede upnaadeneeyye, katamaddasene a Liqooniya Listira isho Tarpe kidamma isho piitase ishootta akapan desa kitto oppopa qahen. 7Ka eyye otoota fayya torren.
Pawloosi isho Parnapaasi wa a katama Listira isho a Tarpe kara kodene
8Listira karaayye, nama takka a loqta tupa toonnaawte ca. Namoose qoota a dalade paayyatte toonnayta kodde malla, a pari loqqaadin in anne kan in upo. 9namoose ete Pawloosi haasawannoyye, ikute'e ka dakkaysanni. Pawloosi ka isha quda ilda kode ka akka amanteeta a isha dinissa ettanisso qapo akke. 10Ka nessa kuttan haasawade ka kide, “Jibi kide ka loqqaattin qa'ado!” Namase ka ela shore ka anta paayye. 11Orrase ete wa Pawloosi kode akkeeyye, nessa kuttishen ka afa Liqqoniyaatin haasawaden ka kidene, “Ha Waaqadda nama pahanaade ka ino oppopa lekkade!” 12Ka Parnapaasi kidene “Diyya;” Ka Pawloosi qoota a harmo haasawattanpayta kodde malla, ishi “Hermeeni” kiden. 13Qeesitta a tikase a qulqulloota a Diya a katamaayye laka tula kittooti ka xormada isho pisa a xalaala mina maramen xarrase a katama oppopan de'e, ka samayta isi quda qeedeeta ka Pawloosi isho Parnapaasi kalisoota kalissa fade.”
14Erkamampayasene Pawloosi isho Parnapaasi xoori ete sede dakayeneeyye, nyarrahatanne mehaddaasso isi quda kakkaa'en ka samaytopa hiren ka nessa kuttishen ka kidene, 15“Ishina orraayti, maana'e sede koonittan? Ha ino xaayshin mina'ewwen an orra. Ha ino waan malla arepa deene akka ishina wessene a paata patta kapaayye sekaattan ka caattampaytase a Waaqa moonta ka piita isho pakateeta ka wa kara ca piisa uumepa tiitaawtane'en otoota fayya ishina torreeta malla#sooka 20:11; mas 146:6 . 16Sapanna tarpeetiiyyi Waaqa samayta piita piisa akka saantaaysho qara kallaadane'e ishootta tupadesa diishe. 17A koddito ma, isha xoori shorokitta Waaqa a atta paho akkima kodde koda paxaara kodeetanne moonte xata ishina roopa roopissaanne ka kiseewwa paxaara ika lekayta ishina daassatane ka wa damtane tupa xata ishina daassatanne senen paxaarumtaadi akkissaanne qootaadi desa maakkuma in qaatinne.” 18Erkamampaya kadi punu a asse kitto hasawadeneeyye, akka kalisoose ishootta in kalinnini rakkoota a kuttatinni samayta isi qara dawren.
19Yihutaata xoori Ansookkiya isho Iqqoniyooniiyyi eyyepa dete ka samayta nyarisse ka akka Pawloosi dakaan dakkane koote. Ikka a to'e ishootta pahanaade. Ikka alle titen ka katamaappa sookshen. 20Ma xoori, ete orra amanno de'e ka isha kapa qa'addeyye, ixa'e ka katama karopa kulle ka parraytaadiiyyi, Parnapaasi olliiyyi Tarpe opa aanen.
Pawloosi isho Parnaapase akka katamasene a Ansookkiya piita Sooriya kara ca opa tiitaawen
21Pawloosi isho Parnapaasi, ete Tarpe kara otootase a fayya kollishen ka orra lekayta amansiisen kammaayye, Listira ka Iqqoniyooni oppanne tarpen ka katamasene Ansookkiya piita Pisdiya kara ca opa aanen. 22Ka piitaddoosen piisa oppaayye orra amanno akka amanteetayshotin japaado kokkonnassa ka dehaamanne, Ishootta kollishen ka kidene, “Mankisteeta Waaqa opa kalta'e rakkoota a kutta akkatta ino faani.” 23Ka tikka a kiristaana kara ishootta qimaya shuumen ka ete damta musaden ka ishootta Waaqa qinsaden kammaayye poqallasene a amaneneti ishootta atara' daashen.
24Ka Pisdiya opan tarpen ka Binfiliyaapa aanen. 25Ka ete katama Berke kara qaaleta Waaqa kollishen kammaayye, katama a Taaliya opa aanen. 26Ka sekkammaayye kodoose a kodene'e katamasene a Ansookkiya a oppaayye daassata Waaqati atara' daasamen, opa markapan aanen. 27Ka ete eyye kayeneeyye, orra amanno ollopa halen ka wa a Waaqa ishootta olli caade ka kode ka akka orra Yihutaata in koddini amano'e akka ishootta xarra pane ishootta torren. 28Ka eyye'e, orra amanno olli eta kuttayata jaren.
Právě zvoleno:
Kodampaya 14: MaQu
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas