मरकुस 2
2
लकवे चे बिमार नु ठीक करले
(मत्ती 9:1–8; लूका 5:17–26)
1कहीं ङिहां चे बादा मां ईशु कफरनहूम शहरा मां बल्ति आला, बन्दा नु पता लाग़ला कि ओ घरे छै। 2बल्ति इतनी बन्दी भेली हुली कि पग़्ग़ मेहलणे ची जग़हा कोनी हुती, दरवाजे चे ब़ाहरु तक जग़हा वी कोनी हुती, ओ वानु नरीकारा चा वचन सुणावे पलता 3ते लौक हेक लकवे चे बिमारा नु चार बन्दा कनु चवाती कर ओचे गोढु आणले। 4पर जब वे भीड़ी चे वजह ईशु चे गोढु कोनी पोज़ सग़ले, तां वाणे वे छत्ते नु जाये तले ओ हुता, खोलती ङिले, ते जब वे विनु अध्रेड़ती चुकले, तां वे खाटे नु जिसी उपर लकवे चा बिमार पला हुता, लटकाती ङिले। 5ईशु ने वांचा विश्वास ङेखती कर ओ लकवे चे बिमारा नु केहले, “हे पूत, दुधे पाप माफ हुले।”
6तब कई शास्त्री जको ओठे ब़ेहले हुते, वे आपणे-आपणे मना मां सोचु लाग़ले, 7“ईं बन्दे कां यूं किहे? हा तां नरीकारा ची निन्दा करे पला! नरीकारा नु छोड़ती कर नेरे कूण पाप माफ कर सग़े?” 8ईशु ने तुरन्त आपणी आत्मा मां जाणती गेले कि वे आपणे-आपणे मना मां इसड़ा विचार करी पले, ते ओणे वानु केहले, “तम्ही आपणे-आपणे मना मां इसड़ा विचार कां करा पले? 9आसान का छै? का लकवे चे बिमारा नु ईं केहणे कि ‘दुधे पाप माफ हुले’ जा ईं केहणे कि ‘ऊठ आपणी खाट चा ते टोर-फेर’? 10पर ऐवास्ते कि तम्ही जाणती गिहा कि मैं इन्साना चे पूता नु धरती उपर पाप माफ करने चा अधिकार छै।” बल्ति ओणे लकवे चे मरीजा नु केहले, 11“मैं तनु किहे पला, ऊठ, आपणी खाट चा ते आपणे घरे चाह्ला जा।” 12ओ ऊठला ते तुरन्त खाट चती कर सारा चे सामणे निकलती कर चाह्ला गेला, ऐचे उपर सब हैरान हुले ते नरीकारा ची बढ़ाई करती कर किहुं लाग़ले, “अम्ही इसड़े कङी कोनी ङेखले।”
ईशु ने लेवी नु हकारले
(मत्ती 9:9–13; लूका 5:27–32)
13बल्ति ईशु गलील ची झील चे किनारे गेला ते सारी भीड़ ओचे गोढु आली, ओ वानु शिक्षा ङिऊं लाग़ला। 14जते बेले ओणे हलफई चे पूत लेवी नु चुंगी गेहणे आले ची चौकी उपर ब़ेहले ङेखले, ते ओनु केहले, “माये भांसु आती जा,” ते ओ उठती कर ओचे भांसु टुरती पला। 15जब ओ ओचे घरा मां खाणा खाणे वास्ते ब़ेहला, तब ब़ोहत से चुंगी गेहणे आले ते पापी, ईशु ते ओचे चैला लारे खाणा खाणे वास्ते ब़ेहले, कांकि वे ब़ोहत से हुते, ते ईशु चे भांसु चाह्ले आलते। 16शास्त्रीया ते फरीसिया ने ईं ङेखती कर कि ओ तां पापीया ते चुंगी गेहणे आला लारे खाणा खाये ब़ेहला, ओचे चैला नु केहले, “ओ तां चुंगी गेहणे आला लारे ते पापीया लारे खाये पीयें!” 17ईशु ने ईं सुणती कर वानु केहले, “भले चंगा नु वैद ची जरुरत कोनी, पर बिमारा नु छै, मैं धर्मीया नु ना, पर पापीया नु हकारने वास्ते आला।”
ईशु कनु उपवास चे बारे मां पूछले
(मत्ती 9:14–17; लूका 5:33–39)
18यूहन्ना चे चैले, ते फरीसी उपवास राखते, तां वाणे आती कर ईशु नु ईं केहले, “यूहन्ना चे चैले ते फरीसिया चे चैले कां उपवास राखी, पर दुधे चैले उपवास ना राखी?”
19ईशु ने वानु केहले, “जब तक बीन्द बरातीया लारे रिहे, का वे उपवास राख सग़ी? तां जब तक बीन्द वांचे लारे छै, तब तक वे उपवास ना राख सग़ी। 20पर वे ङिहें आवे बीन्द वाकनु अलग़ करला जई, ते बल्ति वे ओ समय उपवास राखे।
21“नवें ओढ़णा ची टाकी पुराणे ओढ़णा उपर कुई ना लावी, ना तां वा टाकी ओ ओढ़णा कनु कोच्छ छिकती गिही, यानि नवां, पुराणे कनु, ते ओ पेहले कनु ज्यादा फड़ीती जई। 22नवां अंगूरा चा रस नु पुराणीया मशका मां कुई ना भरी, ना तां नवां अंगूरा चा रस पुराणीया मशका नु फाड़ती नाखी, ते नवां अंगूरा चा रस ते मशका ङोनी नाश हुती जाये, पर नवां अंगूरा चा रस नवींया मशका मां भरला जाये।”
सब्त चा प्रभु
(मत्ती 12:1–8; लूका 6:1–5)
23इसड़े हुले कि ईशु सब्त चे ङिओ खेता महु हुती कर जाये पलता, ते ओचे चैले जते बेले सीटी पटु लाग़ले। 24बल्ति फरीसिया ने ओनु केहले, “ङेख, ये सब्त चे ङिओ ऊं काम कां करी जको वाजिब कोनी।” 25ईशु ने वानु केहले, “का तम्ही ईं कोनी पढ़ले कि जब दाऊद नु जरुरत हुली, ओनु ते ओचे साथीया नु भोक्क लाग़ली, तां का करले? 26दाऊद किवें आबियातार महायाजक चे बेले, नरीकारा चे भवना मां जती कर भेंट चा रोटीया खालीया, जानु खाणे याजका नु छोड़ती कर नेरे कानु वाजिब कोनी, ते आपणे साथीया नु वी ङिलीया।” 27ईशु ने केहले, “सब्त चा ङिओ बन्दा चे वास्ते बणाला, ना कि बन्दे सब्त चे ङिओ वास्ते बणाले। 28ऐवास्ते मैं इन्साना चा पूत सब्त चे ङिओ चा वी प्रभु छै।”
Právě zvoleno:
मरकुस 2: ODR
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CC BY-NC-ND 4.0
