मत्ती 11
11
ईशु ते यूहन्ना बपतिस्मा ङेणे आला
(लूका 7:18–35)
1जिसे बेले ईशु आपणे ब़ारहा चैला नु आज्ञा ङिती चुकला, तां ओ वांचे शहरा मां उपदेश ते प्रचार करने नु उठु चाह्ला गेला।
2यूहन्ना बपतिस्मा ङेणे आले ने कैदखाने मां मसीह चे कामा चा समाचार सुणला ते आपणे चैला नु ओकनु ईं पूछणे वास्ते भेज़ले, 3वाणे पूछले, “का आणे आला तु ही छी, जा अम्ही कुई ङुजे ची बाट ङेखु?”
4ईशु ने उत्तर ङिला, “जको कोच्छ तम्ही सुणले ते ङेखले, ऊं सब जती कर यूहन्ना नु केहती ङिया। 5कि अन्धे ङेखी ते लंगड़े टुरी-फिरी, ते कोहड़ी शोद्ध करले जई, ते बेहरे सुणी, ते मुड़दे जीते करले जई ते कंगाला नु सुसमाचार सुणाला जाये। 6ते धन्न छी वे, जको माये उपर भरोसा करना ना छोड़ी।”
7जब चैले उठु टुरती पले, तां ईशु यूहन्ना चे बारे मां लौका नु किहुं लाग़ला, “तम्ही बरब्यान मां का ङेखु गेलते? का हवाई लारे हलते हुले कान्नै नु? 8बल्ति तम्ही का ङेखु गेलते? का मुलायम ओढ़णी घाले आले बन्दे नु? ङेखा, जको मुलायम ओढ़णी घाली, वे राज़ भवना मां रिही। 9तां बल्ति का ङेखु गेलते? का कुई भविष्यवक्ते नु? हव्वे, मैं तम्हानु किहे पला कि भविष्यवक्ते कनु वी बङे नु। 10हा ओही छै, जाये बारे मां लिखले पले,
“ ‘ङेख, मैं आपणे दूता नु दुधे आग़ु-आग़ु भेज़े पला,
जको दुधे आग़ु दुधा मार्ग़ तियार करी।’
11“मैं तम्हानु सच्च किहे पला कि जको असतरीया कनु जमले, वांचे महु यूहन्ना बपतिस्मा ङेणे आले कनु कुई बङे कोनी, पर जको स्वर्ग़ चे राज़ मां छोटे कनु छोटा छै, ओ यूहन्ना कनु वी बङा छै। 12#लूक 16:16यूहन्ना बपतिस्मा ङेणे आले चे ङिहां कनु हमा तक स्वर्ग़ चे राज़ मां जबरदस्ती प्रवेश हुता रेहला, ते बलवान ओनु खोसती गिही। 13यूहन्ना तक चे सारे भविष्यवक्ता ते मूसा चे व्यवस्था चे जाणकार राज़ चे बारे मां ब़ोलते रेहले। 14#मत्ती 17:10–13; मरकु 9:11–13ते चाहवा तां मनाकि यूहन्ना हाओ एलिय्याह छै, जको आणे आला छै, जेह्णे भविष्यवाणी करली हुती। 15जाये सुणने चे कान हो, ऊं सुणती गिहो।
16“मैं ऐ समय चे लौका ची तुलना काये लारे ङिये? वे वां ब़ाला चे समान छी, जको बजारा मां ब़ेहले आले हेके ङुजे नु साङ मारती कर किही,
17“ ‘अम्ही तम्चे वास्ते बन्सरी बजाली
ते तम्ही कोनी नचले,
अम्ही विलाप करला,
ते तम्ही छात्ती कोनी कोट्टली।’
18“ते यूहन्ना बपतिस्मा ङेणे आला ना खाता आला ते ना पीता आला, ते वे किही, ‘ओचे मां दुष्टात्मा छै।’ 19मैं इन्साना चा पूत, खाता-पीता आला, ते वे किही ‘ङेखा पेटु ते पियक्कड़ बन्दे, ते चुंगी गेहणे आला चा ते पापीया चा मित्र छै।’ पर नरीकारा चा ज्ञान आपणे कामा लारे सच्चा ठहराला गेला।”
अविश्वास उपर हाय हाय!
(लूका 10:13–15)
20बल्ति ईशु वा शहरा चे लौका नु उलाहणा ङिऊं लाग़ला, जाये मां ओणे ब़ोहत से अचम्भे चे काम करले हुते, कांकि वाणे आपणे मन कोनी फिराले हुते। 21“हाय खुराजीन! हाय बैतसैदा! जको सामर्थ चे काम तम्चे मां करले गेले, अगर वे सूर ते सैदा मां करले जईया, तां उठले लौक टाट ओढ़ती कर, ते कैरी मां ब़ेसती कर वे कङकणे मन फिराती गिहा। 22पर मैं तम्हानु किहे पला कि न्यां चे ङिओ, तम्ची दशा कनु सूर ते सैदा ची दशा घणी सेहणे चे लायक हुवी। 23हे कफरनहूम, का तु स्वर्ग़ तक ऊंचा करला जाये? तु तां अधोलोक तक तले जाये! जको सामर्थ चे काम दुधे मां करले गेले, अगर सदोम मां करले जईया, तां आज़ तक ओ बणला रिहा। 24#मत्ती 10:15; लूक 10:12पर मैं तम्हानु किहे पला कि न्यां चे ङिओ दुधी दशा कनु सदोम शहरा ची दशा घणी सेहणे लायक हुवी।”
बोझ लारे दब़ले लौका चे वास्ते आराम
(लूका 10:21,22)
25ओही बेले ईशु ने केहले, “हे ब़ा, स्वर्ग़ ते धरती चा प्रभु, मैं दुधा धन्यवाद करे पला कि तु यां बाता नु ज्ञानीया ते समझदारा कनु लुकाती राखलीया, ते ब़ाला उपर प्रकट करलीया, 26हव्वे, हे ब़ा कांकि तनु ईं आच्छे लाग़ले।
27 #
यूह 3:35;
यूह 1:18; 10:15 “माये ब़ा ने मनु सब कोच्छ सोंपती ङिले, ते कुई पूता नु ना जाणी, सेर्फ ब़ा, ते कुई ब़ा नु ना जाणी सेर्फ पूत, ते ओ जाये उपर पूत ओनु प्रकट करना चाहवे।
28“हे सब मेहनत करने आले ते बोझ मां दब़ीले आले लौक, माये गोढु आवा, मैं तम्हानु आराम ङिही। 29माये जूले नु आपणे उपर चती गिहा ते माये कनु सिखा, कांकि मैं नर्म ते मना मां दीन छै, ते तम्ही आपणे मना मां आराम गिहा। 30कांकि माये जूले उपर मेहलणे मां सरल छै, ते माया बोझ चवणे मां हल्का छै।”
Právě zvoleno:
मत्ती 11: ODR
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CC BY-NC-ND 4.0
