Ɓalɔma 4
4
Isisenio ngɨyɔ Abalama
1Isu, tasugo tanɨ akʉʉ ɔ kuku Abalaama? Ɨyɔ, ɛ꞉nɨanɨa ndɨ nɔ báya ɨngbaa akɔ ndʉtʉ? 2Yɔɓieni jɛnɛ ɓɔ Asɔɓɨɨ a꞉sɨka Abalaama ndʉ mombi ata ngbingbii apɛɨ angɔ ɨngbaa akɔ kyananakɨa mapanʉ, ambɔ ɨyɔ akɛ, a꞉sisekio jɛnɛ aniwo aɗia. Yakamɛngana, yangɔmʉ ɓanɨ atɨ Asɔɓɨɨ. 3Dɔ, amati ɔ Mabii ya꞉tɛndanakɨa ɓɔ: Abalaama a꞉baya Asɔɓɨɨ, kʉdɔ, ɨyɔ Asɔɓɨɨ, a꞉mʉsɨka ndʉ mombi ata ngbingbii, akpatanakɨa ta nɔ báya ngɨangɔ#popoko Mʉkp 15:6. 4Mombi ɔkɨeni tɛa, ɔsisekio ta nɔ mʉkaya. Mʉkaya wɔngɔ, wangɔmʉ ndʉ ɓɔminjo akɔ ɨjɨɔ, dɔ, yɔsisekio pɛngɛ ta ɓɔ ɓiminjo ɓanɨ. 5Yakamɛngana, mombi ɔnapɨeni báya ta akɔ Asɔɓɨɨ ngɨa anacho mombi ata ɓɨɓɨ anɨka mombi ata ngbingbii, Asɔɓɨɨ a꞊mʉsɨka ndʉ mombi ata ngbingbii ta sɨkanɨ, gʉtʉ ta ɓɔ ɔkɨenimʉ tɛa pɔ mɛngana. 6Ya ngbanga ta ndʉ Dawidi akɔpana ɨgyagya yɔ mombi ngɨa Asɔɓɨɨ anayɔ akɔsɨka ndʉ mombi ata ngbingbii, sɔkɔmʉ ɨngbaa akɔ mʉkyananakɨa:
7«Ɨgyagya nɔ ɓombi ngʉɓa Makwɔɓɨɨ a꞉ɓɨpaakɨa mɨkyananakɨa yɛta gbaɨ,
nɔ, ɔkutoko ɓʉɓɨɓɨ ngʉɓeɓo ta kutoko!
8Ɨgyagya nɔ mombi ngɨa Makwɔɓɨɨ angɔmʉ ɓata apopoko mboi yɔ ɓʉɓɨɓɨ ngʉɓangɔ!»#popoko Mmb 32:1-2
9Ɨgyagya ngɨyɛnɛnɨ, ya ndɨ ta akɔ ɓombi ngʉɓa ɓa꞉kiiso ɨgʉnɨ, ga pɔ ɓɔ ya kʉ akɔ ɓombi ngʉɓa ɓa꞉kiisomʉ ɨgʉnɨ? Tɔ꞉ɓio ɓɔ tɔsugeni ɓɔ, Asɔɓɨɨ a꞉sɨka jɛnɛ Abalaama ndʉ mombi ata ngbingbii, akpatanakɨa ta nɔ báya ngɨangɔ. 10Asɔɓɨɨ a꞉mʉsɨka ndʉ mombi ata ngbingbii ngbinga nga eno tanɨ? Ga pɔ pɛɨ ga pɔ mbise ɔ kiiso ɨgʉnɨ? Ya꞉ɓiomʉ ambise, yakamɛngana, ya꞉ɓio pɛɨ ɨyɔ, akiiso ɨgʉnɨ. 11Mbise ngɨananɨ, ɔ꞉tɔkiiso tɨa ɨgʉnɨ. Nɔ kiiso ɨgʉnɨ ngɨyɛnɛnɨ, ya꞉ɓio ndʉ kɔkɔ ngɨa, akɔpananiso ɓɔ Asɔɓɨɨ a꞉mʉsɨka ndʉ mombi ata ngbingbii, ta akʉʉ ɔ báya ngɨangɔ, pɛɨ iyɔ akiiso ɨgʉnɨ. Kʉɓanɨ, ɨyɔ Abalama ɔ꞉natana aɓio tɨa ɨsɛ ɔ ɓombi ɓaɓomu ngʉɓa ɓa꞉baya, gʉtʉ ɓɔkiisenimʉ ɨgʉnɨ, ambɔ Asɔɓɨɨ ɨɓʉsɨka tɨa kʉndʉ ɓombi ɓɔta ngbingbii. 12Ngbanga kʉɓanɨ, a tɨa kʉ ɨsɛ ɔ ɓombi ngʉɓa ɓa꞉kiiso ɨgʉnɨ, sɔkɔmʉ ta ɓɔ dɔ ɓa꞉kiiso ɨgʉnɨ, yakamɛngana, dɔ, ɓakɔkpataka kʉ ɨngbaa mɛngana ngɨyɔ báya, ɨyɛ, kuku Abalaama a꞉kpataka jɛnɛ, ngbinga ngɨa a꞉ɓio-ɔɔ ta ɓɔ angɔkiisenimʉ ɨgʉnɨ.
Yaka ngɨyɛ Asɔɓɨɨ apanaka ɓombi ɓɔ báya
13Asɔɓɨɨ a꞉panaka jɛnɛ Abalaama, ɨhɔ nɔ ɓanɔnɔ ɓangɔ, ga a꞊ɓinjo dɔdɔ ndʉ mʉgyɛndɔ wɔ maɓɨɨ weɓo#popoko Mʉkp 12:2-3; 22:15-18. Ya꞉ɓiomʉ ɓɔ dɔ a꞉kyananakɨa mapanʉ, yakamɛngana, ya꞉ɓio ta dɔ Asɔɓɨɨ a꞉mʉsɨka ndʉ mombi ata ngbingbii, ɨngbaa akɔ báya. 14Yɔɓieni pɛngɛ ɓɔ ta ɓombi ngʉɓa, ɓakyananakɨa mapanʉ akɛ, ɓɛ꞊nɨanɨa nɔ mʉgyɛndɔ wɔ maɓɨɨ ngʉwɔnanɨ, ɨyɛnɛnɨ yakɔsugo ɓɔ báya ngɨyeso yangɔmʉ nɔ dada, nɔ ɨkyɛmʉ ngɨyɛ Asɔɓɨɨ a꞉panaka yaɓio ɓʉtʉʉ. 15Mapanʉ kakɔjʉkaniso ta ʉnganga wɔ Asɔɓɨɨ. Yakamɛngana, mapanʉ kɔɓienimʉ, yaka ngɨyɛ ɓundo mapanʉ, yangɔɓiomʉ pɛngɛ kʉɓanɨ.
16Kʉɓanɨ, yaka ngɨyɛ Asɔɓɨɨ a꞉panaka ndʉ apɛpɛ, yakɔkpatanakɨa nɔ báya, ɓɔ dɔ ɓombi ɓɨnɨanɨa nayɔ ɨngbaa akɔ ɨjɨɔ ngɨangɔ. Yaka ngɨyɛnɛnɨ a꞉ɨpanaka, ya ingono, nɔ, ya akɔ ɓana ɓɔ Abalaama ta ɓaɓomu. Yiɓio Ɓayuda ngʉɓa ɓa꞉kyananakɨa mapanʉ, ga pɔ ɓombi ɓaɓomu ngʉɓa ɓa꞉baya Asɔɓɨɨ ngbanga ndʉ Abalama. Nɔ ɨyɔ Abalama, ɔ꞉natana aɓio tɨa kuku ngɨyeso ɓaɓomu. 17Ya ta ɓanɨ ndʉ aka ɓa꞉tɛndakɨa-ɔɔ amati ɔ Mabii ɓɔ: «Dɔ ɨmɨ, na꞉napɨa aɓio ɨsɛ wɔ mababa kɔ ɓombi ɓaja#popoko Mʉkp 17:5». Abalama a abaa ngɨyeso apɛɨ ɔ Asɔɓɨɨ ngɨa a꞉mʉbaya. Ɨyɔ Asɔɓɨɨ akɛ, anɔ ʉpanʉ aheiso ɓombi ngʉɓa ɓa꞉sio, nɔ akɨa ɓayaka ngʉɓa ɓa꞉ɓiomʉ jɛnɛ pɛɨ akɔ uɓei, ɓɔ ɓiɓio tɨa ɓioni ɓʉɓʉnʉ. 18Abalama a꞉baya, nɔ, ɔ꞉napɨana mʉtɨma akʉʉ ɔ yaka ngɨyɛ mombi angɔnapɨamʉ jɛnɛ-ɔɔ mʉtɨma, kʉdɔ, ɓɔ꞉mʉnapɨa aɓio tɨa ɨsɛ ɔ «mababa kɔ ɓombi ɓaja nɔgbɛ», akɔkpatanakɨa nɔ yaka ngɨyɛ Asɔɓɨɨ a꞉musigio jɛnɛ ɓɔ: «Ɓanɔnɔ ɓɔsɔɔ ɓa꞊ɓio sina ɓaja nɔgbɛ.»#popoko Mʉkp 15:5 19Ɓáya ngɨyɛ Abalama ya꞉ɓio ta ɓumu, gʉtʉ ndɨ a꞉ɓio tɨa nɔ mago mɨa mʉngana. A꞉ɓio kʉ anɨmbɨa ɓɔ uɓei ngʉwangɔ ndʉ mombi, akɔɓɛtɨa tɨta ingwo, nɔ moi angɔ Sala kʉ ɨkatʉa. 20Ɨyɔ, a꞉ɓiomʉ nɔ ɓajatwoko akʉʉ ɔ yaka ngɨyɛ Asɔɓɨɨ a꞉mʉpanaka, nɔ, sɔkɔmʉ báya ngɨangɔ yɨ꞉dɔɓanaka kʉɓanɨ. Yakamɛngana, báya ngɨyɛnɛnɨ yangɔ, yɛ꞉ka ɓumu, nɔ, ɔ꞉pʉnga bibiso Asɔɓɨɨ. 21A꞉kɨa ɓanɨ dɔ, a꞉ɓio anɨmbɨa nɔ ingono ɓɔ, Asɔɓɨɨ anɔ angu akɨa yaka ngɨyɛ a꞉sugo ɓɔ a꞊kɨa. 22Yaka ngɨyɛ Asɔɓɨɨ a꞉mʉsɨka-ɔɔ ndʉ mombi ata ngbingbii, ɨyɔ, ingainga ɨyɛnɛnɨ. 23Yakamɛngana, yaka ngɨyɛ ɓɔ, «Asɔɓɨɨ a꞉mʉsɨka ndʉ mombi ata ngbingbii», ya꞉tɛndanakɨamʉ ta akʉʉ angɔ nangana. 24Yakamɛngana, ya꞉tɛndanakɨa kʉ akʉʉ eso ngʉɓa ɓa꞊tɨsɨka sina ndʉ ɓombi ɓɔta ngbingbii. Yaɓanɨ dɔ, isu, takɔbaya Asɔɓɨɨ ngɨa, a꞉jukaniso Yeso Makwɔɓɨɨ akɔ ingwo. 25Ɨyɔ Yeso, ɓa꞉mʉgaba aniwekio ɓʉɓɨɓɨ ngʉɓeso nɔ, ɓɔmʉjʉkaniso akɔ ingwo, dɔ, Asɔɓɨɨ ɨtɨsɨka ndʉ ɓombi ɓɔta ngbingbii apɛɨ angɔ.
Právě zvoleno:
Ɓalɔma 4: buuN
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2021, Wycliffe Bible Translators, Inc.