Rooma 6
6
Zambi xayli yiggidile
1Ayim narhxo kinni haye? Nicma tammango ciloh zambe abak marno? 2Maale haye! Zambeeko rabih barhsime marak, aaginah kaddih adde marna? 3Inkoh Masiix kin Yeesuslih tiya nakko yimthimmiqhe marak, kaa rabidde tiya nakko ninthimmiqhe mitaarhigiiniho? 4#Kolossay 2:12Amaydo, tamaa Abbat nabneh Masiix rabaako akah uguteekah, nanu lel cusub aniinadde marno ciloh, anthammaqhah rabidde kaalih numuccuge.
5Kaa rabidde kaalih nengeleh ninniyemko, rabaakohi ugut hi max lel mudhdhuguh kaa rabaakohi ugutuh higgid rabaakohi ugutudde kaalih nangalo kino. 6Tamaa zambi-wanna kin ni nabsi foyya yakko ciloh, kalxit ni nabsi kaalih masqalak takarimtem naarhige. Tayek sarrah zambeh minangizziye. 7Amayim lel tamaa rabeti zambeeko finja geyemhi sabbatah kinni. 8Kado, nanu Masiixlih rabneh ninniyemko, kaalih marnamah gantah naamine. 9Rabaako ugute Masiix, malammih caduruh rabo makinam naarhige; kamboh rabi kaa bukalle reeza maleya. 10Usuk rabe rabi, inki gedda umman tiyah zambeh abe rabi kinni. Laakin, usuk mara aniina, Yallah aba aniina kinni. 11Amayim balih, atin gantah zambeeko rabih barhsimteenim kee Masiix kin Yeesus araxah Yallaalih aniina geyteenim balih sinne lowa.
12Amaydo, tamaa rabe sin nabsi kaa farhi akah abtoona sin yaamirek, zambi sin agziye wayo. 13Sin karim xaqqi-waytot maysaalaxa yakko zambeh maaxayna. Laakin, rabaako aniinalle yewce mara balih Yallalle sinne uxuwa, sin karim lel xaqqi maysaalaxa yakko Yallah uxuwa. 14Amayim lel nicmat geridde kibah sercat geridde mitaniinimhi sabbatah, zambi sin bukalle reeza yaallo maki.
Xaqqi garuuza
15Ayim kinni haye? Nicmat geridde kibah sercat geridde minanemhi sabbatah zambe abno? Maale haye! 16Akkinnan tiyalle tangizziye garuuza balih sinne toxoynimko, tamaa akah tangizziin tiyahi garuuza kitiinim mitaarhigiini? Hido rabille xiyaa baaha zambeh yangizziye mara takkoona dhictan, hido lel xaqqelle xiyaa baaha Yallah yangizziye mara takkoona dhictan. 17Yallah xamde takko lel, zambi-wannun kuuk tiniinimko, sinah yomxoye darsi caynah afcaadooko yangizziye mara tekkiinih tanin. 18Zambeeko finja geyteenih lel xaqqi garuuza tekkiinih tanin. 19Anu xiyaw waanih sinlih waanishak aniyom, atin khulqaako litin ruktahi sabbatah kinni. Wuli gedda, sinni karim garuuza balih xaraame kee uma ciyyoh toxoyin. Tayim lel ziyaada uma ciyyolle sin baaha. Kado sinni karim garuuza balih xaqqelle uxuwa. Tayim lel anqaddasalle sin baaha.
20Zambi garuuza kuuk tinin gedda, xaqqi gabooko finja luuk tinin. 21Kado akko xoolashshiitak taniinimko, ayimti fire akko geyteeni? Amayimhi abayshima lel raba kinni. 22Kado laakin, zambeeko finja geyteenih Yallahi garuuza tekkiinih tanin. Atin geytan fire lel anqaddasalle xiyaa bahtam kinni, amayimhi abayshima lel umman geedit aniina kinni. 23Zambi casbi raba kinni, Yallahi muttuxuwa laakin, ni Maddara kin Yeesus Masiix araxah umman geedit aniina kinni.
Právě zvoleno:
Rooma 6: SCC
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia