Fartottit hi Abittot 27
27
Bawlos Rooma badah yadiye
1Badah Ithaaliya nadawo abayshen gedda, Bawlos kee aki maxaabuush, Roomaati caskar filcodde bool caskartiyah manabotta yakke Yuuliyos akko yarhxin tiyalle ni yoxoyin. 2Adramitteyon akko yarhxin makaanooko ugutteh Aasiyaati zoobah marsasti gabolle aduuk tine doonikidde korneh badah gerho erherhishneyaako, Makedooniyaati xiyawti Aristarkhos akko yarhxinya Tessaloniikeeko ni goorishe. 3Malammit max Tsiidoon gufne. Yuuliyos Bawlos naxrurtah kaa yibbirheyaako, ishi soxoballe yedeeyaako tenko xato geyo akah yismixe. 4Amakkeeko ugunneh lel, xaaxatti nifidde nok yinemhi sabbatah, Qobrosuk celto abinneh tillabne. 5Kilikiya kee Bamfiliyaati mirixtah yane badko tillabneh, Likiyaati Miralle nemeete. 6Amalle amaa bool caskartiyah manabotti Ithaaliya fanah tadiye Aleksaanderiyaati doonik geyeyaako amadde ni korishe. 7Doonikih cilaagih adiinuk mango max sugneyaako xaylah Kinidosti waacina gufne. Amayko fer nadawo xaaxatti ni kalite gedda lel, Kireete celtoh abinneh Salmoone waacinaako tillabne. 8Tsagce-tsagceh lel xaylah tillabneyaako, Lassayaati daafoh agaagalle, “Maaxiyole marso” akko yarhxin makaanolle nemeete.
9Taginah dherh waqhte sugneh, zambi-xabbot siyaamhi lellec bakite gedda, badah yadiinim adde sirii waqhti gufeyaako, Bawlos ten faysheh: 10“Ko xiyawo, ta ni kallaaxedde doonik kee cuuka camaza bisa akkekkah, ni nabsehi liyi gantah adde yanem yoh ambulluwik tane” akko yerhxe. 11Amaa bool caskartiyah manabotti laakin, Bawlos yerhxemko, amaa naakuda kee doonik hi wannadde ziyaada hammiteh yine. 12Amaa marsa dhamxin waqhte alle tillaabishoona dhiican makaano kuuk mitinemhi sabbatah, mangih amakkeeko yedeyinyaako, dhiiceenimko Foynikis fanah gerheenih dhamxin waqhte amalle tillaabishoona abayshen. Takke lel junuub ayrodhdhuma kee qilbat ayrodhdhumat gabolle taybulluwe Kireeteeti marsa kinni.
Badalle goomadhdhe
13Junuub xaaxatti xeelaatih dhage gedda, ten farhi balih akah tekke yekkeliinih, borosho yooqhociinih tsagce-tsagceh Kireeteeko tillaaben. 14Mangum sugekkah lel qilbat ayrommaaxah tiya akko yarhxin dhacuma xaaxatti baarhooko ni yootoke. 15Amaa xaaxatti amaa doonik dufuwe gedda, ishe xaaxatta curto mirhiicinna, nanu lel farhelle tadawo tee xabne. 16Kawda akko yarhxin cindhaa jaziirah celto gufne gedda lel xaylah amaa doonik jalba gargerno dhicne. 17Amaa jalba hiriigeenih yeyyeeciinik sarrah, amaa doonik gubaako akatah yurhuwin. Sirtille baarholle radaanamko mashshiiteenih lel borosho ramac-isheenih xaaxatti alle ten beyinnanille yadawna tee xaben. 18Malammit max goomadhdhe asruuk tisriye gedda, meerrat nuwaako wulim cidoona erherhishen. 19Maddaxit max lel amaa doonik nuwaa sinni gabah ciden. 20Ayro yakko xutuk ablekkah mango max sugneyaako, amaa sirii goomadhdhe asruuk tisriye gedda, nagaadde nawco kino yarhxiinimko umbuka cag xabne.
21Folo hinnim mangum sugeenih yiniinimhi sabbatah, Bawlos ten fanko uguteyaako: “Ko xiyawo, yi fawo taabboona sinalle tine, ta biyak kee liyi deesimo ciloh lel Kireeteeko badalle tawcoona sinalle mitine. 22Kado lel ta doonikko bextih nooko inketti yalaw makiiki aydukum-tarhxoona sin faysha. 23Tayim lel bire tamaa anu akah acbude yi Yallahi malaykatti yolle yemeeteh: 24‘Bawlos, mimashshiitin. Roomaati naba nugus hi nifille daw-tarhxo kolle tane. Taykinna lel, inkoh koolih aduuk yane mara gantah, Yalli naggoyishnan akah yoxoyeh yane’ yok yerhxe. 25Amaydo, ko xiyawo, tamaa akah yok yerhxeekah takko kinamah Yallah aaminemhi sabbatah, aydukum-erhexa. 26Yakko kibah, xaaxatti wuli jaziiralle ni cido kinni” akko yerhxe.
27Affaran kee taman-yarhxe bar, xaaxatti Adriyasti badalle ni beyak, barti-abrhah wakalelle, amaa naakudeen baarhoh kab-nerhxem yekkelin. 28Sarrah erherhadde cilsha le akatah yeqheesin gedda, guballe marootom mitrotiya takkem kuuk yinem yublin. Dagum yedeynih lel malammih yeqheesin gedda, soddom mitrotiya takkem kinam yublin. 29Doonik dumamadde tamuttukemko mashshiiteenih, doonik caazaako affara borosho cidenyaako, baarho dheh akah maxto dhaaciten. 30Naakudeen amaa doonikko kudoona farheenih, nifti gabooko borosho cida marah yimmingidiinih amaa doonik hi jalba oobishen. 31Bawlos lel amaa bool caskartiyah manabotta kee caskarak: “Ta mari doonikidde suge wayeenimko, atin naggoytoona mirhictaana” akko yerhxe. 32Sarrah amaa caskar amaa doonik hi jalbat akut yigriciinih, raddo tee xaben.
33Baarho maxte gedda, Bawlos folo beetoona inkoh ten dhaacimeyaako: “Folo hinnim inkim beetekkah ilaalak kaafi sin affaran kee taman lellectiya kinni. 34Amaydo, martoona ciloh folo bettoona sin dhaacimak aniyo. Sin amooko inki dagarti yalaw maki” akko yerhxe. 35Tayim yerhxek sarrah, folotta yooqhoceh umbuka tenhi nifille Yalla cawwatoyshiteyaako, beeto erherhishe. 36Amaymih usun niya abiteenih folo beeten. 37Sittiyadde lel amaa doonikidde lamma bool kee malxintomon kee lix kiinuk nine. 38Beeteenih xayten gedda, amaa sinraa badalle cideenih, amaa doonikih akah yiysissikin.
Doonik tiggidile
39Maaxi yekke gedda lel, baarho mayaysharhaarhaginnooni, waacinalle laakin badti-anrabhi gimam yublinyaako, dhiiceenimko amaa jalba amakke gudduusoona yixiggirin. 40Amaa borosho yiftixiinih badalle xabenyaako amaa doonik hi sukkaan akah yumudhdhuweh yine akut yiftixin. Tamaa doonik janthella xaaxattalle xaf-isheenih lel badti gimam fanah yadawna erherhishen. 41Amaa doonik lel badti laye rigididde akko yane cindet kumredde tumuttukeyaako amadde tindhibbirhe. Nifti gabooko baarhodde tindhibbirheh lel xumuu-arhxinnixem tekke. Caazaako lel goomadhdhet xaylah tiggidile. 42Amaa caskar lel maxaabuush igiiloh kudaanamko ciloh ten yagdafoona yixiggirin. 43Amaa bool caskartiyah manabotti laakin, Bawlos naggoysho farheyaako, sinni xagara abaanamko ten deese. Erherhih igiilo dhiica mari tireenih baarholle yawcoona amre yoxoye. 44Amaa raace mari lel, gari luuxak, gari lel amaa teggedeedele doonikik yawcoona amre yoxoye. Taginah lel inkoh nagaadde baarho gufen.
Právě zvoleno:
Fartottit hi Abittot 27: SCC
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia