Kuurotokwe 25
25
Poolol gavnokweyolluro kooti yogalo tovino, “A'mwo aguto Sisa tool neya wuu'nonokwono,” adoka tovinokwono
1Toruda'ai Festosol proovins Juudiya tomuu mido mollomwallo'moneyokwe wagwolago Sisariya toru abai'movokaikono. Toro bai'mo'mno sumaiyokwe wagwolago su tovi iruko pullapullu mwalo'no wagwolago Jeruusalem'no sulokaikono. 2Toro tool wagwolago su tovi ilai'mo'mduke toga pris mido mollomwalokwe toorogai'aro Juu tooravuro a'mwo aguto toorogai'aro tooro kwollomno bo'mno Poololluno kooti yogalo tovi mojokuu'noso'moneyokwe kuuguudo ton kuudoporogano. Toro wuujuno sumaveyokwe aro kuudoganoporogano. 3“Guu Poolollu momworaro'bi wagwolago Jeruusalem akawai'no nokwo mokailabinekudeyo?” A'mwo su tooravuro toro kuudoganopo tov aro kuudo sauroporogano. Poolol wagwolago Jeruusalem'no ilabodowo'jure toollu puuto tomuu romiyosanekono. Toro kuudo yauro'mno kuudoganoporogano. 4Toro kuudoganopo kuvi kuruv Festosol kaduko mwiyokaikono. Toro tool aro kuudokaikono. “Poolol wagwolago Sisariya toru wuulo killo'mo ago tovi ki'na'dowodekono. Aki nuvnokwe toonyu wobo toga Sisariya'no wolamonyudeyo kuudo me'no sau'mwa'jonyugono. 5Toro tovino tov kevu mido mollomwalokwe pworekul nuuge wagwolago su tovi nokwo wolowanorekikono. Toro wolowa'ji Poolol ma'no ma'nodo puruv sokaldeyo kevu su toro kuudo saupi tov kooti yogalo wuu'nyo'moneyokwe toga kemoro kuudo ton nokwo nyudupinorekikono.” Kuudokaikono.
6Toruda'ai Festosol iruko 8-pela oo 10-pela tobuul me'no mwalno sumaiyokwe wagwolago Sisariya'no aikomgu wollo'moneyokwe a'mwo kuudoka toorogai mokwola'no kwolai'movoporogano. Toro wolai'mo'mno sumaveyokwe iruko aikomguda'ai tollugwoji Festosol kooti yogalo wuu'nyo'moneyokwe ago tovino kuula'no gavnokweyolluro mwallo'moneyokwe toru aulomwalokaikono. Toro kuulomwalno sumaiyokwe Poolollu wuulo killo'mo ago tovida'ai amokabupureyokwe a'mwo pworai amodapiyokaikono. 7Toro amodapiyoka tovi Poolollu mokabo'mno kooti yogalo wuu'nyo'moneyokwe toru aulomolludapiyopekono. Toro kuulomolludapiyodopure toollu wagwolago Jeruusalemda'ai Juu kwolabopo tooro aiyowomno amomwodovomaroporogano. Toro momwodovoma'no sumaveyokwe Poololluno kuunano yogalo pun Festosollu soukuu'nuudoporogano. Toro tooro guureji aro aduuwiyoporogano. “A'mwo akal ma'no ma'no bwotonyago ton mujumovla'mdowodekono.” Aduuwiyoporogano. Toro aduuwiyopo tovino nebal'nodokwoneyo'mo pun ku'nono muuduuwalloporogano. 8Toro duuwino sumaveyokwe Poolol gavnokweyolluno kworado aro ajumwonyokaikono. “Nuu Juu tooravuro loowo tonyu kisuvolo miyodumdonyugono. Aki Gooti toollu ilomoropiyo'moneyokwe ago tovi kaiyako mamollugolamo'mdumdonyugono. Aki toro toonyu a'mwo aguto Sisa toollu kisuvolo mwiyodumdonyugono.” Kuudokaikono.
9Toro kuudoka kuvi kuruv Festosol Juu a'mwo su toorai ilaiyo igollo'mo tool Poolollu aro kuudoganokaikono. “Gumoro kooti yogalo akav wagwolago Jeruusalem toru wuu'nyo'moneyokwe magubwemo'mokwono. Toro te navu wagwolago su tovino avlawosi tov nokwo'mo'mdukono?” Kuudoganokaikono. 10Toro kuudoganoka kuvi kuruv Poolol aro kuudokaikono. “Awiyo, ku'nono mavla'monyugono. Ago adakuuwo akav a'mwo aguto Sisa toolluro kooti yogalo wuu'nyo'moneyokwerukono. Toro te akawai nokwo'morukono. Guu moro kooti yogalo tovi pumuu amanubwebi tov ilaiyo'maiyo. Nuu Juu toorai kaiyako migolodumdo tovino guu kuu'maiyo toru'no me'no nonuu'numwakuno. 11Aki nuu loowo puvi kisuvolo so'mujuko'mno'juki kisuvolo su tovuro kirumwallo tokwe neya aromiyanubweyopujukonyugono. Aki toro toonyu kirumwallo su tovino lukado irolo'nugovlaiyo'mo manyunowo'jujukonyugono. Toro kuvi kuruv a'mwo su tooravuro kooti yogalo adanyumwakopo ton kuunano yogalo adupi to'gwowi a'mwo pwolnodo kwol kuruv kworavuro ato tovi ku'nono mamanubweyononyugono. Toro te aga nuvnokwe toonyu aro kuudo sau'mwakono. Moro kooti yogalo akav a'mwo aguto Sisa tool jainbworowo'ji adomduukuuroso'ji tov ilaiyokwono. Kuudo sau'mwakono. Toro te moro su toro kuudo sau'mwako tovino nuu gumi agudoganmono.” Kuudokaikono.
12Poololluro kuudoka su tovi Festosol gami kaunsel toorogai kuuguudo pwekwo adomwaloporogano. Toro domwalno sumaveyokwe Festosol Poolollu aro kuudokaikono. “Yowa'nogano. Guvnokwe tookujuro aro anyudumado tov, “Moro kooti yogalo akav a'mwo aguto Sisa tool jainbworowo'ji domduukuurosonokwono,” anyudumado tov ilaiyokwono. Toro te guu a'mwo aguto Sisa toollomno nokwo pla'binekugono.” Kuudokaikono.
Festosol a'mwo aguto kig Agripa'wollu Poololluno kuudoka tovinokwono
13Toruda'ai iruko pubuul me'no avlavopo toga a'mwo aguto kig Agripa'weke gami jo'mwo Benaisokwe tonyo'mwolal gavman a'mwo aguto Festosollu ilaiyo mollo'moneyokwe wagwolago Sisariya'no kwolabolonyo'mwolakono. 14Toro wolabino sumaleyokwe wagwolago su tovi iruko pubuul amwalolonyo'mwolakono. Toro mwalodole toga Festosol a'mwo aguto kig su toollu Poololluro kooti yogalo tovino kuuguudo pwekwo aro kuudokaikono. “Aiyoga Feliksol gavman a'mwo aguto mwaloduke toga a'mwo pwollu wuulo killo'mo ago tovi aulomerosokaikono. Toro aulomerosoka toollu nokwo surolowapiyowo'jujuko kwol kuruv mirolowapiyokaikono. Toro te a'mwo su tool aga wuulo killo'mo ago tovi kuuno aule'naso. 15Toro te nuu wagwolago Jeruusalem'no yagwoto illogalodore toonyu pris mido mollomwalokwe pworogai'aro Juu tooravuro mido mollomwalokwe pworogai'aro tooro abonyuru'ma'mwa'juporogano. Toro bonyuru'ma'no sumaveyokwe aro anyudoganmwa'juporogano. “Guu a'mwo wuulo aule'nasuko su toollu kooti yogalo tovi domduukuurubweyo'bi kirumwallo tov nokwo uubwebinekudeyo?” Anyudoganmwa'juporogano. 16Toro anyudoganmwa'jupo kuvi kuruv nuu aro kuudumwa'jonyugono. Nevu Roomda'ai toonol a'mwo pwollu kooti yogalo yere maduuwiyodowa'jure toga kirumwallo tov yasuwa'no muubweyokwenogano. Toro kuvi kuruv aro yodowadonogano. A'mwo pworo a'mwo pwollu kooti yogalo duuwiyo'mo kwinpi tooro kwolluro sumdollu toru neya kuulodavopi kemoro kuuguudo ton kuu'maiyo toru'no neya duuwipinorogano. Aki a'mwo kooti yogalo aduuwipi toolluro kuuguudo kun kuruv kuu'maiyo toru'no neya wuudonekono. Nevu Roomda'ai toonol toro yodowadonogano. Kuudonyugono.
17Toruda'ai nevu akawai me'no bwolomwalno sumawoneyokwe nuu sogwollo mainonyugono. Toro toonyu iruko aikomguda'ai tollugwoji kooti yogalo wuu'nyo'moneyokwe ago tovi kuulano nuvnokwenyuro mwalodumdo toru aulomwalmwa'jonyugono. Toro kuulomwalno sumoneyokwe a'mwo wuulo ki'na'dowodo toollu amokabupureyokwe amodapimwa'jonyugono. 18Toro modapino sumoneyokwe a'mwo su tool moro sumdollu toru boda'mduke toollu a'mwo abwolonyuru'ma'mwajupo tooro abomwodovoma'mwa'juporogano. Toro bomwodovoma'dopure toga kuudo sau'mwa'jonyugono. Oo a'mwo kirovanyuvanyu yodowodo su toolluro judo'no judo'no yodowodo tonyuno nyudupino'mo toorodeyo. Toro kuudo sau'mwa'jo kuvi kuruv a'mwo su tooravuro kuuguudo ton judo pumgu'aro anyudumwa'juporogano. 19Kevnokweravuro lootuu pasudo yodupudo tonyuno anyudumwa'juporogano. Aki a'mwo aboloka pwolluno yovo tov Jisasolekono. A'mwo su toolluno kuuguudo anyudumwa'juporogano. Poolol su toolluno aro moruudodowodekono. “Oo Jisasol me'no aboloka kwol kuruv aiyo aiko te me'no adukavokaikono.” Poololluro kuuguudo moruudodowodo tovino a'mwo su toorogai'aro Pooleke'aro tooro yogalo kuullajunodupudorogano.
20Toro te a'mwo su tooravuro kuuguudo anyudumwa'jupo su tonyuro kavlo ton po'dogalo yo'mgonoma'mokwe sumwa'jo kuvi kuruv ku'nono miyo'mgonoma'mwa'jonyugono. Toro toonyu Poolollu aro kuudoganmwa'jonyugono. “Gumoro kooti yogalo akav wagwolago Jeruusalem toru wuu'nyo'moneyokwe magubwemo'mokwono. Toro te navu wagwolago su tovino avlawosi tov nokwo'mo'mdukono?” 21Toro kuudoganmwa'jo kuvi kuruv Poolol anyudumwa'jukekono. “Awiyo, nuu su towai'no mavla'monyugono. Toro kwonyu kuruv guu mirolovonuwapiyo'bi yiuno a'mwo aguto Sisa tool moro kooti yogalo tovi jovo'dogalono'moneyokwe sogwollo kinmwalmonyugono.” Anyudumwa'jukekono. Toro anyudumwa'juko tovino tov nuu a'mwo mollurogudo toorai aro aduuwimwa'jonyugono. “Kevu a'mwo akallu wuulo killo'mo ago te kuuno mollomwalodopure toga nuu a'mwo aguto Sisa toollomno morapiyo'moneyokwe puuto puruv yo'mgonoma'monyugono.” Aduuwimwa'jonyugono.” Gavman a'mwo aguto Festosol a'mwo aguto kig toollu toro kuudokaikono.
22Toro kuudoka tovi a'mwo aguto kig Agripa'wol gavman a'mwo aguto Festosollu aro kuudoganokaikono. “Nuu a'mwo su toolluro kuuguudo tovi nokwo wuu'numonyudukono?” Toro kuudoganoka tovi Festosol kuudokaikono. “Yowa'nogano, guu bi'ai toga nokwo wuu'nubinekugono.” Kuudokaikono.
23Toruda'ai iruko aikomguda'ai tollugwoji a'mwo aguto kig Agripa'weke gami jo'mwo Benaisokwe tonyo'mwolal kemi youro sugumaluko touso mollosolno ago i'bwo'nomwalodopure toru'no kuulalno aulomwalolovakono. Toro kuulomwalodole tovallu a'mwo mollurogudo tooravuro mido mollomwalokwe toorogai'aro wagwolago su tovida'ai a'mwo aguto yovokwe toorogai'aro tooro muugonaro'mno ilaiyo bwotonyo amollomaroporogano. Toro me'no molloma'no sumaveyokwe toga gavman a'mwo aguto Festosol Poolollu wuulo killo'mo ago tovida'ai amokabupureyokwe a'mwo pworai amodapiyokaikono. Toro modapino sumaiyokwe Poolollu ago i'bwo'nomwalodopure tovi mokaula'mno sumdollu toru aulomolludapiyopekono. 24Toro kuulomolludapino sumaveyokwe gavman a'mwo aguto Festosol aro adokaikono. “Oo a'mwo aguto kig Agripa'wekuge'aro yiuwi'nokai a'mwo su'bwo'numwakopo toorekike'aro toorekul a'mwo akallu noonmwakovo. A'mwo akalluno yiuwi'nokai Juu tooro surodo bwotonyo wuunodupudekono. Nemoro wagwolago akavida'ai Juu toorogai'aro wagwolago Jeruusalemda'ai Juu toorogai'aro tooro a'mwo akalluno biyolo uu'mwojodupu aro nyudodupudorogano. “A'mwo su tool aiyo nomwalo'jokwe guu neya doromiyosono.” Deko toro nyudodupudorogano. 25Toro nyudodupudo kuvi kuruv nuu a'mwo akallu romiyoso'moneyokwe kavlo puruv miyo'mgonoma'dumdekono. Aki toro tool aro anyudumwa'jukekono. “Moro kooti yogalo tovi wuu'nono'moneyokwe mi a'mwo aguto Sisa toollomno domonuwapiyono.” Toro anyudumwa'juko tovi wuu'nono kuvinono morapiyo'mo kuudo sau'mwa'jonyugono. 26Toro toonyu a'mwo akallu amorapimi toga a'mwo aguto Sisa toollomno pas tokwe'aro neya yokwollapimonyugono. Toro kwonyu kuruv Poololluno kuuguudo tov pas tovi burowo'nyovo yakwollomonyudukoneyokwe tovino kuudo miyau'mwakono. Toro tovino tov a'mwo akallu kemoro sumdollu toru abwolomolludapimekono. Toro te aga nuuge'aro guu a'mwo aguto kig Agripa'wekuge'aro toonal a'mwo akalluro kuuguudo tovi wuu'nowosi adomduukuurososi tovida'ai pas tov nokwo yakwollumonyugono. 27Toro tov aro tovinokwono. Nuu a'mwo wuulo ki'na'dowodo pwollu a'mwo aguto Sisa toollomno yasuwa'no mamorapimonyugono. Toro kuvi kuruv a'mwo su toollu kooti yogalo aduuwipi kavlo ton neya yakwollo'mi amorapimi tov ilaiyokwono. Nuu su toro kuudo sau'mwakono.” Gavman a'mwo aguto Festosol toro adokaikono.
Právě zvoleno:
Kuurotokwe 25: SMB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022: Ethnos360 Sanford, Florida