Kuurotokwe 17
17
Wagwolago Tesaloonaikada'ai a'mwo mwalodupudo pworo Pooleke Sailaseke toorallu kaiyako igollo'mo sopo tovinokwono
1Toruda'ai Pooleke Sailaseke tooral wagwolago Tesaloonaika'no puuto tovi avlavolorakono. Puuto su tovi akuuto tomuu wagwolago puruval wo'dubulokwono. Wagwolago su tovalluno yovo tov puruv Amfipoolesovokwono. Puruv Apoolooniyavokwono. Toro te Pooleke Sailaseke tooral wagwolago su tovallu tomuu'aro uuwoleno sumaleyokwe wagwolago Tesaloonaika toru ai'movolorakono. Wagwolago ai'movolo su toru Juu tooravuro i'bwo'nyago puruv wo'dowodokwono. 2Toro te Poolol Sabat pullapullu tobuullu Juu toorogai i'bwo'nodowo i'bwo'nyago su tovi aullajukekono. Toro kuulodawo sumdomgu togasuro wagwolago go'no go'nodo punyu yomollodowo Juu tooravuro i'bwo'nyago punyu aullodubwasajuko to'busuko kubalno aval'no sodubwasajukekono. Toro tool Gooti toolluro yogalo sakwollungiko tovi mojagilodowo aki Juu a'mwo abolo i'bwo'nodopure togai kavlo tovino sajunyajupogano. 3Poolol Gooti toolluro yogalo sakwollungiko tovi toro mojagilno sumaiyokwe kavlo tov aro sodubwasokaikono. “Aiyoga muudu'nodo toga Gooti tool aro anekudokaikono. “Nuu kemi ikullo'mwojo'moneyokwe Krais tool nomekwopiyamonyugono. Toro amekwopiyami tool dado bwotonyo ton ibwosunowo'ji yiuno'no bolonekono. Toro abolo'ji kwol kuruv aiyo aiko te nodukawonekono.” Gooti toolluro yogalo tovi toro sakwollungiko su tov kuvinono me'no sumo'nokakwono. Gooti toolluro nekullo'mwojo'moneyokwe amonekwopiyaboka Krais su tool Jisasol kwekono. Toro toolluno aga nuu kuu'maiyo toru'no aikudadokwono.” Sodubwasokaikono. 4Toro sodubwasoka tovi Juu a'mwo abolo pun wuu'no'mno, Oo nebalo'mdeyo, juno sumaveyokwe kuudo kuubweyopogano. Aki Grikda'ai a'mwo abolo Gooti toolluno ilomoropiyodapudo bwotonyago togai'aro ton kuuguudo su tovi wuu'no'mno kuudo kuubweyopogano. Aki abolo yovo agutokwe pugai'aro kuudo kuubweyopogano. Yiuwi'nokai a'mwo abolo Jisasolluno kuudo kuubweyopo su ton Pooleke Sailaseke toorallu uuguro'mwonyo'mno kworalluro avalo kwimo'nopogano.
5Toro yodopure tovi Juu pworo wono'mno Pooleke tooralluno kwekuullu kuudo sauroporogano. Toro yau'no sumaveyokwe Juu su tooro kemi molluullo'moneyokwe a'mwo pworai aju'bworomaroporogano. A'mwo aju'bworomaropo su tooro maket tomuu yasuwa'no worubovenodupudorogano. Toro toorai ju'bworoma'no sumaveyokwe Pooleke Sailaseke toorallu kwolallo tonyuro ato tovi morubweyo'moneyokwe a'mgono somolloporogano. Wagwolago su tovi yiuwi'nokai tomuu yomolluno yomolluno sumaveyokwe a'mwo abolo punyu Pooleke tooralluno surodo aju'gwoloporogano. Toro ju'gwolodopure tovida'ai a'mwo su tooralluno yogalo amjodumoulaporogano. Toro mujodumoulno sumaveyokwe a'mwo su tooralluno a'mgono soporogano. Toro ya'mgonyuno sumaveyokwe a'mwo pwolluro ago tovi awo'dolomokaulaporogano. A'mwo su toolluno yovo tov Jesoonolekono. 6Toro toolluro ago tovi awo'dolomokaulapo kuvi kuruv Pooleke toorallu ku'nono miyo'mgonomaroporogano. Toro tovino tov Jesoonollu agalomworaroporogano. Toro galomwora'no sumaveyokwe aki Jisasolluro a'mwo abolo pugai'aro tonyu agalomworaroporogano. Toro galomwora'no sumaveyokwe wagwolago su tovida'ai a'mwo aguto pworaiyomno amogaibworomokavlavoporogano. Toro mogaibworomokavla'mno sumaveyokwe a'mwo aguto tooravuro sumdollu toru kuulomolludapiyo'mno deko aro adelowo'naroporogano. “A'mwo akaral yiuwi'nokai kwako go'no go'nodo tomuu yomollodubul a'mwo abolo tonyu kaiyako jugolodubulorakono. Toro jugolodole tovida'ai jul'nyo pun me'no bai'mo'mdowodokwono. Toro tooral aga nemoro wagwolago akavi me'no abai'mo'mwakulorakono. 7Toro bai'mo'mdole toorallu Jesoonol gamoro ago tovi amollomwaladopikorakono. Yiuwi'nokai a'mwo su tooro Sisa toolluro loowo tonyu kisuvolo wiyodupudorogano. Toro tooro a'mwo aguto Sisa toollu dolago tomuu mwallo'mo mwinodupu aro jokwerogano. “Nemi aguto kig toolno'gwowi Jisasol kwekono.” Jokwerogano.” Adelowo'naroporogano. 8Toro delowo'na'dopure tovi wagwolago su tovida'ai a'mwo aguto toorogai'aro a'mwo abolo su'bwo'nopo togai'aro ton wuu'no'mno Jisasolluro a'mwo su tooraino biyolo kuu'mwojopogano. 9Toro ino sumaveyokwe a'mwo aguto su tooro Jesooneke tobuurai aro adumuurolovoporogano. “Kevu nuugwiyo me'no anekubipi toga'no nokwo irolovekwapiyanonogano.” Adumuurolovoporogano. Toro dumuurolo'mno sumaveyokwe Jesooneke tobuuro nuugwiyo tov kuubiyopogano. Me'no uubiyodopure su tobuurai surolowapiyoporogano.
Pooleke Sailaseke tooral wagwolago Beriya tomuuno plavolno womdo amollolo tovinokwono
10Toro surolowapiyopo togasuro surakuuto tollugwoji Jisasolluro a'mwo abolo ton Pooleke Sailaseke toorallu wagwolago Beriya'no avla'buleyokwe amorapiyopogano. Toro amorapiyopo tooral plaino sumaleyokwe wagwolago su tovi ai'movolorakono. Toro ki'movolno Juu tooravuro i'bwo'nyago puvi aulalorakono. 11#2Tm. 4:2Wagwolago Beriyada'ai Juu mwalodupudo ton kemoro kuudo tov dogaipo'nyonmaiyo. Toro ton Poololluro kuuguudo yodubwasoduke tovi wuu'nyo'mo ilaiyo to'no kwinyajupogano. Toro kuvi kuruv imuu wagwolago Tesaloonaikada'ai toorono'gwowi yiuno pwolno pwolnodo toorono Poololluro kuuguudo tonyu wuu'nyo'mo ilaiyo kwinyajuporogano. Toro te Poolol wagwolago Beriyada'ai Juu mwalodupudo tonyu kuuguudo sugudo tokwe sodubwasajukekono. Toro yodubwasoduke ton guureji wuu'nugovlaiyo'mo kwinyajupogano. Aki kuuguudo tov nebalo'mdukono oo kuunano'mdukoneyokwe tovi yo'mgonomallo'moneyokwe kevnokwe ton yiuwi'nokai iruko toga Gooti toolluro puukwollo sakwollungiko tonyu amojagillajupogano. 12Toro mojagilodupudo tovino tov bwotonyago ton Jisasolluno kuuguudo tovino, Oo nebalo'mdeyo, kuudo kuubweyopogano. Aki wagwolago su tovida'ai Grik a'mwo abolo yovokwe bwotonyago kugai'aro kuuguudo tovino kuudo kuubweyopogano.
13Toro uubweyodopure tovino wagwolago Tesaloonaikada'ai Juu tooro wuu'no'mno aro adoporogano. “Oo Poolol wagwolago Beriya kumuu kuruv Gooti toolluro kuuguudo tokwe domodomolladopiyo.” Toro juno sumaveyokwe wagwolago Beriya'no aboporogano. Toro bino sumaveyokwe wagwolago su tovida'ai a'mwo abolo kwolallo tonyu aju'bworomaroporogano. Toro ju'bworoma'no sumaveyokwe kwolallo su ton Pooleke tooralluno surodo ipureyokwe aju'gwoloporogano. Toro aju'gwolopo tovino tov kwolallo su ton Pooleke Sailaseke tooralluno mesubuuto to'no airowopiyopogano. 14Toro kirowopiyodopure kuvi kuruv Jisasolluro a'mwo pworo Poolollu soolwara wolo tomuuno yere amorapiyoporogano. Toro morapino sumaveyokwe Sailaseke Timootiyeke tooralno'gwowi wagwolago Beriya su toru kuuno amwalolorakono. 15Toro te a'mwo tooro Poolollu mollubworomokavla'mno mollubworomokavla'mno sumaveyokwe wagwolago Atens toru ai'movoporogano. Toro ki'mo'mno sumaveyokwe a'mwo su tooro kemi wagwolago Beriya'no aikomgu plaiyo'mo yodopure toorai Poolol aro amodapiyokaikono. “Kevu plavopi Sailaseke Timootiyeke tooral miyomno yere neya bubulluno'moneyokwe duujulo.” Amodapiyokaikono.
Poolol wagwolago Atens toru kuuguudo amodomolloka tovinokwono
16Poololno'gwowi wagwolago Atens toru mwalno sumaiyokwe Sailaseke Timootiyeke tooralluno sogwollo kwinyajukekono. Wagwolago su tovida'ai a'mwo mwalodupudo tooro kemi ilomoropiyo'moneyokwe kuunano gooti judo'no judo'no kula'noka bwotonyago toorai yokwolludapiyodupudorogano. Toro yokwolludapiyodupudo toorai Poolol wonomolluno sumaiyokwe aro adokaikono. “Ai, kuunano gooti akaro wagwolago akavi yiuwi'nokai tomuu yo'mowopiyodupudorogano.” Toro juno sumaiyokwe biyolo adou'mwonyopiyokaikono. 17Poolol toro dou'mwonyopino sumaiyokwe Juu tooravuro i'bwo'nyago tovi kuulodawo a'mwo Juu toorogai'aro aki a'mwo Juu tooravuro miyawosunodupudo kworogai'aro toorai kuuguudo sugudo tokwe sodubwasajukekono. Juu miyawosunodupudo su tooro Gooti toolluno me'no ilomoropiyodapudorogano. Aki toro tool yiuwi'nokai iruko toga maket toru'no pla'mdowo kuuguudo sugudo tokwe sodubwasajukekono. Toro yodubwasoduke tovi a'mwo abolo maket toru'no abiyajupo pun au'nallajupogano. Toro wuu'nyuno sumaveyokwe kavlo tov buro'nyo tovino'mdukoneyokwe yajuno'mno Pooleke kuuguudo adomwalopogano. 18Toro adomwalopo tovino tov Poolol kavlo tov aro sodubwasokaikono. “Jisasol bolo'no aiyo aiko te adukavokaikono.” Sodubwasokaikono. Toro yodubwasoduke tovino tov a'mwo ibwasokwe pworo Pooleke yogalo aullajunoporogano. Ibwasokwe su tooraino yovo tov pworo Epikuuriyanoravo dodupudorogano. Aki pworo Stoowikoravo dodupudorogano. A'mwo ibwasokwe su tooravuro pworo Poolollu bwolomorumwogapiyo'moneyokwe aro adoporogano. “A'mwo kuudo maiyo akal gavnokweyol ilomoropunyu yokwekono. Toro tool buro'nyo kavlo tov nekudono'mo duukwinadopiyo?” Adoporogano. Aki pworo aro adoporogano. “Oo a'mwo akal a'mwo pumuuda'ai pworavuro gooti tooraino amoruudomolladopikekono.” Adoporogano. 19Toro juno sumaveyokwe Poolollu momworaro'mno kaunsel tooravuro i'bwo'nodupudo toru'no amollubworomokavlavoporogano. Kaunsel tooravuro i'bwo'nodupudo su toru'no yovo tov Muumuudo Areyoopagasolo dodupudorukono. Toro towai'no mollubworomokavla'mno sumaveyokwe ai'movoporogano. Toro ki'mo'mno sumaveyokwe Poolollu aro samuugojoporogano. “Gumoro kuuguudo muuduko sodonekubwasadokuudo tovino kavlo tov youromallo'mo anekullunadopiyo. 20Nevu gumoro kuuguudo muuduko su tovi muu'nodowadonogano. Toro toonollu kavlo tovino nokwo yodonekubwasubinekudeyo?” Samuugojoporogano. 21A'mwo su tooravuro toro samuugojopo tov aro tovinokwono. Wagwolago Atensda'ai a'mwo toorogai'aro aki wagwolago su tovida'ai a'mwo bomwallokwe toorogai'aro tooro yiuwi'nokai toga kuuguudo muudukodeyo oo yogalo muudukodeyo tonyuno jainbwollo'mo i'bwo'nodupudorogano. Toro yodupudo tovino tov Poolollu yamuugojo toro kwiyoporogano.
22Toro kwiyopo tovi Poolol kaunsel tooravuro sumdollu toru boda'mno sumaiyokwe wagwolago su tovida'ai a'mwo mwalodupudo toorai aro kuudokaikono. “Nuu wagwolago Atensda'ai a'mwo akarekullu me'no kwonekuma'morekikono. Kevu gooti judo'no judo'nodo kula'noka bwotonyago pworai yokwolludapiyodupu ilomoropiyodapudorekikono. 23Toro te nuu kemoro wagwolago akavi wonomollodum kemoro gooti judo'no judo'no kula'noka su toorai me'no kwonoma'mwakonyugono. Toro wonoma'dum aki romiroudapiyo'moneyokwe dukwagupto puvi me'no kwonmonyugono. Dukwagupto su tovi puukwollo puruv aro sakwollungikokwono. “Gooti pwol miyouroma'dowado toolluno romiroudapiyo'moneyokwe dukwaguptokwono,” sakwollungiko tovi kwonmonyugono. Toro te kevu Gooti miyouroma'dupudo kwolluno kuruv ilomoropiyodapudogaikikono. Gooti su toolluno aga nuu kuu'maiyo toru'no ikudumo'monyugono.
24 #
Krt. 7:48
Gooti su tool kwako akakwe'aro yiuwi'nokai kwako tovi wo'dupudo togai'aro tonyu sokwollosokaikono. Toro tool gami sokwollosoka su tonyu aguto kuunodo wimo'nyokwekono. Aki toro tool kwako tokwe'aro sulugumdo tokwe'aro tovallu yokwolloso'no mido mollomwallo imo'nyokwekono. Toro tool kwako akavida'ai a'mwo pworavuro ilomoropiyo'moneyokwe ago mododupudo tonyu mamwallokwekono. 25Aki Gooti su tool noonyumwonyu punyuno supto miyokwekono. Toro toolluno tov kwako akavida'ai a'mwo pwol gamoro ato tokwe noonyumwonyu pun yakwollowo'ji Gooti su toollu wiyo'mwojo'moneyokwe ku'nono mwiyonekono. Toro tov aro tovinokwono. Gooti gavnokwe su tool yiuwi'nokai kwako akavi mwalodowado tonollu aiyo nekullabodowodekono. Toro nekullaboduke tovida'ai sumuujudo tov yalomo'mdowadonogano. Aki yiuwi'nokai supto yodowado kun kuruv nekullabodowodekono. 26Toro tool aiyoga muudu'nodo toga a'mwo yiuno pwolnodo toollu sokwolludapiyokaikono. Toro sokwolludapiyoka toolluda'ai yiuwi'nokai judo'no judo'no kula'noka tonollu yonekuuwosungelabo'mno kwako akavi aiyowomno so'mowopiyowonogano. Toro te Gooti gavnokwe tool aro toval me'no ajonekubweyokaikono. Kwako akavi nemoro aiyo mujomwekovlaiyo'moneyokwe iruko tobuuke'aro nemoro kwako akavi mwallo'moneyokwe senagu'nyo tokwe'aro toval me'no ajonekubweyokaikono. 27Gooti tool nemi yasuwa'no miyakwollanekubweyokaikono. Toro kuvi kuruv nevu Gooti toolluno a'mgono neya imwalano'moneyokwe sokwollanekubweyokanogano. Gooti tool yiuwi'nokai kwako akavida'ai a'mwo abolo pwolno puru'monodo ton gamino a'mgono neya yogapureyokwe winyokwekono. Toro te a'mwo abolo ton Gooti toolluno a'mgono yodopure kuvi kuruv Gooti toolno'gwowi manyu toru'aro mamwallokwekono. Toro yodowo'jure toollu nevu a'mgono sa'ji tov kuvinono nyo'mgonomaranekono. 28Aki nemi wobo toru mwalodowodo Gooti su toolluno a'mwo pwol aro ajakwollokaikono. “Nemoro aiyo mwalodowado tokwe'aro kulako kwaikwai yodowodo tokwe'aro toval yiuno Gooti su toolluda'ai yodowadonogano.” Ajakwollokaikono. Aki kemoro pi'mwo kuudokwe pworo aro ajakwolloporogano. “Nevu yiuwi'nokai tonol Gooti toolluro kwoloraiyonogano.” Ajakwolloporogano. 29Toro te kuuguudo akav nebal'no kuunodokwono. Gooti tool nemi Nellunumiyagekono. Toro te pwonal aro kuudo nyauroso. Oo kwako akavida'ai a'mwo pworavuro kuudo to'no yau'dupu yokwolludapiyodupudo su tooro Gooti kuunodo imo'nodupudorogano. Navu su toro kuudo nyauroso. Yiuwi'nokai sulo togai gool togai silva togai tonyuda'ai yokwolludapiyodupudo tooro Gooti kuunodo mimo'nodupudorogano.
30Aki aiyogasuro tooro Gooti toolluno kuudo miyouroma'dopure toorai gavnokwe tool nokwo airumwallowo'jujuko kwol kuruv kuudo maiyokwe su tooravuro yodopure tonyu majagillajukekono. Toro kuvi kuruv aga'no'gwowi Gooti su tool yiuwi'nokai tomuuda'ai mujomwekwodowado a'mwo abolo pwolno puru'monodo tonollu aro danekullodowodekono. “Kevu Gooti toollomno kuudo neya jouragunyumo'nogaulo,” danekullodowodekono. 31Su toro danekullodowodo tov aro tovinokwono. Gooti tool yiuwi'nokai kwako akavida'ai tonollu nebal'no kooti yogalo danekullo'moneyokwe iruko pullugwo me'no ajesokaikono. Aki kooti yogalo tovi mollomwallo'moneyokwe a'mwo pwollu me'no ajesokaikono. A'mwo ajesoka su toolluno Gooti tool yiuwi'nokai a'mwo abolo tonollu kuu'maiyo toru'no me'no anekuduuwallokaikono. A'mwo ajesoka su tool me'no bino sumaiyokwe aboloka toollu Gooti tool aiyo aiko te amodukavokaikono. Su toro tomgu'aro me'no anekuduuwallokaikono.” Poolol toro kuudokaikono.
32Poololluro wuudoduke su tovi aro au'nallajuporogano. “A'mwo aboloka tool aiyo aiko te adukavokaikono.” Toro wuudoduke tovino wuu'no'mno Poolollu burolpakuto amollovakuroporogano. Toro kuvi kuruv a'mwo pworono'gwowi Poolollu aro kuudoporogano. “Oo gumoro kuuguudo sodonekubwasumado tovino lukomgu guu aki aiko te yodonekubwaso'mo anekullunadopiyo.” Kuudoporogano. 33Toro me'no wuujuno sumaveyokwe Poolol a'mwo su'bwo'nyajupo su toorai kuugollu'movokaikono. 34Toro wuugollu'mo'mno sumaiyokwe a'mwo abolo pun Poolollu uuguro'mwonyo'mno Jisasolluno kuudo kuubweyopogano. Kuudo kuubweyopo su tonyuda'ai a'mwo pwolluno yovo tov Diyoonisiyosolekono. A'mwo su tool muumuudo Areyoopagas toru i'bwo'nodupudo kaunsel pwekono. Aki abolo kuudo kuubweyoka puvino yovo tov Damarisovokwono. Aki a'mwo abolo pugai'aro kun kuruv Poolollu uuguro'mwonyo'mno Jisasolluno kuudo kuubweyopogano.
Právě zvoleno:
Kuurotokwe 17: SMB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022: Ethnos360 Sanford, Florida