Kuurotokwe 11
11
A'mwo abolo Juu tooravuro miyawosunodupudo tonyu kwimo'noka tovino Pital wagwolago Jeruusalemda'ai tonyu sodubwasoka tovinokwono
1To'no'gwowi a'mwo kuurotokwe toorogai'aro Jisasolluro a'mwo abolo togai'aro ton kwako Juudiya tomuu mwalno sumaveyokwe kuuguudo aro tovino kuu'nopogano. “Oo a'mwo abolo Juu tooravuro miyawosunodupudo kun kuruv Gooti toolluro kuuguudo tovino ilaiyo molloma'dupu Jisasolluno kuudo me'no kuubwemwakopogano.” Toro tovino kuu'nopogano. 2Toro wuu'nodopure toga Pital plaino sumaiyokwe wagwolago Jeruusalem toru ki'movo'no Jisasolluro a'mwo pworai kuuru'marokaikono. Toro kuuru'maroka su tooro aro kuudo saullajuporogano. A'mwo Juu toonolluro miyawosunodowado tooro yiuno lakulkulako ado'nupi toorono to'no nevuge nokwo guro'mwonyumwalpinorogano. Kuudo saullajuporogano. Toro yau'dupudo toorai kuuru'marokaikono. Toro te a'mwo su tooro Pitallu yogalo aro amojurugoloporogano. 3“Guu a'mwo Juu toonolluro miyawosunodowado tooro lakulkulako mado'nodupudo toorogai kemoro ago tonyu aulonomwalmwa'judo tov sugudo'maiyo. Guu su toro sumwa'judo tov buro'nyo'mo sumwa'judekudeyo?” Amojurugoloporogano.
4Toro amojurugolopo kuvi kuruv Pital yiuwi'nokai kwimo'nugelabiyajuko tonyuno sodubwasokaikono. Muudu'no kwimo'noka tovida'ai aro sodubwasokaikono. 5“Nuu wagwolago Joopa toru mwalono subusu'nyogalo kuulodomwalodore toga wojo to'busuko puruv suwo'numwa'jonyugono. Wojo to'busuko su tov aro tovi suwo'numwa'jonyugono. Nuu muunyu kai'muu illoonyopiyodore toga poragiyo bwotonyo to'busuko puul wolaboduke tovi kwonmwa'jonyugono. Poragiyo su tov gamoro bullo aval aval tovi'aro kwako akamuuno wolomollukwo'bworopiyaboduke tovi kwonmwa'jonyugono. Toro tov wolabino wolabino sumaiyokwe mi wobo toru abwolai'mo'mwa'jukokwono. 6Toro bwolai'mo'mduke tovi muugonarono kwako akavuro judo'no judo'no ibesa'aiyo wuulo ki'duvolodupudo pworogai'aro ibesa'aiyo kuulludaiyo pworogai'aro noonyumwonyu gabakuto wagwollogudo pworogai'aro aki sulugumdo tovuro dokato pworogai'aro tooro poragiyo su tovi akuuto tomuu wolomno'dopure toorai kwonmwa'jonyugono. 7Toro muugona'dore toga yogaimaguurai puruv aro anyudumwa'jukokwono. “Pitaloo, guu ilodavo'bi noonyumwonyu su toorai domovelanono.” 8Toro anyudumwa'juko kuvi kuruv nuu aro kuudumwa'jonyugono. “Awiyo, nuu su toro tov ku'nono mimonyugono. Agutoloo, ibesa'aiyo su tooro gumoro sumdo tovi kaiyako mollugolamo'mdupudo tooraino tov nuu nonyo'moneyokwe kumako mwalodumdonyugono.” Kuudumwa'jonyugono. 9Toro wuujuno sumoneyokwe lukomgu muunyu kai'muuda'ai yogaimaguurai tov aki aiko te aro doduke tovi kuu'numwa'jonyugono. “Noonyumwonyu Gooti toonyuro sumdo tovi sugudo nyumo'nodupudo toorai nonyo'moneyokwe guu noduulluku'biyo. Aki toro tooku su toro tooraino, Kumakorogano, madubinono.” Anyudumwa'jukokwono. 10Yogaimaguurai su tov pugasalpuga tono tono anyudumwa'jukokwono. Toro nyujuno sumaiyokwe poragiyo noonyumwonyu ibesa'aiyo tooro aulomnallajupokwe su tov muunyu kai'muuno yiunokuudo amokailmwo'dokakwono.
11Toro mokailoduke tovi muugona'dore kuga'gwo kuuno a'mwo pworapwol tooro ago nuu mwalodore tovi wobo toru ai'mo'mwa'juporogano. A'mwo su tooro mino a'mgono'moneyokwe wagwolago Sisariyada'ai kwolomoropimwo'daporogano. 12Toro tooro ago tovi wobo toru da'mdopure toga Gooti toolluro Kuullo tool aro anyudumwa'jukonyugono. “Guu a'mwo Juu tooravuro miyawosunodupudo su toorogai plaiyo'mo sogwollo mainbinono. Toro kweku kuruv kworogai neya dovlavono.” Anyudumwa'jukonyugono. Toro te nuuge'aro wagwolago Joopada'ai Jisasolluro a'mwo 6-pela akarogai'aro toonol ilabowono wagwolago Sisariya toru abilai'mo'mwa'juwonogano. Toro toonol Kooniliyoseke aulonomwalmwa'juwonogano. 13Toro kuulonomwalowono Kooniliyosol ensel pwollu gamoro ago tovi kuuloda'mduke toollu kwonoka tovino kuuguudo anekudumwa'jukekono. Toro tool aro anekudumwa'jukekono. “Ensel pwol miyomno bino sumaiyokwe aro anyudokaikono. “Guu a'mwo pworai wagwolago Joopa'no morapiyo'bi a'mwo pwolluno a'mgono ipinorogano. A'mwo su toolluno yovo tov Saimoonolekono. Aki toro toolluno yovo puruv Pitalekono. Toro toollu yo'mgonomaropi gumiyomno mollubworomokailabupinekono. 14Toro amollubworomokailabupi su tool kuuguudo aro tovino yodekubwasonekono. Guuge'aro gumoro ago tovi aullu'bwo'nomwalpi togai'aro togaikullu ma'no ma'nodo tovuro kirumwallo tovida'ai Gooti tool bomollurolovekumokalokwono'moneyokwe kuuguudo tov yodekubwasonekono.” Ensel tool toro anyudokaikono.” Kooniliyosol toro anekudumwa'jukekono. 15Toro te nuu a'mwo abolo tonyu kuuguudo tov aiyo kuuno yodubwasodore toga Gooti toolluro Kuullo tool wolabo'no a'mwo abolo aulomwallajupo su tonyuro poowokalago tovi aulomwalmwa'jukekono. Muudu'nodo toga nemi aulonekumwaloka to'busuko kubalno aulomwalmwa'jukekono. 16#Krt. 1:5Toro kuulomwaloduke kuga'gwo kuuno nuu Aguto Jisasolluro kuuguudo anekujajuko puvino aki aiko te kuudo sau'mwa'jonyugono. Kuuguudo su tov arokwono. “Joonol wonyo tokwe amogaluvollajuko kuvi kuruv Gooti toolno'gwowi gamoro Kuullo tool wiyodowo'jure tomgu'aro mogaluvollonekono.” Aguto toolluro kuuguudo su toro tovino aki aiko te kuudo sau'mwa'jonyugono. 17Toro te aga nuu kuu'maiyo toru'no aro sau'mwakonyugono. Nevu Aguto Jisas Kraisolluno kuudo muudu'no kuubweyowo toga Gooti tool gamoro Kuullo tool anekubweyokaikono. Toro to'busuko kubalno a'mwo abolo Juu toonolluro miyawosunodowado kubuurai kuruv Gooti tool gamoro Kuullo tool yiuno aval'no duubwemaiyo, kuudo sau'mwakonyugono. Toro te Gooti tool a'mwo abolo Juu toonolluro miyawosunodowado tonyu gamoro Kuullo tool uubweyoduke toga nuu nokwo kuumjukuro'mujukonyudukono? Awiyo, nuu ku'nono muumjukuro'mujukonyugono.” Pital toro sodubwasokaikono.
18Toro sodubwasoka tovi wagwolago Jeruusalemda'ai Jisasolluro a'mwo abolo ton wuu'no'mno sumdomgu Pitallu yogalo amojurugollajupo kun kuruv su toro toga'no'gwowi kemoro sumwoluko tov noullo kwosunopogano. Toro wosunyuno sumaveyokwe Gooti toolluno ilomoropiyo'moneyokwe aro adopogano. “Oo a'mwo abolo Juu miyawosunodupudo kubuuro kuruv Gooti toollomno kuudo souragunyumo'nupi tonyu Gooti tool ilaiyo to'no mollomarowo'ji aiyo yiunokuudo mujomwekovlaiyo'moneyokwe tov nokwo wiyonoldeyo.” Adopogano.
Wagwolago Antiyookda'ai a'mwo abolo pun Jisasolluno kuudo kuubweyopo tovinokwono
19 #
Krt. 8:1-4
To'no'gwowi sumdomgu Stivenollu aromiyosopo toga Jisasolluro a'mwo abolo kunyu kuruv kaiyako sugollajupogano. Toro igolodopure tovida'ai gomno gomno lukado me'no sounopiyopogano. Toro sounopiyopo tonyuda'ai pun proovins Foonisiya tomuu ai'movopogano. Aki pun aku'momdo Saipros toru ai'movopogano. Aki pun wagwolago Antiyook toru ai'movopogano. Go'no go'no ajumiyo su tomuu toro ki'mo'mno sumaveyokwe Aguto Jisasolluno kuuguudo tov yiuno Juu tooraino amoruudomollajupogano. 20Toro amoruudomollajupo tooravuro pworono'gwowi wagwolago Antiyook toru yiuno Juu tooraino to'no amoruudomollajuporomaiyo. Toro kworo kuruv a'mwo abolo Juu tooravuro miyawosunodupudo kugai'aro tonyu Aguto Jisasolluno kuuguudo sugudo tov amoruujajuporogano. Toro amoruujajupo su tooro pworo aku'momdo Saiprosda'aiyorogano. Aki pworo wagwolago Sairinida'aiyorogano. 21Toro tooro Gooti toolluro jurogudo uubweyoduke tokwe sodubwosumovlaiyajuporogano. Toro yodubwosumovla'mdopure toga a'mwo abolo ton kuudo youragunyumo'no'mno Aguto toolluno kuudo kuubweyopogano. Toro te Jisasolluro a'mwo abolo ton bwotonyago sumo'nopogano.
22Toro imo'nodopure tonyuno wagwolago Jeruusalemda'ai Jisasolluro mollu'bwoto ton me'no kuu'nopogano. Toro wuu'nyuno sumaveyokwe Banabasollu wagwolago Antiyook'no amorapiyopekono. 23Toro amorapiyopo tool plaino sumaiyokwe wagwolago su tovi ki'movo'no Gooti tool a'mwo abolo su tonyu gamoro yasuwa'wino sugumaluko uubweyoduke tovi kwonokaikono. Toro kwonoka tovino ilaiyo bwotonyo sokaikono. Toro tool a'mwo abolo su tonyuro poowokalago tovi jurogudo duuwimwojo'moneyokwe aro kuudokaikono. “Kevu Aguto toollu kisuvolo nuuwimwalpiyo. Toro kugaikul kuruv kemi poowokalago tokwe po'dogalo neya duumjunogaulo.” Toro kuudokaikono. 24A'mwo Banabasol sugudekono. Toro tool Gooti toolluro Kuullo toollu uumjunyo'moneyokwe kuudo ton gamoro poowokalago tovi kuullo'mowopiyodowodekono. Aki toro toolluro kuudo tov yiuno Gooti toolluno uubweyodowodekono. Toro toolluro kuuguudo yodubwasoduke tovi a'mwo abolo kwolallo bwotonyo ton wuu'no'mno kuudo kuubweyopogano. Toro ton Aguto toolluro a'mwo abolo kuunodo kwimo'nyajupogano.
25Toruda'ai Banabasol Soolollu yo'mgonomallo'moneyokwe wagwolago Tasos'no avlavokaikono. 26Toro tool plaino sumaiyokwe wagwolago su tovi ki'movo'no Soolollu kuvinono so'mgonomarokaikono. Me'no yo'mgonoma'no sumaiyokwe wagwolago Antiyook'no aikomgu abolorakono. Toro bino sumaleyokwe Jisasolluro mollu'bwoto ton a'mwo su toorake wobo toru abi'bwo'nyajupogano. Toro bi'bwo'nodopure tonyu a'mwo Antiyookda'ai tooro wonodupu, Kristenoravo, ajajuporogano. Yovo Kristenovo tov su toro togada'ai uumjunyokwe tooraino muudu'no adopokwono. Toro te Banabaseke Sooleke tooral wagwolago su tovida'ai a'mwo abolo bwotonyago tonyu kuuguudo sugudo tov yodubwasuno yodubwasuno sumaleyokwe kworomo pullugwo kuuwolo'nokarakono.
27Su toro toga proofet pworo wagwolago Jeruusalem toru wuugollu'mo'mno sumaveyokwe wagwolago Antiyook'no abwolaporogano. 28#Krt. 21:10Toro tooro wagwolago su tovi bwole'mo'mno sumaveyokwe proofet su tooravuro pwol kuuguudo wuujo'moneyokwe sulodavokaikono. A'mwo su toolluno yovo tov Agabuusolekono. Toro tool iloda'mno sumaiyokwe Gooti toolluro Kuullo tool kwollu jurogudo uubweyoduke tokwe a'mwo abolo tonyu kuu'maiyo toru'no aro amoruudokaikono. “Yiuwi'nokai kwako akavi go'no go'nodo tomuu muju'wuulo bwotonyo puruv nyumo'nonokwono.” Kuudokaikono. Toro kuudoka su tov kuvinono aro me'no sumo'nokakwono. Muju'wuulo tov Sisa Klaudiyosol a'mwo aguto kig mwaloduke toga sumo'nokakwono. 29Muju'wuulo toro sumo'noka tovino tov wagwolago Antiyookda'ai a'mwo abolo Jisasollu uumjunodupudo ton aro sajunopogano. “Nevu Juudiyada'ai Jisasolluro a'mwo abolo tobuuro wosamujuko supto yodopure su tobuurai neya wiyo'mwojano.” Toro yajunyuno sumaveyokwe nuugwiyo pun su'bworosopogano. Toro ton i'bworosuno i'bworosuno sumaveyokwe yiuwi'nokai a'mwo abolo pwolno puru'monodo ton yowa'no wipino toru'aro mokabodupu su'bworosopogano. 30Toro me'no i'bworosuno sumaveyokwe nuugwiyo tov Banabaseke Sooleke toorallu wiyo'mno amorapiyoporakono. Toro amorapiyopo tooral kwako Juudiya tomuuno mokavla'mno sumaleyokwe ai'movolorakono. Toro ki'mo'mno sumaleyokwe nuugwiyo su tov Jisasolluro a'mwo abolo tobuuravuro a'mwono moduvomwallokwe toorai kuubweyolorakono.
Právě zvoleno:
Kuurotokwe 11: SMB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022: Ethnos360 Sanford, Florida