Mark 12
12
Sema Arig Na Naengi-chen Na Garden A Grape
(Matthew 21:33-46; Luke 20:9-19)
1Et engiarig si Jesus cha tothoon kigwan to i “Gwariy toon iyantanem na grape cha mabenaw a garden to. Iyalad to et emaong na pemespesan na grape a ma-mag na tafiy. Engitgwen pay na ekayang a baliy a panbantayan na naiyanbantay na garden. Et inpa-bang to ma garden tod echom a naengi-chen et kimowan cha sa-kin ili. 2Idi mimothok i timpo na siborasan na grape, engito-no ma mahagarden na bagaen ired ma naengi-chen say a-daen na bagaen i bingay to. 3Nem idi mimothok iwa bagaen, piyegpeg-as iren ma naengi-chen et inpabtik chen diwas. 4Engito-no mowan iwa mahagarden na sa-kin bagaen, nem piyegpeg-as ngo iren ma naengi-chen i toktok to tan biyai-baingan cha. 5Et engito-no mowan i mahagarden na afil a bagaen, nem biyono ra. Inges toy inpasing ched ma echom a iyayto-no. Piyegpeg-as chiy echom tan biyono ra ngoy echom. 6Et igwa wiy sa-sa-kin ebay-anan a ito-non ma mahagarden. Si-kathoy anak ton ensemek ton pasiya. Into-no tho wen kigwan tod nemnem to i ‘Rispiktaren chiy anak ko.’
7“Nem idi mimothok iwa anak to, iyankinowan ira ma naengi-chen i ‘Sejay i menegwid niya garden. Bonoen tayo say a-daen tayo ja tawid to.’ 8Ida ra wen biyono ra, et inba-tok chiy angel tod ma awas na garden.” 9Et kigwan men Jesus i “Ngoy pesing niwa mahagarden ired ma naengi-chen? Sigoradon onkowan chiwan a bonoen to ira, et ipiyal to ma garden tod ma echom a too. 10Nemnemnem jo ma iyaysolat cha esel Afo Chiyos a kigwan to i:
‘Sema bathon kigwan iren
ma naengamag i nagwariy silbi tho,
si-kathoy iyanbalin a
kapategan a bathon naengibahed na baliy.
11Si Afo Chiyos i engipasing niwan
et kaskasdaaw cha
nemnem tayo.’ ” #12:10-11 Psalm 118:22-23
12Et sema wa iren naengibalnay na Hodjos, piyan chen chedmethen si Jesus tep amta ra i sema arig, maypangkep cha si-kara. Nem tiyakothan chiy tothoo, isonga bintihan ches Jesus.
Sema Salodsod Maypangkep Na Bayad Na Binis
(Matthew 22:15-22; Luke 20:20-26)
13Idi engkay, sema iren naengibalnay na Hodjos, engito-no wa ira na Pharisees tan echom a toon Herod a menalodsod Jesus say osalen chiy konen ton pengicharoman ched si-katho. 14Idi mimothok ired kad-an to, kigwan cha i “Maistoro, amta wi i emiin a nakigwan mo, podno. Amta wi pay i nat naindasin moy kasasaad na angken siyen too, no diket naintorom i podno maypangkep na piyan Afo Chiyos a a-magen na tothoo. Et ija pangoy ibaga wi. Iyaytolok emod ma dinteg tayo i panbejad na binis cha Caesar, ono enchi?”
15Nem amten Jesus i chiyan iparas a menaol, isonga kigwan to i “Niyana jowan parasaak? Ala kayo di na pilak a naaosal a maybayad na binis say si-nengen ko.” 16In-i-kanan ches Jesus na denarius, et kigwan to i “Siyay mahadopa tan mahangaran niyay?”
Kigwan cha i “Si Caesar.”
17Et kigwan men Jesus i “No setan ngarod, i-kan jod Caesar i may-i-kan komed si-katho, tan i-kan jo ngod Afo Chiyos i may-i-kan komed si-katho.” Et iyasdaaw ma ired Jesus.
Sema Salodsod Maypangkep Na Panpawil Na Iyangketiy
(Matthew 22:23-33; Luke 20:27-40)
18Gwara ngo iriy echom a Sadducees a kimowan cha kad-an Jesus. Sema iren Sadducees, eg cha napiyati i manpawil i etiy. Kigwan ched Jesus i 19“Maistoro, say dinteg tayon insolat Moses, kigwan tod man i ‘No gwariy sambaliy a nagwariy anak cha iy metiy i dahi, mesepol a imbaliyen na ahi tho ma ebalo say no man-enak ira, maybilang a anak niwa etiy.’ #12:19 Deuteronomy 25:5 20Niman ma, gwariy pithon san-aahin daleki. Engimbaliy i kafangodowanan, nem etiy iy nagwariy anak cha. 21Et sema sigonchen ahi tho, inimbaliy to ma ebalo, nem etiy ngo iy nagwariy anak cha. Inges to pay i maykatdon ahi tho. 22Sema iren pithon san-aahi, inimbaliy cha ma bii iy etiy iren emiin a nagwariy in-ana-anak cha. Et etiy ngo ma bii na kaonoran. 23No timpo di na panpawil na iyangketiy, siya wiy koston imbaliy niwa bii? Tep emiin a pithon daleki, inimbaliy cha ma bii.”
24Insongbat Jesus i “Iyankamali kayo tep eg jo egwathan i iyaysolat cha esel Afo Chiyos tan eg jo egwathan i panakabalin to. 25Tep no manpawil iriy etiy, nat mengimbaliy ira tep ingesen chiy anghilis cha dangit. 26Nem sema maypangkep na panpawil na iyangketiy, eg jo aya bisay insolat Moses maypangkep na manchachalang a kejow a edafoan na esel Afo Chiyos a kigwan tod Moses i ‘Si-kak i Chiyos Abraham, Chiyos Isaac, tan Chiyos Jacob.’ #12:26 Exodus 3:6 Kigwan Afo Chiyos iwan angken etiy ires Abraham nonta bayag da. Sema piyan ton a-seden, manpawil i iyangketiy tan sibibiyag ired sangoanan Afo Chiyos. 27Si Afo Chiyos, nat Chiyos na etiy, no diket sema iren sibibiyag. Isonga, iyankamali kayon pasiya.”
Sema Kainportantian A Bilin Afo Chiyos
(Matthew 22:34-40; Luke 10:25-28)
28Gwariy maistoro na dinteg a manki-ki-ngel na tabtabal ira na Sadducees tan si Jesus. Amta tho i kostoy insongbat Jesus, et inbaga tho wa i “Ngoy kainportantian a bilin?”
29Insongbat Jesus i “Sema kainportantian a bilin, sejay a ‘Si-kayon poli-polin Israel, ki-ngeli yo. Si Afo Chiyos a Afo thayo, si-katho bengat i Chiyos. Nagwariy echom. 30Mesepol a sesmeken mon pasiyes Afo Chiyos a Afom cha posom, cha ispiritom, cha nemnem mo, tan cha kedsang mo.’ #12:29-30 Deuteronomy 6:4-5 31Sema maykadgwen ainportantin bilin ket, sejay a ‘Semek moy echom mon inges toy penmek mo na angel mo.’ #12:31 Leviticus 19:18 Nagwariy echom a bilin a mas ainportanti iy sejay ira.”
32Et kigwan niwa maistoro na dinteg i “Kosto, Maistoro. Podnoy kigwan mon sa-ki bengat i Chiyos. Nagwariy echom. 33Kosto pay i mesepol a sesmeken tayon pasiyed poso tayo, cha nemnem tayo, tan cha kedsang tayo. Tan mesepol a sesmeken tayo ngoy echom tayon inges toy penmek tayo na angel tayo. Sema pemati thayo iren jay a chegwen bilin, mas ainportanti iy say sema pengitangdal na animal tan kompormin may-i-kan cha Afo Chiyos.”
34Idi inki-ngelan Jesus i mapteng a songbat niwa dahi, kigwan to i “Iyay-esop ked pantorayan Afo Chiyos.” Et manipod nontan ma, nagwara wiy engitoled a mansalodsod cha Jesus.
Sema Salodsod Maypangkep Na Cristo
(Matthew 22:41-46; Luke 20:41-44)
35Idi mantotoros Jesus cha timplo, kigwan to i “Niyana nakigwan iren ma mamaistoro na dinteg i sema Cristoy polin David? 36Tep kigwan mismon David babaen na Ispirito Santo i:
‘Kigwan Afo Chiyos cha
Afok i
“Tokkong ked ja gwanan ko
ingkathod a-gwahen ko ira
ma naengontred si-kam a
singen inkathin mo ira.” ’ ” #12:36 Psalm 110:1
37Intoloy Jesus a engowan i “No kigwan David ngo i sema Cristoy Afo tho, ngoy pesing na Criston medepod David?”
Et kinas na chakel a toon iyanki-ngel na nakigwan Jesus.
Kigwan Jesus Ired Tothoo I Tanchaanan Chiy Mamaistoro Na Dinteg
(Matthew 23:1-36; Luke 20:45-47)
38Et intoloy Jesus a iyantoro i “Tanchaani yoy mamaistoro na dinteg tep piyan chen manbaro na mapteng say mepeschian ira tan piyan cha pay a komostaen ira na too no onkowan ired market. 39Piyan cha pay a ontokkong chiwa kamaptengan a tokkongan cha synagog, tan no mekidihob ira, piyan cha pay a mekitokkong ired ma ainportantin too. 40Nasiyaol cha pay iriy iyangkebalo say a-daen chiy kameng cha, angken baliy cha, tan naebaya-bayag iren mankararag a nainbili-biling cha i maronong iren too. Isonga, mema-men enbel-at aliy chosa ra.”
Sema In-i-kan Na Biin Ebalod Afo Chiyos
(Luke 21:1-4)
41Idi mantoktokkong si Jesus a towan sangoay ejanan na pilak a para cha timplo, biyantayan to iriy tothoon man-eejan na pilak ched man. Chakel i bebaknang a toon engi-jan na chakel a pilak. 42Nem gwara wiy ebitheg a biin ebalon kimowan a engi-jan na chegwen sintimos bengat. 43Et tiya-gway men Jesus iriy disipolos ton kigwan to i “Sejay a konen kod si-kayo, podnon sema ebalon ebitheg, esolok i in-ejan to iy say sema iren emiin a echom. 44Tep sema iren echom, in-i-kan chiy sobda na kinabaknang cha iy say sema ebalo, angken nagwariy kebedinan to, in-i-kan ton emiin i gwared si-kathon panbiyagan to.”
Právě zvoleno:
Mark 12: KAR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 Wycliffe Bible Translators, Inc. All rights reserved.
Mark 12
12
Sema Arig Na Naengi-chen Na Garden A Grape
(Matthew 21:33-46; Luke 20:9-19)
1Et engiarig si Jesus cha tothoon kigwan to i “Gwariy toon iyantanem na grape cha mabenaw a garden to. Iyalad to et emaong na pemespesan na grape a ma-mag na tafiy. Engitgwen pay na ekayang a baliy a panbantayan na naiyanbantay na garden. Et inpa-bang to ma garden tod echom a naengi-chen et kimowan cha sa-kin ili. 2Idi mimothok i timpo na siborasan na grape, engito-no ma mahagarden na bagaen ired ma naengi-chen say a-daen na bagaen i bingay to. 3Nem idi mimothok iwa bagaen, piyegpeg-as iren ma naengi-chen et inpabtik chen diwas. 4Engito-no mowan iwa mahagarden na sa-kin bagaen, nem piyegpeg-as ngo iren ma naengi-chen i toktok to tan biyai-baingan cha. 5Et engito-no mowan i mahagarden na afil a bagaen, nem biyono ra. Inges toy inpasing ched ma echom a iyayto-no. Piyegpeg-as chiy echom tan biyono ra ngoy echom. 6Et igwa wiy sa-sa-kin ebay-anan a ito-non ma mahagarden. Si-kathoy anak ton ensemek ton pasiya. Into-no tho wen kigwan tod nemnem to i ‘Rispiktaren chiy anak ko.’
7“Nem idi mimothok iwa anak to, iyankinowan ira ma naengi-chen i ‘Sejay i menegwid niya garden. Bonoen tayo say a-daen tayo ja tawid to.’ 8Ida ra wen biyono ra, et inba-tok chiy angel tod ma awas na garden.” 9Et kigwan men Jesus i “Ngoy pesing niwa mahagarden ired ma naengi-chen? Sigoradon onkowan chiwan a bonoen to ira, et ipiyal to ma garden tod ma echom a too. 10Nemnemnem jo ma iyaysolat cha esel Afo Chiyos a kigwan to i:
‘Sema bathon kigwan iren
ma naengamag i nagwariy silbi tho,
si-kathoy iyanbalin a
kapategan a bathon naengibahed na baliy.
11Si Afo Chiyos i engipasing niwan
et kaskasdaaw cha
nemnem tayo.’ ” #12:10-11 Psalm 118:22-23
12Et sema wa iren naengibalnay na Hodjos, piyan chen chedmethen si Jesus tep amta ra i sema arig, maypangkep cha si-kara. Nem tiyakothan chiy tothoo, isonga bintihan ches Jesus.
Sema Salodsod Maypangkep Na Bayad Na Binis
(Matthew 22:15-22; Luke 20:20-26)
13Idi engkay, sema iren naengibalnay na Hodjos, engito-no wa ira na Pharisees tan echom a toon Herod a menalodsod Jesus say osalen chiy konen ton pengicharoman ched si-katho. 14Idi mimothok ired kad-an to, kigwan cha i “Maistoro, amta wi i emiin a nakigwan mo, podno. Amta wi pay i nat naindasin moy kasasaad na angken siyen too, no diket naintorom i podno maypangkep na piyan Afo Chiyos a a-magen na tothoo. Et ija pangoy ibaga wi. Iyaytolok emod ma dinteg tayo i panbejad na binis cha Caesar, ono enchi?”
15Nem amten Jesus i chiyan iparas a menaol, isonga kigwan to i “Niyana jowan parasaak? Ala kayo di na pilak a naaosal a maybayad na binis say si-nengen ko.” 16In-i-kanan ches Jesus na denarius, et kigwan to i “Siyay mahadopa tan mahangaran niyay?”
Kigwan cha i “Si Caesar.”
17Et kigwan men Jesus i “No setan ngarod, i-kan jod Caesar i may-i-kan komed si-katho, tan i-kan jo ngod Afo Chiyos i may-i-kan komed si-katho.” Et iyasdaaw ma ired Jesus.
Sema Salodsod Maypangkep Na Panpawil Na Iyangketiy
(Matthew 22:23-33; Luke 20:27-40)
18Gwara ngo iriy echom a Sadducees a kimowan cha kad-an Jesus. Sema iren Sadducees, eg cha napiyati i manpawil i etiy. Kigwan ched Jesus i 19“Maistoro, say dinteg tayon insolat Moses, kigwan tod man i ‘No gwariy sambaliy a nagwariy anak cha iy metiy i dahi, mesepol a imbaliyen na ahi tho ma ebalo say no man-enak ira, maybilang a anak niwa etiy.’ #12:19 Deuteronomy 25:5 20Niman ma, gwariy pithon san-aahin daleki. Engimbaliy i kafangodowanan, nem etiy iy nagwariy anak cha. 21Et sema sigonchen ahi tho, inimbaliy to ma ebalo, nem etiy ngo iy nagwariy anak cha. Inges to pay i maykatdon ahi tho. 22Sema iren pithon san-aahi, inimbaliy cha ma bii iy etiy iren emiin a nagwariy in-ana-anak cha. Et etiy ngo ma bii na kaonoran. 23No timpo di na panpawil na iyangketiy, siya wiy koston imbaliy niwa bii? Tep emiin a pithon daleki, inimbaliy cha ma bii.”
24Insongbat Jesus i “Iyankamali kayo tep eg jo egwathan i iyaysolat cha esel Afo Chiyos tan eg jo egwathan i panakabalin to. 25Tep no manpawil iriy etiy, nat mengimbaliy ira tep ingesen chiy anghilis cha dangit. 26Nem sema maypangkep na panpawil na iyangketiy, eg jo aya bisay insolat Moses maypangkep na manchachalang a kejow a edafoan na esel Afo Chiyos a kigwan tod Moses i ‘Si-kak i Chiyos Abraham, Chiyos Isaac, tan Chiyos Jacob.’ #12:26 Exodus 3:6 Kigwan Afo Chiyos iwan angken etiy ires Abraham nonta bayag da. Sema piyan ton a-seden, manpawil i iyangketiy tan sibibiyag ired sangoanan Afo Chiyos. 27Si Afo Chiyos, nat Chiyos na etiy, no diket sema iren sibibiyag. Isonga, iyankamali kayon pasiya.”
Sema Kainportantian A Bilin Afo Chiyos
(Matthew 22:34-40; Luke 10:25-28)
28Gwariy maistoro na dinteg a manki-ki-ngel na tabtabal ira na Sadducees tan si Jesus. Amta tho i kostoy insongbat Jesus, et inbaga tho wa i “Ngoy kainportantian a bilin?”
29Insongbat Jesus i “Sema kainportantian a bilin, sejay a ‘Si-kayon poli-polin Israel, ki-ngeli yo. Si Afo Chiyos a Afo thayo, si-katho bengat i Chiyos. Nagwariy echom. 30Mesepol a sesmeken mon pasiyes Afo Chiyos a Afom cha posom, cha ispiritom, cha nemnem mo, tan cha kedsang mo.’ #12:29-30 Deuteronomy 6:4-5 31Sema maykadgwen ainportantin bilin ket, sejay a ‘Semek moy echom mon inges toy penmek mo na angel mo.’ #12:31 Leviticus 19:18 Nagwariy echom a bilin a mas ainportanti iy sejay ira.”
32Et kigwan niwa maistoro na dinteg i “Kosto, Maistoro. Podnoy kigwan mon sa-ki bengat i Chiyos. Nagwariy echom. 33Kosto pay i mesepol a sesmeken tayon pasiyed poso tayo, cha nemnem tayo, tan cha kedsang tayo. Tan mesepol a sesmeken tayo ngoy echom tayon inges toy penmek tayo na angel tayo. Sema pemati thayo iren jay a chegwen bilin, mas ainportanti iy say sema pengitangdal na animal tan kompormin may-i-kan cha Afo Chiyos.”
34Idi inki-ngelan Jesus i mapteng a songbat niwa dahi, kigwan to i “Iyay-esop ked pantorayan Afo Chiyos.” Et manipod nontan ma, nagwara wiy engitoled a mansalodsod cha Jesus.
Sema Salodsod Maypangkep Na Cristo
(Matthew 22:41-46; Luke 20:41-44)
35Idi mantotoros Jesus cha timplo, kigwan to i “Niyana nakigwan iren ma mamaistoro na dinteg i sema Cristoy polin David? 36Tep kigwan mismon David babaen na Ispirito Santo i:
‘Kigwan Afo Chiyos cha
Afok i
“Tokkong ked ja gwanan ko
ingkathod a-gwahen ko ira
ma naengontred si-kam a
singen inkathin mo ira.” ’ ” #12:36 Psalm 110:1
37Intoloy Jesus a engowan i “No kigwan David ngo i sema Cristoy Afo tho, ngoy pesing na Criston medepod David?”
Et kinas na chakel a toon iyanki-ngel na nakigwan Jesus.
Kigwan Jesus Ired Tothoo I Tanchaanan Chiy Mamaistoro Na Dinteg
(Matthew 23:1-36; Luke 20:45-47)
38Et intoloy Jesus a iyantoro i “Tanchaani yoy mamaistoro na dinteg tep piyan chen manbaro na mapteng say mepeschian ira tan piyan cha pay a komostaen ira na too no onkowan ired market. 39Piyan cha pay a ontokkong chiwa kamaptengan a tokkongan cha synagog, tan no mekidihob ira, piyan cha pay a mekitokkong ired ma ainportantin too. 40Nasiyaol cha pay iriy iyangkebalo say a-daen chiy kameng cha, angken baliy cha, tan naebaya-bayag iren mankararag a nainbili-biling cha i maronong iren too. Isonga, mema-men enbel-at aliy chosa ra.”
Sema In-i-kan Na Biin Ebalod Afo Chiyos
(Luke 21:1-4)
41Idi mantoktokkong si Jesus a towan sangoay ejanan na pilak a para cha timplo, biyantayan to iriy tothoon man-eejan na pilak ched man. Chakel i bebaknang a toon engi-jan na chakel a pilak. 42Nem gwara wiy ebitheg a biin ebalon kimowan a engi-jan na chegwen sintimos bengat. 43Et tiya-gway men Jesus iriy disipolos ton kigwan to i “Sejay a konen kod si-kayo, podnon sema ebalon ebitheg, esolok i in-ejan to iy say sema iren emiin a echom. 44Tep sema iren echom, in-i-kan chiy sobda na kinabaknang cha iy say sema ebalo, angken nagwariy kebedinan to, in-i-kan ton emiin i gwared si-kathon panbiyagan to.”
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 Wycliffe Bible Translators, Inc. All rights reserved.