Mark 10
10
Sema Maypangkep Na Pengimbaliy Tan Pengisi-jan
(Matthew 19:1-12; Luke 16:18)
1Et imekal ma ires Jesus chiwa dogad, et kimowan ired sahop na Judea a gwared piig na kolos a Jordan. Chakel mowan i toon esa-sa-nop cha kad-an Jesus, et tiyoroan to ira tep si-katho na olay i nainpasing to.
2Gwara pay iriy Pharisees a kimowan cha kad-an Jesus say pechasen cha. Inbaga ra i “Iyaytolok emod ma dinteg tayon Hodjos i pengisi-jan na dahi na imbaliy to?”
3Insongbat Jesus i “Nengoy inbilin Moses cha si-kayo nonta bayag da?”
4Kigwan cha i “Intolok Moses a i-kanan na dahiy imbaliy to na solat a mengipaneknek i iyansi-jan ira, et pebtik to.”
5Et kigwan Jesus i “Intolok Moses i pengisi-jan jo na imbaliy jo tep esolpeng kayo. 6Nem nonta kapkapoanan a piyarsowen Afo Chiyos i dobong, ‘imag toy dahi tan bii.’ #10:6 Genesis 1:27 7‘Isonga, say dahi, bebtihan toy aweto tan ineton maytipon cha imbaliy to, 8et manbalin iwa chegwa na sa-ki.’ #10:8 Genesis 2:24 Nat chegwa wa ira, no diket iyansa-ki ira. 9Isonga, sema inpansa-kin Afo Chiyos, nat pansi-jan koma na too.”
10Idi imoli ches Jesus chiwa baliy, inbagen ma disipolos toy maypangkep na banag niwa kigwan to. 11Kigwan Jesus i “Angken siyen dahin mengisi-jan na imbaliy to et mengimbaliy mowan na afil a bii, manbesol cha pilmiron imbaliy to tep ekibii. 12Et inges to ngoy bii. No isi-jan na biiy imbaliy to et mengimbaliy na afil a dahi, manbesol chiwa pilmiron imbaliy to tep ekidahi.”
Binindisjonan Jesus I Aanak
(Matthew 19:13-15; Luke 18:15-17)
13Nonta sa-kin akow, gwara iriy toon engitolod na aanak cha kad-an Jesus say isagpat toy diwa thod si-kara tan ikararagan to ira. Nem nat intolok na disipolos to. 14Idi iyamtaan Jesus iwan, bimonget a kigwan to i “Itolok joy aanak a onkowan ali ched si-kak. Enog i inparit tep sema iren toon inges to ira ja aanak a iyangkebaba, si-kariy mayka-chom cha pantorayan Afo Chiyos. 15Sejay a konen kod si-kayo, podnon no piyan jon mayka-chom cha pantorayan Afo Chiyos, mesepol a egwathen joy pantorayan ton inges toy pengegwat na aanak.” 16Et igwang to wa ira ma aanak a insagpat toy diwa thod si-kara et inkararagan to ira.
Sema Baknang A Too
(Matthew 19:16-30; Luke 18:18-30)
17Idi mandadayat ires Jesus, gwariy dahin iyanbetik alin iyantalimohod cha sangoanan ton kigwan to i “Maistoro, maronong ken too. Ngoy ampet pesing ko say may-i-kananak na biyag a nagwariy pengingkaan to?”
18Et kigwan Jesus i “Niyana mowan kona i maronongak? Nagwariy maronong, malaksid si Afo Chiyos bengat. 19Amtam i bili-bilin Afo Chiyos i ‘Enog i bono, enog i mekibii, enog i kibot, enog i tistigo na itek, enog i sihap, tan chayaw mos awam tan si inam.’ ” #10:19 Exodus 20:12-16; Deuteronomy 5:16-20
20Et kigwan men ma dahi i “Maistoro, manipod na kanga-ngak, napiyatik a emiin ira ma bili-bilin.”
21Et sini-neng men Jesus a sinmekan ton kigwan to i “Gwara pay i sa-kin kolang mo. Mo idahoy kameng mon i-kan mo ma pilak cha iyangkebitheg, et gwara wiy kinabaknang mod dangit a ikamid Afo Chiyos. Et kowan ka di et kay-olop ka wed si-kak.” 22Idi inki-ngelan na dahi man, iya-ngos i kasi-neng na dopa tho et imekal tep baknang a chili.
23Et sini-neng men Jesus i disipolos ton kigwan to i “Edigat ngarod a mayka-chom i baknang a tood pantorayan Afo Chiyos!” 24Iyasdaaw ira ma disipolos tod kigwan to, nem inpidgwen Jesus i “Aanak ko, edigat ngarod a mayka-chom i baknang a tood pantorayan Afo Chiyos! 25Mas inam-ay i idesot na camel cha ebot na chakom iy say kayka-chom na baknang a tood pantorayan Afo Chiyos.”
26Nonta inki-ngelan na disipolos to man, iyasdaaw iren pasiyen kigwan cha i “No edigat i baknang a toon maysalakan angken chakel i kebedinan to, siya ngarod i maysalakan?”
27Sini-neng iren Jesus a kigwan to i “No too, eg cha mebedin a a-magen iwan, nem no si Afo Chiyos, mebedin tep kaya thon a-magen a emiin.”
28Et kigwan men Peter i “Si-kawi ngay? Inpayas min emiin tep say may-odop kawid si-kam.”
29Kigwan Jesus i “Ahow, et sejay a konen kod si-kayo, podnon sema toon mengipejas na baliy to, aahi to, aweto tan ineto, aanak to, tan payo-payow to say mekika-chom cha si-kak tan mankasaba na mapteng a chamag 30chiya biyag, may-i-kanan na menandasos a banol na inpayas to. May-i-kanan ngo na chakel a baliy, ahi, ina, anak, tan payow. Mepedigat ngo. Et no sa-ki din akow, may-i-kanan ngo na biyag a nagwariy pengingkaan to. 31Nem chakel a iyangkekayang niman, maybaba, tan chakel ngon iyangkebaba niman, maykayang.”
Sema Maykatdon Inpangowan Jesus Maypangkep Na Ketiy To
(Matthew 20:17-19; Luke 18:31-34)
32Nonta gwara ires Jesus cha kalsaren mankokowan cha Jerusalem, edagwas iy say disipolos to. Iyasdaaw iriy disipolos to, tan sema iren toon mantetened ket, ketahot ira. Et ingwakdin mowan Jesus iriy sawal na chegwen disipolos ton kigwan tod si-kariy mepesamak alid si-kathon kigwan to i 33“Iki-ngeli yo. Mankokowan kiyed Jerusalem. No onmothok kiyed man, si-kak a Anak na Too, iawat chaak cha aafo na papari tan mamaistoro na dinteg, et kowisen chaak a konen cha i metiyak koma. Et iawat chaak ired ma Gentiles 34say ang-angjaen chaak na Gentiles, chopchopdaan chaak, becha-bechasen chaak, et bonoen chaak, nem no maykatdon akow, manpawilak.”
Sema Kechow James Ni John
(Matthew 20:20-28)
35Et si James ni John a anak iren Zebedee, kimowan ma ired kad-an Jesus a kigwan cha i “Maistoro, ijay i ibaga wi.”
36Kigwan Jesus i “Tiwa, niyana, nengoy piyan jon pesing kod si-kayo?”
37Kigwan cha i “No mantoktokkong ked thronom cha pantorayan mo, pangaasim itolok mon mekitokkong kawid si-kam, sa-kid gwanan mo tan sa-kid gwilim.”
38Nem kigwan Jesus chiwa disipolos ton chegwa i “Nat amta yoy jowan ibaga. Igwiy tasen iyapno na digat tan mesepol a inomen koy gwared man. Kabaalan jo ayen imingel i digat a tamtamen ko? Igwa pay i epaladon bonjag a onsagwid si-kak. Mebedin ayen imingel joy bonjag a inges toy bonjag a imingel ko?”
39Kigwan cha i “Mebedin.”
Et kigwan men Jesus i “Ahow, sigoradon inomen joy gwared tasen inomen ko. Tan mebonjagan kayo ngo pay na inges toy kebonjag ko. 40Nem no sema maypangkep na toon ontokkong cha gwanan ko tan gwilik, nagwariy karebengan kon memispis tep pinispis malen Awak iriy toon insaganaan ton ma dogad.”
41Sema ngon echom a sampolon disipolos, idi inki-ngelan cha man, inbonget ches James ni John. 42Et tiya-gway men Jesus a emiin ira ma disipolos to, et kigwan to i “Amta yo i sema iren toon naiyantoray chiya dobong, nainpilit chiy piyan cha. Sema pay iren toon iyangkekayang i karebengan to, naiyantoray iren oltimo. 43Nem enchek jo i ipasing iwan. Tep angken siyen tood si-kayon piyan ton kahejangan, mesepol a mansilbid echom ton inges toy bagaen, 44tan angken siya ngon tood si-kayon piyan ton manpan-inportanti, mesepol a mansilbid emiin a toon inges toy bagaen. 45Tep si-kak a Anak na Too, sema kimowanan ko di, nat say manpasilbiak cha echom, no diket mansilbiak cha echom tan i-kan koy biyag kon mengikaro na chosa na basol na chakel a too.”
Ingkal Jesus I Korab Bartimaeus
(Matthew 20:29-34; Luke 18:35-43)
46Mimothok si Jesus tan disipolos tod Jericho. Idi imekal ira, chakel i ekiolop a too. Iyaytompong a gwariy sa-kin ekorab a mantoktokkong cha kilig na kalsaren manpapalimos. Say ngaran to, si Bartimaeus a anak Timaeus. 47Idi inki-ngelan ton gwares Jesus a i-Nazareth, kimeljaw a kigwan to i “Hoy, Jesus! Polin David! Pangaasim, kaasii moak!”
48Inbonget na chakel a too i on-eket, nem miya-ma thon kimeljaw a kigwan to i “Polin David! Pangaasim, kaasii moak!”
49Et simalcheng mes Jesus a kigwan to i “Ta-gway jo did jay.” Tiya-gway cha wa ma ekorab a kigwan cha i “Pan-imdeng ka, akgwat ka, towan ta-gwaya ka.” 50Ingkal Bartimaeus i ta-kep na baro tho, imakgwat a chakos, et kimowan cha kad-an Jesus. 51Et kigwan men Jesus i “Niyana, ngoy piyan mon pesing kod si-kam?”
Et kigwan niwa ekorab i “Afo, piyan kon mahasi-neng.” 52Kigwan Jesus i “Tiwa, taha betik. Mimapteng ka wa kagol na pamatim cha si-kak.” Et iya-kal men chakos iwa korab to, et ekiolop cha Jesus.
Právě zvoleno:
Mark 10: KAR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 Wycliffe Bible Translators, Inc. All rights reserved.
