Ioane 9
9
Kua Fakamālōlō e Iehu he Tamāloa na Fānau mai e Tāuaho
1Koi havali atu ia Iehu kae kua ia kitea he tamāloa na fānau mai lava e tāuaho. 2Oi na fehili ai ona hoko kia te ia, “Te Faiākoga, e āi nei te agahala na māfua ai te fānau mai o te tamāloa e tāuaho? E ā ia lava, pe e ā ona mātua?”
3Na tali mai ia Iehu, “E hē ona ni agahala e ā ia, pe e ā ona mātua. Na fānau mai ia e tāuaho, kae ke mafai ai ia gāluega mamana a te Atua ke fakaalia e ala ia te ia. 4E tatau ke fai pea lava e kitātou te gāluega a tē na ia uga maia au meamanū koi ao; e pa mai loa te pō, e hēai he tino e mafai ke galue. 5Ka koi iei au i te lalolagi, ko au te maua ai te mālama mo te lalolagi.” #Mat 5.14; Ioa 8.12
6Kua uma atu tana kupu tēnā, oi na feanu ai ki te kelekele ma palupalu nā palapala i ona feanuga, ma uku ai nā mata o te tamāloa, 7ma na lea vē atu ki ei, “Fano la oi fufulu nā mata o koe i te Vaitākele ko Hiloma.” (Ko te uiga o te igoa tēnei “Uga. ”) Oi na fano ai te tamāloa kua fufulu nā mata o ia, ma i te liliu maiga kua toe pupula ona mata.
8Ko nā tuākoi o ia, ma nā tino na kilātou kitea te tamāloa nae māhani oi kaitagōgō, kua fehili vēia, “E hē ko te tagata tēnei te nae māhani oi nofo ma kaitagōgō?”
9Na lea vē iētahi, “Io, ko ia,” ka ko iētahi na lea, “Hēai, e hē ko ia, kae e tāi vē lava ona fōliga.”
Oi na lea atu ai loa lava te tamāloa, “Ko au ko te tino tēnā.”
10“Na vēhea la oi mafai ke toe pupula nā mata o koe?” kua fehili mai kilātou ki te tamāloa.
11Na tali atu te tamāloa, “Ko te tino e igoa kia Iehu na palupalu e ia ni mea palapala ma uku ai oku mata, ma lea mai ai ko au ke fano ki te Vaitākele ko Hiloma oi fufulu ai oku mata. Oi na fano ai au, ma na uma loa lava te fufulu kae pupula loa oku mata.”
12“E i fea la ia Iehu?” na fehili vēnā mai kilātou.
“E hē kō iloa,” na tali atu ai te tamāloa.
Kua Hukehuke e nā Falehaio te Tāuaho na Fakamālōlō
13Oi na kave ai e kilātou te tamāloa nae tāuaho ki te kau Falehaio. 14Ko te aho na palu ai e Iehu nā palapala ma fakapupula ai e ia nā mata o te tāuaho, ko he Hāpati. 15Oi na toe fehili ai foki te kau Falehaio ki te tamāloa pe na vēhea ona mafai ke toe pupula nā mata o ia. Ma na tali atu te tamāloa, “Na tuku e Iehu nā palapala ki oku mata, oi na fufulu kehe ai e au, ma na pupula ai oku mata.”
16Ko iētahi o te kau Falehaio kua lea vē, “Ko te tino na ia faia te mea tēnei e hē he tino e hau mai te Atua, auā kua hē uhitaki ki te tūlāfono e uiga ki te Hāpati.”
Ka ko iētahi kua lea vē, “E vēhea ona mafai e he tino agahala oi fai ni fakailoga vēnei?” Oi na iei ai he fekehekeheakiga ia te kilātou.
17Oi na toe fehili ai foki te kau Falehaio ki te tamāloa, “Heā hau fakamatalaga e mafai ke fai e uiga ki te tino e lea koe na toe fakapupula e ia nā mata o koe?”
“Ko te tino ko he pelofeta,” na tali mai ai te tamāloa.
18Kae ko nā takitaki Iutaia nae hē talitonu ko te tamāloa nae tāuaho moni, oi na fekau ai e kilātou nā mātua o te tamāloa, 19ma na fehili vē atu ai kilātou ki ei, “E o koulua te ataliki tēnei? E lea koulua na fānau mai lava e tāuaho; na mafai vēhea la ke toe pupula nā mata o ia?”
20Na tali atu nā mātua, “E ki mā iloa ko te ataliki tēnei o kimāua, na fānau mai lava e tāuaho. 21Kae e hē ki mā iloa pe na vēhea ona mafai ke toe pupula ona mata, kae pe ko ai foki te na ia fakamālōlōa mai tona tāuaho. Fehili ki ei; kua matua ma kua ia mafaia lava oi tali mo ia!” 22Na lea vēnā ona mātua, ona kua mātataku i nā takitaki Iutaia, auā kua uma te fai o te lātou tonu, ko te tino e lea ko ia e talitonu ko Iehu ko te Mehia, e tuli kehe mai loto o te hūnako. 23Ko te mea ia na lea vē ai ona mātua, “Fehili ki ei; kua matua ma kua ia mafaia lava oi tali mo ia!”
24Kua fakalua ona toe fekau e kilātou te tamāloa na fānau mai e tāuaho, ma na lea vē atu ai ki ei, “Takutino mai i mua o te Atua ko koe ka tautala i te meamoni! E iloa e kimātou ko te tino na ia fakamālōlōa koe ko he tino agahala.”
25“E hē kō iloa pe ko ia he tino agahala pe hēai,” na tali mai ai te tamāloa. “E fokotahi lava te mea e kō iloa; ko au nae tāuaho kae nei kua pupula nā mata o oku.”
26“Ko heā ta ia na fai kia te koe?” na lea vēnā atu kilātou. “Na fakapupula vēhea e ia nā mata o koe?”
27“Kua uma toku lea atu kia te koutou,” na tali mai ai te tamāloa, “kae ko koutou e hē fia fakalogo. Heā la te fofou ai koutou ke toe lea atu au ki te mea na pa au ki ei? Ko koutou foki kua fia kavea ma hoko o ia?”
28Kua fakatauemu kilātou ki te tamāloa ma na lea vē ai ki ei, “Ko koe tēnā te hoko o ia; kae ko kimātou ko nā hoko o Mohe. 29E iloa e kimātou ko te Atua na vāgana kia Mohe; ka ko te tino tēnā e lea mai ai koe, e hē kimātou iloa foki pe hau mai fea!”
30Na tali mai te tamāloa, “Te ofōfogia lele la o te mea tēnei! Tēnā e hē koutou iloa pe hau mai fea, kae na ia fakamālōlōa au mai te tāuaho! 31E iloa e kitātou ko te Atua e hē fakalogo ki nā tino agahala; kae e fakalogo ki nā tino e tāpuaki ake kia te ia ma faia nā mea e fofou ia ki ei. 32Mai te kāloā, e hēki lagona lele pe na kua iei he tino e fakapupula e ia ni mata o he tino na fānau mai e tāuaho. 33E hē mafai e te tino tēnei oi fai he mea vēnei, vaganā na hau mai te Atua.”
34Na tali atu kilātou, “Ko koe na fānau ma tuputupu ake i te agahala—kae e hau koe oi akoako mai kimātou?” Oi na tuli kehe ai e kilātou te tamāloa mai te hūnako.
Ko te Tāuaho i te Faka-te-agaga
35I te lagonaga e Iehu o te mea na tupu, oi na fano ai kua hakili te tamāloa. I te ia mauaga, oi na fehili atu ai ki ei vēia, “E talitonu koe ki te Ataliki o te Tagata?”
36Na tali mai te tamāloa, “Te aliki, taku mai ake pe ko tēfea te tino tēnā, kae ke talitonu au ki ei!”
37Oi na vāgana atu ai ia Iehu ki ei, “Kua uma te kē kiteagia, ma ko ia tēia e tautala atu nei kia te koe.”
38“Te Aliki, ko au kua talitonu!” kua lea vēnā atu te tamāloa, ma na tōtuli ifo ai ki lalo i mua o Iehu.
39Na vāgana atu ia Iehu, “Ko au na hau ki te lalolagi ke fakamahino, kae ke pupula ai ia mata o nā tino nae tāuaho, kae tāuaho nā mata o nā tino nae pupula nā mata.”
40Ko iētahi o te kau Falehaio nae i kinā, na kilātou lagona te tala tēnei a Iehu, oi na fehili vē atu ai ki ei, “Ko kimātou foki la e tāuaho?”
41Na tali mai ia Iehu, “Ānei ake koutou e tāuaho, ko koutou e hē nofohala; kae ona ko koutou e lea ko koutou e hē tāuaho, ko tona uiga koi nofohala pea lava la koutou.”
Právě zvoleno:
Ioane 9: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
Ioane 9
9
Kua Fakamālōlō e Iehu he Tamāloa na Fānau mai e Tāuaho
1Koi havali atu ia Iehu kae kua ia kitea he tamāloa na fānau mai lava e tāuaho. 2Oi na fehili ai ona hoko kia te ia, “Te Faiākoga, e āi nei te agahala na māfua ai te fānau mai o te tamāloa e tāuaho? E ā ia lava, pe e ā ona mātua?”
3Na tali mai ia Iehu, “E hē ona ni agahala e ā ia, pe e ā ona mātua. Na fānau mai ia e tāuaho, kae ke mafai ai ia gāluega mamana a te Atua ke fakaalia e ala ia te ia. 4E tatau ke fai pea lava e kitātou te gāluega a tē na ia uga maia au meamanū koi ao; e pa mai loa te pō, e hēai he tino e mafai ke galue. 5Ka koi iei au i te lalolagi, ko au te maua ai te mālama mo te lalolagi.” #Mat 5.14; Ioa 8.12
6Kua uma atu tana kupu tēnā, oi na feanu ai ki te kelekele ma palupalu nā palapala i ona feanuga, ma uku ai nā mata o te tamāloa, 7ma na lea vē atu ki ei, “Fano la oi fufulu nā mata o koe i te Vaitākele ko Hiloma.” (Ko te uiga o te igoa tēnei “Uga. ”) Oi na fano ai te tamāloa kua fufulu nā mata o ia, ma i te liliu maiga kua toe pupula ona mata.
8Ko nā tuākoi o ia, ma nā tino na kilātou kitea te tamāloa nae māhani oi kaitagōgō, kua fehili vēia, “E hē ko te tagata tēnei te nae māhani oi nofo ma kaitagōgō?”
9Na lea vē iētahi, “Io, ko ia,” ka ko iētahi na lea, “Hēai, e hē ko ia, kae e tāi vē lava ona fōliga.”
Oi na lea atu ai loa lava te tamāloa, “Ko au ko te tino tēnā.”
10“Na vēhea la oi mafai ke toe pupula nā mata o koe?” kua fehili mai kilātou ki te tamāloa.
11Na tali atu te tamāloa, “Ko te tino e igoa kia Iehu na palupalu e ia ni mea palapala ma uku ai oku mata, ma lea mai ai ko au ke fano ki te Vaitākele ko Hiloma oi fufulu ai oku mata. Oi na fano ai au, ma na uma loa lava te fufulu kae pupula loa oku mata.”
12“E i fea la ia Iehu?” na fehili vēnā mai kilātou.
“E hē kō iloa,” na tali atu ai te tamāloa.
Kua Hukehuke e nā Falehaio te Tāuaho na Fakamālōlō
13Oi na kave ai e kilātou te tamāloa nae tāuaho ki te kau Falehaio. 14Ko te aho na palu ai e Iehu nā palapala ma fakapupula ai e ia nā mata o te tāuaho, ko he Hāpati. 15Oi na toe fehili ai foki te kau Falehaio ki te tamāloa pe na vēhea ona mafai ke toe pupula nā mata o ia. Ma na tali atu te tamāloa, “Na tuku e Iehu nā palapala ki oku mata, oi na fufulu kehe ai e au, ma na pupula ai oku mata.”
16Ko iētahi o te kau Falehaio kua lea vē, “Ko te tino na ia faia te mea tēnei e hē he tino e hau mai te Atua, auā kua hē uhitaki ki te tūlāfono e uiga ki te Hāpati.”
Ka ko iētahi kua lea vē, “E vēhea ona mafai e he tino agahala oi fai ni fakailoga vēnei?” Oi na iei ai he fekehekeheakiga ia te kilātou.
17Oi na toe fehili ai foki te kau Falehaio ki te tamāloa, “Heā hau fakamatalaga e mafai ke fai e uiga ki te tino e lea koe na toe fakapupula e ia nā mata o koe?”
“Ko te tino ko he pelofeta,” na tali mai ai te tamāloa.
18Kae ko nā takitaki Iutaia nae hē talitonu ko te tamāloa nae tāuaho moni, oi na fekau ai e kilātou nā mātua o te tamāloa, 19ma na fehili vē atu ai kilātou ki ei, “E o koulua te ataliki tēnei? E lea koulua na fānau mai lava e tāuaho; na mafai vēhea la ke toe pupula nā mata o ia?”
20Na tali atu nā mātua, “E ki mā iloa ko te ataliki tēnei o kimāua, na fānau mai lava e tāuaho. 21Kae e hē ki mā iloa pe na vēhea ona mafai ke toe pupula ona mata, kae pe ko ai foki te na ia fakamālōlōa mai tona tāuaho. Fehili ki ei; kua matua ma kua ia mafaia lava oi tali mo ia!” 22Na lea vēnā ona mātua, ona kua mātataku i nā takitaki Iutaia, auā kua uma te fai o te lātou tonu, ko te tino e lea ko ia e talitonu ko Iehu ko te Mehia, e tuli kehe mai loto o te hūnako. 23Ko te mea ia na lea vē ai ona mātua, “Fehili ki ei; kua matua ma kua ia mafaia lava oi tali mo ia!”
24Kua fakalua ona toe fekau e kilātou te tamāloa na fānau mai e tāuaho, ma na lea vē atu ai ki ei, “Takutino mai i mua o te Atua ko koe ka tautala i te meamoni! E iloa e kimātou ko te tino na ia fakamālōlōa koe ko he tino agahala.”
25“E hē kō iloa pe ko ia he tino agahala pe hēai,” na tali mai ai te tamāloa. “E fokotahi lava te mea e kō iloa; ko au nae tāuaho kae nei kua pupula nā mata o oku.”
26“Ko heā ta ia na fai kia te koe?” na lea vēnā atu kilātou. “Na fakapupula vēhea e ia nā mata o koe?”
27“Kua uma toku lea atu kia te koutou,” na tali mai ai te tamāloa, “kae ko koutou e hē fia fakalogo. Heā la te fofou ai koutou ke toe lea atu au ki te mea na pa au ki ei? Ko koutou foki kua fia kavea ma hoko o ia?”
28Kua fakatauemu kilātou ki te tamāloa ma na lea vē ai ki ei, “Ko koe tēnā te hoko o ia; kae ko kimātou ko nā hoko o Mohe. 29E iloa e kimātou ko te Atua na vāgana kia Mohe; ka ko te tino tēnā e lea mai ai koe, e hē kimātou iloa foki pe hau mai fea!”
30Na tali mai te tamāloa, “Te ofōfogia lele la o te mea tēnei! Tēnā e hē koutou iloa pe hau mai fea, kae na ia fakamālōlōa au mai te tāuaho! 31E iloa e kitātou ko te Atua e hē fakalogo ki nā tino agahala; kae e fakalogo ki nā tino e tāpuaki ake kia te ia ma faia nā mea e fofou ia ki ei. 32Mai te kāloā, e hēki lagona lele pe na kua iei he tino e fakapupula e ia ni mata o he tino na fānau mai e tāuaho. 33E hē mafai e te tino tēnei oi fai he mea vēnei, vaganā na hau mai te Atua.”
34Na tali atu kilātou, “Ko koe na fānau ma tuputupu ake i te agahala—kae e hau koe oi akoako mai kimātou?” Oi na tuli kehe ai e kilātou te tamāloa mai te hūnako.
Ko te Tāuaho i te Faka-te-agaga
35I te lagonaga e Iehu o te mea na tupu, oi na fano ai kua hakili te tamāloa. I te ia mauaga, oi na fehili atu ai ki ei vēia, “E talitonu koe ki te Ataliki o te Tagata?”
36Na tali mai te tamāloa, “Te aliki, taku mai ake pe ko tēfea te tino tēnā, kae ke talitonu au ki ei!”
37Oi na vāgana atu ai ia Iehu ki ei, “Kua uma te kē kiteagia, ma ko ia tēia e tautala atu nei kia te koe.”
38“Te Aliki, ko au kua talitonu!” kua lea vēnā atu te tamāloa, ma na tōtuli ifo ai ki lalo i mua o Iehu.
39Na vāgana atu ia Iehu, “Ko au na hau ki te lalolagi ke fakamahino, kae ke pupula ai ia mata o nā tino nae tāuaho, kae tāuaho nā mata o nā tino nae pupula nā mata.”
40Ko iētahi o te kau Falehaio nae i kinā, na kilātou lagona te tala tēnei a Iehu, oi na fehili vē atu ai ki ei, “Ko kimātou foki la e tāuaho?”
41Na tali mai ia Iehu, “Ānei ake koutou e tāuaho, ko koutou e hē nofohala; kae ona ko koutou e lea ko koutou e hē tāuaho, ko tona uiga koi nofohala pea lava la koutou.”
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust