Ioane 2
2
Ko te Fakaipoipoga i Kana
1I te tolu o aho, na fai ai he fakaipoipoga i Kana i Kalilaia. Nae i kinā te mātua o Iehu, 2ma na valakaulia ai foki ia Iehu ma nā hoko o ia. 3Kua uma te uaina, oi na lea atu ai te mātua o Iehu kia te ia, “Kua hēai he lātou uaina.”
4Na tali mai ia Iehu, “Te māfine, ko koe e hē tatau ke lea mai ki nā mea e tatau ke kō faia! Ko toku taimi ko hēki pa mai.”
5Oi na lea ai te mātua o Iehu ki nā kaukauna nae fakahoahoa e kilātou te uaina, kua vē atu, “Ho he mea lava e lea atu ia Iehu ke fai, oi fai.”
6E ono ia hiā tukuvai lalahi na gaohia i te fatu nae fakatutū i kinā, ona ko te tu māhani a Iutaia e uiga ki te fakamamāgia. Ko te hiā tukuvai e fokotahi, e tuha ma te helau lita e tumu ai. 7Ma na lea atu ai ia Iehu ki nā kaukauna, “Fakatūtumu nā hiā iēnei i te vai.” Na fakatūtumu ai e kilātou nā hiā tukuvai, ma na pa lele ake ki nā kaugutu. 8Oi na vāgana atu ai ia Iehu kia te kilātou, “Ahu ake la ni vai oi kave ki te tino e pule i te kaiga.” Kua kave e kilātou nā vai ki te pule o te kaiga, 9ma i te taimi tēnā ko te vai kua liu uaina, ma na tofo ai ki ei te pule o te kaiga. E hēki ia iloa pe na kaumai i fea tēnei uaina (kae e iloa e nā kaukauna na kilātou ahu akea te vai); oi na lea atu ai ki te tama fakaipoipo, 10“Ko nā tino uma lele, e fakahoa muamua lava e kilātou te uaina lelei, ma kāfai te kau valakaulia e kāmata oi konanā, oi fātoā fakahoa ai loa ki ei te uaina kino. Kae kua tāofi e koe te uaina lelei ke fakahoa mulimuli.”
11Ko te fakailoga#2.11 fakailoga He vāvega e fakahino āgai ki he taimi i mua muamua tēnei na fai e Iehu, i Kana i Kalilaia; ko kinā na ia fakaalia ai tona mamalu, ma na talitonu ai kia te ia ona hoko.
12Kua uma te mea tēnei, oi na olo ai ia Iehu ma tona mātua, ona uho, ma ona hoko ki Kapenaumi, ma na nonofo ai i kinā mo ni nāi aho. #Mat 4.13
Kua Fano ia Iehu ki te Mālumalu
(Mat 21.12, 13; Mlk 11.15-17; Luk 19.45-46)
13Kua tāli pa ki te taimi o te Kaiga Fakamanatu o te Pāheka a nā tino Iutaia, oi na fano ai ia Iehu ki Ieluhalema. #Eho 12.1-27 14I loto o te Mālumalu,#2.14 I loto o te Mālumalu i loto o nā lōtoā mo tagata nukukehe na ia maua atu ki ei nā tino nae fakatau a lātou pōvi, nā māmoe, ma nā lupe, ma vēnā foki ma nā tino huitupe, nae nonofo i nā laulau a kilātou. 15Oi na fafau ai e ia he kini i nā meakafa tuaiti, ma na tuli ai e ia nā manu ki fafo o te Mālumalu, nā māmoe ma nā pōvi; kua togi e ia ki lalo nā laulau a nā tino huitupe ma fakatakape a lātou tupe hiliva; 16ma na fakatonu ai e ia nā tino fakatau lupe, kua lea vē atu ki ei, “Kave kehe ki fafo nā mea iēnei! Nahe toe faia e koutou te fale o toku Tamana, ma māketi e fakatau ai nā koloa.” 17Na manatua ai e nā hoko o ia nā tuhituhiga paia e vē mai, “Ko toku naunau ki tō fale te Atua e, e mū i loto o kita e vē he afi.” #Hal 69.9
18Ona ko te mea na fai e Iehu i te Mālumalu, na ōmamai ai kia te ia nā takitaki Iutaia ma he fehili e vē, “Heā he fakailoga e kē faia, ke fakamāonia ai kia te kimātou, kua ia te koe te pule ke fai ai te mea tēnei?”
19Na tali atu ia Iehu, “Talepe ki lalo te Mālumalu tēnei, oi toe fau ai e au i ni aho e tolu.” #Mat 26.61; 27.40; Mlk 14.58; 15.29
20Oi na lea atu ai nā tino Iutaia kia te ia, “E fa hefulu ono ia tauhaga na fau ai te Mālumalu tēnei, kae e kē toe faua i ni aho e tolu?”
21Kae ko te mālumalu na tautala fakatatau ki ei ia Iehu, ko te tino o ia. 22I te toe fakatū maiga la o Iehu mai te oti, oi na manatua ai e nā hoko o ia, ko tēnei te mea na lea ai ia, ma na talitonu ai kilātou ki te tuhituhiga paia, ma ki te mea na lea ai ia Iehu.
E Mālamalama ia Iehu i te Nātula Faka-te-tagata
23Ka koi i Ieluhalema ia Iehu i te taimi o te Kaiga Fakamanatu o te Pāheka, na tokalahi nā tino na talitonu kia te ia, ona na kilātou kitea nā fakailoga na fai e ia. 24Kae na hēki talitonu ia Iehu kia te kilātou, auā nae ia iloa kilātou uma. 25E hēki tau lea ake he tino kia te ia e uiga kia te kilātou, auā kua uma te ia iloa o nā mea nae i o lātou loto.
Právě zvoleno:
Ioane 2: TOKU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Society New Zealand Charitable Trust
