यूहना 2

गलील गै काना गाम में पेलो चमत्कार

1गलील परदेस गै काना गाम में तीसरै दिन किंगैई ब्या हो। यीसू गी मां बी ब्या में आएड़ी ही। 2यीसू अर बिंगा चेला नै बी ब्या में बुलाएड़ा हा। 3जद बठै दाख गो रस मुकग्यो तो, यीसू गी मां यीसू नै केयो, “बांगै कनै अब ओर दाख गो रस कोनी है।”

4यीसू आपगी मां नै केयो, “हे मां, आ बात थे मनै क्यूं केओ? मेरो काम करण गो टेम अजे तांई कोनी आयो।”

5फेर यीसू गी मां ब्या में काम करण आळै नोकरां नै केयो, “झिको कीं बो थानै केवै, बिंयाई करियो।”

6बठै पाणी भरण गै खातर छ माटला रखेड़ा हा। ऐ माटला यहुदी लोगां गै धारमिक रीति रिवाज गै अनुसार हात धोगे सुद्ध करण गै खातर रखेड़ा हा। हरेक माटलै में दो तीन मण पाणी नावड़तो हो।

7यीसू ब्या में काम करण आळै नोकरां नै केयो, “आं माटला में पाणी भर दैयो। नोकरां माटला नै उपर तांई भर दिया।” 8फेर बण बानै केयो, “माटला माऊं थोड़ो काड गे भोजन गै प्रधान नै दिखाओ।” अर बे लेग्या। 9भोजन गै प्रधान जद बो पाणी पीयो तो बिं टेम बो दाख गो रस बणग्यो हो, बिनै ठा कोनी हो कै दाख गो रस कठूं आयो पण झिका नोकरां माटला माऊं पाणी काडयो बानै पतो हो। फेर भोजन गै प्रधान बीन नै बुला'गे केयो, 10“हर कोई पेलां आच्छो दाख गो रस देवै है जद लोग धाप जावै है तो थोड़ो बिंऊं हळको दाख गो रस देवै है पण थे अजे तांई बडिया आळो दाख गो रस मेल राख्यो है।” 11यीसू गलील गै काना गाम में पेलो चमत्कार करयो। ईं चमत्कार गै द्वारा यीसू आपगी मेमा प्रकट करी। अर बिंगा चेला बिं पर बिस्वास करयो।

यीसू मिन्दर में

(मत्ती 21:12,13; मरकुस 11:15-17; लूका 19:45,46)

12इंगै बाद यीसू आपगी मां, भाईयां अर चेलां गै सागै कफरनहूम गाम उड़ग्यो अर बठै केई दिन रेयो। 13यहुदियां गै फसह गो त्यूंहार नेडै़ हो ईंखातर यीसू यरुसलेम उड़ग्यो। 14बठै मिन्दर गै आंगणै में देख्यो कै लोग बळद, भेड़ अर कबूतर बेचण लागरया है अर मिन्दर में चढाण खातर विदेसी रिपिया नै बदळगे देसी रिपिया देण आळा नै बेठया होयां देख्या। 15ईंखातर बण जेवड़िया गो कोड़ो बणागे सारां लोगां अर बांगी भेड़ अर बळदां नै मिन्दर ऊं बारै काढ दिया अर मिन्दर में चढाण खातर विदेसी रिपिया नै बदळगे देसी रिपिया देण आळा गा रिपिया खिंडा दिया अर बांगा पिडा मूंदा मार दिया। 16अर कबूतर बेचण आळा नै केयो, “आनै अठुं बारै ले जाओ,” मेरै पिता गै घर नै खरीदण अर बेचण आळा गो घर ना बणाओ। 17जद बिंगा चेला नै परमेसर गी लिखेड़ी बाता याद आई कै परमेसर थारै मिन्दर गै बारै में मेरी भगती मेरै मा आग गी तरियां बळती रेवै है।

18फेर यहुदी अधिकारियां यीसू नै पूछयो कै तूं म्हानै के चमत्कार दिखावैगो झिकै ऊं ओ साबित हो'ज्यै कै ओ सगळो कीं करण गो अधिकार तेरै कनै है।

19यीसू बानै जबाब दियो, “ईं मिन्दर नै ढा दैयो अर मैं इनै तीन दिनां में बणा देऊंगा।”

20यहुदियां गै अधिकारियां केयो ईं मिन्दर नै बणाण खातर छीयाळीस साल लागग्या हा तूं इनै तीन दिनां में किंया बणा देवैगो। 21पण बण खुद गै सरीर गै बारै में केयो हो। 22अर जद बो मरेड़ा माऊं जी उठयो तो बिंगै चेला नै याद आयो कै आ बात बण कैई ही अर जद बानै पवितर सासतर अर यीसू गी केयेड़ी बाता पर बांगो बिस्वास मजबूत हो'ग्यो।

23जद बो यरुसलेम में फसह गै त्यूंहार में हो, तो भोत सारा चमत्कार झिका बण करया। बानै देखगे भोत सारा लोगां बिं पर बिस्वास करयो। 24पण यीसू बां पर भरोसो कोनी करयो क्यूंकै बो सारा नै जाणै हो। 25अर बिनै जरूरत कोनी ही कै कोई आदमी गै बारै में गवाई देवै क्यूंकै बो खुद जाणै हो कै आदमी गै मन में के है।

Právě zvoleno:

यूहना 2: BGQ

Zvýraznění

Kopírovat

Porovnat

Sdílet