Lomu 8
8
Ulenu Laixe ulosinge mauli
1Ioxe, laso tamitema ta'ei ixolu noxou Kalaisiti Iesua la ixolu no laxu la'ia noxou Mosinge uasi. 2Xo aloxo 'o. Tei la xavi so susu mo soli mukasinge. Ia nenge ta'ei taxolu noxou Kalaisiti Iesua la Ulenu Laixe mulosinge mauli mo mu'umenenge no anu tu'umaxu e mukasinge ne. 3Xo lo noxou Mosinge umomomo so ukalusou xavi no anu susu uasi. Xo susu tava'u no vasimenge xavinu musuku. Ia Mosinge mupalusou Olu mune'e mo muxali vasimolu loxo nenge tamitema so susu 'o. Laso noxou Iesua la Mosinge muxalixu vote'i so ukalusou xavi no anu susu tava'u no anu tamitema vasime'a. 4Mosinge mu'oxo axone so nenge vote'i so tamulinu lo malemalenga no anu xoluxolu noxinge. Xo susu tava'u upamuxanenge loxo teila uasi. Vaimomo 'o Ulenu Laixe upamupamuxanenge.
5-6Xo aloxo 'o. Ane'i ane Ulenu Laixe upamuxane'i la opone'i utulu no anu masaxa noxou Ulenu Laixe. Mo loxo axone la telexu no anu mauli lalavulusi. Ia ane'i ane susu tava'u upamuxane'i la opone'i ututulu no anu masaxa so sususi. Mo loxo axone la telexu no anu solisi. 7Tamitema ane opone'i utulu no anu sususi, la ixililiou Mosinge. Xo ane'i vote'i so imulinu lo noxou uasi manina. 8Ane'i anene susu tava'u no vasime'a upamuxane'isi, laso umomomo so Mosinge u'osasi'a uasi.
9Ia ngingi ane Ulenu Mosinge uxoxolu noxinge, la susu tava'u upamuxangengi uasi. Ulenu Laixesi upamuxangengi. Xo itema ane Ulenu Kalaisiti uxolu noxou uasi la anu itemaou Kalaisiti uasi ane. 10Xo susu tava'u muxalixu soli no vasimenge mukalu. Ia loxo Kalaisiti a uxolu noxinge la ngexali ngamalemalenga mukalu mo ulengengi a uxolu umauli. 11Laso aloxo 'o. Vasimenge ne anu usoli ane. Ia loxo Mosinge mupamaulinu Iesua Kalaisiti no anu soli la axone kalumo Ulenu Mosinge upamaulinu vasimenge ili'i. Anu u'oxo axone xo anu a uxolu noxinge.
12Laso tavivilo, mamu so oponenge ututulu so talomuxu susu tava'u no vasimenge. 13Xo tamitema ane tava'u susu no vasime'a upamuxane'i la ixalisou solisi. Ia ngingi ane Ulenu Laixe uxolu noxinge la anu usu'ulingengi so ngatalotalosou susu no vasimenge. Ngingi anene la ngaxolu ngamauli. 14Xo tamitema ta'ei ane Ulenu Mosinge upamuxane'i la ane'i Mosinge ta'olu ane. 15Xo Mosinge ulosinge Ulenu so ukalavusunenge no anu umela uasi. Anu mulosinge Ulenu so muxalinenge ta'olu. Mo anu usu'ulinenge so takatu noxou Mosinge lexe, “Papao”. 16Anu Ulenu Laixe molu upala'anixu no anu ulenenge lexe nenge Mosinge ta'olu. 17Ioxe vaimomo 'o nenge taxolu Mosinge ta'olu. Laso ili'i la nenge taxalisou mimi lailaixe. Xo mi ma'ia so anu ulosou Kalaisiti la anu ulosinge kalumo. Vaimomo 'o nenge tatavulenu tu'umaxu a loxo anu a utavulenu. Ia ili'i la nenge noxou taxolu no anu xoluxolu iaxusi.
Xoluxolu noxinge laixe ili'i
18Ioxe, eni avikala lamana aloxo 'o. Tu'umaxu ane tatavulenu vaimomo 'o, taxavutalanu uasi. Xo xoluxolu iaxu ane taxalisou ili'i ne uua'ulixu ane so vaimomo 'o avile. 19Mo aloxo 'o. Mimi ane Mosinge mukokoinu ne loxo uxoxomaiou mo utatamasou voxo anene kalumo. Uxoxomaiou voxo ane Mosinge musosovosou so xoluxolu laixe noxi'a ta'olu upala'a. 20Xo vaimomo 'o mimi ane Mosinge mukokoinu ne a uxolu vuluvulusi. Anu anene muxali no anu masaxa noxou Mosinge. Anu molu muxiunu mimi mukoinu axone, ia umasaxau lexe uxolu axone avile uasi. 21Xo vaimomo anu mimi anu loxo uxolu ukalavusu xo u'uiui mo uxaloxalosi. Ia ili'i la Mosinge ta'olu ixalisou xoluxolu lalavulusi. Mo axone, la mimi ane Mosinge mukokoinu ne uxalisou xoluxolu laixe kalumo. 22Xo manina, mimi ne loxo uxamulinu navunavu mo uiele. Uiele loxo sema iiele no voxo so ivo'onu ili'e. Mi ne musoko'u tei manina mo muxali avile vaimomo 'o. 23La mimi anenesi utavulenu navunavu uasi. Nenge kalumo taiele no oponenge xo taxomaiou mo talopalanu voxo ane Mosinge upala'anixu xoluxolu laixe noxinge ta'olu. Xe no voxo anene la Mosinge uxiunu vasimenge ta'olu uxali alavua mukalusi. Nenge talavu lexe mi ne uxali xo pa'usou tei no anu a muxali mukalu, ane Ulenu Laixe. 24Xo anu mupamaulinenge mukalu laso nenge taxomaiou mimi ane uxali ili'i. Nenge taxomaiou mi ane tesaxisou no ienge mukalu uasi. Anu laixe, xo loxo mi ane tasaxisou no ienge la taxomaiou axova? Xo muxali mukalu to. 25Ia nenge talavu lexe mimi ane taxalisou uao ne, la nenge taxalisou ane. Talavu axone mo ta'osasou laso taxolu se'isisi so taxomaiousi.
26Mo aloxo 'o. Nenge taxolu taxomaiou la nenge xavinenge uasi. Mo nenge talavu lexe tavikala noxou Mosinge axova uasi. Ia Ulenu molu usu'ulinenge xo mi ma'ia nenge tamomomo so talemolu laixe uasi, la anu molu ulemolu noxou Mosinge. Xo vaikala ulemolu ne, nenge tamitema talavusou uasi. 27Loxo Ulenu usu'ulinenge so ulemolu oponenge noxou Mosinge la anu upalasi noxousi. Xo anu ulavusou oponenge mo anu uvikala avile noxou Ulenu. Anu Ulenu ne umulinu masaxa noxou Mosinge so uvulanu vaikalamenge tamitemaou Mosinge u'isalili axone.
Mosinge usexelanenge misevile
28Ioxe, Mosinge molu mu'avalinge so taxali ta'olu no anu masaxa noxousi laso nenge tasexelaxu. La talavu aloxo 'o. Mi ma'ia uxalisinge la Mosinge uxalixu nene'axu laixe no anu xoluxolu noxinge. 29Xo Mosinge mulavusinge tateimo. Mulavusinge laso musosovosinge so uxiuxiunenge so taxali loxo Olu. Mo so axone la Laposalanenge e Kalaisiti u'uli laxunenge nenge Mosinge ta'olu tapiena. 30Xe nenge ane musosovosinge tatei ne mu'avalinge kalumo. Mu'avalinge mo mumoxo'inge lexe nenge tamalemalenga no iou. Mumoxo'inge axone laso ili'i la nenge talailai noxou mo xoluxolu noxinge iaxusi no tualasou.
31Laso nenge tavikalasou iaiama noxou Mosinge axova? Loxo anu uiaiamanenge mo uutulunenge a loxo telemolu ne, la ei uua'ulinenge? 32Xo Mosinge u'apisou Olu soxu vilesisi ne uasi, anu mupilixinu so usolisinge nenge mukalusi. Loxo u'apisou Olu axone uasi, la ngaxavutala axova? Umomomo so u'apisou mi se'i lailaixe so xoluxolu noxinge? E uasi manina, anu ulosingesi ane. 33Anu Mosinge molu musosovosinge lexe nenge tanoxou. Laso ena'ei utulusinge no anu vaikala? E uasi, xo Mosinge molu mumoxo'inge lexe nenge tamalemalenga ane. 34Laso ena'ei uto'omenge lexe tina'unenge so susu uxolusio? Uasi manina. Xo Kalaisiti Iesua musoli mo mutulu ne. Mo vaimomo 'o a utalupexa no anu Mosinge avolu tema so uvalanenge noxou lexe mukolinu tina'u so susu noxinge mukalu.
35Ai manina misevile, ena'ei umomomo so ukalipalanenge no anu sexela noxou Kalaisiti? Loxo tu'umaxu uxali noxinge o tatavulenu navunavu o tamitema ixililiienge o tasolinenge o lavuluti uasi o mi vile so uvila'isinge o oto uxali noxinge. Mimi anene umomomo so u'apixu sexela noxou Kalaisiti noxinge uasi. 36Loxo Mosinge Vaikala ulemolu, tu'utu'umaxu masi uxalisinge. Anu uvikala aloxo 'o, “Nexi taxolu tamitemameni laso voxovoxo utotomu tamitema imolo soli noxixe. Nexi loxo tasipisipi ane tamitema so ive'ave'a isoli.” 37Ia mi vile uasi. Xo Kalaisiti ne anu tanunenge laso mi ma'ia uxali noxinge ne anu usu'ulinenge so taua'ulixusi. 38-39Xo eni emaisou mo alavu manina lexe Mosinge usexelanenge misevile. Laso mi vile umomomo so utanuxu mi ne uasisi manina. Mi loxo soli o mauli o ta'angelo talaixe o tamasua o mi ane uxolu vaimomo 'o o mi so uxali ili'i o tami se'i loxo xavine'i o mi ane teitexi o mi ane no lia o mi ane no pa'upa'umenge 'o, mimi anene umomomo so ukalipalanenge no anu sexela noxou Mosinge uasi. Sexela noxou ne, tava'u ane Kalaisiti Iesua anu Tatananenge.
Právě zvoleno:
Lomu 8: ATA
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright 1999 New Tribes Mission, Sanford, FL 32771-1487