Lomu 16
16
Polu muvikala aso laixe noxi'a talopala
1Tavivilo. Eni avikalangengisie vivinge Vipi. Sema ne utotomu ixaxai so isu'uline'i tatemanu pita noxou Tatananenge ne Senikilia. 2Laso loxo ilai ixali noxinge ne Lomu la ngamaxa'u sexela noxie no anu ilixo noxinge tamitemaou Mosinge mu'isalili. Ane vivinge xo ngingi ngoli'a noxou Tatananengesi laso nga'unane noxinge. Xe loxo tu'umaxu vile noxie la ngasu'uline, xo ane misu'uline'i tamitema tavu'alo. Mo misu'ulileli kalumo.
3Mo ngingi ngalemolu aso laixe noxilo noxi'a Pilisila ilou Akuila. Ane'i tamenexilo no anu xaixai noxou Kalaisiti Iesua. 4Ilou misu'ulileli laixe. Misu'ulileli xe loxo tamitema i'oxo lexe ive'axu su'uli ne, la ilou i'ume uasi. Eni avikala laixe noxi'a ia eni enisisi uasi. Ane'i tatemanu pita no tuatuala noale'ale opone'i axone kalumo. Ane'i latala ivikala laixe noxi'a ilou kalumo. 5Xe ngalemolu aso noxilo noxi'a tatemanu pita e ipita no tasi'a ilou.
Mo aso noxilo ulai noxou vivilo e asexelaxu manina e Epainetusi. Anu tei manina noxi'a ane'i ane milopala noxou Kalaisiti ne Esia polovinisi. 6Mo ngalemolu aso noxilo noxie Malia. Xo ane mixaxai tatila so misu'ulingengi. 7Mo aso ulai noxi'a tatulaleli tamei e Anitolonikusi ilou Tiuniasi. Ane'i e noxi'a tekalavusu. Ta'aposeli ivikalasi'a ilou ne laixe. Ane'i ilou milopala noxou Kalaisiti tei noxilo. 8Mo aso noxilo noxou Amipiliatusi. Nexi noxou oponexi vilesisi noxou Tatananenge laso talelixu misevile. 9Mo ngalemolu aso noxilo ulai noxou Ulivanusi, anu menexinge no anu xaixai noxou Kalaisiti. Mo aso noxilo noxou Sitakisi kalumo, anu asexelaxu manina. 10Mo aso noxilo ulai noxou Apelesi. Xo tamitema ilemolu lexe anu itema so umulinu Kalaisitisi. Mo aso noxi'a ane'i ane ixoxolu no tasou Alisitovulusi. 11Xe noxou tulaleli e Elotioni mo noxi'a ane'i ane ixoxolu no tasou Nasisusi. Ane'i tamitemaou Tatananenge kalumo. 12Mo aso noxilo noxi'a Tilivina olie Tilivosa, ane'i tasema so xaixai noxou Tatananenge. Xe noxie Pelisisi ane talelixe misevile. Ane xavineou xaixai noxou Tatananenge kalumo. 13Mo aso kalumo ulai noxou Luvusi. Anu itema laixe so umulinu Tatananenge. Mo noxie nenu, xo ane loxo nenilo kalumo. 14Mo aso noxilo ulai noxi'a tamitema ano'o. Asinikilitusi xe Velekoni xe Elemasi xe Patolovasi xe Elemesi oli'a tavivinge ane oli'a ixoxolu ne. 15Xe noxi'a tamitema ano'o kalumo. Vilolokusi olie Tiulia. Xe Neleusi olie vimou xe Olimipasi oli'a tamitemaou Mosinge u'isalili e oli'a ixoxolu ne. 16Ngingi mukalusi ne ngasexelangenge ngato'o. Mo ngalavu laixe lexe pitipita noxou Kalaisiti lai 'o ikalanu aso a ulai noxinge ne.
Kaluxusou pelototo noxou Polu si'a Talomu
17Ioxe tavivilo eni apelototosinge aloxo 'o. Ngingi masi ngalaxa'i laixe noxi'a tamitema se'i no taingengi. Xo ane'i masi ixalixu vaikala ane uxililiou votovoto loxo ngelomusou. I'oxo axone la masi tu'umaxu uxali la pita noxinge umamulo. Laso ngamaloxo'u vaikalai'asi. 18Xo ane'i anene tamitema so xaixai noxou Tatananenge Kalaisiti uasi. Ane'i imulinu masamasaxa no anu vasime'asi. Mo ane'i ilavusou ivikala laixe mo ixilisine'i ane'i ane itilovo laixe uasi. 19Apelototosinge axone xo alavu lexe opongengi ututuluou vaikalaou Mosingesi. Mo vaikalasinge muiaveiave no tuatuala. Laso eni a'osa no anu xoluxolu noxinge anene. Ia amasaxa lexe ngalavu lamana no anu mi ma'ia laixe. Ia no anu mi ma'ia masua la uxolu no xavutalamengi uasi. 20Xo anu voxo alaimanasi so Mosinge ukalusou xavinu Uluaou. Ukalasou mo anu Uluaou uxolu no langenge ane. Laixe, xo Mosinge u'oxonu xoluxolu noxinge lalavulusi mo iaiama noxou Tatananenge Iesua uxoxolu noxinge.
21Ioxe, menexilo no anu xaixai e Timoti mukalanu aso laixe noxinge. Xe tatulaleli e Lusiusi mo Iesoni mo Sosipateli mivikala axone kalumo. 22Xe eni Tetiusi a. Polu mulemolu vaikala ma'ia la ekaukavunu 'o. Eni kalumo avikala aso noxinge xo nenge vilesisi noxou Tatananenge. 23Xe Xaiusi mulemolu aso noxinge. Eni Polu a axoxolu no tasou xe Mosinge ta'olu ipitapita ne kalumo. Xe Elasitusi e itema so usaxila'u lamoli noxou xamani no tuala ano'o ulemolu aso noxinge. Xe vimou Kualitusi kalumo. 24Iaiama noxou Tatananenge Iesua Kalaisiti a uxolu noxinge mukalusi. Vaikala ano'o manina.#16.24 Tamitema so lavulavu se'i ixavutala lexe Polu molu ukaukavunu vaikala ane uxolu no anu 16:24 uasi, itema vilemo masi mukaukavunu.
Nenge ta'itinu Mosinge ualasousi
25Ioxe, Mosinge umomomo so u'oxongengi so ngatulu pakia'inge. Ngatulu pakia'inge mo so ngalopala no anu vaikala laixe so Iesua Kalaisiti ane evotovotosou noxinge. Xo tateimo la vaikala ne mutalume ia vaimomo 'o mupala'a avile. 26Mupala'a avile xo vaikalai'a tapolopeti no anu Mosinge vaikalaou muxali lamana noxi'a tamitema no xale tuatuala. Mi ne muxali loxo Mosinge Kaluxu Uasi mulemolu. Xo tamitema mixali lamana laso milopala mo mi'oxonu ilixo ane anu u'osasou. 27Ai manina misevile. Mosinge anu anusisi lavulavuou. Laso nenge masi taxavutalanu mimi ane mupala'anixu no avolu Iesua Kalaisiti. Taxavutalanu mo ta'itinu ualasou ulai ulai utalo uasi. Anu anesi.
Právě zvoleno:
Lomu 16: ATA
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright 1999 New Tribes Mission, Sanford, FL 32771-1487