Lomu 10
10
Ta'isilaeli ilavusou ilixo noxou Mosinge uasi
1Ai tavivilo, eni opoleli ututului'a Ta'isilaeli lexe ixalisou pamauli. La utotomu apilixine'i noxou Mosinge no anu mi nesi. 2Eni alavusi'a mo avikala lamana lexe ane'i xavine'i so imulinu masaxa noxou Mosinge. Xavine'i, ia imomomo uasi xo ilamana no anu oponu uasi. 3Ane'i ilamana avile no anu ilixo malemalenga noxou Mosinge uasi. Mo ilamana no anu vote'i so ixali tamalemalenga no iou uasi laso ane'i me'a itovonu no anu xavi noxi'asi. Me'a itovonu no anu xavi noxi'asi, laso maixene ipilixine'i noxou Mosingesi so uxalixi'a tamalemalenga uasi. 4Nenge talavu mukalu lexe Kalaisiti ne anu ngiou no anu lo xo anu mumomoxu. Laso ta'ei ilopala noxou la ane'i tamalemalenga no iou Mosinge.
5Ia ane'i se'i sasaie'i so imulinu lo. Xo Mosisi mukaukavunu vaikala lexe, “Loxo tamitema imulinu lo mukalusi la imauli.” 6-7Ane'i Ta'isilaeli sasaie'i mo ipune'isi axone. Laso tamitema ane'i ane milopala noxou Iesua mo mixali tamalemalenga la ivikala aloxo 'o, “Opongengi utuluou lo axone la ngapungengi ane. Xo ngamomomo so ngatelai no tualasou Mosinge mo ngalu'enu Kalaisiti? O ngamomomo so ngalu'elai no tanixu soli so ngatelonu Kalaisiti? E uasi, ngapungengisi. Mo axone kalumo ngapungengi so ngatovonu ngamulinu lo so ngaxali tamalemalenga no iou Mosinge.” 8Ane'i sasaie'i sasaie'i ia loxo Mosinge vaikalaou mulemolu lexe, “Vaikala lamana so mi ne uxolu alai noxinge. Ngingi ngelomusou mukalu mo ngingi menge ngalemolu.” Vaikala ne ma'ia? Vaikala e so lopala ane nexi tavotovotosou. 9Vaikala aloxo 'o. Loxo itema vile uvikala lamana lexe Iesua anu Tatananenge mo ulopala no oponu lexe Mosinge mutulusou no anu soli, la itema ne uxalisou pamauli ane. 10Xo loxo itema vile ulopalanu Mosinge vaikalaou la anu uvikala lexe, “Ai, vaikala ano'o maninasi.” Loxo u'oxo axone la Mosinge ulemolu lexe anu malemalenga. Xe loxo u'oxo lexe, “Anu ane, eni alopala noxou Iesuasi.” La Mosinge upamaulinu itema anene. 11Xo no anu lavukuou Mosinge vaikala vile mulemolu mi ne aloxo 'o, “Ane'i ane ilopala noxou la itavulenu mailasou uasi.”
12Ioxe, noxinge Taiuta xe Takiliki ne ienge vilesisi. Tatananenge tamitema mukalusi ne vilesisi. Xe loxo nenge talinga noxou la mimi so usu'ulinenge no anu mulolutu e mulolutu. 13Xo loxo mulemolu, “Tamitema ta'ei ikatu noxou Tatananenge so usu'uline'i, la ixalisou pamauli.” 14Ia ane'i ikatu noxou axova loxo ilopalanu uasi? Xe vote'i axova so ilopalanu loxo ilomusou a'alosou uasi? Xe vote'i axova so ilomusou a'alosou loxo evile ulai so uvotone'i uasi? 15Ia laixe, xo Mosinge upalupalusi'a se'i so ivotovoto. Loxo ulemolu no anu vaikalaou, “Tamitema i'osasi'a ane'i ane ine'enu Vaikala e so mimi lailaixe.”
Ta'isilaeli ne opone'i pakia'usi
16Anu manina, ia tavu'alo noxi'a Ta'isilaeli ilomuxu Vaikala laixe ne uasi. Xo loxo Aisaia mulemolu tatei, “Tatananexi, nexi talanu Vaikalameni lailaixe 'o ia ane'i ilomuxu to uasi!” 17Xe nenge talavu lexe vote'i so lopala ne no anu lolomusi. Ia talomusou ma'ia? Talomusou Kalaisiti vaikalaousi. 18Mo nenge talavu lexe Ta'isilaeli milomusou Vaikala ne mukalu, utalume noxi'a uasi. Xo loxo Mosinge mulemolu no vaikalaou, “Xoline'i tamitemaxeli mulailai no xale tuatuala mukalusi. Mo vaikalai'a muxali no anu teletelexu mukalu.”
19Ia axova? Vaikala ne muxali noxi'a ia upalasi uasi? Uasi, ane'i milavu mukalu xo vaikalaou Mosinge Mosisi mulemolu tatei aloxo 'o, “Eni ano'u laili vile ane ualasi'a tatila uasi mo ane'i tami vitanisi. Ano'a mo a'oxone'i laixe mo so ngingi ngaisuxa'a mo la'iangengi'a.” 20Mo Aisaia muvikala lamana aloxo 'o, “Tamitema ane ikakamulileli uasi a mixalisilo mukalu. Eni apala'a noxi'a ane'i ane imasaxa'ilo uasi.” 21Ia muvikalasi'a Ta'isilaeli aloxo 'o, “Voxovoxo utotomu eni alongenge no avolo so apamaulingengi ngingi tamitema so nga'oxo pai.”
Právě zvoleno:
Lomu 10: ATA
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright 1999 New Tribes Mission, Sanford, FL 32771-1487