Lomu 1
1
Polu muvikala aso noxi'a Talomu
1Eni Polu a. Eni amitema so xaixai noxou Kalaisiti Iesua. Anu molu mutulusilo so axali aposeliou mo musosovosilo so alanu vaikala laixe noxou Mosinge. 2Vaikala ne tatei Mosinge muvavalimasou no anu anaxa'a tapolopetiou. Vavalima ne mikaukavunu mo a uxoxolu no anu vaikalaou malemalenga. 3Vaikala laixe ne, so upala'anixu Olu. Anu Olu ne, anu itema manina xo anu ilusunu Teviti. 4Mo anu Mosinge Olu manina kalumo xo Ulenu Laixe mupela'ingexu no anu xavi noxou. Mupela'ingexu no anu vote'i e so mutulusou mu'umenu Iesua Kalaisiti anu Tatananenge no anu soli. 5Laso tava'u so Mosinge mutulusixe ta'aposeliou ne, a no anu iaiama noxou Olusi. Mutulusixe so tapitane'i tamitema noale'ale no anu ualasou Iesua, mo so ilopala noxou mo imulinu vaikalaou. 6Mo ngingi ne, ngingi pa'usou noxi'a ane'i ane tepitane'i lexe tamitemaou Iesua Kalaisiti. 7Laso lapasi ano'o ulai noxinge ngingi Talomu ane Mosinge musexelangenge mo mukalipalangengi lexe noxou mu'isalili. Masaxa noxilo lexe ngingi ngaxamulinu iaiama mo mamatola noxou Mosinge anu Maminge xe Tatananenge Iesua Kalaisiti.
Polu oponu mutulu lexe umaisi'a Talomu
8Ioxe, tei la avikalangengi aloxo 'o. A'alo so lopala noxinge a muxali no xale xale tuatuala mukalusi. A'alo anene muxali noxilo laso a'itinu Mosinge no anu ualasou Iesua Kalaisiti. 9Eni asexelaxu Mosinge misevile mo xavileliou xaixai mulosilo. Xaixai anene so alanu vaikala laixe so Olu. Anu ulavusou opoleli lexe ututulu noxingesi. 10Opoleli ututulu noxinge so apilixingengi noxou. Mo alavusou avikala noxou aloxo 'o, “Mosilo, alaxu tavu'alo e'oxo lexe alai noxi'a Talomu, ia mimi se'i mutanuxo. Ia loxo nini nemasaxa la na'oxonu vote'isilo so alai noxi'a.”
11Avikala noxou Mosinge axone xo amasaxa manina lexe amaisinge. Xo iaiama ane Ulenu Laixe mu'oxonu noxilo la amasaxau lexe avulunu noxingela. Mo so axone la ngingi pakia'inge. 12Ia mi ne, enisisi uasi. Nenge nenge'a ta'oxonu pakia'inge no anu lopala noxinge ngato'o. 13Xo tavivilo, eni amasaxau ngalavu laixe lexe alaxu tavu'alo atovonu so ane'e noxinge. Ia mimi mutanutanuxo to'. Atovo ane'e noxinge so lexe xaixai noxilo uxalixu nene'axu no taingengi. Xo no anu tuatuala elai no anu la nene'axu muxali axone noxi'a tamitema noale'ale. 14Mosinge musosovosilo so alanu vaikalaou, laso mamu so a'apisou noxi'a tamitema se'i. Mamu so a'apisou noxi'a Takiliki o noxi'a ane'i Takiliki uasi. Xe noxi'a tamitema so lavulavu o tamitema so lavulavu uasi. 15Laso maixene opoleli uauavutinge so aa'aloxu vaikala laixe noxinge Talomu kalumo.
Vaikala laixe ne xavinu
16Eni amama'u so alanu vaikala laixe ne uasi. Xo anene vote'i so xavi noxou Mosinge so upamauline'i tamitema ane'i ane ilopalanu. Anene vote'i so Taiuta xe tamitema noale'ale kalumo ixalisou pamaulisi. 17Xo no anu vaikala laixesi Mosinge upela'ingexu vote'i so anu umoxo'inge lexe nenge tamalemalenga. Vote'i ne so talopala mo ta'italonengesi. Anu ane, vote'i anenesi. Xo no anu vaikalaou Mosinge uvikala lexe, “Loxo tamitema ipilixine'i mo ilopala no anu vaikalaou, la Mosinge umoxo'a lexe ixoxolu tamalemalenga avile.”
Tamitema latala mixiunu tumali'aou Mosinge
18Ia nenge talavu lexe Mosinge uxolu no tualasou laixe mo oponu sixulaou susu mo ilixo masua noxi'a tamitema. Mo anu la'ia noxou ne, anu uxalisi'a, xo ane'i itanuxu vaikala manina noxou no anu ilixo masua ne. 19Xo ilixo noxou Mosinge a uxoxolu no ie'isi xo anu molu mupala'anixu noxi'a. 20Ilixo noxou mupala'a, musoko'u no anu mi ne mukoinu mimi mukalusi mo muxali vaimomo 'o. Mo aloxo ne, la anu mupala'anixu xavi kaluxu uasi noxou xe ili'ilixo noxou u'isalili. Laso tamitema saexa'a uxolasi xo mimi ane muxalixu a uxolu no ie'isi.
21Mo aloxo 'o. Ane'i ilavusou Mosinge ia i'itinu ualasou uasi mo ivikala laixe noxou uasi. Laso xavutala noxi'a muxovulaulausi mo opone'i isivoxosi. 22Ane'i i'itine'i lexe lavulavu noxi'a tatila. Ia uasi, ane'i kisi'a mutomusi. 23Anu Mosinge ne ilixo noxou iaxusi mo kaluxu uasi ia tamitema itoxu uasi. Ane'i i'oxonu lakolisou Mosinge maninasou la ipuinu mi loxo itema vitanisi o ngiala o misoposi o sineke so i'itinu. 24I'oxo axone, laso Mosinge upilixine'i so imulinu masaxa masumasua noxi'asi. Mo utotomu ane'i ipita so i'oxonu susu no anu vasime'a ngato'o. 25La vaikala manina noxou Mosinge ne ane'i ilomuxu uasi, ikolinu no anu kalakalavoisi. Ane'i i'itinu mimi se'i so mosi'a, ia Mosou mimi ne ane'i ixiunu tumali'a noxou. Ai manina misevile, loxo nenge ta'oxo laixe, la ta'itinu ualasousi. Ta'itinu ulai ulai utalo uasi.
26Ioxe, ane'i mixiunu tumali'a noxou axone, la anu upilixine'i no anu masamasaxa ukilikalu noxi'a. Ane'i tasema kalumo imulinu ilixo laixe so taula'i uasi, imulinu ili'ilixo iou vilemo. 27Xe tamulu kalumo i'italonu ilixo laixe so itaula'ixa'a tasema. La navu u'ani no tane'i so imasaxai'a ngato'o. Ane'i tamulu ne i'oxonu ilixo ukilikalu noxi'a ngato'o. Laso maixene ixalisou lakolisou ilixo ne tu'umaxu.
28Mo aloxo 'o. Ane'i itaxanu lavulavui'a so Mosinge uasi, laso anu u'italone'i so imulinu xavutala masua noxi'a nesi. Mo i'oxonu ili'ilixo ane ulovo uasi manina. 29Ili'ilixo masua iouiou ne aloxo 'o. Ane'i iisuisu xe ive'ave'a tamitema isoisoli xe i'oto'oto xe ixalixu tu'utu'umaxu xe ikalavoi xe ito'oto'ome'a no anu vaikala xe imunumunxa'a ngato'o. 30Ane'i ilavusou ikalavoisi'a tamenexi'a xe imatapianu Mosinge xe itaxane'i tatiatilasi'a uasi xe itoxa'asi xe ixalixu ili'ilixo alavua masumasua xe utotomu ilomuxa'a tamami'a oli'a taneni'a uasi. 31Mo ane'i ixolaxola mo loxo ilemolu mi vile la imulinu uasi. Ane'i isexelaxa'a ngato'o uasi xe mi ma'ia imasaxau la ino'usi. Tane'ixa'a tamenexi'a uasi. 32Xe ane'i ilavusou lo malemalenga noxou Mosinge lexe lakolisou ilixo anene solisi. Ilavusou ia ane'i opone'i ututuluou mi aloxo nesi. Opone'i ututuluou, xe kalumo la i'itinu ualasi'a ta'ei loxo imulinu ili'ilixo anene.
Právě zvoleno:
Lomu 1: ATA
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright 1999 New Tribes Mission, Sanford, FL 32771-1487