ल़ेह-पेन 27
27
रोम क्याहसाला डोज्येला लाहम स्य़ूहक्यो
1ङ्यिह इटालिया क्याहल-खापला डोज्येला ताम डी़ फान्ज्यो, खुङया़गी पावल दाङ लेहमेन चोन-खाङला लू़क्योगी मिहया़ ङ्याम्बु गो-छ्येवा माक्मीकी माक्पेन युलियसकी लाहक्पाला चि क्याहप्सीन। 2एड्रामिटेनोस क्याहसाले एशियागी छ्यु-टुहया़ तेहकें ग्या़गी लाहमया़ले पेहती छ्यु-टुह च्यी़ला जा़दी ङ्यिह काहल्सीन। माकेडोनिया लुहङबागी थेसलोनिके क्याहसाले ओहङग्योगी अरिस्तार्खस माएँ मिह च्यी़ ङ्यिह ङ्याम्बुराङ येहकें।
3ओहले नाहङबार च्युङ ङ्यिह सीदोन क्याहसाला लेप्सीन। ओ़ह ग्या़ला माक्पेन युलियसगी पावलला निङज्यी पेहती राहङगी रो़हया़साला काहल्दी थू़ज्ये दाङ रो़हराम पेहॱलाङ माज्येला लोहङ तेर्सीन। 4ओहले ङ्यिहगी छ्यु-टुह सीदोनलेगी लाहम स्य़ूहदी डोएँमु ल्हा़बा दिन ङो़ले स्युककी ओहङग्यो सोङगोराङ ङ्यिह थेका सिरे डो मा़हखु। ओहले ङ्यिह साइप्रस छोलिङ पोहले ल्हा़बाला क्यो़दी काहल्सीन। 5ओहले किलिकिया दाङ पाम्फिलिया लुहङबागी छो-क्याहम्जो च्येती ङ्यिह लुकिया लुहङबाला येहकेन्गी माइरा क्याहसाला लेप्सीन। 6ओ़हला अलेक्जेन्ड्रिया क्याहसालेगी ओहङग्योगी इटालिया क्याहल-खापला डोएँगी छ्यु-टुह च्य़ेह सिहन्सीन। ओहले माक्पेन युलियसगी ङ्यिहला ओ़ह छ्यु-टुहलाॱराङ जा़ च्य़ूसीन।
7ओहलेगी थेन्दी डोएँमु ल्हा़बा लुङजीगी पेहती लाहम स्य़ूहज्ये खेन्दा-का़हबु काहल्सीन, ओहले ङ्यिहमा माहङबुराङ यिहन थो़दी क्नीडस क्याहसाकी सुहरला लेप्सीन। ओहलेगी ल्हा़बागी ङ्यिहला स्यार्क्याङ तोहङले डोएँगी लाहम स्य़ूह मा़हच्यु। ओ़ह सोङगोराङ ङ्यिह क्रेट छोलिङ ङो़ले क्यो़दी सालमोने माएँ ग्या़लेगी काहल्सीन। 8ओहले ङ्यिह ज्यिबुराङ का़हबु पेहती छोलिङगी सुहरता सुहर पेहती लासीया क्याहसागी पोहलाराङ येहकेन्गी “या़हबु माएँ छ्यु-टुह तेहकें ग्या़” च्यी़ला लेप्सीन।
9ओ़हला लेप्च्येला ज्यिबुराङ यिहन थो़ सिहन्ग्यो येहकें। ओहले ङ्युङने तेहकेन्गी छ्येपा सिहङदाॱआङ सिहन-सिहन्ग्यो येहकें ओहले ख्या़बु दावाला ओहङगेन्गी ल्हा़बा लुङजीगी पेहती छ्यु-टुह लाहम स्य़ूहज्येला ज्यिक्पा ओहङसीन। ओ़ह सोङबे पावलगी राहङला कू़हदी तेहक्योगी मिहया़ला दि ल़ेहमु पेहती प्रा साल्सीन।#प्रस ३०:१०; लेवी २३:२७; गन्ती २९:७-११; हिब्रू ९:७ 10“आदा-नो़हया़, ङाहला दिठी ने़उ दुबा, ओहराङ दिलेगी लाहम स्य़ूहसीमाना छ्यु-टुह दाङ छ्यु-टुहला येहकेन्गी खुर्पुया़ज्यीराङ मिहम्बा, ओहराङगी ज़ुबुराङ डोवा म़ेदी ज्यिक्पा येहबा” म़ेदी मासीन। 11यिहॱनाङ माक्पेनगी पावलकी तामला यिह मा़हछ्ये। ओहले माक्पेनगी छ्यु-टुह चा़ल्ती़एँ मिह दाङ छ्यु-टुह ताहक्पुगी माक्यो तामला माहङबु यिह छ्य़ेसीन। 12ओहले ओ़ह छ्यु-टुह तेहकेन ग्या़, ख्या़बु दावा च्येच्येला या़हबु म़ेहबा येहकें ओ़ह सोङबे मिहया़ काहन्डुमु पेहती यिहॱनाङ ओ़ह ग्या़ले काहल्दी फोनिक्स क्याहसाला लेप्कें म़ेदी सेम्बा येहकें। क्रेट छोलिङला येहकेन्गी ओ़ह फोनिक्स क्याहसादी च्याहङ-नुहप दाङ ल्हो-नुहप ङो़ले खा तेन्ग्यो येहकें।
छो-क्याहम्जोकी ल्हा़बा लुङजी ओहङग्यो
13ओहले ल्हो ङो़ले ल्हा़बा लोप्से पेहती ओहङज्ये पेहसीन। मिह थाम्ज्यीगी “ता़ह ओहराङ डो ख़ूएँ” म़ेदी साम्लु ताङसीन। ओहले खुङया़गी छ्यु-टुह दाम ज़्या़क्योगी थाक्पाया़ स्यी़दी छ्यु-टुहला क्रेट छोलिङगी सुहर सुहरले पेहती ख्येर्सीन। 14ओहले याहम्बीज्यीले फार ओ़ह छोलिङ ङो़ले ज्यिबुराङ छ्यिम्बु ल्हो-स्यारगी माएँगी ल्हा़बा लुङजी स्युक छ्यिम्बुच्यी क्याहप्सीन। 15ओहले छ्यु-टुह ल्हा़बा लुङजीगी पेहती पाहरक्यीला छ्यिसीन, ङ्यिहगी च्यिॱआङ पेह मा़हखु ओहले ङ्यिहगी छ्यु-टुहला का़हला ख्येर डोना ख्येर च्य़ू म़ेदी ताङसीन। 16क्लौडा माएँ छोलिङगी च्याहङ ङो़ले लेप फान्ज्यो छोलिङगी ल्हा़बा लुङजीला का़सीन। यिहॱनाङ ओ़ह ग्या़ॱलाङ ङ्यिहगी छ्यु-टुहगी क्याहपला दाम्ग्योगी फेमा च्यी़ छ्यु-टुहला ज्यिबुराङ खेन्दा-का़हबु पेहती जेम्दे ख्योङ ख़ूसीन। 17ओहले खुङगी टुह-छ्युङला टिहते छ्यु-टुह नाहङला ज्यिबुराङ खेन्दा-का़हबु पेहती लू़सीन ओहले छ्यु-टुह चा़लती मिहगी ओ़ह टुह-छ्युङला थाक्पागी या़हबु पेहती ताहम्सीन। ओहले छ्यु-टुह लिबियागी सुहरला फार पेहमाला नुहप्कें नि म़ेदी ज्यिक्पा ओहङसीन। ओ़ह सोङगोराङ छ्यु-टुह चा़ल्ती़एँ मिहया़गी छ्यु-टुहला क्याहप्क्योगी पा़लला माहर टी़हसीन ओहले छ्यु-टुहला ल्हा़बागी डे़ला डो च्य़ूसीन। 18ओहले ल्हा़बा लुङजी क्याहप्तेराङ तेहक्यो सोङबे छ्यु-टुह लो़री क्याहप्च्ये पेहसीन। ओहले नाहङबार च्युङ खुङया़गी छ्यु-टुहला येहकेन्गी खुर्पुया़ क्युर चाहङसीन। 19ओहले नाङ ङ्यिहमुदी छ्यु-टुह चाल्तीज्येला कोहकेन्गी पेलाया़ राहङ लाहक्पागीॱराङ छो-क्याहम्जोला क्युर चाहङसीन। 20ओहले ङ्यिहमा माहङबुराङ थु ङ्यिहगी ङ्यिहमाॱआङ माहथोङ कार्माॱआङ माहथोङ। ल्हा़बा लुङजी स्युककी क्याहप्तेराङ तेहसीन, ओहले ङ्यिह थार्के माएँ रेहवाराङ म़ेहबा येहकें।
21मिहया़गी तो मा़हसेहबा ङ्यिहमा माहङबुराङ काहल्दी येहकें। ओहले पावल मिहया़गी दिनला लाहङदी मासीन, “आदा-नो़हया़, ख्या फे़बेया़गी ङाहगी ताम ङ्यिहन्दी क्रेटले माहयोहङबा येहना ओहङज्ये येहकें। ङाहगी माक्योगी ताम ङ्यिहन तेर्पा यिहनानी दि ल़ेहमु तुहक्पुॱआङ ङ्युहङज्ये म़ेहबा येहकें ओहले च्यिॱआङ पेलाया़ क्युर कोहच्ये म़ेहबा येहकें। 22यिहॱनाङ ङाह राहङ फे़बेया़ला माएँ– ख्या फ़ेबेॱया तुहङाल जे नाङ मेहकोएँ, ओहराङ सुज्यीॱआङ स्यिज्ये म़ेह यिहॱनाङ छ्यु-टुहदी तोङज्ये येह। 23ङाह किन्ज्योगी मिह यिहम्बा ओहले ङाह किन्ज्योला स्याहप्तो स्युहएँ। ओहले तिहरीङ नुहङमु किन्ज्योगी स्याहप्च्यी च्यी़ ङाह पोहला फेप्ती सुङ नाङसीन, 24‘ए पावल, ख्ये मा़हन्ज्यी, ख्ये रोमी क्याहल्बु छ्यिम्बुगी दिनला डोॱराङ कोहकें ओहले ख्येगी पेहतीराङ किन्ज्योगी ख्ये ङ्याम्बु डोएँगी थाम्ज्यीला थार च्य़ू नाङज्ये येह’ 25ओ़ह सोङबे ख्या फ़ेबेॱया ज्यी़ माहनाङ च्यिबेमाना किन्ज्योगी सुङ नाङग्यो ओ़ह स्याहल तेहन्दा डुप्च्यु नाङज्ये येह म़ेदी ङाहगी यिह-छ्य़े पेहती येह। 26ता़ह ओहराङ छोलिङ च्यी़ला थेप्च्ये येह।”
छ्यु-टुह फेतोर कोहतोर काहल्ग्यो
27ओहजेला ल्हा़बा लुङजी क्याहप्ती छ्यु-टुह एड्रियास माएँ छो-क्याहम्जोला फार छुर पेहती स्याहक्पु च्युप्स्यी काहल्दी येहकें। ओहले कुहङमु नुहप फेचेला फार छ्यु-टुह चा़ल्ती़एँ मिहया़गी ता़ह ओहराङ क्याहल-खाप च्यी़गी सुहरला फार लेप्सीन दु म़ेदी नोम्साङ ताङसीन। 28ओहले खुङगी छ्यु काहजे तिहङ रिहङबु दु म़ेदी ताहप्ती तासीन। ताहप्ती ताएँमु ठु खाल ङ्यिचे तिहङ रिहङबु दुबा। ओहले फाच्ची लेप फान्ज्यो येहपाराङ ताहप्ती ताएँमु ठु खाल फेदाङ ङ्यी़च्यीॱराङ दुबा। 29ओहले छ्यु-टुह छो तिहङगी तोह छ्यिम्बुया़ला थेप्केंनी म़ेदी ज्यी़सीन। ओ़ह सोङगोराङ खुङगी क्याहप ङो़ले येहकेन्गी छ्यु-टुह ता़गेन च्याल्दा ज़्यि छो नाहङला ताङसीन ओहले ग्यो़बाराङ नाहम लाहङज्यु म़ेदी सोल्वाङ ताप्ती ओ़हलाराङ कू़हदी तेहसीन। 30ओहले छ्यु-टुह चा़ल्ती़एँ मिहया़गी छ्यु-टुहगी तोहङ ङो़गी च्याल्दा छो नाहङला पाप्चेनज्यी तेन्दी फेमा छ्यु-टुह छो-क्याहम्जोला पाप्ती प्रे़हज्ये छोल्सीन। 31ओहजेला पावलगी माक्पेन दाङ माक्मीया़ला मासीन, “दि छ्यु-टुह चा़ल्ती़एँ मिहया़ प्रे़हसीन मानानी ख्या फ़ेबेॱया सुॱआङ थार्च्ये म़ेह” म़ेदी मासीन। 32दि ताम थे़दी माक्मीया़गी छ्यु-टुहला ताहम्ग्योगी फेमा टुह-छ्युङला थाक्पा तुप्ती ताङ चाहङसीन।
33ओहले नाहम लाहङज्ये पेहकेमु क्या र्हाबा-र्हिबेला पावलगी मिह थाम्ज्यीला “तोप्च्या च्यिरा छ्ये नाङदोङ” म़ेदी स्युहसीन। ओहले “ख्या फ़ेबेॱया तुहङालगी पेहती च्यिॱआङ माहछ्येपा पेहती ज़्य़ू नाङग्यो ङ्यिहमा च्युप्स्यी काहल सिहन्दी येह। 34ओ़ह सोङबे ख्या फे़बेया़गी च्यिरा छ्ये नाङदोङ म़ेदी ङाह ह्ओर-छ्ये स्युहएँ च्यिबेमाना थार्च्येगी तेहन्दालानी छ्ये़ॱराङ कोहएँ। ख्या फ़ेबेॱया ज्यी़ माहनाङ, किन्ज्योगी सुङ नाङग्यो ल़ेहमुराङ ओहराङ सुज्यीॱलाङ च्यिॱआङ डोज्ये म़ेह।” 35देजे म़े फान्ज्यो पावलगी खुरा लेहन्सीन ओहले मिह थाम्ज्यीगी दिनला किन्ज्योला थुज्यी-छ्ये़ फुल्दी साहज्ये छ़ूसीन। 36ओहले खुङगीॱआङ राहङ-राहङगी सेम ज़ुङदी खुरा साहसीन। 37ओ़ह छ्यु-टुहला ङ्यिह मेहन्दा ङ्यी़क्या दाङ तिहन-टू़ह येहकें। 38ओहले मिह थाम्ज्यीगी टेहपा काहङ साह सिहन फान्ज्यो छ्यु-टुहला याहङदी ज़ोज्येला खुङया़गी का़ह येहकेन्गी ने़ह छो-क्याहम्जोला क्युर चाहङसीन।
39ओहले नाहम लाहङ फान्ज्योॱआङ खुङया़गी ओ़ह ग्या़ ङोह स्य़े मा़हखु, यिहॱनाङ खुङया़गी छो-क्याहम्जोकी सुहर च्यी़ थोङसीन। ओहले खुङया़गी ला़ खाजेबा छ्यु-टुहला ओ़ह छो-क्याहम्जोकी सुहरला ख्येर्च्ये म़ेदी साम्लु ताङसीन। 40ओहले छ्यु-टुह ता़गेन च्या़या़ला ता़क्योकी थाक्पाया़ तुप्ती च्या़या़ छो-क्याहम्जोला क्युर चाहङसीन, ओहले छ्यु-टुह चा़ल्ती़एँ प्रेहकाया़ ठाबे पेहती छ्यु-टुहकी दिन ङो़ले येहकेन्गी पा़ल क्याहङसीन, ओहले ल्हा़बागी छ्यु-टुहला छोगी सुहर ङो़ले ख्येर्सीन। 41ओहजेला छ्यु-टुह पेहमाला सू़हसीन ओहले छ्यु-टुहकी क्याहप ङो़ले छ्यु-पाहलापगी पेहती छ्यु-टुह रोहप्च्ये पेहसीन।
42ओहजेला चोन-खाङला छ्यिक्योगी मिहया़ प्रे़हडोएँ ने़दी माक्मीया़गी खुङया़ला सेच्ये म़ेदी साम्लु ताङसीन। 43यिहॱनाङ माक्पेनगी पावलला थार च्य़ूज्ये म़ेदी माक्मीया़ला सुज्यीॱलाङ माहसे म़ेदी का नाङसीन। ओहले माक्पेनगी च्याल क्याहप स्य़ेएँया़ च्याल क्याहप्ती सोङ म़ेदी मासीन। 44ओहले च्याल क्याप मे़हस्येएँया़गीदी छ्यु-टुहगी छ्यामया़ दाङ रोहप्क्योगी स्यिङ पाङलेपया़ला ज़ुङदी छो च्येतोङ म़ेदी मासीन। दि ल़ेहमु पेहती ङ्यिह थाम्ज्यी या़हबु पेहती छो-क्याहम्जोकी सुहरला लेप्सीन।
Právě zvoleno:
ल़ेह-पेन 27: HYLM
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.