ल़ेह-पेन 22
22
1“क़ेहङगेन दाङ आदा-नो़हया़, राहङ फे़बेया़गी दिनला ङाहगी राहङगी तेहन्दाला मा कोहएँगी ताम सेन नाङदोङ!” म़ेदी पावलगी मासीन। 2पावलगी हिब्रू ताम माएँ थे़गोराङ मिह मिह-माहङया़ खाजुम तेहसीन।
3ओहले पावलगी मासीन, “ङाह किलिकिया लुहङबागी टार्सस माएँ क्याहसाला क्येक्योगी यहूदी यिहम्बा। यिहॱनाङ, ङाह यरूशलेमलाराङ छारक्यो यिहम्बा। ओहले लोबेन गमलिएलगी स्याहप्च्यी पेहती ङाहगी ओहराङगी चावा यिहन्ज्यु ची़दी ओहङग्योगी छ्य़े-ठिम या़हबु पेहती लोप ङ्युहङसीन। तिहरीङ राहङ फे़बेया़गी किन्ज्यो ङो़ले काहजे सेम ताङग्यो येहबा, ओहजेराङ ङाहगीॱआङ राहङगी सेम किन्ज्यो ङो़ले ताङदे येहकें।#ल़ेह ५:३४-३९ 4ङाहगी थार्पागी लाहमला स्य़ूहक्यो मिहया़ला स्यिज्ये पेहकें थु तुहक्पु तेरक्यो येहकें ओहले क्येप-ख्योवा दाङ पी़हमी-पेहजाया़ला ज़ुङदी चोन-खाङला ल़ू च्य़ूक्यो येहकें।#ल़ेह ८:३; २६:९-११ 5दि ङाहगी माक्योगी ताम तेहम्बाराङ यिहम्बानी मिहम्बा म़ेदी पूजाहारी गो-छ्येवा दाङ यहूदी गोबाया़गी सुङ थुप्च्ये येह। खुङ फे़बेया़गीराङ ङाहला दमस्कस क्याहसाला तेहकेन्गी यहूदी आदा-नो़हया़गी मिहनला यिहगी नाङसीन ओहले ओ़ह यिहगीला चो़वो येशूला यिह-छ्य़े पेहकेन्गी मिहया़ला जु़ङज्येला ङाहला ओङ ज़्योरक्यो येहकें। ओ़ह सोङबे खुङया़ला यरूशलेमला ख्योङदी ङ्य़ेहबा तेर्च्येला ङाह दमस्कसला डोॱराङ येहकें।
राहङ ग्युरक्योगी तेहन्दाला पावलगी प्रा साल्ग्यो
(ल़ेह ९:१-१९; २६:१२-१८)
6दमस्कसला लेप्च्ये पेहकेमु नामले माहर मी़राङ छ्यिप्केन पेहती येहसेर च्यी़ ङाह थो़ला क्याहप्सीन। ओहजेला ङ्यिहमा फ़ेचे काहल्दी येहकें। 7ओहले ङाह साला रिहल्सीन, ओहले ङाहगी दि रोहवा सुङ-क़े च्यी़ थ़ेसीन, ‘ए शाऊल, ए शाऊल ख्येगी ङाहला च्यिबे तुहक्पु तेर्कें?’ म़ेदी टी़हक्यो थ़ेसीन। 8ओहले ङाहगी, ‘चो़वो छ्येवा! राहङ सु यिहम्बा ला़ह?’ म़ेदी टी़हसीन। ओहले चो़वो छ्येवागी ‘ङाह नासरतकी येशू यिहम्बा, ख्येगी ङाहला तुहक्पु तेर्केॱराङ येह’ म़ेदी सुङ नाङसीन। 9ङाह ङ्याम्बु येहकेन्गी रो़हया़गीनी येहसेरती थोङसीन दुबा, क़ेनी खुङगी मा़हथे। 10ओहले ङाहगी मासीन, ‘ओ़ह चो़वो छ्येवा, ता़ह ङाह च्यि पेहच्ये?’ ओहले चो़वो छ्येवागी सुङ नाङसीन, ‘ख्ये लाहङदी दमस्कसला सोङ, किन्ज्योगी ख्येला कुल नाङगेन्गी ल़ेहया़गी तेहन्दाला ख्येला ओ़ह ग्या़लाराङ स्येच्ये येह।’ 11ओहले ओ़ह येहसेरकी पेहती ङाहगी मी़ माहथोङ ओहले ङाहगी रो़हया़गी ङाहला ठिती दमस्कसला क्याल तेर्सीन।
12ओ़ह क्याहसाला हननिया मिहन थो़क्यो मेहन्दा च्यी़ तेहको येहकें। ओहले खोगी मोशागी नाङग्यो छ्य़े-ठिमया़ या़हबु पेहती ची़उ येहकें। ओहले खो मिह टाहङबु येहकें ओहले दमस्कसला तेहकेन्गी यहूदी थाम्ज्यीगी खोला ची़नाङ पेहको येहकें। 13ओहले हननिया ङाह पोहला ओहङदी, ‘नो़ह शाऊल, ख्येगी मी़ थोङज्यु’ म़ेदी मा-लुहङ मे़हबाराङ ङाहगी मी़ थोङसीन। 14ओहले हननियागी मासीन, ‘ओहराङगी आख्ये मे़हमेया़गी किन्ज्योगी थुला ठुङग्योगी स्याहलया़ ङोह स्य़े ख़ूज्यु म़ेदी किन्ज्योगी ख्येला दाम नाङग्यो यिहन। ख्येगी टाहङबु स्याहप्तो स्युह नाङगेन येशूला थोङ ङ्युहङसीन ओहले मिहरोगी स्याहलले सुङ नाङग्योकी स्याहलया़ ङ्यिहन ङ्युहङसीन। 15च्यिबेमाना ख्येगी मिहरोगी पाङबु तेहती राहङगी थोङग्यो दाङ थे़क्योगी तामया़ मिह थाम्ज्यीगी दिनला स्येॱराङ कोहच्ये येह। 16ओ़ह सोङबे ता़ह च्यिबे कू़हदी तेहच्ये? ता़ह लाहङदोङ ओहले बप्तिस्मा लेहन्दोङ ओहले येशूगी छेन लेहन्दी राहङगी पेहक्योगी तिहक्पा ता़ह च्य़ूदोङ!’ म़ेदी हननियागी मासीन।
17ओ़ह ग्या़ले ङाह यरूशलेमला काहल्सीन ओहले छ्योखाङला सोल्वाङ ताप्ती तेहकेमु चो़वो येशूगी ङाहला ज्याल्गा नाङसीन। 18‘ग्यो़बा-ग्यो़बा पेहती यरूशलेम क्युर ज़्या़दी सोङ! ख्येगी ङाहगी तेहन्दाला माएँगी ताम यरूशलेमगी मिहया़गी ङ्यिहन्ज्ये म़ेह’ म़ेदी किन्ज्योगी सुङ नाङसीन। 19ओहले ङाहगी मासीन, ‘ओ़ चो़वो छ्येवा, ङाहगी थाम्ज्यीराङ छो़बाया़ला काहल्दी राहङला यिह-छ्य़े पेहकेनया़ला चोन-खाङला लू़दी तुहङग्योगी तामया़ खुङ थाम्ज्यीला क्यी़ह येह। 20राहङदी पाङबु तेर्के स्तिफनासला सेकेमु ङाहॱआङ ओ़ह ग्या़ला येहकें। ओहले स्तिफनासला सेकेमु ङाहगीॱआङ ओ़ह मिहया़ ङ्याम्बु डी़दी, खोला सेकेन मिहया़गी काप्च्या सुङ तेहक्यो येहकें।’#ल़ेह ७:५८ 21ओहले चो़वोगी सुङ नाङसीन, ‘ख्ये सोङ, ङाहगी ख्येला लेहमेन क्यिहपागी मिहया़साला था़-रिहङबु रिहङबु थु ताङज्ये येह’!”
22ओहजे माएँ थुनी मिह मिह-माहङया़गी पावलगी ताम ङ्यिहन्दी तेहक्यो येहकें। ओ़ह तिङलेनी खुङ थाम्ज्यीगी क़े तेन्दी मासीन, “खोला सेॱराङ कोहएँ! खोला सेॱराङ कोहएँ! ता़ह खोला सोम्बो ताङज्ये मेहयोहङगे!” 23खुङया़ राहङगी काप्च्या पित्ते थाल्बी नामला टाम्दी क़े तेन्सीन। 24दि थोङदी माक्पेन छ्यिम्बुगी पावलला नाहङला ख्येर्ती ताक्स्यु क्याहप्च्येला का तेर्ती दि ल़ेहमु मासीन, “नाह ताक्स्यु क्याहप्केमु दिगी यहूदीया़ च्यिबे स्यिहताङ पेहक्यो दुबा म़ेदी स्येके यिहम्बानी?” 25ओहले माक्मीया़गी ताक्स्यु क्याहप्च्ये म़ेदी ताहम्ज्ये पेहकेमु पावलगी खो पोहला लाहङदी तेहक्योगी माक्पेनला टी़हसीन, “च्यि रोम क्याहल-खापगी मिहला ल़ेह नोहरक्यो स्यिहक्यो मा़हतेबा पेहती ख्यागी ताक्स्यु क्याहप ङ्युहङगेन ले? च्यि रोमी ठिमगी दि ल़ेहमुराङ पेहतोङ म़ेदी येहबा?” म़ेदी टी़हसीन। 26दि ताम थे़दी ओ़ह माक्पेनगी, माक्पेनया़गी गोबासाला काहल्दी, “ओहराङगी च्यि पेहच्ये पेहक्यो यिहम्बा? दि मिहनी रोम क्याहल-खाप छ्यिम्बुगी मिह गा दुबा!” म़ेदी माक्पेन छ्यिम्बुला स्येसीन।
27दि ताम थे़दी माक्पेन छ्यिम्बु नाहङला स्य़ूहदी पावलला टी़हसीन, “च्यि ख्ये तेहम्बाराङ रोम क्याहल-खापगी मिह यिहम्बा ले?” ओहले पावलगी, “यिहम्बा लाह” म़ेदी मासीन। 28ओहले माक्पेन छ्यिम्बुगी, “ङाहनी टाङगा माहङबुराङ च्याल्दी गा रोम क्याहल-खापगी मिह काहल्ग्यो यिहम्बा!” म़ेदी मासीन। ओहले पावलगी, “ङाहनी क्येएँ यिहन्ज्युराङ रोम क्याहल-खापगी नागरिकता ज़्योरक्योगी मिह यिहम्बा लाह!” म़ेदी मासीन। 29दि थे़-लुहङ मे़हबाराङ पावलला टी़हदाप पेह ओहङग्योगी मिह थाम्ज्यीराङ क्याहप लो़हदी काहल्सीन। पावल रोम क्याहल-खापगी नागरिकता ज़्योरक्योगी मिह दुबा म़ेदी क्यी़ह ज्योर फान्ज्यो माक्पेन छ्यिम्बुॱआङ ज्यी़सीन, च्यिबेमाना खोगी पावलला च्याल्दागी ताहम च्य़ूक्यो येहकें।
यहूदी छो़बागी दिनला पावल
30ओहले नाहङबार च्युङ यहूदीया़गी पावलला च्यिबे फातुर च़ूक्यो यिहम्बा म़ेदी ङोह स्येच्येला माक्पेन छ्यिम्बुगी पूजाहारी छ्यिम्बु दाङ छो़बागी मिह थाम्ज्यीला क़े क्याहप्ती छो़बा पेहच्येला का नाङसीन। ओहले पावलला ख्योङदी मिह थाम्ज्यीगी दिनला लाहङ च्य़ूसीन।
Právě zvoleno:
ल़ेह-पेन 22: HYLM
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.