ल़ेह-पेन 18
18
कोरिन्थी क्याहसाला
1ओ़ह तिङले पावल एथेन्स क्याहसाले कोहङबा स्यी़हदी कोरिन्थी क्याहसाला काहल्सीन। 2ओहले ओ़हला अकिलास मिहन थो़क्योगी यहूदी मिह च्यी़ थ़ूसीन। खो पोन्टस लुहङबाला क्येक्यो यिहन्गे, ओहले खो राहङगी पी़हमी प्रिस्किला ङ्याम्बु थेरेरेराङ इटालिया लुहङबाले#१८:२ इटालिया लुहङबा : दि लुहङबादी यूरो क्याहल-खाप छ्यिम्बुकी ल्हो ङो़ले पार तीएँ। दि रोमीया़गी लुहङबा यिहम्बा। इटालियागी क्याहल्सादी रोम यिहम्बा। ओहङदी येहकें। च्यिबेमाना, ओहजे काहङला रोमी क्याहल्बु क्लौडियसकी यहूदी थाम्ज्यीलाराङ, रोमले थेन्दी सोङ म़ेदी का तेर्ती येहकें। ओहले पावल खुङ ङ्यी़ला थु काहल्सीन। 3खुङया़गी पा़ल ज़ोएँगी ल़ेह पेहती राहङगी टेहपा सोउ येहकें। पावलॱआङ खुङया़ ङ्याम्बुराङ तेहसीन च्यिबेमाना खोगीॱआङ खुङया़गी ल़ेहमुराङ पा़ल ज़ोएँगी ल़ेह पेहती टेहपा सोउ येहकें। 4ओहले पावल थाङ सोएँ ङ्यिहमा-टाहङमाराङ यहूदीया़की छो़खाङला काहल्दी यहूदी दाङ ग्रीक क्यिहपागी मिहया़ ङ्याम्बु चो़वो येशूगी तेहन्दाला ताम मामा चेउ येहकें ओहले खुङया़ला प्रा साल तेर्च्ये छोल्गो येहकें।
5ओहले सिलास दाङ तिमोथी माकेडोनिया लुहङबाले ओहङ फान्ज्यो पावलगी सुङ ख्येप्टा तेर्केन्गी ल़ेह पेहसीन। खोगी यहूदीया़ला, येशूॱराङ थार्पा नाङगेन्गी मास्यीका क्याहल्बु यिहन म़ेदी पाङबु तेर्सीन। 6ओहले खुङया़गी पावलला खा लो़हदी स्ये़हन्डील पेहसीन। ओ़ह सोङगोराङ पावलगी राहङगी काप्च्या प्रू़दी खुङया़ला दि ल़ेहमु मासीन, “ख्याया़गी तिहक्पा ख्याया़लाॱराङ फो़ज्यु, ता़ह ङाहला ङ्य़ेहबा फो़ज्ये म़ेह। ता़ह यिहन्ज्यु ङाह लेहमेन क्यिहपागी मिहया़साला डोज्ये येह।”
7ओहले खो ओ़ह ग्या़ले किन्ज्योला छ्य़ेसेम पेहकेन तीतस युस्तस माएँ मिहगी खाङबाला काहल्सीन। खोगी खाङबा छो़खाङगी पोहलाराङ येहकें। खो ग्रीक क्यिहपागी मिह यिहन्गे। 8ओहले यहूदीया़की छो़खाङगी पोम्बो क्रिस्पस दाङ खो खाङबा म़ेहमे थाम्ज्यीगीराङ चो़वो येशूला यिह-छ्य़े पेहसीन। ओहले ओ़ह यिहन्ज्यु कोरिन्थी क्याहसाकी मिह माहङबुगीराङ पावलगी लोप्च्युङ ङ्यिहन्दी चो़वोला यिह छ्य़ेसीन, ओहले खुङ थाम्ज्यीगी बप्तिस्मा लेहन्सीन।
9कुहङमु च्यी़ चो़वोगी पावलला ज्याल्गा नाङदी सुङ नाङसीन, “सुॱलाङ मा़हन्ज्यी, खाजुम माहतेह, या़हबु लेहङगुया़ स्येकेराङ सोङ। 10ङाह ख्ये ङ्याम्बुराङ येह, ख्येला सुज्यीगीॱआङ च्यिॱआङ पेह ख़ूज्ये म़ेह च्यिबेमाना दि क्याहसाला ङाहती मिह माहङबुराङ येहबा!” म़ेदी चो़वोगी सुङ नाङसीन। 11ओहले पावलगी किन्ज्योगी लुहङ लोप्ती ओ़हला लो़ह फेदाङ ङ्यी़ थु खुङ ङ्याम्बु तेहसीन।
12ओहले गलियोन मिहन थो़क्योगी रोमी मिह च्यी़ अखैया लुहङबाला स्युहङ-पेन छ्यिम्बु काहल्सीन। ओहजे काहङला यहूदी थाम्ज्यी रुहप्ती पावलला ज़ुङसीन। ओहले ठिम-खाङला ख्येर्ती मासीन, 13दि मिहगी ओहराङगी छ्य़े-ठिम ङ्याम्बु मी़ह-डी़एँगी छ्याप्स्यीया़ ङो़ले किन्ज्योला छ्येपा फुल्गे तामया़ लोप्ते मिहया़ला नोङज्ये छोल्गु दु म़ेदी यहूदीया़गी मासीन।
14ओहले पावलगी ताम माज्ये पेहकेमु स्युहङ-पेन गलियोनगी यहूदीया़ला मासीन, “दि मिहगी च्यिॱआङ ल़ेह चोक्पा कि-माना ल़ेह ङ्येहम्बा पेहक्यो यिहन्सीमाना ख्यागी ताम ङ्यिहन्दी ङाहगी ठिम ताङ कोहज्ये येहकें। 15दि तामनी ख्याराङदी छिकाया़, मिहनया़ दाङ छ्य़े-ठिमगी तेहन्दाला च्यी़राङ दुबा ओ़ह सोङगोराङ दि तामगी तेहन्दाला ख्या राहङगीराङ ठिम ताङदोङ। दि तामगी तेहन्दाला ङाहगी ठिम ताङ कोहबा म़ेह” म़ेदी मासीन। 16ओहले गलियोनगी खुङया़ला ठिम-खाङलेगी ताङ चाहङसीन। 17ओहले यहूदीया़गी छो़खाङगी पोम्बो सोस्थेनेसला ज़ुङदी ठिम-खाङगी दिनलाराङ तुहङसीन। यिहॱनाङ स्युहङ-पेन गलियोनगी नाङदाराङ माहताङ।
पावल एन्टिओखिया क्याहसाला लो़ह काहल्ग्यो
18ओ़ह तिङले पावल ङ्यिहमा तोबा थु चो़वोला यिह-छ्य़े पेहकेन्गी आदा-नो़हया़ ङ्याम्बु कोरिन्थी क्याहसाला तेहसीन। ओ़ह तिङले खुङया़ ङ्याम्बु कोहङबा स्य़िहदे प्रिस्किला दाङ अकिलास ङ्याम्बु छो-क्याहम्जोकी लाहमले पेहती सिरिया क्याहल-खापला फार काहल्सीन। ओहले पावलगी तोहङलेराङ किन्ज्यो ङ्याम्बु ताहम्ज्या ज़्या़क्यो सोङगोराङ खोगी किंक्रिया क्याहसाला राहङगी टा प्रा़हसीन।#गन्ती ६:१८ 19खुङया़ एफिसस क्याहसाला लेप्सीन, ओहले पावलगी खुङया़ला ओ़हला क्युर ज़्या़सीन। पावलदी एफिससगी छो़खाङला स्य़ूहदी यहूदीया़ ङ्याम्बु स्येपा तुहर्च्ये छ़ूसीन। 20ओहले खुङगी पावलला, “ङ्यिहमा तोबाज्यी ङ्यिह ङ्याम्बुराङ ज़्य़ू नाङदोङ” म़ेदी स्युहसीन यिहॱनाङ, पावलगी माहङ्यीहन। 21पावलगी खुङ ङ्याम्बु दि ल़ेहमु म़ेदी कोहङबा स्युहसीन “किन्ज्योगी थुला ठुङदी येहसीमाना ङाह ख्या फे़बेया़साला लो़ह ओहङगे” म़ेदी पावल छ्यु-टुहला जा़दे एफिसस क्याहसाले काहल्सीन।
22कैसरिया क्याहसाला लेप्तीले पावल यरूशलेमला काहल्सीन ओहले ओ़ह ग्या़गी छेन्छोककी मिहया़ ङ्याम्बु थ़ूसीन। ओ़ह तिङले खो एन्टिओखिया क्याहसाला 23ङ्यिहमा तोबा थु तेहसीन। ओ़ह तिङले खो गलातीया दाङ फ्रिगिया लुहङबाला काहल्दी ग्या़ ग्या़ला येहकेन्गी चो़वोगी स्याहप्च्यी थाम्ज्यीला यिह-छ्य़ेला स्युक क्ये च्य़ूसीन।
अपोल्लोस एफिसस क्याहसाला
24ओहले अलेक्जेन्ड्रिया क्याहसाला क्येक्योगी अपोल्लोस माएँ यहूदी मेहन्दा च्यी़ एफिसस क्याहसाला ओहङसीन। खो ताम माज्येला ज्यिबुराङ ख़ेबा येहकें। खोला यहूदी सुङरापकी तेहन्दाला माहङबुराङ येहन्देन येहकें। 25खोगी थार्पा नाङगेन मास्यीकागी तेहन्दाला लोप्च्युङ ज्योर्ती येहकें ओहले खो सेमला काहसो पेहती येशूगी तेहन्दाला ठीक-ठीक ङ्या़ह-ङ्या़ह पेहती लोप्को येहकें। यिहॱनाङ खोला यूहन्नागी तेरक्यो बप्तिस्मा च्यी़राङ क्यी़ह येहकें। 26ओहले खोगी यहूदीया़की छो़खाङला मा़हन्ज्यीबा पेहती लोप्च्युङ तेर्च्ये छ़ूसीन। खोगी माक्योगी ताम थे़दी प्रिस्किला दाङ अकिलासगी खोला राहङगी खाङबाला क़े क्याहप्सीन ओहले किन्ज्योकी थार्पागी तेहन्दाला तोहरोङ या़हबु पेहती ङोह स्य़े च्य़ूसीन।
27ओहले अपोल्लोस अखैया लुहङबाला डोज्ये सेम पेहसीन। ओहले एफिससला येहकेन्गी आदा-नो़हया़गी खोला डोज्येला आ़र तेर्सीम्बाराङ अखैया लुहङबाला तेहकेन्गी आदा-नो़हया़ला, “अपोल्लोसला फेप स्यी़हदोङ” म़ेदी यिहगी च्यी़ प्री़हदी तेर्सीन। ओहले अखैया लुहङबाला लेप्ती अपोल्लोसगी किन्ज्योगी थुज्यीगी पेहती यिह-छ्य़े पेहकेनया़ला माहङबुराङ रो़हराम पेहसीन। 28च्यिबेमाना ओ़हला येहकेन्गी यहूदीया़ ङ्याम्बु मिहया़गी दिनला स्येपा तुहर्केमु खोगी सुङरापगी तामया़ ख्योङदी चो़वो येशूॱराङ थार्पा नाङगेन्गी मास्यीका यिहन म़ेदी पाङबु तेर्सीन।
Právě zvoleno:
ल़ेह-पेन 18: HYLM
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 (Active), Wycliffe Bible Translators, Inc. All rights reserved.