Luka 6
6
Yɛsu ne mokoo we lusu lwe sabatɔ
(Mat 12:1-8; Mali 2:23-28)
1Lɔmɔ lusu lwe sabatɔ, Yɛsu na kosaboka masio me ngano. Baeyechwa bakɛ na kɔɔlɔla bichɛngɛ bye ngano, kubiikinya mo mesani yaabɔ na kubilya. 2Bamɔ Bafalisayɔ na kobocha baeyechwa itɛ: «Ko booni kotoketa baanu bitokandelwa ne Salia lusu lwe sabatɔ?» 3Yɛsu na kobasaolea itɛ: «Muunayɔɔla byaketa Lauli aungwa awɛ njaa, awɛ ne bando bakɛ? 4Waingea mo ndabo ya Kakua, na koenda mikati yaocha bando kwa Kakua. Awɛ na komelya, ne kɔɛcha kabee bando babɛa naakɛ, bɔbɔ ne mikati ya ɔyɔ mutindɔ yakandelwa kolewa ne bando bakinɛ bataasi basia ikɛɛsa.» 5Awɛ na kokondoa kobasaolea itɛ: «Mee Mwaana we Mondo ne mokoo wee sabatɔ.»
Yɛsu osoolola we kɔbɔkɔ lyaoma
(Mat 12:9-14; Mali 3:1-6)
6Lukinɛ lusu lwe sabatɔ, Yɛsu na kwingea mu sinakɔki, na kobangoa koeyekya: Mo elya sinakɔki, mwabɛchaya mondo walɛbɛa chanja lye isandome. 7Baeyechi be Salia ne Bafalisayɔ, na koyongobechea Yɛsu miisɔ kɔ kɔmɔa ingɛ otaolole olya mondo mu lusu lwe sabatɔ, bakonje kɛɛyameo kye komotaeka ko nganya. 8Awɛ na kocheba lokani lwabɔ, na kosaolea walɛbɛa chanja itɛ: «Byoka, imaa mwingya bando.» Awɛ na kobyoka, na kwimana mwingya abɔ. 9Kɔmɔngɔ Yɛsu na kobasaolea itɛ: «Nae ne lɛmɔ ikomo lye kobabocha: Salia yiito etotokandea koketa byaachi ɔbɛɛ bwabea ku lusu lwe sabatɔ? Koolola mondo ɔbɛɛ kumuchia?»
10Yɛsu na kɔlɔla basɛ babɛa naakɛ alya, na kosaolea olya mondo itɛ: «Ɔnɔnɛka chanja lyao.» Awɛ na kɔlɛɔnɔnɛka, chanja lyaakɛ, na kooloka, na koongwa mwɛchɔ. 11Abɛa baeyechi be Salia ne Bafalisayɔ abɔ na kochaa moemo, na kobochana baketee Yɛsu eke.
Yɛsu ɔɔsɔbɔa ndomwa ikumi na babee
(Mat 10:1-4; Mali 3:13-19)
12Kɔ maɔ masu Yɛsu na konena ko keembe kwaiyaye. Awɛ na koketa kaboombo mu kwiyaya kwa Kakua. 13Akya butu, awɛ na kwitana baeyechwa bakɛ, awɛ na kɔsɔbɔa asambea abɔ ikumi ne babee na kɔbaɛbɛcha chiina lye ndomwa. 14Ngombo chabɔ na chichi: Simɔni (waɛcha Yɛsu chiina lya Pɛtɛlɔ) na Andele mobotwa naakɛ, Yakɔbɔ na Yɔana, Filipɔ na Balatimayɔ, 15Matayɔ na Tɔmasi, Yakɔbɔ mwaana wa Alufayɔ, na Simɔni waitaniwa Sɛlɔtɛ, 16na Yula mwaana wa Yakɔbɔ, na Yula Isikaliɔta waocha Yɛsu.
Yɛsu otoeyecha ne koolola balwachi
(Mat 4:23-25)
17Yɛsu na kwika ne baeyechwa bakɛ. Aolea awɛ ataasi ketoo, awɛ na kwimana amɔɔsa ne baeyechwa bakɛ na kosanga ndongo yee bakinɛ baeyechwa bakɛ ne ndongo mekataa yee bando bakinɛ batokea mɔsɛngɛ ɔɔsɛ we Yulɛa, nɛ Yɛlusalɛma, nɛ Tilɔ nɛ Silɔna mɔ mɔkɔngɛ we kichibachiba. 18Baa bando babaka kwa mwiungweeche, ne koololwa bolwachi bwabɔ. Na baa basonga ne masombo nabɔ baololwa kabee. 19Bando basɛ na koenga bamɔkɔbɔchɛ kɔ kɔmɔa bɔkɛtɛ bwamoolaya na koolola bando basɛ.
Lɔkɔka ne mokimo
(Mat 5:1-12)
20Yɛsu na kɔlɔla baeyechwa bakɛ, awɛ na kɔɔcha:
«Moenoke banu bakɛna,
kɔ kɔmɔa itɛ boombe bwa Kakua ne bwiinu.
21Moenoke banu bae ne njaa leno,
kɔ kɔmɔa mɔtaɛbɛ.
Mɔmɛmɛ banu bae mo kolela leno,
kɔ kɔmɔa mɔtasɛkɛ.
22«Moenoke atamɔkɔnɛ bando na kɔbaisɔa ne ndongo chabɔ, ne kɔbabɛngɛa, ne kobaakoɛa bwabea ku chiina lyanɛ mee Mwaana we Mondo. 23Mɔmɛmɛ atamoolelaye mamɔ makomo mwinande nɛ kɛmɛmɔ, kɔ kɔmɔa itɛ motobekiwa bɔɔngya bokataa mwiyoo. Kɔ kɔmɔa na boa bwasongya ba isabɔ mokoo ndɛnda cha Kakua.
24Banu ngonji, moe ne mayombe
kɔmɔa mususia kokonja kwinu kɛmɛmɔ.
25Na banu basɔɛba leno moe ne mayombe
kɔmɔa motaungwe njaa.
Na banu bae mɔ kɔsɛka leno moe ne mayombe,
kɔmɔa motalele.
26Mayombe kwinu atobaseka bando,
kɔmɔa ba isabɔ mokoo baketa bɔbɔ nɛ ndɛnda che manu.»
Kokondaya baangani
(Mat 5:38-48; 7:12a)
27Yɛsu na kɔbaɔkɔɛa bando kabee itɛ: «Alakini natobasaolea banu bae mu kunungwa itɛ: Mokondaye baangani niinu. Mobaketee byaachi baa batɔbakɔna. 28Mwiyayaye kwa Kakua ɔbaɛchɛ lɔkɔka baa bae mo kobakimoa. Ne mwiyayaye kwa Kakua ko baa batobamɔnya manɛnɛ. 29Ingɛ mondo osobaamea kwitama lɛmɔɔsa, mumutuulee ne likinɛ. Ne ingɛ mondo osokobakoa ikɔti lyao, mɔlɛkɛɛla ne sumisi yao. 30Ɛcha ɔɔsɛ ɔtakɔɛngɛɛ, ne ɔɔsɛ otakobakoe byɛndɔ byao, ndɛ kɔmɔɛngɛa ɔbiɔtɔɛ. 31Boa botokonda banu bando babaketee mobaketee nabɔ bwakaɛ.
32«Ingɛ motokonda ikɛɛsa baa batobakonda, ko eke kotabaseke abɔ? Kɔmɔa ɔbɛɛ bando babea batokonda baa batobakonda. 33Ingɛ motoketa byaachi ko baa bae mo kobaketea byaachi, ko eke kotabaseke abɔ? Kɔmɔa nabɔ bando babea batoketa bwakaɛ bɔbɔ. 34Ingɛ motoambesa mondo ne kobaela kokonja keemo, ko eke kotabaseke abɔ? Kɔmɔa nabɔ bando babea batɔkɔpɛsa baa batɔbaɔtɔsɛa. 35Mokondaye baangani niinu, ne kobaketeaya byaachi. Ne koambesaya kotaasi kobaela bakɔɔtɔsɛɛ. Mwasoketa bɔbɔ, motakonje ikonja lekatala, kabee mɔtabɛ kiinɛkinɛ baana ba Kakua we Kwiyoo Njɔɔ. Kɔmɔa awɛ otoketa maachi ko bando bataasi batusukulu ne ko baa batoketa bwabea. 36Mɔbɛ ne lokwa boe Isinu ne lokwa.»
Nde kɔmɔa bakinɛ ne bwabea
(Mat 7:1-5)
37Yɛsu na kɔɔcha kabee itɛ: «Mɔkɔsɛkyaya mondo sambo, na Kakua ndakabakɔsɛkyɛ sambo. Mɔɔchaya bakɔsɛkyɛ bakinɛ sambo, na Kakua ndakabamɔkɔsɛkyɛ sambo. Muungwee bakinɛ lokwa, na Kakua otamuungwee lokwa. 38Mɔɛchayɛ bakinɛ na Kakua ɔtabaɛchaye. Motakonje ikonja lekoo lya chaa bɛɛ. Kɔmɔa batamochekyee mo kyakaɛ kɛɔmbɔlwa ketochekyea banu bakinɛ.»
39Kabee Yɛsu na kobasaolea mo meengo itɛ: «Mbufu etaangoeche ikinɛ mbufu? Bakakee basɛ babee mu kiina? 40Mweyechwa ndatoeta mweyechi waakɛ; ɔɔsɛ mweyechwa uusia koeyechwa bwaachi, ɔyɔ ne ɔtabɛ boe mweyechi waakɛ.»
41Yɛsu na kɔɔcha kabee itɛ: «Booni bɔtɔmɔa awɛ kɛsɛsi kee mu liisɔ lye mobotwa nao, na awɛ ndɔtɔmɔa lomafa loe mu liisɔ lyao? 42Ɔbɛɛ booni bɔtaɔchɛ awɛ ne mobotwa nao: ‹Ee mobotwa naanɛ, ndɛkɛa naoche kɛsɛsi mu liisɔ lyao›, na awɛ mwɛɛnɛ ndɔtɔmɔa lomafa loe mu liisɔ lyao? Awɛ wee tobee tobee! Taocha kombaa lomafa loe mu liisɔ lyao, kɔmɔngɔ ɔtamɔɛ bwaachi na kotosa kɛsɛsi kee mu liisɔ lye mobotwa nao.»
Mote ne bimuka byakɛ
(Mat 7:16-20; 12:33-35)
43Yɛsu na kɔɔcha kabee itɛ: «Kuusi mote mwaachi otaɔsɔnɛ koocha bimuka byabea, ɔbɛɛ mote wabɛchaya kowamba bimuka byaachi. 44Kɔmɔa mote ɔɔsɛ otochebekwa ku bimuka byakɛ. Ndakakotoe tini ko mete yɛ mɛkɛɛ, ne ndokakaole misabibu ku kichinaka kye malɛngɛ. 45Mondo mwaachi ɔtɔɔcha maachi matotoka ko motema waakɛ. Ne mondo wabɛchaya, bwabea bɔtɔɔcha awɛ bototoka ne mo bwabea bɔtɔɔnga awɛ mo motema waakɛ. Kɔmɔa kanywa ke mondo kaanga kɔɔcha ne makomo matochekya motema waakɛ.»
Mitindɔ ebee yee bayɛngi
(Mat 7:24-27)
46Yɛsu na kɔɔcha kabee itɛ: «Ko eke kutumbitana baanu ‹Mwaame, Mwaame›, koko ne mootoketa bitobasaolea mee? 47Ne ɔɔsɛ otoba kwanɛ, ne kuungwa makomo maanɛ, ne komaketa ndabaangweche banu bitoeyana na ona mondo. 48Otoeyana ne mondo waaboka ndabo yaakɛ. Awɛ na kochoa kina kekatala kyaolea ne kwibwe. Kɔmɔngɔ na koaboka ndabo konganda kwe ɔyɔ musingi. Aɔka mbua, maache na kwika ne bɔkɛtɛ mo nganda mwe elya ndabo, elya ndabo ndeyaɔsɔna kuchingana, kɔmɔa yaabokiwa bwaachi. 49Olya utuungwa makomo maanɛ, na awɛ ndatoketa bitɔɔcha amɔ, otoeyana ne mondo waaboka ndabo yaakɛ mo matɛkɛ me lɔsɛkɛnja kotaasi kochoa kina ne koaboka musingi. Kɔmɔngɔ, abaka maache mabua me looche kwaɛtamɛ elya ndabo, akaɛ alya ndabo na kokea na kusunjuka.»
Právě zvoleno:
Luka 6: ZMB
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2022 Seed Company in coordination with Forum Communautaire des Traducteurs de la Bible et Alphabétisation
