માથ્થી 28
28
ઈસુ જીતા ઉઠના
(માર્ક 16:1-8; લુક. 24:1-12; યોહ. 20:1-10)
1ઈસવુના દિસને માગુન આઠોડાને પુડલે દિસને પાહાટના જ, મરિયમ મગદલાની અન દુસરી મરિયમ દોની જની મસાનમા આનેત. 2તાહા પકા ધરતીકંપ હુયના, આકાશ માસુન એક દેવદુત ઉતરીની તી દગડ સરકવી દીના, અન તેવર બીસના. 3તેના ટોંડ ઈજને સારકા દેખાયના, અન તેના ફડકા બરફને સારકા હતાત. 4તેલા હેરીની ચોકીદાર થર થર કરુલા લાગનાત, અન એકદમ ઝામલાયજીની જાય પડનાત. 5તાહા દેવદુત બાયકા સાહલા સાંગ કા, તુમી બીહસે નોકો! કાહાકા ઈસુ જેલા કુરુસવર ટાંગી દીયેલ હતા, તેલા ગવસતેહેસ, તી માલા માહીત આહા. 6હેરા, ઈસુ અઠ નીહી આહા, કાહાકા તેની સાંગેલ તે પરમાને દેવની તેલા જીતા ઉઠવાહા, યીની જઠ તેલા ઠેવેલ હતા તી જાગા હેરા. 7અન આતા લેગ લેગ જાયની તેને ચેલા સાહલા સાંગજા ઈસુ મરેલ માસુન જીતા ઉઠનાહા, ઈસા સાંગજા, તો તુમને પુડ ગાલીલ વિસ્તારમા જાયીલ, તઠ તુમી તેલા હેરસેલ, જા મા તુમાલા સાંગી દીનાવ.
8તે બીહનેત તરી મનમા ખુબ ખુશી હુયી મસાન માસુન નીંગીની ચેલા સાહલા સાંગુલા ધાવંદત ગયેત.
9તે બાયકા જા હતેત, તાહા વાટમા ઈસુ તેહાલા મીળના, અન તેહાલા સાંગના, “સુખી રહા!” તાહા તેહી ઈસુના પાય ધરીની તેની ભક્તિ કરનેત. 10તાહા ઈસુ તેહાલા સાંગ, બીહસે નોકો, માના ચેલા જે માના ભાવુસ સારકા આહાત તે સાહલા ગાલીલ વિસ્તારમા જાવલા સાંગા, તે માલા તઠ હેરતીલ.
યહૂદી આગેવાનસી બનાવટ
(માર્ક 16:14-18; લુક. 24:36-49; યોહ. 20:19-23; પ્રે.કૃ. 1:6-8)
11જાહા તે બાયકા ચેલા સાહલા યી ગોઠ સાંગુલા સાટી જા જ હતેત તાહા થોડાક ચોકીદાર જે મસાનની ચવકી કર હતાત તે, સાહારમા જાયની, મોઠલા યાજક લોકા સાહલા જી હુયના તી અખા સાંગી દાખવનાત. 12તાહા મોઠલા યાજકસી વડીલ લોકાસે હારી મીળી ન યોજના બનવી અન તેહી ચોકીદાર જે રાખ હતાત, તેહાલા ગોઠ દાબુલા સાટી ખુબ ચાંદીના સિક્કા દીની સાંગનાત, 13તુમાલા યી સાંગુલા પડીલ કા રાતમા જદવ આમી નીજ હતાવ, તાહા તેના ચેલા યીની ચોરી લી ગયલા. 14અન તુમી રાખુને સમયમા નીજી ગયલા યી ગોઠ રાજ્યપાલ પાસી જાયીલ, ત આમી તેલા સમજવી દેવ, અન જોખમ માસુન બચવી લેવ. 15અન સિપાયસી પયસા લી લીદાત, અન તેહાલા જી સીકવેલ તે પરમાને તેહી સાંગા, તાહા યી ગોઠ યહૂદી લોકસાહમા આજધર ચાલહ.
ઈસુ ચેલા સાહલા દરશન દેહે અન સેલા હુકુમ દેહે
(માર્ક 16:14-18; લુક. 24:36-49; યોહ. 20:19-23; પ્રે.કૃ. 1:6-8)
16પન અકરા ચેલા ગાલીલ વિસ્તારને તે ડોંગરવર ગેત, જઠ જાવલા સાટી ઈસુની તેહાલા સાંગેલ. 17તે તેલા હેરીની હાત જોડીની ભક્તિ કરનાત, પન થોડાક જના સાહલા શક હુયના કા, ઈસુ જીતા હુયી ગેહે. 18ઈસુ તેહને આગડ યીની તેહાલા સાંગના કા, માને બાની માલા અખે સરગ અન ધરતીવર સતા દીદીહી. 19તે સાટી તુમી અખે દેશમા જાયની અખે જાતિને લોકા સાહલા ચેલા બનવા, બાહાસ, પોસા, અન પવિત્ર આત્માને નાવમા તેહાલા બાપ્તિસ્મા દેતા જાયજાશ. 20મા તુમાલા જી જી આજ્ઞા દીનાહાવ તે અખે પાળુલા તેહાલા સીકવત જાયજા, હેરા, યી દુને પુરી હુયીલ તાવ સુદી કાયીમ મા તુમને હારીજ આહાવ.
Právě zvoleno:
માથ્થી 28: DHNNT
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.
