1 Korinti 8
8
Nkyang a ba hywaai na̱za na̱yaan mi ni
1Naanini zzim nyin na tazwa dinam ti ba hywaai na̱za na̱yaan mi ni. Ku yet ka̱ryong, “zi byyi bvwo,” ma taka̱i bvwo na ni na tyyi a̱yin a yayet, ma cat ba̱nyet a̱ na ba̱ nok. 2A̱yin nu a̱ hwa na̱ byyi bvwo ni, a̱ bvwo di ka̱sak ka ku myim da̱ bvwo ni ba. 3Ma a̱yin nu a̱ cat Ka̱za ni, nu a̱mi Ka̱za ka bvwo.
4To, ba̱ryat tazwa dinam ti ba hywaai na̱za na̱yaan mi ni dei, na̱za na̱yaan a̱ yet kyang i ka̱sa ka ba, ko ba̱cincong, zi bvwo Ka̱za a̱ shyi bu ka̱yring. 5Ko nkyang nzaan n shyi, ko Tazwa bu ka̱sa ka, ba̱yanyet ban yei na̱za ni, ko di na̱za nani nan shii ka̱tswa ni, 6njit dei zi bvwo Ka̱za bu ka̱yring. Nka a̱ yet A̱tyyi njit u; nka a̱ bo yya sa̱rei ka̱sa ka. Zi bu swat sabo ba̱ nka. Zi bu byyi A̱gwam ba̱yring, nu a̱ yet Yesu Kristi. Bu Yesu Ka̱za ka yin krok nkyang a bu ba̱nyet ba sa̱rei, a̱ bo za ryi a̱hwai sucet.
7Ba̱nyet ba̱yaan ba̱gingang a̱ bvwo ka̱ryong ka ni ba. Ka̱sak ka ba ka̱n myrang bu dinam ti ba wwat na̱za na̱yaan ni, ko ka̱pfun ba shyi i ya kyangya na ba na hwa di nkyang a ba wwat na̱za na̱yaan a̱mi ba ya. Ta ka̱rek tang-hywa mba nu ba shyi i yya a̱ka̱tukyya. 8Kyangya ni ba ba̱ njit shishrek bu Ka̱za ba. Ko zi kpo ya ba, zi ni wai kyang ba; ko zi ya, njit ba nin shya kyang ba.
9Ma yi ta̱rwam ka̱trak nyin ka ka bu grap ba̱nyet sang ncet ba. 10Ka̱ a̱yanyet u a̱ sang cet da̱ nyin ba̱nyet bvwo ba ni a̱ ryi yi ya nkyang a ba wwat na̱za na̱yaan ni, a ryi na̱ ma̱n nat ya na. 11Rot a̱mi a̱wumba nwan nu Yesu na̱ kwu zi hywak nu ni a̱ kpa rot bvwo nwan na. 12Ka̱ram ka yin yya a̱wumba nyin a̱ka̱tukyya i ryen ani ni, si ku byyan a bibyek a̱huhwa nu nu ni, Yesu Kristi a̱mi yi ku yya a̱ka̱tukyya nu. 13Ki kyang a n ni ya ni ni tyyi a̱kpondang nzuk ka̱grap, goma n pfwi kpo ya na ho n bu ku tyyi digrap.
Právě zvoleno:
1 Korinti 8: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.