1 Korinti 7
7
Ba̱ryat nyreng
1Kyang a n ni ya tyyei tazwa wasika ka yi jem i, ku myim ka̱ a̱yin a̱ yya nyreng ba. 2Ma rot bu dikan-a̱naan ti, ba̱ntyok a̱ bvei ba̱nyring, ba̱nyring a̱ ma̱n yreng. 3A̱ntyok u a̱ ni yya kyang a myim a̱mbyring nu nu ni, a̱mbyring u a̱ ma̱n yya kyang a myim a̱ntyok nu nu ni. A̱ wwat a̱ccu mba di ba̱yaan ka̱sak ka koyan na̱n cat i. 4A̱mbyring u a̱ byyi cet rwam nu ba, seko a̱ntyok u; a̱ntyok u meyang, na̱ ma̱n byyi cet rwam nu ba, seko a̱mbyring u. 5Yi ryok rak kwai bu ba̱yaan ba, se yi shim ni yya a̱mi i ka̱baram, i gi wrak a̱ccu nyin ka̱yat a̱duwa. Ki ka̱ram iya a̱ seyak yi ya ka̱son, ho Ka̱ta̱nyrang a̱ bu shya diwat ya nwa rot yi breng a̱ccu nyin ansham ba.
6N ya shim mi yi yya nyreng, truwang a̱mi n ya saai i ba. 7I cat nzuk a yi swat da̱ nzuk i ban bu nyreng. Ma koyan bu ka̱sak ka Ka̱za ka ku yya ni -- ba̱yanyet Ka̱za a̱ ba̱ ryi za̱nang nyreng, ba̱yanyet ka ba̱ ryi za̱nang swat kpotyok.
8Ba̱ntyok sang ba̱nyring bu ba̱nyring sang ba̱ntyok ba ryok bu cat nyreng ba; ba̱nyet ba meyang ba̱nyet nswat mba ba ka̱n kwi i ba ryok bu cat yreng ba, ba swat da̱ nzuk ni. 9Ma a̱yin nu a̱ hok na̱ ni maai ni ba ku myim na̱ ya ka̱son a̱ nyreng, di na̱ pfong a̱ka̱tuk a̱huhwa.
10Ba̱nyet ba a̱ ma̱n shyi bu nyreng i ba ryok na̱ kam ba. Ba̱ryat bani a̱ yet ba̱nyaam ba, ma ba̱nying A̱gwam Yesu a̱mi. 11A̱ra̱mbyring u a̱ ma̱n wwon a̱ntyok nu ni na̱ bo ryok cat nat nyreng hwai ba, na̱ swrang a̱mi; ka̱ ma̱n shya ryen brek ba da̱ a̱ntyok u na̱ brek. A̱ntyok na̱ ma̱ nin nyying a̱mbyring nu ba.
12Kpikpit nkyang a n dyat i nzuk a̱mi n dyat, na nyyai da̱ A̱gwam Yesu ba. A̱wumba nu a̱ byyi a̱mbyring na̱ wi tssup ma a̱ wa shim swrang nyreng a ni na̱ ryok cat ku wwok ba. 13A̱ra̱mbyring u a̱ ma̱n byyi a̱ntyok u a̱ wi tssup i ma a̱ wa shim ba swat i, na̱ ryok tyet nyreng a ba. 14Rot a̱ntyok u a̱ wi ka̱n wrak rya nu di Ka̱za ni, a̱ ni bvwo Ka̱za i ryen a̱mbyring nu na a̱ ka̱ tssup ni. A̱mi meyang a̱mbyring u a̱ wi ka̱n wrak rya nu di Ka̱za ni, a̱ nin ka̱ bvwo i ryen a̱ntyok nu na a̱ ka̱ tssup ni. Ka̱ a̱mi ba, na̱won nyin na a̱ ni yet a̱shishik di na̱won ba̱nyet wi tssup a ni; ma naani a̱mi yin dyi ba; na̱won nyin na a̱ ma̱n yet na̱nying Ka̱za. 15Ma a̱tuba nu a̱ wi yet a̱ntyok tssup u ni, ki a̱ cat wwon a̱ntyok tssup u, na̱ ya ka̱son; ba ku yet dikwwa ba swat ndung ba, rot Ka̱za a̱ za yei zi gi swat ansham bu ba̱yaan. 16Nwan a̱mbyring tssup u, a ni maai bvwo ba, shim Ka̱za a̱ cat nwan i yet ryen na a̱ntyok nwan nu na̱ nin shya sucet i. Ko nwan a̱ntyok u tssup ni, a ni yya ni n bvwo ka̱ nwan a̱mi ni yya ryen shya sucet a̱mbyring nwan na.
Yi cong ka̱cyet ka Ka̱za kan ya yei ni
17Kyang a yi ni yya ni nkpa yet: koyan a̱ ya ka̱son bu kyang a Ka̱za ka ku nang i, da̱ni da̱ yin dyi ka̱ram ka Ka̱za ka yin ku yei ni. Truwang ji n tyyei sa̱rei ba̱nyet tssup ba ni zi yemi. 18Ki ba yin tyyi a̱yin ncen, Ka̱za a̱ si wa bvwa a̱n ku yei, na̱ ryok yya koka̱ri a̱ tun tyyi ncen na a̱ jing ba. Brak, ki ba ma̱ yin wi ku tyyi ncen, na̱ ryok hywa se ba ku tyyi ncen ba. 19Di tyyi ncen di wi tyyi ncen, ku yet kyang ba. Kyang a yet i seko tssup truwang Ka̱za. 20Koyan a̱ sseng an kyang a na̱ yin shyi Ka̱za a̱ si wa bvwa a̱n ku yei ni. 21Ka̱ a̱ yin na̱ yei a yet a̱kwwa, a ryok mbyyi a̱dyying ba. Ma ki a ryi ryen na a nin ya tun wwon ni, a kwan i ya tun. 22Rot a̱yin nu A̱gwam Yesu na̱ yei na̱ shyi i dikwwa ni, Yesu a̱ ku tun i dikwwa ti rot A̱gwam Yesu a̱ ku tun a̱ wwon. A̱mi meyang, a̱yin nu a̱ yin wi yet a̱kwwa ka̱ram ka Ka̱za ka yin ku yei ni, naani a̱ yet a̱kwwa Yesu. 23Ka̱za a̱ tan ka̱tan a̱ na̱ san; rot a̱mi ryok ya tyyi dikwwa an bvak ba̱neywu ba. 24Ba̱wumbeyang, kyang a a̱yin na̱ yin yet ka̱ram ka Ka̱za ka yin ku yei ni, na̱ mon diccu ba̱ nka a̱ sseng a nkpa.
Ba̱ryat tazwa nyreng
25Nnaanini zzim nyin na tazwa ba̱nyet wi ka̱n yreng ka, n shya truwang nyyai da̱ A̱gwam Yesu ba. Ma a̱huhwa nzuk u, da̱ni da̱ a̱yin nu Ka̱za ka hok dizot nu ni, n maai ba wrak ka̱ryong i ba̱ryat nzuk ba.
26I ryi nzuk a, ka̱ a̱yin a̱ swat a̱n sang nyreng a ku ku ran, rot ka̱bvung ba̱nyying ka. 27A̱yin nu a̱ shyi bu nyreng ni na̱ ryok cat kpo kam ba. A̱yin nu a̱ sang nyreng ni na̱ ryok cat bvwa a̱mbyring ba. 28Ma ka̱ a̱ra̱ntyok a̱ bvwa a̱mbyring, ku yet a̱ka̱tuk ba; ki ka̱neyang a̱ ma̱n nyreng, ku yet a̱ka̱tuk ba. Ma ku myim n tyyei kozan a̱neyring nyin ka̱bvung ka ba̱nyet ni nyreng ba ni sswa ni, n cat ryen na n nin ya brang yi shot ka̱bvung ka ni.
29Ba̱wumbeyang, kyang a n cat yi bvwo ni nkpa yet: ka̱ram a̱ bo bvat a̱ shii ba. Rot a̱mi ba̱nyet ba̱nyring a̱ ni swat anye ba byyi ba̱nyring ba. 30Ba̱nyet ka̱nak meyang a̱ yya anye ba shyi i dimrang, ba̱nyet dimrang a̱ yya di ba̱nyet ka̱nak i. Ba̱nyet kwei nkyang a̱ yya anye ba san kyang a̱ sak ba, 31ba̱nyet ba a̱ byyi nkyang ka̱sa nani ni a̱ yya anye ba byyi kyang ba. Rot nnaani ka̱sak ka ka̱sa ka kan dyi ni, swrap ka nshyi.
32N cat yi byyi a̱duniya a̱huhwa ba. A̱tuba nu a̱ sang a̱mbyring ni a̱ tyyi ka̱ssi nu an pfong Ka̱za, rot rya nu na shyi i cat yya kyang a da̱ ni myim Ka̱za ni. 33Ma a̱yin nu a̱ shyi ba̱ a̱mbyring ni a̱ na tyyi ka̱ssi nu ka an nkyang ka̱sa nani, rot rya nu na shyi i cat yya kyang a ni myim a̱mbyring nu nu ni, 34a ryi na̱ brak a̱ tyyi a̱ntyok tyyi tswam swa an dong. Ka̱neyang a̱ na tyyi ka̱ssi nka an pfong Ka̱za, rot ka cat wrak rwam nka na bu tswa nka ji; ma a̱tuba nu a̱ yreng i a̱ na tyyi ka̱ssi nu ka a̱ nkyang ka̱sa nani, rot rya nu na shyi i cat yya kyang a ni myim a̱ntyok nu nu ni.
35N ya tyyei nkyang ani na gi ya brang. Yi ryok hwa di n cat n ya bvwo kyang a yi cat i ba, ma n cat koyan a̱ yya kyang a yet i i bu myim ni, yi gi maai wrak a̱ccu nyin sa̱rei a mpfong Ka̱za, i ryok kwak riryim ba.
36Ma da̱ni di ka̱neyang ka a̱ seyak ka̱ram nyreng i, a̱tyyi nu a̱ ryi ku myim ba, ki ryen n shyi se na̱ ka̱ wwon ka yreng, ku yet a̱ka̱tuk ba. 37Ma ki a̱yin a̱ ka̱n dop i rya nu a̱ ni wwon ka̱neyang ka yreng ba, ba di ba̱nyet mba a̱n ku tyyi ba, to, a̱ yya kyang a myim ni. 38A̱yin nu a̱ tyyi ka̱won ka̱neyang nu nyreng ni a̱ yya ansham, ma a̱yin nu a̱ wwon ka̱nu ka ka̱ryi ni a̱ yya ansham ba̱t.
39A̱ra̱mbyring u a̱ shyi ba̱ a̱ntyok nu ni a̱ byyi diwat nat nyreng a̱ntyok u na̱n shyi a̱cet ba. Ma ki a̱ntyok u a̱n srang, se na̱ yreng a̱yin nu na̱ cat i, ma dolet a̱ntyok u a̱ yet a̱ntyok tssup. 40A̱ ni hok ansham ki a̱ yreng; ma a̱ ni hok ansham ba̱gingang ki a̱ yreng ba. Ryi nzuk a yemi; n dyi anye n shyi bu Tswa Ka̱za.
Právě zvoleno:
1 Korinti 7: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.