1 Korinti 16
16
Nkyang a ba tung a̱ nin brang ba̱nyet tssup Yahudiya ni
1Nnaani ba̱nyying tazwa tung krum brang ba̱nyet tssup ba shyi Yahudiya ni, dolet yi yya kyang a n tyyei ba̱nyet tssup ka̱byen Galatiya ba yya ni. 2Kozan ka̱tuk Ladi koyan a̱ tun kyang a na̱ cat wrak a ni ba̱cicrak bu kyang a na̱ na shya ni, a̱ sak zan, rot ka̱tuk ba nzuk ka a̱ bu yet nom a yi si naat tung krum ji ni ba. 3Ka̱ram ka n nin ba ni n ni tun ba̱nyet ba yi cat i bu kpa ta̱ka̱rda shaida ba nat bu krum ji a̱ si wrak Urushalima. 4Ki ku myim n nat, se ba cong ba̱ nzuk.
Ka̱cyet ka Bulut na̱n tyyi a̱ta̱ssi nu ni
5Ka̱ram ka n bu n sin tat Makidoniya, n ni seyak n ba da̱ nyin, rot n ni hyok ka̱ yemi. 6Shim n bu bvwa ka̱ram da̱ nyin, shim n tyak dikwei ti ba̱ nyin, wwon yi gi n brang n seyak nat ka̱bvwa ka n cat nat a ni. 7Ki n ba da̱ nyin naanini, n bu brak-brak n seyak ba. Ma n cat n da̱de n shyi ba̱ nyin, ki Ka̱za a̱ bu shim.
8Ma n ni yen swrang kyi Afisa se ba tyak ba̱pfo Pentikot ba. 9Rot a̱tsatsak ryen mpfong a̱ shyi kyi, seko ba̱ka̱tuk ba̱nyet a̱n shyi ba̱gingang, ba̱nyet ba a̱ cat a̱ byyan pfong a ni.
10Ki Timoti a̱ ba da̱ nyin, yi bu ku san bu gwai, rot a̱ ma̱n yet a̱pfong Ka̱za da̱ nzuk ni. 11Yi bu ryok ku cyang-cyang ryihywat ba, seko yi ku brang na̱ ga hok ansham seyak ba da̱ njit, rot nzuk bu kpikpit ba̱nyet tssup a ku cam kyi.
12Se ba̱ryat Apollot. N ka̱n naai na̱ ba da̱ nyin bu kpikpit ba̱wumbeyang a, ma a̱ ka̱n tyyi rya ba na naani ba. Ka̱ shya ka̱ram, yi ni ryi na̱ ba.
A̱ngbom ba̱ryat
13Yi cam. Yi wrak Ka̱za ndya nyin na sseng di cet, i tun ka̱wun. 14Yi yya sa̱rei mpfong nyin na ka̱yat gwai ba̱yaan.
15Yi bvwo ba̱nyet a̱gbang Istifanat mba a̱ yet ka̱son a̱ san ba̱ryat Ka̱za i ka̱byen Akaya, a̱ bo tyyi a̱ccu mba i yya ba̱nyet tssup dikwwa. N ya naai, ba̱wumbeyang, 16yi pfong ba̱ryat taka̱i ba̱nyet ani, sa̱rei bu kpikpit ba̱nyet a mon yya pfong di cet a ba̱ mba ni.
17N hok ansham ba ba̱nyet Istifanat bu Fartunatat bu Akaikat, rot ba bu n yya kyang a da̱ nyin ba maai n yya mi ni ba. 18Ba bu tyyi rya nzuk a bu nyiin na shok bu sai rya. Ntaka̱i ba̱nyet ani mba a̱ yet ba̱nyet ba yi ni dyep ni.
19Ba̱nyet tssup ba sa̱rei i ka̱byen Asiya a̱ ya byyei. Akila bu Briska bu sa̱rei kpikpit ba̱nyet tssup a a̱ tung a̱gbang mba ka ni a̱ ya byei ba̱gingang i diyrek A̱gwam Yesu. 20Sa̱rei ba̱wumbeyang ba a̱ shyi kyi ni a̱ ya byei.
Yi ya byei da̱ a̱zizrak byet.
21Nzuk Bulut n ya jem byet ani di bvak nzuk.
22A̱yin nu a̱ rak cat A̱gwam Yesu ni, Ka̱za a̱ ni ku shyi.
Se zi hywa, “A̱gwam Yesu njit, ba!”
23Ryok Yesu a̱ hok dizot nyin!
24N cat cat nzuk a i shyi a ndya nyin sa̱rei ka̱yat Yesu Kristi. Amin.
Právě zvoleno:
1 Korinti 16: kaj
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.