Genesis 37
37
Joseph ar uniren boehako
1Jakob do Kanan disạmrege girobasokʼe ehopʼena. Ar acʼren apat hõ onḍegeye tahenkan tahẽkana.
2Noa do hoyokʼ kana Jakob gharońjrenko reakʼ kạhini. Joseph do acʼren boehako sãote bhiḍi ar meromkoe gupikan tahẽkana. Ar uniren boehako doko tahẽkana acʼren kạki eṅgat Bilhạ ar Silpạren hoponkoge. Uniyakʼ umer gel eae bochor tahẽkanre uni do acʼren noko boehakoakʼ bạṛicʼ colon reakʼ katha acʼ apate lạiyadea. 3Haṛam umerren hopone tahẽkan iạte Israel do joto hoponko khon Josephge ḍhere dulạṛede tahẽkana. Ar mitʼṭecʼ tilpạṅ talpaṅ aṅgrope benaoade tahẽkana. 4Uniren boehako tinreko bujhạukeda, akoren apat do Josephge bạ̃ṛtiye dulạṛedea mente unre onko do uni hiskạwaeko ehopʼena. Ar uni tulucʼ katha hõ mońte bako roṛetʼ tahẽkana.
5Mitʼdin Joseph do mitʼṭecʼe kukmũkeda. Ar ona katha acʼren dadattetʼtakoe lạiyatʼko khan onko do arhõ bạ̃ṛti hiskạwaeko ehopʼena. 6Joseph doe metatʼko tahẽkana, “Ańjompe, iń do mitʼṭecʼ kukmũń ńel akada. 7Ona do nonka, abo do khetre getʼakatʼ phosol reakʼ ạṭi bon toleda; menkhan hahaṛa do noage je, ińakʼ ạṭi do sojhete teṅgo akana. Ar ona tayom apeakʼ ạṭiko do ińakʼ ạṭi beṛhaete teṅgokate ińakʼ ạṭiko ḍobokʼada.”
8Unre uniren boeha do uniko metadea, “Am do cetʼ sạrigem hudiseda rajem hoyokʼa ar ale cetanre hukumem calaoa?” Uniyakʼ kukmũ ar kathate uniren dadattetʼtako do arhõ bạ̃ṛti hiskạwaeko ehopʼena.
9Noa tayom Joseph do arhõ mitʼṭecʼe kukmũkeda ar acʼren dadattetʼtakoe lạiyatʼkoa. Uni doe metatʼkoa, “Ńelpe, iń do arhõ mitʼṭecʼ kukmũń ńelakada. Ińiń ńelkeda siń cando ar ńindạ cando ar gelmitʼ ipilko do ińko ḍobokʼạń kana.”
10Ar noa kukmũ do acʼ baba ar boehako ṭhene lạiketʼ khan apattetʼ do ruhetʼkedeteye metadea, “Noa do cetʼ lekan kukmũm ńelleda?” Amren eṅgam, ar amren dadamtako ar iń do cetʼ ombakʼkate amle ḍobokʼama?” 11#Apos 7.9Niạ tayom Joseph iạte acʼren boehako do hiskạte mon perecʼentakoa, menkhan uniren apat do noako katha monreye rebetʼ dohokada, ar okoehõ bae lạiyatʼkoa.
Joseph do boehako ṭhene calakʼkan
12Tayomte Josephren boehako do akoren apattetʼren merom ar bhiḍi gupiko lạgitʼ Sikemteko calaoena. 13Unre mitʼ din Israel do Josephe metadea, “Dadamtako do Sikemre merom ar bhiḍi palko gukʼpikana. Ar ińakʼ monejoṅakʼ do noage am do onko ṭhenem calakʼa.” 14-15Israel do arhõe menkeda, “Amren dadamtako ar bhiḍi-meromko cetʼleka menakʼkoa senkate ona reakʼ khoborem ạguạńạ.” Ar noa menkate Joseph do Hebron reakʼ buru lodam khone kolkadea.
Joseph do tinre Sikemteye seṭerena unre mitʼṭen hoṛ do bilạn ṭạnḍire ạcur baṛaekan ńelkedeteye kulikedea, “Cetʼem sendra baṛakana?”
16Josephe menkeda, “Ińren boehakoń sendrayetʼkoa. Amem lại daṛekińạ onko do okareko gupikana mente?”
17Uni hoṛe menkeda, “Onko do nonḍe khonko calao akana. Menkhan roṛiń ańjomletʼkoa, ‘dela abo do Dothante bon calakʼa.’ ” Unre Joseph do acʼren boehako sendra Dothanteye calaoena ar onkoe ńamketʼkoa.
18Onko do sạṅgiń khon Josephko ńel ńamkedea ar ako ṭhen ạuriye seṭerokʼrege goje reakʼko solhawana. 19Onko do ako akoreko mepenena, “Hạni ńelepe, kukmũ gurui hijukʼ kana. 20Dela, ńitokʼge bon gojea ar mitʼṭecʼ kuńre bon khadlekaea. Ar bon mena, uni do kaṭaha janwarko jomkedea, ar ona tayom do uniyakʼ kukmũ reakʼ bon ńela cetʼ hoyokʼa mente.”
21Menkhan Ruben do noa katha ańjomkate onkoakʼ ti khon bańcaoe reakʼe kurumuṭukeda uni doe metatʼkoa, “Uni do alope gojea.” 22Uni do solhae ematʼkoa, “Mãyãm do alope joroetaea. Ar unire hat hõ alope lagaoa bickom mitʼṭecʼ kuńre bhoraokaepe.” Uni do onko ti khon Joseph bańcaoe lạgitʼ ar apattetʼ ṭhen jimạkae lạgitʼ noa kathae menkeda.
23Joseph acʼren dadattetʼtako ṭhene seṭeren khan onko do joraemoṭ uniyakʼ hoṛmo khon uniyakʼ tilpạṅ talpaṅ aṅgropko totʼketʼtaea. 24Ar ona tayom do kuńreko bhoraokadea. Ona kuń do rohoṛge tahẽkana.
Josephe ạkhriń ocokʼkan
25Ona tayom Josephren dadattetʼtako do jom-ńũiy lạgitʼko duṛupʼen khan Ismaelren bạnij-beparko Gilead khon hijukʼko ńelketʼkoa. Onko do ũṭre decʼkate jut so mosola, ran sunum ar gondhorosante Misor disạmteko calakʼkan tahẽkana. 26Unre Jihudạ do acʼren boehakoe metatʼkoa, “Aboren boeha gocʼkate uniyakʼ mãyãm bon danaṅ dohokakʼte aboakʼ do cetʼ lab hoyokʼa? 27Uni mae aboren boehakange, ar unire hõ aboakʼ jel ar mãyãmge menakʼa. Onate uni do babon joṭedea, bickom Ismaelrenko ṭhen bon ạkhriń gotʼkaea.” Rubenren boehako do uniyakʼ noa kathako ańjomketʼtaea.
28 #
Apos 7.9
Ar Midiạnren bạnij-bepariko do tinreko hecʼ sorena unre Josephren boehako do kuń khonko or rakapʼkedea ar bargel rupạ ṭakate Ismaelren bepari ṭhenko ạkhrińkedea. Onko bạnij-bepariko do Misorte Joshepko idikedea.
29-30Tayomte Ruben do ona kuń ṭhen senkate Joseph bae ńel ńamledete dukte uniyakʼ kicricʼ oṛecʼkate boehako ṭhen senkateye menkeda, “Joseph do onḍe bạnuea. Iń do ńitokʼ cetʼ iń cekaea?”
31Unre onko do mitʼṭen merom bodako gurkedea ar bodawakʼ mãyãmre Josephakʼ kicricʼko topokeda. 32Ar akoren baba ṭhen ona idikateko menkeda, “Ale do noale ńam akada. Mońjte ńelme, noa kicricʼ do amren hoponakʼ kana se baṅa.”
33Jakob do aṅgrop ńel ṭhikketʼteye menkeda, “Noa kicricʼ do ińren hoponakʼ kangea. Uni do kaṭaha janwarko jomkedea. Hẽ uni do kaṭaha janwar ṭhengeye or cirạ ocoakana.”
34Jakob do acʼakʼ kicricʼe oṛecʼketʼa ar ḍanḍare gõṛẽ kicricʼe horokʼketʼte ḍher din hạbicʼ hopontetʼ lạgitʼte homor halaṅkeda. 35Ar uniren eṭakʼ hoponko do uniyakʼ jiwi raṛejtae lạgitʼko kurumuṭukeda, menkhan cetʼtege jiwi do baṅ raṛecʼlentaea. Uni doe menkeda, “Iń do rakʼ rakʼteń gujukʼte ińren hoponiń ṭheniń calakʼa.” Nonkate Jakob do Joseph lạgitʼ ạḍiye rakʼkeda.
36Ar Midianko do Misorte Josephko idikedete Poṭiphar ṭhenko ạkhrińkedea. Poṭiphar do Pharaoren mitʼṭen maraṅ rajren kạmiyạ hoṛe tahẽkana, uni do rurukhiyạkoren sordargeye tahẽkana.
Právě zvoleno:
Genesis 37: SBT
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Santali Bible © Bangladesh Bible Society, 2021.