मत्ती 27
27
येसुत पीलातस्ज बोर्बल
(मर्कुस् १५:१; लुका २३:१-२; युहन्न १८:२८-३२)
1स्य्हो म्हुन्चेनो ङ्हच्छ्यङ् लम्बुमातेङ् म्हीमाकी एल्डर्माचे येसुत स्यीबे सजाय पीन्बरी तम् डीःज्यी। 2ओसेम् थेङ्यीमाचे येसुत खीःज्यीम् रोमी सर्कार् पीलातस्ज बोर्ज्यीम् सोप्तीपीन्ज्यी।
यहुदा स्यीबल
(प्रेरीत् १:१८-१९)
3ओसेम् येसुत स्यीबे सजाय पीन्बल थ्येःज्यीम् थेङ्त चुङ्पीन्बे यहुदात पछुतो तज्यी। ओसेम् थेचे म्हुइकी डबल् खल् गीस्यी च्यी ङ्हच्छ्यङ् लम्बुमातेङ् एल्डर्मात दोःपीन्बरी ङ्यीज्यी। 4ओसेम् थेचे थेङ्यीमात पङ्ज्यी, “तेइ दोस्एनो अरेबे म्हीत ङचे चुङ्पीन्ज्यीम् पाप् स्य्हेङ्ज्यी।” थेङ्यीमाचे थेत जोहप् पीन्ज्यी, “ङ्यीमात तेइ मतलब्, हुजुम् एइ तम् य्हीन्ब।” 5ओसेम् यहुदाचे म्हुइकी डबल्मा पर्मेस्वर्की दीम्न्हङ् ख्लाथेन्ज्यीम् य्हर्ज्यी। हुजुलीप्चे थे र्हङ्नो च्योज्यीम् स्यीज्यी।
6ओसेम् ङ्हच्छ्यङ् लम्बुमाचे हुजु म्हुइकी डबल्मा दुत्ज्यीम् पङ्ज्यी, “चु काइ टङ य्हीन्ब, चुत पर्मेस्वर्की दीम्की बर्री थेन्ब अत।” 7थेङ्यीमाचे तम् ज्योप्प बीसेम् हुजु टङचे ल्हो-ल्हो य्हुल्की स्यीबे म्हीमा बुप्परी कुमाल्की म्रङ् ग्लुज्यी। 8होत्तज्यीम् देरेसम्मनो हुजु म्रङ्त “काइ म्रङ्” पङ्ब।
9चोले यर्मीया अगम्बक्तचे, “थेङ्यीमाचे म्हुइकी डबल् खल् गीस्यी च्यी कीन्ज्यी, हुजु इस्राएल्की म्हीमाचे थेङ्की लागीरी ज्याबे सेइ मुबल। 10ओसेम् परम्प्रभुचे ङत कुल्जेत्प र्हङ्लेनो थेङ्यीमाचे हुजु टङ कुमाल्की म्रङ्की लागीरी पीन्ज्यी”#जकरीया ११:१२-१३ पङ्बे चु तम् टोप् तज्यी।
पीलातस्की ङोन्री येसु
(मर्कुस् १५:२-१५; लुका २३:३-५,१३-२५; युहन्न १८:२९-१९:१६)
11हुजुलीप्चे येसु रोमी सर्कार् पीलातस्की ङोन्री रप्जेत्ज्यी। ओसेम् रोमी सर्कार्चे थेङ्त, “ए यहुदीमाकी ग्यल्बो य्हीन्ब?” बी ङ्योत्ज्यी। येसुचे जोहप् न्हङ्ज्यी, “हुजुम् र्हङ्चेनो सुङ्जेत्ज्यी।” 12ओसेम् ङ्हच्छ्यङ् लम्बुमातेङ् अगुवामाचे थेङ्त दोस् ल्हइतीज्यी, तर थेङ्चे तेएनो असुङ्। 13हुजु लीप्चे पीलातस्चे थेङ्त, “एइ बीरुद्दरी चोत्तेले दोस् ल्हइतीटीबल एचे अथ्येउ?” बी ङ्योत्ज्यी। 14तर येसुचे तम् गीलेएनो जोहप् अन्हङ्। ओसेम् चु म्रङ्ज्यीम् रोमी सर्कार् य्हक्को तेःङेन् तज्यी।
15नीस्तार् पर्बइ बेलोरी म्हीमाचे पीत्लागो पङ्बे जेल्न्हङ् च्युप्पे म्ही गीत रोमी सर्कार्चे पीत्पे पे मुबल। 16हुजु बेलोरी य्हक्को अज्यबे लक् स्य्हेङ्बे म्ही पङ्ज्यीम् स्येःबे बारब्बा पङ्बे म्ही गी जेल्री मुबल। 17होत्तज्यीम् य्हक्को म्हीमा र्हुब् तब बीसेम् पीलातस्चे थेङ्यीमात ङ्योत्ज्यी, “एङ्यीमाचे ङचे खल्त पीत्लाखइ म्हेन्ब? बारब्बात वुइ मुक्ती न्हङ्बे ख्रीस्ट् पङ्बे येसुत?” 18तलेपङ्सम् यहुदी अगुवामाचे येसुत स्हेर्ज्यीम् सोप्तीबरी बबल य्हीन्ब पङ्बे तम् पीलातस्चे स्येःबल मुबल।
19पीलातस् न्याय स्य्हेङ्बे ठीरी टीटीबे बेलोरी थेइ म्रीङ्चे थेत चोले पङ्ज्यीम् सम्तर् पीत्ज्यी, “हुजु धर्मी म्हीत तेएनो थलो, तलेपङ्सम् थेचे लज्यीम् ङचे तील ङ्येसे म्हङ्री य्हक्को दुख यङ्बल मुब।”
20तर ङ्हच्छ्यङ् लम्बुमातेङ् एल्डर्माचे म्हीमात फुलीइतीज्यी, ओसेम् बारब्बत पीत्लाज्यीम् येसुत सेत्पुङ्ज्यी। 21पीलातस्चे थेङ्यीमात देबेएनो ङ्योत्ज्यी, “चु म्ही ङ्य्ही न्हङ्री एङ्यीमाकी लागीरी खल्त पीत्लाब?” थेङ्यीमाचे, “बारब्बत पीत्लागो!” पङ्ज्यीम् क्रीङ्ज्यी।
22पीलातस्चे थेङ्यीमात देबेएनो ङ्योत्ज्यी, “होलेपङ्सम् मुक्ती न्हङ्बे ख्रीस्ट् पङ्बे येसुत ङ ता लब?” थेङ्यीमा जम्मचे क्रीङ्ज्यीम्, “थेत क्रुस्री च्योलागो!” बी पङ्ज्यी। 23पीलातस्चे थेङ्यीमात, “तले? थेचे ता अतबे लक् स्य्हेङ्बल मुब?” बी ङ्योत्ज्यी। तर थेङ्यीमाचे झेन् बङ्ले क्रीङ्ज्यीम्, “थेत क्रुस्री च्योलागो!” बी पङ्ज्यी।
24देरेम् पीलातस्चे र्हङ्चे तेएनो स्य्हेङ् अखम्बल म्रङ्ज्यी, ओसेम् खइल-बइल तल म्हेन्ज्यीम् जम्मनो म्हीमाइ ङ्होन्सङ् र्हङ्की या ख्रुज्यीम्, “चु म्हीइ काइ दोस् ङत अटखइ एङ्यीमातनो टखइ” पङ्ज्यी। 25ओसेम् जम्मनो म्हीमाचे क्रीङ्ज्यीम्, “चु म्हीइ काकी दोस् ङ्यीमातेङ् ङ्यीमाइ कोलमातनो टखइ” बी पङ्ज्यी।
26हुजुलीप्चे पीलातस्चे थेङ्यीमाकी लागीरी बारब्बत पीत्लाज्यी। ओसेम् येसुत कोर्रचे ग्यङ्पुङ्ज्यीम् क्रुस्री च्योलबरी स्यीपाइमाकी यारी सोप्तीपीन्ज्यी।
स्यीपइमाचे येसुत ङोःबल
(मर्कुस् १५:१६-२०; युहन्न १९:२-३)
27हुजुलीप्चे पीलातस्की स्यीपइमाचे येसुत थेङ्यीमाकी ङ्हच्छ्यङ् हाकीम् मुबे दर्बार्न्हङ् बोर्ज्यी, ओसेम् जम्मनो स्यीपइमात र्हुब्ले ङ्होत्ज्यी। 28थेङ्यीमाचे येसुइ न्हम्ज प्लोक्ज्यीम् थेङ्त ग्यल्बोचे येन्ब र्हङ्बे वल येन् येन्पीन्ज्यी। 29हुजुलीप्चे पुजुइ क्रेःकी स्य्हेङ्ज्यीम् थेङ्की क्ररी कुःपीन्ज्यी। ओसेम् थेङ्की केत् फ्यारी मइ बेर्क पीन्ज्यी। ओसेम् थेङ्की ङोन्री पुइ जुःज्यीम्, “यहुदीमाकी ग्यल्बोइ छे र्हीङ्खइ” पङ्ज्यीम् ङोःज्यी। 30हुजुलीप्चे स्यीपइमाचे थेङ्त थोः साज्यी, ओसेम् थेङ्यीमाचे मइ बेर्क ब्येन्ज्यीम् थेङ्की क्ररीनो ग्यङ्ज्यी। 31थेङ्यीमाचे थेङ्त ङोःब बुत्प बीसेम् वल येन् प्लोक्ज्यीम् थेङ्त थेङ्की न्हम्जनो येन्पीन्ज्यी। हुजु लीप्चे थेङ्यीमाचे थेङ्त क्रुस्री च्योबरी बोर्ज्यी।
येसुत क्रुस्री च्योलाबल
(मर्कुस् १५:२१-३२; लुका २३:२६-४३; युहन्न १९:१७-२७)
32ग्यम्री य्हर्टीबे बेलोरी थेङ्यीमाचे कुरेनी पङ्बे ग्लाकी सीमोन् पङ्बे म्ही गीत खतु तज्यी। स्यीपइमाचे थेत कर्लेनो येसुइ क्रुस् नाबुङ्ज्यी। 33ओसेम् थेङ्यीमा गलगथ पङ्बे ग्लारी दोःज्यी। (गलगथ पङ्बलम् खप्पर्की ग्ला य्हीन्ब।) 34हुजुरी थेङ्यीमाचे येसुत कम्बे मेन् युबे अङ्गुर्की नीङ्गु थुङ्बुङ्ज्यी, तर हुजु म्य्हङ्ब बीसेम् थेङ्चे असोल्।
35हुजु लीप्चे थेङ्यीमाचे येसुत क्रुस्री खील् ठोक्ज्यीम् च्योलाज्यी। ओसेम् थेङ्यीमाचे थेङ्की न्हम्ज चीठ्ठ युःज्यीम् जुज्यी। 36हुजु लीप्चे थेङ्यीमा थेङ्त रुङ्ज्यीम् टीज्यी। 37थेङ्की क्रइ जोरी थेङ्की बीरुद्दरी “चु येसु, यहुदीमाकी ग्यल्बो य्हीन्ब” बी दोस् ङोन्बे तम् ब्रीज्यीम् थेन्ज्यी। 38येसुत क्रुस्री च्योबे बेलोरी थेङ्यीमाचे य्होमाएनो ङ्य्हीत थेङ्की केत्तेङ् ल्होम्पट्टीचे काकर् च्योलाज्यी।
39हुजु ग्यम्से तोर्-मोर् ब्रबे म्हीमाचे र्हङ्-र्हङ्की क्र य्होङ्ज्यीम् थेङ्त ङोःज्यी। 40ओसेम् पङ्ज्यी, “पर्मेस्वर्की दीम् स्हीलाज्यीम् सोम्रेत्री स्य्हेङ्ब पङ्बे म्ही ए अय्हीनो स्यीम्? ए पर्मेस्वर्की ज य्हीन्सम् र्हङ्चे र्हङ्तनो थर्नलज्यीम् क्रुस् ग्यम्से दुङ्री फप्युउ!”
41होलेनो ङ्हच्छ्यङ् लम्बुमातेङ् धर्म लोप्पोन्मा ओसेम् एल्डर्माचेएनो थेङ्त ङोःज्यी। 42ओसेम् पङ्ज्यी, “चु म्हीचे ल्हो-ल्होतमी थर्नलज्यी, तर र्हङ्तमी थर्नलअखम्। थे इस्राएलीमाकी ग्यल्बो य्हीन्सम् क्रुस् ग्यम्से दुङ्री फप्युखइ, ओसेम् ङ्य्हङ्माचे थेत बीस्वास् स्य्हेङ्स्ये मुब। 43चुजे पर्मेस्वर्री भरोसा थेन्ब, होत्तज्यीम् पर्मेस्वर्की थुः मुसम् पर्मेस्वर्चेनो थेत थर्न लखइ। तलेपङ्सम् थेचे, ‘ङ पर्मेस्वर्की ज य्हीन्ब’ बी पङ्ब मुबल।”
44होलेनो थेङ्तेङ् बक्च्य क्रुस्री च्योलाबे य्होमाचेएनो थेङ्त ङोःज्यी।
येसुचे बुः पीत्जेत्पल
(मर्कुस् १५:३३-४१; लुका २३:४४-४९; युहन्न १९:२८-३०)
45दीन्गुङ् य्हङ्से प्रोः बेलोक्योर् सम्म य्हुल्की जम्मनो ग्लामारी म्हुन्दुङ् तज्यी। 46ओसेम् तीन् बजेक्योर् येसुचे ङ्हच्छ्यङ् केत् तेत्जेत्ज्यीम् सुङ्ज्यी, “इलोइ, इलोइ लामा सबखथनी#२७:४६ इलोइ, इलोइ लामा सबखथनी- येसुचे चु छीःमा अरामीक ग्योत्री सुङ्ज्यी।?”#भजन्सङ्ग्रह २२:१ चुइ अर्थ, “ओ ङइ पर्मेस्वर्, ओ ङइ पर्मेस्वर्, थेङ्चे ङत तले ख्लाजेत्पल?” य्हीन्ब। 47हुजुरी रप्टीबलमा न्हङ्री डेत्-डेत्चे चु थ्येःज्यीम्, “चु म्हीचेम् अगम्बक्त एलीयात ङ्होत्टीप” बी पङ्ज्यी।
48थेङ्यीमान्हङ्री गी ग्योन्नो छ्योङ्य्हर्ज्यीम् अङ्गुर्की क्युङ्बे नीङ्गुरी येन्खेन् ब्लुम्ज्यी, ओसेम् मइ बेर्करी येइज्यीम् येसुचे ङ्हप्खइ बी थेङ्की स्य्हल्री थेन्पीन्ज्यी। 49तर ल्हो-ल्होमाचे, “ब्रेनो-ब्रेनो, एलीया खज्यीम् थेत थर्न लमुवा च्यागे!” बी पङ्ज्यी। 50हुजुलीप्चे देबेएनो येसुचे तीख्यप् केत् ङ्हच्छ्यङ् तेत्जेत्ज्यीम् क्रीङ्जेत्ज्यी, ओसेम् र्हङ्की बुः पीत्जेत्ज्यी।
51हुजु बेलोरीनो पर्मेस्वर्की दीम्न्हङ् च्योबे र्हीङ्बे येन्#२७:५१ पर्मेस्वर्की दीम्न्हङ् च्योबे र्हीङ्बे येन्- चु येन् पबीत्र ग्लातेङ् गोदोब्न्हङ्की पबीत्र ग्लाकी गुङ्री च्योबल मुबल (प्रस्थान् २६:३१-३३)। हुजु गोदोब्न्हङ्की पबीत्र ग्लारी बर्सइल तीख्यप् गोदोब्न्हङ्की ङ्हच्छ्यङ् लम्बु वङ्ब मुबल। चु येन् पर्मेस्वर्चे गोदोब्न्हङ्की पबीत्र ग्लारी गोदोब्न्हङ्की ङ्हच्छ्यङ् लम्बुकीनो अय्हीन् तर जम्मनो म्हीमा ङ्यीब खम्ब बी ङोन्बरी डेःबल य्हीन्ब। जोय्हङ्से दुङ् सम्मनो ङ्य्हीले डेःय्हर्ज्यी, ओसेम् सङ्गुल् य्हर्ज्यीम् ङ्हच्छ्यङ्-ङ्हच्छ्यङ् युङ्बमा थीज्यी। 52ओसेम् दुर्समा ठोङ्य्हर्ज्यी, ओसेम् पर्मेस्वर्की स्यीज्यीन्बे य्हक्को म्हीमाकी ल्हीःमा सोम्बो तज्यीम् रेःज्यी। 53येसु पुनरुत्थान् तब बीसेम् थेङ्यीमा दुर्सचे डोङ्ज्यीम् पबीत्र सहर् यरुस्लेम्री ङ्यीज्यी, ओसेम् थेङ्यीमा य्हक्को म्हीमाज म्रङ्खज्यी।
54येसुत रुङ्ज्यीम् टीबे कप्तान्तेङ् स्यीपइमाचे हुजुरी सङ्गुल् य्हर्बलतेङ् तबे जम्मनो तम्म म्रङ्ब बीसेम् य्हक्को लोङ्ज्यी। ओसेम् थेङ्यीमाचे पङ्ज्यी, “देमेन्नो चु म्ही पर्मेस्वर्की ज य्हीन्ब टीम्!”
55हुजुरी य्हक्को अमकोलमाएनो चेक्पजाकी थारीङ् रप्ज्यीम् च्याटीब मुबल। थेङ्यीमाचे गालील्#२७:५५ गालील्- येसुचे प्रचार् स्य्हेङ्ब तीप्पे ग्ला गालील् प्रदेस् य्हीन्ब। य्हङ्सेनो थेङ्की लीप्-लीप् खज्यीम् थेङ्त र्हो स्य्हेङ्बल मुबल। 56थेङ्यीमान्हङ्री मरीयम् मग्दलीनी, ओसेम् याकुब्तेङ् योसेफ्की अम मरीयम्, ओसेम् जब्दीयाकी ज ङ्य्हीकी अम मुबल।
येसुइ ल्हीःत दुर्सरी थेन्बल
(मर्कुस् १५:४२-४७; लुका २३:५०-५६; युहन्न १९:३८-४२)
57ङ्येसे तब बीसेम् अरीमाथीया पङ्बे ग्लाकी योसेफ् पङ्बे बरु म्ही खज्यी, थेएनो येसुइ डब मुबल। 58थेचे पीलातस्ज ङ्यीज्यीम् येसुइ स्यीबे ल्हीः र्हीत्ज्यी। ओसेम् पीलातस्चे थेत थेङ्की ल्हीः बोर्पुङ्ज्यी। 59योसेफ्चे येसुइ स्यीबे ल्हीः बोर्ज्यीम् छार् सुतीइ येन्चे तुन्ज्यी, 60ओसेम् थेचे र्हङकी लागीरी युङ्बरी ठाज्यीम् स्य्हेङ्बे छार् दुर्सरी येसुइ स्यीबे ल्हीःत थेन्ज्यी। ओसेम् दुर्सइ म्रप्री ङ्हच्छ्यङ् युङ्बचे दुङ्थेन्ज्यीम् थे य्हर्ज्यी। 61मरीयम् मग्दलीनीतेङ् गीब मरीयम्मी दुर्सइ ङोन्ग्यम्नो टीटीब मुबल।
स्यीपइमाचे दुर्स रुङ्बल
62न्हम्स्य्होर्हङ्, दुःब न्हबे दीन्री ङ्हच्छ्यङ् लम्बुमातेङ् फरीसीमा पीलातस्ज ङ्यीज्यी। 63थेङ्यीमाचे पीलातस्त पङ्ज्यी, “सर्कार्, ङ्यीमाचे म्लेत्पल अरे, हुजु भ्यु पङ्बे म्हीचे थे सोम्बो मुबे बेलोरी ‘ङ स्यीज्यीम् सोम्रेत्कुनो सोस्ये मुब’ पङ्बल मुबल। 64होत्तज्यीम् सोम्रेत् सम्म हुजु दुर्स ज्यनले रुङ्पुङ्जेतो। अय्हीन् पङ्सम् थेइ डबमा खज्यीम् थेइ ल्हीः य्हो लज्यीम् बोर्ल, ओसेम् ‘थेङ् स्यीब ग्यम्से सोबल मुब’ बी म्हीमात पङ्ल। ओसेम् हुजु लीक्यम्की भ्युमी ङोन्ग्यम्ल बीमएनो य्हक्को अज्यबल तस्ये मुब।” 65पीलातस्चे थेङ्यीमात पङ्ज्यी, “एङ्यीमाचे र्हङ्की स्यीपइमा बोर्ज्यीम् एङ्यीमाचे गदे खम्ज्यी होदेनो ज्यनले रुङ्पुङो।” 66ओसेम् थेङ्यीमा य्हर्ज्यीम् दुर्सइ म्रप्री दुङ्बे युङ्बरी छाप्#२७:६६ छाप्- थेङ्यीमाचे युङ्बत छो:तचे खीज्यीम् हुजु युङ्बरी हीलो युज्यीम् रोमी छाप् ठोक्प मुबल, ओसेम् खल्चे पङ्लेनो छुसम् था यङ्ब मुबल। ठोक्ज्यी, ओसेम् स्यीपइमात दुर्स रुङ्पुङ्ज्यी।
Právě zvoleno:
मत्ती 27: WTDG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 by Mother Tongue Translators Society, Nepal Bible Society
and Wycliffe Bible Translators, Inc.
