मत्ती 21
21
यरुस्लेम्री येसुत स्य्हेस स्य्हेङ्बल
(मर्कुस् ११:१-११; लुका १९:२८-४०; युहन्न १२:१२-१९)
1येसुतेङ् डबमा यरुस्लेम्की रेइकी जैतुन् पङ्बे गङ्तोर्की बेथ्फागे पङ्बे ग्लारी दोखजेत्ज्यी। ओसेम् थेङ्चे डब ङ्हीत 2चोले सुङ्ज्यीम् पीत्जेत्ज्यी, “एङ्य्ही क्योम्सङ्की नम्सरी ङ्यीउ। ओसेम् एङ्य्ही हुजु नम्सरी दोःब साच्चेनो एङ्य्हीचे य्हरु बुङ्गु गी थेइ अमतेङ् चुङ्थेन्बल यङ्स्ये मुब। हुजुमात पीत्ज्यीम् ङइज बोउ। 3खल्चे पङ्लेनो एङ्य्हीत, ‘एङ्य्हीचे ता स्य्हेङ्टीबल?’ पङ्ज्यी पङ्सम्, ‘प्रभुत चुमा तोःबल मुब’ पङो। ओसेम् थेचे ग्योन्-ग्योन्नो हुजुमात पीत्खस्ये मुब।”
4अगम्बक्तमा ग्यम्से पङ्बे तम् टोप् तखइ पङ्ज्यीम् चु तबल य्हीन्ब-
5“यरुस्लेम्की म्हीमात स्येत्पीनो,
‘च्याको, एङ्यीमाकी ग्यल्बो एङ्यीमाज ब्योन्खटीब मुब,
थेङ् नम्र तज्यीम् बुङ्गुरी क्रेत्ज्यीम् ब्योन्खटीब मुब,
थेङ् बुङ्गुकी कोलइ जोरी क्रेत्ज्यीम् ब्योन्खटीब मुब।’#जकरीया ९:९”
6ओसेम् डब ङ्य्ही य्हर्ज्यीम् येसुचे कुल्जेत्प र्हङ्लेनो स्य्हेङ्ज्यी। 7थेङ्य्हीचे बुङ्गुतेङ् बुङ्गुइ कोलत बज्यी, ओसेम् हुजुमाकी गोरी थेङ्यीमाइ ग्यामा तीत्पीन्ज्यी। ओसेम् येसु हुजुइ जोरी क्रेत्जेत्ज्यी। 8ओसेम् य्हक्को-य्हक्को म्हीमाचे र्हङ्-र्हङ्की ग्यामा ग्यम्री तीत्पीन्ज्यी#२१:८ ग्यामा ग्यम्री तीत्पीन्ज्यी- यहुदीमाचे ङ्हच्छ्यङ् म्हीत स्वागत् स्य्हेङ्बरी चोले स्य्हेङ्ब मुबल। , ल्हो-ल्हो डेत्-डेत्चेम् दोङ्बोइ य्हर्ङमा थाज्यीम् ग्यम्री तीत्पीन्ज्यी। 9येसुइ लीप्तेङ् ङोन्चे ब्रबे य्हक्को म्हीमाचे चोले पङ्ज्यीम् क्रीङ्ज्यी, “दाउद्की जत तोप्प तखइ! परम्प्रभुइ छेन्री ब्योन्खजेत्पे म्ही मोलम् यङ्बे म्ही य्हीन्ब! स्वर्गरी स्य्हुःबे पर्मेस्वर्त तोप्प तखइ!”#भजन्सङ्ग्रह ११८:२५-२६
10थेङ् यरुस्लेम् सहर्री वङ्जेत्प बीसेम् सहर्की जम्मनो म्हीमा तङ्ज्यीम्, “चु म्ही खल?” बी ङ्योत्ज्यी। 11य्हक्को म्हीमाचे जोहप् पीन्ज्यी, “थेङ् गालील्की नासरत् ग्यम्से खबे अगम्बक्त येसु य्हीन्ब।”
येसु पर्मेस्वर्की दीम्री
(मर्कुस् ११:१५-१९; लुका १९:४५-४८; युहन्न २:१३-२२)
12ओसेम् येसु पर्मेस्वर्की दीम्री स्येःजेत्ज्यीम् हुजुरी चुङ्टीबतेङ् ग्लुटीबलमा जम्मत ल्हब्लाजेत्ज्यी। थेङ्चे टङ देब्टीबलमाकी#२१:१२ टङ देब्टीबलमा- हुजु बेलोरी ठा पीन्बरी पर्मेस्वर्की दीम्री खबलमाचे पर्मेस्वर्की दीम्न्हङ् टङ कोल्बरी देप्प मुबल, तलेपङ्सम् हुजु देप्पे टङचेकीनो ठा पीन्बरी सेम्ज्येन्मा ग्लु म्यङ्ब मुबल। टेबल्मातेङ् परेवा चुङ्टीबलमाकी टीबे ग्लामा दोःलाज्यी। 13ओसेम् थेङ्चे थेङ्यीमात सुङ्ज्यी, “धर्म छ्येःरी चोले ब्रीबल मुब, ‘ङइ दीम् प्रार्थना स्य्हेङ्बे दीम् तस्ये मुब।’#यसैया ५६:७; यर्मीया ७:११ तर एङ्यीमाचे य्होमा लाबे ग्ला स्य्हेङ्बल मुब!”
14हुजु लीप्चे कनमातेङ् खोरमा थेङ्ज पर्मेस्वर्की दीम्री खज्यी। ओसेम् थेङ्चे थेङ्यीमात फेन्नलजेत्ज्यी। 15तर ङ्हच्छ्यङ् लम्बुमातेङ् धर्म लोप्पोन्माचे थेङ्चे स्य्हेङ्जेत्पे तेःङेन्की लक् म्रङ्ज्यी, ओसेम् कोलमाचे पर्मेस्वर्की दीम्री, “दाउद्की जत तोप्प तखइ” बी क्रीङ्टीबल थ्येःज्यीम् थेङ्यीमात बोमो खज्यी। 16होत्तज्यीम् थेङ्यीमाचे येसुत ङ्योत्ज्यी, “कोलमाचे ता पङ्टीब एचे थ्येःब?” ओसेम् येसुचे सुङ्ज्यी, “अ, थ्येःटीब। एङ्यीमाचे धर्म छ्येःरी खेत्पल अरे, ‘थेङ्चे कोलमातेङ् ङ्य्हे थुङ्बे कोलमातेएनो थेङ्त तोप्प लोप्जेत्ज्यी?’#भजन्सङ्ग्रह ८:२” 17हुजु लीप्चे थेङ्यीमात ख्लेथेन्ज्यीम् थेङ् हुजु सहर् ग्यम्से बेथानीयारी स्येःज्यीम् हुजुरी र्येजेत्ज्यी।
रोरो अरोःबे नेभाराइ दोङ्बो
(मर्कुस् ११:१२-१४,२०-२४)
18न्हम्स्योर्हङ् स्य्हो म्हुन्चेनो येसु सहर्री दोःखजेत्टीबे बेलोरी ख्रेन्जेत्ज्यी। 19ओसेम् थेङ्चे ग्यम् रेइरी नेभारइ दोङ्बो गी म्रङ्जेत्ज्यी। हुजु दोङ्बोरी रोरो मुज्यीवा बी रेइरी स्येःजेत्ज्यी, तर थेङ्चे दोङ्बोइ बाकीनो यङ्जेत्ज्यी। ओसेम् थेङ्चे हुजु दोङ्बोत, “देरे य्हङ्से एचे खेमेएनो रोरो अरोःखइ!” बी सुङ्जेत्ज्यी। होले सुङ्ब साच्चेनो हुजु दोङ्बो ङ्य्हुल्य्हर्ज्यी।
20चु म्रङब बीसेम् डबमाचे तेःङेन् तज्यीम् पङ्ज्यी, “चोदे ग्योनले चु नेभारइ दोङ्बो खले ङ्य्हुल्य्हर्ज्यी?” 21ओसेम् येसुचे थेङ्यीमात सुङ्ज्यी, “ङ एङ्यीमात देमेन्नो पङ्ब, एङ्यीमाचे सङ्क अलनले बीस्वास् लज्यी पङ्सम् नेभारइ दोङ्बोत ङचे ता स्य्हेङ्ज्यी होदेकीनो अय्हीन् तर एङ्यीमाचे चु गङ्त, ‘र्हङ्नो ओर्ज्यीम् समुन्द्ररी तइङ्यीउ’ पङ्लेनो होलेनो तस्ये मुब। 22एङ्यीमाचे बीस्वास् लज्यी पङ्सम् प्रार्थनारी ता र्हीत्ज्यी हुजु एङ्यीमाचे यङ्स्ये मुब।”
येसुइ अधीकार्की बारेरी ङ्योत्पल
(मर्कुस् ११:२७-३३; लुका २०:१-८)
23येसु पर्मेस्वर्की दीम्री वङ्जेत्ज्यीम् लोप्जेत्टीबे बेलोरी ङ्हच्छ्यङ् लम्बुमातेङ् एल्डर्मा थेङ्ज खज्यी। ओसेम् थेङ्यीमाचे थेङ्त ङ्योत्ज्यी, “एचे खजु अधीकार् ग्यम्चे चु लक्मा स्य्हेङ्टीब? एत चु अधीकार् खल्चे पीन्ज्यी?” 24येसुचे थेङ्यीमात जोहप् न्हङ्ज्यी, “ङएनो एङ्यीमात तम् गी ङ्योत्प, हुजुइ जोहप् पीन्ज्यी पङ्सम् ङचे खजु अधीकार् ग्यम्से चु लक्मा स्य्हेङ्ब बी एङ्यीमात स्येत्स्ये मुब। 25युहन्नचे बप्तीस्मा पीन्बे अधीकार् खन ग्यम्से यङ्ज्यी? पर्मेस्वर् ग्यम्से वुइ म्ही ग्यम्से?” चु थ्येःज्यीम् थेङ्यीमान्हङ्री गीचे गीत चोले तम् पङ्ज्यी, “पर्मेस्वर् ग्यम्से पङ्गे पङ्स्यीम् थेचे ङ्य्हङ्मात ‘एङ्यीमाचे युहन्नत तले बीस्वास् अलबल?’ बी पङ्स्ये मुब। 26तर म्हीमा ग्यम्से पङ्गे पङ्स्यीम्, म्हीमा ङ्य्हङ्माइ बीरुद्दरी रेःल बी लोङ्ब, तलेपङ्सम् जम्मनो म्हीमाचे युहन्नत अगम्बक्त य्हीन्ब बी बीस्वास् लब मुबल।”
27होत्तज्यीम् थेङ्यीमाचे येसुत, “ङ्यीमाचे स्येःबल अरे” बी जोहप् पीन्ज्यी। ओसेम् येसुचे थेङ्यीमात सुङ्ज्यी, “होलेपङ्सम् ङएनो एङ्यीमात खजु अधीकार् ग्यम्चे ङचे चु लक्मा स्य्हेङ्ब अस्येत्।
ज ङ्य्हीकी अर्त
28 “एङ्यीमाचे ता म्हेन्ब? म्ही गील ज ङ्य्ही मुबल। थे ज ग्रेन्ज ङ्यीज्यीम् पङ्ज्यी, ‘ज, ए तीङ्यी अङ्गुर्की म्रङ्री ङ्यीज्यीम् लक् स्य्हेङो ओ।’ 29जचे, ‘ङ अङ्य्ही’ बी जोहप् पीन्ज्यी। तर लीक्क्यम् थेइ सेम् पोज्यीम् लक्री ङ्यीज्यी। 30हुजु लीप्चे अप ज च्यङ्बज ङ्यीज्यीम् होलेनो पङ्ज्यी। ज च्यङ्बचे, ‘तब, ङ ङ्यील’ बी पङ्ज्यी, तर थे लक्री अङ्यी। 31देरे हुजु ज ङ्य्ही न्हङ्री खल्चे अपचे कुल्बल ङ्येन्ज्यी?” ओसेम् थेङ्यीमाचे, “ज ग्रेन्चे” बी जोहप् पीन्ज्यी। हुजु लीप्चे येसुचे थेङ्यीमात सुङज्यी, “ङ एङ्यीमात देमेन्नो पङ्ब, तीरो दुत्पलमातेङ् बेस्य स्य्हेङ्बलमा एङ्यीमा बीमम् ङोन्ग्यम् पर्मेस्वर्की य्हुल्री वङ्स्ये मुब। 32तलेपङ्सम् बप्तीस्मा पीन्बे युहन्न एङ्यीमाज देमेन्की ग्यम् ङोन्बे लागीरी खज्यी, ओसेम् एङ्यीमाचे थेत बीस्वास् अल, तर तीरो दुत्पलमातेङ् बेस्यमाचे थेत बीस्वास् लज्यी। एङ्यीमाचे हुजु तम्म म्रङ्ज्यीम्एनो र्हङ्की पाप् ग्यम्से पस्चताप् अस्य्हेङ्, ओसेम् थेत बीस्वास् अस्य्हेङ्।”
अङ्गुर्की म्रङ् पीमा स्य्हेङ्बे म्हीमा
(मर्कुस् १२:१-१२; लुका २०:९-१९)
33येसुचे सुङ्ज्यी, “ल्हो-ल्हो अर्त ङ्येनो, म्ही गी म्रङ्की न्याबो मुबल। थेचे म्रङ्री अङ्गुर् सुःज्यीम् कोरोरोले कउरु रीःज्यी। अङ्गुर् मेर्बरी कोल् स्य्हेङ्ज्यी। ओसेम् अङ्गुर्की म्रङ् रुङ्बरी नोबे ब्रङ् गी स्य्हेङ्ज्यी। हुजु लीप्चे अङ्गुर्की म्रङ् पीमा स्य्हेङ्बे म्हीमात पीन्थेन्ज्यीम् थे ल्हो-ल्हो य्हुल्री य्हर्ज्यी। 34अङ्गुर् मीन्बे बेलो तब बीसेम् न्याबोचे थेइ बो कीन्बरी योक्पोमात अङ्गुर् पीमा स्य्हेङ्बे म्हीमाज पीत्ज्यी। 35तर पीमा स्य्हेङ्बे म्हीमाचे थेइ योक्पोमात चुङ्ज्यीम् गीत तोज्यी, ल्हो-ल्हो गीत सेत्ज्यी, ओसेम् ल्हो-ल्हो गीत युङ्बचे प्रुङ्ज्यी। 36हुजु लीप्चे देबेएनो न्याबोचे ङोन्ग्यम् बीमाएनो य्हक्को योक्पोमात पीत्ज्यी, तर पीमा स्य्हेङ्बे म्हीमाचे हुजुमातेएनो ङोन्ग्यम्लमात र्हङ्लेनो स्य्हेङ्ज्यी।”
37 “ज्युःरी म्रङ्की न्याबोचे ‘ङइ जतमी थेङ्यीमाचे देमेन्नो स्य्हेस स्य्हेङ्ल’ बी म्हेन्ज्यीम् र्हङ्की जतनो पीमा स्य्हेङ्बे म्हीमाज पीत्ज्यी। 38तर पीमा स्य्हेङ्बे म्हीमाचे न्याबोइ जत म्रङ्ब बीसेम् थेमान्हङ् गीचे गीत पङ्ज्यी, ‘क्युजुम् न्याबोइ ज य्हीन्ब, लो थेत सेत्लागे, ओसेम् थेइ सम्पत्ती ङ्य्हङ्माल तस्ये मुब।’ 39होत्तज्यीम् थेङ्यीमाचे न्याबोइ जत चुङ्ज्यीम् अङ्गुर्की म्रङ्चे फीर्च्योर् बोर्ज्यीम् सेत्लाज्यी।”
40येसुचे, “देरेम् म्रङ्की न्याबो खब बीसेम् हुजु अङ्गुर्की म्रङ् पीमा स्य्हेङ्बे म्हीमात ता लल?” बी ङ्योत्जेत्ज्यी। 41थेङ्यीमाचे जोहप् पीन्ज्यी, “थेचे अङ्गुर्की म्रङ् पीमा स्य्हेङ्बे हुजु अज्यबे म्हीमात सेत्लास्ये मुब। ओसेम् अन्न दुत्पे बेलोरी थेइ बो पीन्बे ल्हो-ल्हो म्हीमात पीमारी पीन्स्ये मुब।” 42येसुचे थेङ्यीमात सुङज्यी, “एङ्यीमाचे धर्म छ्येःरी ब्रीबे चु तम् खेमेएनो खेत्पल अरे?
‘कर्मीमाचे लक् अत पङ्ज्यीम् ख्लाबे
युङ्ब स्हुर् युङ्ब तखज्यी,
परम्प्रभुचेनो चु स्य्हेङ्जेत्पल य्हीन्ब,
ओसेम् चु ङ्य्हङ्माइ लागीरी तेःङेन् य्हीन्ब।’ #
भजन्सङ्ग्रह ११८:२२-२३
43 “होत्तज्यीम् ङ एङ्यीमात पङ्ब पर्मेस्वर्की य्हुल् एङ्यीमा ग्यम्से ब्येन्स्ये मुब, ओसेम् हुजुइ रोरो रोःन लबे ल्हो-ल्हो जाती गीत पीन्स्ये मुब। 44हुजु युङ्बइ जोरी तइबलमा छर्छुर्ले थीस्ये मुब, ओसेम् हुजु युङ्ब खल खलइ जोरी तइज्यी हुजुमाएनो छ्यक्-छ्यीक् तस्ये मुब।”
45येसुचे सुङ्बे चु अर्तमा ङ्हच्छ्यङ् लम्बुमातेङ् फरीसीमाचे थ्येःब बीसेम् थेङ्यीमाकी बारेरीनो सुङ्बल य्हीन्ब बी थेङ्यीमाचे गोज्यी। 46होत्तज्यीम् थेङ्यीमाचे थेङ्त चुङ्ब म्हइज्यी, तर थेङ्यीमा लोङ्ज्यी, तलेपङ्सम् म्हीमाचे थेङ्त अगम्बक्त य्हीन्ब बी म्हन्दीब मुबल।
Právě zvoleno:
मत्ती 21: WTDG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 by Mother Tongue Translators Society, Nepal Bible Society
and Wycliffe Bible Translators, Inc.
