मत्ती 19
19
स्यीङ्ग थाब अत बी लोप्पल
(मर्कुस् १०:१-१२)
1येसुचे चु तम् सुङ्जेत्प बीसेम् थेङ् गालील् पीत्थेन्ज्यीम् यर्दन् ग्येन्दीइ क्योम्सङ् यहुदीया प्रदेस्क्योर् स्येःजेत्ज्यी। 2य्हक्को-य्हक्को म्हीमा थेङ्की लीप्चे खज्यी, ओसेम् थेङ्चे हुजुरी य्हक्को म्हीमात फेन्न लजेत्ज्यी।
3ओसेम् डेत्-डेत् फरीसीमा थेङ्ज खज्यीम् थेङ्त फसइतीब म्हेन्ज्यीम् थेङ्त ङ्योत्ज्यी, “खल्चे पङ्लेनो तइ तम्री पङ्लेनो अथुन्ज्यीम् थेइ म्रीङ्तेङ् स्यीङ्ग थाब नीयम् अनुसार् तब वुइ अत?” 4येसुचे जोहप् न्हङ्ज्यीम् सुङ्ज्यी, “एङ्यीमाचे धर्म छ्येःरी खेत्पल अरे? जम्मनो स्य्हेङ्जेत्पे पर्मेस्वर्चे ङोन्ग्यम् अपकोलतेङ् अमकोल स्य्हेङ्जेत्ज्यी।#ठुङ्ब १:२७ 5ओसेम् थेङ्चे सुङ्ज्यी, ‘होत्तज्यीम् म्हीचे र्हङ्की अप-अमत पीत्थेन्ज्यीम् र्हङ्की म्रीङ्तेङ् डीःज्यीम् टीब, ओसेम् थेङ्य्ही ल्हीः गी र्हङ्ब तब।’#ठुङ्ब २:२४ 6होत्तज्यीम् देरेम् थेङ्यीमा ङ्य्ही अय्हीन् तर गी य्हीन्ब। ओसेम् पर्मेस्वर्चे गी स्य्हेङ्बलमात म्हीचे फेःब अत।”
7ओसेम् फरीसीमाचे थेङ्त ङ्योत्ज्यी, “होलेपङ्सम् मोसाचे तले स्यीङ्ग थाबे स्यो-स्यो ब्रीज्यीम् म्रीङ्त ख्लाब खम्ब बी पङ्बल?” 8येसुचे थेङ्यीमात जोहब् न्हङ्ज्यी, “मोसाचे एङ्यीमाकी कोङ्बे सेम्चे लज्यीम् स्यीङ्ग थापुङ्बल य्हीन्ब। तर अपकोलतेङ् अमकोलत स्य्हेङ्बे बेलो य्हङ्सेमी होतेब अरेबल। 9तर ङ एङ्यीमात पङ्ब, खल्चे जम्म थोइ बेस्य स्य्हेङ्ब बीम ल्हो-ल्हो तम्री र्हङ्की म्रीङ्त स्यीङ्ग थाज्यीम् ल्हो-ल्होतेङ् भ्या स्य्हेङ्ब हुजुचे ब्यभीचार् स्य्हेङ्ब।”
10ओसेम् थेङ्की डबमाचे, “म्रीङ् र्हेम्बोइ गुङ्री होतेब तसम् भ्या अस्य्हेङ्बनो ज्यब तब” बी पङ्ज्यी। 11येसुचे थेङ्यीमात जोहब् न्हङ्ज्यी, “चु तम् जम्मचेनो स्वीकार् स्य्हेङ्अखम्, तर पर्मेस्वर्चे न्हङ्जेत्पलमाचेकीनो स्य्हेङ्ब खम्ब। 12तलेपङ्सम् डेत्-डेत्मी न्हब य्हङ्सेनो नपुङ्सक् तब, डेत्-डेत्तमी म्हीमाचे नपुङ्सक् स्य्हेङ्ब, ओसेम् डेत्-डेत्चेमी स्वर्गइ य्हुल्की लागीरी भ्या अस्य्हेङ्। खल्चे चु स्य्हेङ्ब खम्ब हुजुचे स्य्हेङ्खइ।”
येसुतेङ् ज्यीद कोलमा
(मर्कुस् १०:१३-१६; लुका १८:१५-१७)
13हुजु लीप्चे येसुचे ज्यीद कोलमाकी जोरी फ्या थेन्जेत्ज्यीम् प्रार्थना स्य्हेङ्पीन्जेत्खइ बी डेत्-डेत् म्हीमाचे र्हङ्की कोलमात थेङ्ज बज्यी। तर थेङ्की डबमाचे म्हीमात बराज्यी। 14तर येसुचे, “कोलमात ङइज खबुङो, थेङ्यीमात थर्होदो। तलेपङ्सम् स्वर्गइ य्हुल् चु कोलमा र्हङ्बमाकी लागीरी य्हीन्ब” बी सुङ्ज्यी।
15ओसेम् थेङ्चे कोलमाइ जोरी फ्या थेन्जेत्ज्यीम् मोलम् न्हङ्ज्यी। ओसेम् थेङ् हुजु ग्लासे स्येःजेत्ज्यी।
बरु म्ही
(मर्कुस् १०:१७-३१; लुका १८:१८-३०)
16ओसेम् म्ही गी येसुइज खज्यीम्, “लोप्पोन्, ङचे खेमेएनो अबेबे जीवन् यङ्बरी ज्यबे लक् ता स्य्हेङ्थोब?” बी ङ्योत्ज्यी।
17येसुचे जोहब् न्हङ्ज्यी, “एचे ङत ज्यब ता बी तले ङ्योत्पल? ज्यबमी गीकीनो मुब। एचे खेमेनो अबेबे जीवन् यङ्खइ म्हेन्सम् पर्मेस्वर्चे कुल्जेत्पे अर्तीमा ङ्येनो।”
18हुजु म्हीचे थेङ्त, “खजु अर्तीमा?” बी ङ्योत्ज्यी।
येसुचे सुङ्ज्यी, “एचे थसेतो, ब्यभीचार् थस्य्हेङो, य्हो थालोउ, र्होइ बारेरी भ्यु तम् थपङो, 19एचे र्हङ्की अप-अमत स्य्हेस स्य्हेङो ओसेम् र्हङ्की खीम्चेत र्हङ्त र्हङ्लेनो म्होइगो।”
20हुजु ठीटचे पङ्ज्यी, “हुजु अर्तीमाम् ङचे ङ्येन्बलनो मुब। देरेम् ङचे स्य्हेङ्थोस्येल ल्हो-ल्हो ता मुब?”#प्रस्थान् २०:१२-१६; ब्यबस्था ५:१६-२०; लेबी १९:१८
21येसुचे थेत सुङ्ज्यी, “ए देमेन्नो पर्मेस्वर्की ङ्होन्सङ् ज्यब तइ म्हेन्सम् ङ्यीज्यीम् एतेङ् मुबे जम्मनो स्हेःमा चुङ्ज्यीम् प्रङ्नमात पीनो, ओसेम् एचे स्वर्गरी सम्पत्तीमा यङ्स्ये मुब। हुजु लीप्चे खज्यीम् ङइ लीक्यम् ब्रउ।”
22चु तम् थ्येःब बीसेम् हुजु ठीट लीः म्लङ् लज्यीम् य्हर्ज्यी। तलेपङ्सम् थे य्हक्को बरु मुबल।
23हुजु लीप्चे येसुचे र्हङ्की डबमात सुङ्ज्यी, “ङ एङ्यीमात देमेन्नो पङ्ब, बरु म्ही स्वर्गइ य्हुल्री वङ्बरी य्हक्को अदेबल मुब। 24ङ एङ्यीमात देबेएनो पङ्ब, बरु म्ही पर्मेस्वर्की य्हुल्री वङ्ब बीमम् दब्की मीःचे ऊँट वङ्ब देब।” 25चु थ्येःब बीसेम् डबमाचे तेःङेन् तज्यीम् ङ्योत्ज्यी, “होलेपङ्सम् खल्चे मुक्ती यङ्ब खम्ब?” 26येसुचे थेङ्यीमात स्हीःज्यीम्, “म्हीमाकी लागीरी चु अखम्बे तम् य्हीन्ब, तर पर्मेस्वर्की लागीरी अखम्बे तम् तेएनो अरे” बी सुङ्ज्यी।
27हुजु लीप्चे पत्रुस्चे पङ्ज्यी, “स्हीःगो, ङ्यीमाचेम् जम्मनो स्हेःमा ख्लेथेन्ज्यीम् थेङ्की लीप्चे ब्रबल मुब। ङ्यीमाचे ता यङ्स्ये मुब?” 28येसुचे थेङ्यीमात सुङ्ज्यी, “ङ एङ्यीमात देमेन्नो पङ्ब, म्हीइ ज खस्येकी छार् बेलोरी थे र्हङ्की महीमाकी ठीरी टीस्ये मुब। एङ्यीमा खल-खल ङइ लीप्चे ब्रबल मुब एङ्यीमाएनो चुङ्ङ्य्ही ठीरी टीस्ये मुब, ओसेम् इस्राएल्की चुङ्ङ्य्ही खलक्माकी जोरी सासन् स्य्हेङ्स्ये मुब। 29ओसेम् ङइ लागीरी दीम्, अज्यो-अले, अन-अङ, अप-अम, ज-जमे, म्रङ्मा पीत्थेन्बलमा जम्मचेनो हुजु बीमएनो सय गुन य्हक्को ओसेम् खेमेएनो अबेबे जीवन्एनो यङ्स्ये मुब। 30तर य्हक्को म्हीमा देरे ङोन्ग्यम् मुबलमा लीप्चे तस्ये मुब, ओसेम् य्हक्को म्हीमा देरे लीप्चे तबलमा ङोन्चे तस्ये मुब।”
Právě zvoleno:
मत्ती 19: WTDG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 by Mother Tongue Translators Society, Nepal Bible Society
and Wycliffe Bible Translators, Inc.
